?Yu Yu ‘Rijman Long Fes Blong God’?

WAN long ol parabol blong Jisas Kraes we i mekem man i tingting, hemia parabol blong wan rijman we i gat graon blong hem. Blong gat wan fiuja we i gud, rijman ya i mekem plan blong wokem sam narafala haos bakegen we i bigwan moa. Be long parabol ya blong Jisas, God i talem long man ya se, “Yu yu no gat hed.” (Luk 12:​16-21) Sam narafala Baebol oli yusum tok ya “krangke.” ?From wanem ol tok we God i talem long man ya i strong tumas?

I klia nomo se rijman ya i no tingbaot God nating long ol plan blong hem; mo hem i no givim ona nating i go long God we hem nao i mekem garen i karem fulap kakae. (Matiu 5:45) Be, hem i tok flas i se: “!Man! !Mi mi wan laki man! Naoia mi gat plante samting we mi save yusum long plante yia. I stat naoia, mi save spel, mi save kakae, mi save dring, we mi gat hapi taem olwe nomo.” Yes, man ya i ting se ol sas samting blong hem we hem i wokhad from i olsem “bigfala stonwol we i goraon long taon i blokemgud hem.”​—Ol Proveb 18:11.

Disaepol Jemes i raetem wan woning agens long tingting ya we i flas i se: “Sam long yufala oli save talem se, ‘Tede no tumora bambae mifala i go long wan narafala taon. Nao long ples ya, bambae mifala i stap wan ful yia, bambae mifala i mekem wok blong kasem plante mane.’ Yufala i lesin long mi. Yufala i no save nating wanem bambae i save kamtru long laef blong yufala tumora. Yufala i olsem smok blong hil nomo. Smok ya i save kamtru we i stap smoltaem nomo, nao biaen i lus bakegen.”​—Jemes 4:​13, 14.

Ol tok ya i tru nomo, God i talem long rijman ya long parabol blong Jisas se: “Yu yu no gat hed, long naet ya nomo bambae mi tekemaot laef blong yu. ?Nao hu man bambae i tekem ol samting ya we yu yu hivimap rere i stap?” Yes, olsem smok we i stap smoltaem nomo, rijman ya bambae i ded kwik nomo, nao bambae i no luk ol plan ya blong hem oli kamtru. ?Yu yu luksave wanem lesen i stap long stori ya? Jisas i talem se: “Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.” ?Yu yu ‘rijman long fes blong God’?