“Yufala i Mas Lukaot Gud”​—!Aoa Blong Jajmen i Kam Finis!

Ol save long stadi ya oli stap long buklet ya Keep on the Watch! we i kamaot long ol distrik asembli we ol Witnes blong Jeova oli mekem raon long wol stat long 2004 i go kasem 2005.

“Yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem.”​—MATIU 24:42.

1, 2. ?Jisas i talem se taem we bambae hem i kamtru i olsem wanem?

 ?BAMBAE yu mekem wanem sipos yu harem se stilman i stil long plante haos finis klosap long ples blong yu? Ating bambae yu lukaot gud mo meksua oltaem se famle blong yu mo olting blong yu oli stap sef. Tru ya, yu mas mekem olsem from we neva stilman i sanem leta blong talem se bambae hem i kam. Stilman i kam long fasin haed mo long taem we yumi no save.

² Long ol defdefren taem, Jisas i bin yusum fasin ya blong stilman olsem wan pijatok. (Luk 10:30; Jon 10:10) Hem i tokbaot sam samting we bambae oli hapen long taem blong en, hemia bifo we hem i kam blong jajem wol. Nao hem i givim woning ya se: “Yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem. Mo yufala i mas save se sipos man i save wanem taem long naet man blong stil bambae i kam long haos blong hem blong i stil, bambae hem i no save slip. Bambae hem i stap gad long haos blong hem, blong man ya i no save brekem haos blong hem blong i stil.” (Matiu 24:​42, 43) Jisas i talem se taem hem i kamtru, bambae i olsem taem we wan stilman i kam mo man i no save.

3, 4. (a) ?Yumi mas mekem wanem blong lesin long woning we Jisas i givim long saed blong taem we bambae hem i kam? (b) ?Wanem ol kwestin we yumi save tingbaot?

³ Pijatok ya i stret nomo from we i no gat man i save stret taem we Jisas bambae i kam blong jajem wol. Smoltaem bifo we Jisas i talem pijatok ya, hem i talem se: “Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matiu 24:36) Taswe Jisas i givim advaes ya long ol man we oli lesin long hem se: “Oltaem yufala i mas rere.” (Matiu 24:44) Ol man we oli lesin long woning ya blong Jisas oli stap rere, mo oli mekem ol fasin we i stret, nomata wanem taem we hem i kamtru olsem Jaj we Jeova i makemaot.

⁴ From samting ya, i gat sam impoten kwestin we yumi save tingbaot: ?Woning blong Jisas hem i blong ol man blong wol nomo, no ol trufala Kristin tu oli mas “lukaot gud”? ?From wanem i impoten tumas blong lukaot gud oltaem, mo olsem wanem yumi save “lukaot gud”?

?Woning Ya i Go Long Hu?

5. ?Olsem wanem yumi save se woning ya se “yufala i mas lukaot gud” hem i go long ol trufala Kristin?

⁵ Long ol man blong wol we oli no wantem harem woning se trabol i stap kam, i tru se Masta bambae i kam olsem stilman. (2 Pita 3:​3-7) ?Be olsem wanem long ol trufala Kristin? ?Olgeta tu bambae oli sek long dei ya? Aposol Pol i raet i go long ol Kristin i se: “Yufala i save gud finis we dei blong Jeova i stap kam, stret olsem man blong stil i kam long naet.” (1 Tesalonaeka 5:​2, NW ) Yes yumi sua se “dei blong Jeova i stap kam.” ?Be from we yumi save, hemia i min se yumi no nidim tumas blong stap lukaot gud? I gud yumi tingbaot tok ya we Jisas i talem long ol disaepol blong hem. Hem i se: “Bambae mi kamtru long taem we yufala i no tingbaot.” (Matiu 24:44) Smoltaem bifo long hemia, Jisas i stap givim advaes long ol disaepol blong hem  se oli mas lukaot Kingdom oltaem, nao hem i givim advaes ya se: “Oltaem yufala i mas rere, from we mi, mi Pikinini blong Man, bambae mi kamtru long taem we yufala i no tingbaot.” (Luk 12:​31, 40) I klia se Jisas i stap tingbaot ol man blong hem taem hem i givim woning ya se: “Yufala i mas lukaot gud.”

6. ?From wanem yumi mas “lukaot gud” oltaem?

⁶ ?From wanem yumi mas “lukaot gud” mo ‘stap rere’ oltaem? Jisas i eksplenem se: “Long taem ya, bambae tu man i stap wok long garen, be bambae mi tekemaot wan, wan i stap. Bambae tu woman i stap wanples blong wokem kakae, be bambae mi tekemaot wan, wan i stap.” (Matiu 24:​40, 41) Ol man we oli rere, bambae God i ‘tekem’ olgeta, i min se bambae hem i sevem olgeta, taem hem i spolem rabis wol ya. Ol narawan we oli “stap,” bambae oli go lus olgeta from we oli bin ronem ol samting blong laef we olgeta nomo oli wantem. Maet sam long olgeta ya oli man we oli gat save be oli no gohed blong lukaot gud.

7. ?From we yumi no save wetaem en bambae i kam, samting ya i givim janis long yumi blong mekem wanem?

⁷ From we yumi no save stret taem we rabis wol ya bambae i lus, samting ya i givim janis long yumi blong soemaot stret tingting we i stap pusum yumi blong mekem wok blong God. ?From wanem yumi save talem olsem? From we maet i luk olsem se en i stap tektaem tumas. Sore tumas, sam Kristin we oli gat tingting ya, oli lusum strong tingting we oli bin gat long wok blong Jeova. Be, taem yumi bin givim laef blong yumi long Jeova, yumi rere mo yumi glad nomo blong yusum ful laef blong yumi long wok blong hem. Ol man we oli save Jeova, oli luksave tu se bambae hem i no save glad long bigbigfala wok we maet man i mekem long las minit jes bifo we en i kam. Jeova i luk wanem i stap long hat blong man.​—1 Samuel 16:7.

8. ?Olsem wanem lav we yumi gat long Jeova i pulum yumi blong lukaot gud?

⁸ From we yumi rili lavem Jeova, yumi glad blong mekem ol samting we hem i askem yumi blong mekem. (Ol Sam 40:8; Matiu 26:39) Yumi wantem wosipim Jeova gogo i no save finis. Mo nating sipos yumi mas wet lelebet, hemia i no spolem nambawan janis ya blong mekem wok blong Jeova blong olwe. Antap long hemia, yumi stap lukaot gud from we yumi wantem tumas blong luk dei ya blong Jeova we bambae i mekem stamba tingting blong Hem i kamtru. Strong tingting we yumi gat blong mekem God i glad, i pusum yumi blong folem ol advaes we hem i givim long Baebol mo putum Kingdom blong hem fasples long laef blong yumi. (Matiu 6:33; 1 Jon 5:3) Naoia i gud yumi tokbaot olsem wanem fasin blong lukaot gud i sud gat paoa long ol desisen blong yumi mo fasin blong laef blong yumi evri dei.

?Fasin Blong Laef Blong Yu i Stap Lidim Yu Yu Go Wea?

9. ?From wanem i impoten tumas we ol man blong wol ya oli wekap mo luksave mining blong taem we yumi stap long hem naoia?

⁹ Plante man tede oli luk se i gat plante trabol mo nogud samting i stap hapen long wol evri dei, mo maet oli no glad tu long laef blong olgeta. ?Be oli rili save from wanem i olsem? ?Oli luksave se yumi stap naoia long taem we “rabis fasin blong wol ya i kasem en blong hem”? (Matiu 24:​3, NW ) ?Oli luksave se fasin we man i tingbaot hem wan nomo, i raf, mo olkaen narafala nogud fasin ya we oli no kamaot long God oli olsem saen blong “ol las dei”? (2 Timoti 3:​1-5, NW ) I impoten tumas we oli wekap naoia blong luksave mining blong ol samting ya. Mo i impoten tumas we oli rili tingtinggud, se fasin blong laef we oli jusum bambae i lidim olgeta i go wea.

10. ?Yumi mas mekem wanem blong meksua se yumi stap lukaot gud oltaem?

¹⁰ ?Olsem wanem long yumi? Evri dei yumi gat ol desisen blong tekem long saed blong wok, helt, famle, mo wosip. Yumi save wanem we Baebol i talem, mo yumi traehad blong folem. Taswe, i gud yumi askem long yumi wan se: ‘?Mi mi letem ol wari blong laef oli pulum mi mi gowe long stret rod? ?Mi mi letem ol waes blong wol, ol tingting blong hem, oli gat paoa long ol samting we mi mi jusum?’ (Luk 21:​34-36; Kolosi 2:8) Yumi mas gohed blong soemaot se yumi trastem Jeova wetem fulhat blong yumi mo yumi no stap dipen long prapa save blong yumi. (Ol Proveb 3:5) Long rod ya, bambae yumi save “kasem laef ya we i prapa wan,” hemia laef we i no save finis long niufala wol blong God.​—1 Timoti 6:​12, 19.

11-13. ?Yumi save lanem wanem long stori blong (a) taem blong Noa? (b) taem blong Lot?

¹¹ Long Baebol i gat plante stori we oli olsem woning  long yumi. Ol stori ya oli save halpem yumi blong lukaot gud. Tingbaot wanem i hapen long taem blong Noa. Longtaem finis, God i bin talemaot woning long ol man. Be Noa wetem famle blong hem nomo oli obei, ol narafala man oli no wantem save. (2 Pita 2:5) Long saed ya Jisas i talem se: “Long taem ya we mi, mi Pikinini blong Man mi kamtru, bambae i olsem taem blong Noa bifo, we ol man oli no rere. Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no [“wantem,” NW ] save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong Man mi kamtru, bambae i sem mak nomo.” (Matiu 24:​37-39) ?Yumi lanem wanem long ol tok ya? Yumi lanem se sipos yumi stap letem ol samting blong wol, mo maet ol samting blong laef nomo, oli stap tekem ples blong ol wok we God i stap askem yumi blong putum fasples, ale nao, yumi mas tingtinggud se fasin blong laef olsem bambae i lidim yumi i go wea.​—Rom 14:17.

¹² Tingbaot taem blong Lot tu. Taon ya Sodom, we Lot mo famle blong hem oli stap long hem, i gat plante gudgudfala samting long saed blong bodi. Be fasin blong ol man long taon ya i rabis olgeta. Jeova i sanem ol enjel blong hem i go blong spolem taon ya. Ol enjel ya oli strong long Lot mo famle blong hem se oli mas ronwe i goaot long Sodom mo oli no mas lukluk i kambak long taon ya. Ol enjel ya oli pulum olgeta oli go aot long taon ya. Be woman blong Lot i laekem tumas hom blong hem long Sodom. Ale, hem i no obei, i lukluk i gobak biaen, mo from samting ya hem i lusum laef blong hem. (Jenesis 19:​15-26) Jisas i givim woning long yumi long saed blong fiuja blong yumi, taem hem i talem se: “Yufala i mas tingbaot woman blong Lot.” ?Yumi stap wok folem woning ya?​—Luk 17:32.

¹³ Olgeta we oli lesin long ol woning blong God oli sef. Hemia nao wanem we Noa mo famle blong hem, mo Lot wetem tufala gel blong hem, oli mekem. (2 Pita 2:9) Taem yumi tinghevi long woning we i kamaot long ol stori ya, yumi harem gud tu from we ol stori ya oli soemaot se God i sevem ol man we oli laekem stret fasin. Long hat blong yumi, yumi save sua fulwan se promes blong God bambae i kamtru se bambae i gat “niufala skae mo niufala wol, we stret fasin nomo bambae i stap long hem.”​—2 Pita 3:13.

!‘Aoa i Kam Finis Blong Jajem Ol Man’!

14, 15. (a) ?“Aoa” blong jajmen i minim taem blong wanem samting? (b) ?Olsem wanem man i soemaot we hem i ‘onagud long God mo i leftemap nem blong hem’?

¹⁴ ?Taem yumi stap lukaot gud, yumi stap wet long wanem? Buk blong Revelesen i givim save long ol wanwan samting we bambae oli hapen sloslo i go kasem taem we stamba tingting blong God bambae i kamtru fulwan. Sipos yumi wantem rere from taem ya, i impoten tumas blong tekem aksen folem wanem we buk ya i talem. Profet tok ya i tokbaot klia ol samting we bambae oli hapen long ‘dei blong Masta,’ we i stat long 1914, taem Jisas i kam king long heven. (Revelesen 1:10) Revelesen i tokbaot wan enjel we i gat wok blong “talemaot gud nius ya we i blong stap oltaem nomo, gogo i no save finis.” Hem i stap singaot bigwan i se: “Yufala i mas ona gud long God, mo yufala i mas leftemap nem blong hem, from we taem [“aoa,” NW ] i kam finis blong hem i jajem olgeta man.” (Revelesen 14:​6, 7) “Aoa” ya blong jajmen, hem i wan sotfala taem. Hem i wan taem we tok long saed blong jajmen i mas goaot, mo i taem tu we jajmen long profet tok ya i mas kamtru. Yumi stap naoia long taem ya.

¹⁵ Long taem blong yumi, jes bifo we aoa blong jajmen i finis, yumi kasem advaes blong ‘ona gud long God mo leftemap nem blong hem.’ ?Hemia i  minim wanem? Man we i onagud long God, hem i fraet blong mekem samting we i nogud long fes blong Hem. (Ol Proveb 8:13) Sipos yumi ona long God, bambae yumi lesin long hem from we yumi gat bigfala respek long hem. Bambae yumi neva talem se yumi bisi tumas nao yumi no save ridim Baebol evri dei. Bambae yumi no ting nating long tok blong hem we i se yumi mas go long olgeta Kristin miting. (Hibrus 10:​24, 25) Bambae yumi tingbaot wok blong talemaot gud nius blong Kingdom blong God olsem wan sas samting, mo bambae yumi mekem wok ya olsem we faea i laet insaed long yumi. Bambae yumi trastem Jeova oltaem nomo mo wetem fulhat blong yumi. (Ol Sam 62:8) Yumi agri se Jeova hem i Haefala Rula blong heven mo wol, taswe yumi ona long hem taem yumi rere blong letem laef blong yumi long han blong hem blong hem i rulum yumi. ?Yu yu rili onagud long God mo leftemap nem blong hem long olgeta samting ya we yumi jes tokbaot?

16. ?From wanem yumi save talem se jajmen agensem Bigfala Babilon, we Revelesen 14:8 i tokbaot, i kamtru finis?

¹⁶ Revelesen japta 14 i gohed blong tokbaot ol defdefren samting we oli mas hapen long aoa blong jajmen. Fastaem hem i tokbaot Bigfala Babilon, we i minim olgeta giaman skul long wol, i se: “Seken enjel ya i stap singaot bigwan, i talem se, ‘Taon ya Babilon, we i hae we i hae, hem i foldaon finis, we i foldaon olgeta.’ ” (Revelesen 14:8) Yes, long lukluk blong God, Bigfala Babilon ya i foldaon finis. Long 1919, ol man blong Jeova we tabu spirit i makemaot olgeta, oli kam fri, oli no moa kalabus long ol giaman tijing mo kastom blong Babilon we i holem ol man oli stap long tudak blong plante taosen yia finis. (Revelesen 17:​1, 15) Nao ol tabu Kristin ya oli save yusum ful laef blong olgeta blong leftemap trufala wosip. Stat long taem ya, wok blong talemaot gud nius blong Kingdom blong God i stap gohed raon long wol.​—Matiu 24:14.

17. ?Man i mas mekem wanem blong kamaot long Bigfala Babilon?

¹⁷ Be jajmen blong God agensem Bigfala Babilon i no finis yet. I no longtaem bambae hem i lus olgeta. (Revelesen 18:21) Taswe i stret nomo we tok ya i stap long Baebol mo i go long ol man long evri ples se: “Yufala i kamaot long hem [Bigfala Babilon]. I nogud yufala i stap joen wetem hem long ol sin ya we hem i stap mekem.” (Revelesen 18:​4, 5) ?Olsem wanem blong kamaot long Bigfala Babilon? I tru, hemia i min se yumi no moa memba blong wan giaman skul. Be i no hemia nomo. Babilon i stamba blong plante bigfala lafet mo kastom we man i mekem tede, mo i stamba tu blong fasin blong wol we i agri nomo long ol rabis fasin long saed blong seks, mo Babilon i leftemap ol sinema mo pleplei we oli joen wetem wok blong rabis spirit, mo plante narafala samting bakegen. Blong lukaot gud, i impoten we yumi soemaot klia long ol fasin blong yumi mo long ol samting we hat blong yumi i laekem, se yumi rili seraot fulwan long Bigfala Babilon.

18. ?Folem tok we i stap long Revelesen 14:​9, 10, ol Kristin we oli lukaot gud oli no save mekem wanem?

¹⁸ Revelesen 14:​9, 10 i tokbaot wan narafala samting we bambae i hapen long ‘aoa blong jajmen.’ Wan narafala enjel i singaot bigwan i se: ‘Ol man we oli bodaon blong mekem wosip long anamol ya wetem pija blong hem, mo we oli gat mak blong anamol ya long fored blong olgeta no long han blong olgeta, bambae oli mas dring waen ya we hem i pija blong kros blong God.’ ?From wanem? ‘Anamol ya wetem pija blong hem’ i minim rul blong ol man we oli no wantem save long hae rul blong Jeova. Ol Kristin we oli lukaot gud bambae oli no save gat mak blong anamol ya, oli no save letem wan samting i pulum olgeta,  long tingting no fasin, blong mekem wok blong olgeta ya we oli no wantem save long haefala rul blong trufala God, Jeova. Ol Kristin oli save se Kingdom blong God i stanap finis long heven, mo i no longtaem bambae hem i finisim rul blong ol man, mo hem wan nomo bambae i rul blong olwe.​—Daniel 2:44.

!No Fogetem Se Taem Naoia i Impoten Tumas!

19, 20. (a) ?Moa we yumi kam klosap long en blong ol las dei, moa we Setan bambae i traem mekem wanem? (b) ?Yumi mas mekem tingting blong yumi i strong blong mekem wanem?

¹⁹ Moa we yumi kam klosap long en blong ol las dei, moa we bambae ol trabol mo traem oli kam strong. Oltaem we yumi laef long olfala wol ya mo yumi no stretgud olgeta, bambae yumi stap harem nogud from ol trabol olsem sik, kam olfala, ded blong ol fren mo famle, narafala i mekem yumi harem nogud, bambae tingting blong yumi i foldaon from we ol man oli no wantem lesin taem yumi traehad blong talemaot Tok blong God long olgeta, mo plante narafala samting olsem. No fogetem se Setan i wantem we i wantem tumas blong yusum olkaen hadtaem ya we yumi kasem, blong pulum yumi blong kam slak, nao yumi stop blong talemaot gud nius, no maet yumi brekem ol stret rul blong God. (Efesas 6:​11-13) !I no taem naoia blong fogetem se yumi laef long wan taem we i impoten tumas!

²⁰ Jisas i save se plante samting bambae oli kam mekem tingting blong yumi i hevi gogo yumi wantem lego evri samting, taswe hem i talem se: “Yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem.” (Matiu 24:42) Yes, i gud yumi stap lukaot gud mo tingbaot se wanem taem ya we yumi laef long hem. I gud yumi rere oltaem blong luksave ol trap blong Setan we oli save mekem yumi kam slak no yumi lego Jeova. I gud tu sipos yumi mekem tingting blong yumi i strong blong talemaot gud nius blong Kingdom blong God olsem we faea i laet insaed long yumi. Yes, i gud yumi traehad long evri rod blong no fogetem se taem blong yumi i impoten tumas, mo yumi lesin long woning blong Jisas se: “Yufala i mas lukaot gud.” Taem yumi mekem olsem, yumi leftemap nem blong Jeova, mo yumi stap long rod ya blong kasem ol nambawan blesing ya long fiuja.

?Bambae Yu Ansa Olsem Wanem?

• ?Woning blong Jisas se yumi mas “lukaot gud”, olsem wanem yumi save se i go long ol trufala Kristin?

• ?Wanem ol stori long Baebol we oli olsem woning blong halpem yumi blong “lukaot gud”?

• ?Wanem ya aoa blong jajmen? ?Mo i gud yumi mekem wanem bifo we hem i finis?

[Kwestin]

[Tok blong pija long pej 23]

Jisas i talem se bambae hem i kam olsem stilman

[Tok blong pija long pej 24]

Klosap nao bambae Bigfala Babilon i lus fulwan

[Tok blong pija long pej 25]

I gud yumi mekem tingting blong yumi i strong moa blong prij