!Haremgud Long Beswan Edukesen We Yu Save Kasem!

BAEBOL i tokbaot Jeova God olsem Man ya we i Wokem olgeta samting mo ol man tu. (Jenesis 1:27; Revelesen 4:11) Jeova we i olsem Bigfala Tija i tijim tufala faswan man mo woman, Adam mo Iv, mo i rerem tufala blong laef long naesfala garen ya long Iden. Stamba tingting blong hem, hemia blong gohed blong tijim tufala mo blong kea long tufala blong olwe. (Jenesis 1:​28, 29; 2:​15-17; Aesea 30:​20, 21) !Traem tingbaot nambawan janis ya we tufala i gat!

Sore tumas, be faswan man mo woman ya oli sakemaot gudfala laef ya. From we tufala i no moa obei long Jeova, tufala i statem fasin ya we olgeta man oli no moa folem ol gudfala fasin, oli stap kam olfala mo oli ded. (Jenesis 3:​17-19; Rom 5:12) Baebol i tokbaot olgeta we oli bin laef sam yia afta we Jeova i wokem faswan man mo woman i se: “Jeova i luk we rabis fasin blong man i fulap long wol, mo oltaem hat blong olgeta i stap tingbaot blong mekem ol rabis fasin nomo.”​—Jenesis 6:​5, NW.

Klosap 4,500 yia i pas nao we Jeova i talemaot se hat blong man i stap tingbaot blong mekem rabis fasin nomo, mo naoia i kam mowas i bitim bifo. Plante man oli no sem nating blong giaman, stil mo blong kilim narafala man. Ol trabol oli stap kam antap evri dei be fasin blong kea long narafala i stap lus. Yes fasin joengud wetem ol fren mo insaed long famle, i stap long trabol. Be man i no mas ting se God nao i stamba blong ol trabol ya no talem se God i no wantem save long ol trabol blong man. Oltaem Jeova i intres long ol man, mo hem i rere blong tijim olgeta we oli lukluk i go long hem blong i halpem olgeta blong gat wan hapi laef. Samwe long 2,000 yia bifo, Jeova i sanem Pikinini blong hem, Jisas Kraes, i kam long wol. Tru long Jisas, Jeova i soemaot se hem i intres blong tijim ol man we oli wantem gat wan gudfala laef. Jisas i soem eksampol long fasin blong tij we i stretgud olgeta from we God hem wan, we i Bigfala Tija, i bin tijim hem blong plante bilian yia.

Trufala Kristin Skul​—Wan Edukesen

Jisas Kraes i stanemap trufala Kristin skul olsem wan fasin blong laef we i stanap long lav. Insaed long trufala Kristin skul, ol tok mo ol wok blong yumi oli mas laenap wetem ol samting we God i wantem, blong givim ona long nem blong Hem. (Matiu 22:​37-39; Hibrus 10:7) Jeova we i Papa blong Jisas, Hem nao i biaen long ol tijing blong Jisas long saed blong fasin blong laef ya. Jon 8:29 i tokbaot olsem wanem God i halpem Jisas long saed ya i se: “Hem i sanem mi mi kam, mo hem i stap wetem mi. Hem i no lego mi mi stap mi wan, from we oltaem, mi stap mekem ol samting we hem i wantem.” Yes, Papa blong Jisas i sapotem Jisas mo i lidim hem long ol wok blong hem. Ol faswan disaepol blong Jisas oli no naf blong winim ol hadtaem blong laef sipos i no gat wan we i givhan long olgeta. Jeova i tijim olgeta tru long Pikinini blong hem. Taem oli obei long ol tijing blong Jisas mo oli folem eksampol blong hem, samting ya i mekem olgeta oli kam ol gudfala man. Hemia i sem mak long ol disaepol blong hem tede.​—Lukluk bokis “Paoa Blong Jisas Mo Ol Tijing Blong Hem,” long pej 6.

Wan samting we i makemaot trufala Kristin skul long ol narafala skul hemia se edukesen, no tijing, blong hem i gat paoa long tingting mo hat blong man, ale i save jenisim fasin blong man ya. (Efesas 4:​23, 24) Eksampol, traem tingbaot wanem we Jisas i tijim long saed blong fasin ya we man i stap tru long hasban no waef blong hem i se: “Yufala i harem finis we ol tija oli talem bifo se,  ‘Yufala we i mared, bambae yufala i no mas go slip wetem narafala woman.’ Be mi mi talem long yufala, se man we i luk wan woman, nao i wantem hem tumas, i olsem we hem i slip wetem woman ya finis.” (Matiu 5:​27, 28) Folem ol tok ya, Jisas i stap tijim ol disaepol blong hem se hat i mas stap klin oltaem mo se ol tingting mo ol filing we oli no klin, nating se man i no tekem aksin yet, be oli save mekem wan bigfala trabol i kamaot. Tru ya, ol tingting we oli nogud oli save lidim man blong mekem sam samting we i mekem God i kros mo i spolem narafala man tu.

Taswe Baebol i givim advaes ya se: “Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rom 12:2) Maet yu askem se, ‘?I tru se edukesen, no tijing, i save mekem tingting blong mi i kam niuwan olgeta?’ Mekem tingting i kam niuwan bakegen i minim se man i letem ol rul mo ol tijing we oli kamaot long Tok blong God oli pulum hem blong jenisim rod blong hem nao i folem stret rod. Man i save gat tingting olsem taem hem i akseptem edukesen, no tijing, we God i givim tru long Tok blong Hem.

Edukesen We i Pulum Yumi Blong Jenis

“Tok blong God i wan samting we i laef, mo [“paoa blong hem,” NW ] i stap wok.” (Hibrus 4:12) Tok blong God i stap gat paoa yet long laef blong man mo hemia i soemaot se ol tok blong hem oli stret yet tede. Hem i save pulum man blong i lego rod we hem i bin folem, nao i joen long trufala Kristin skul mo i kam wan gudfala man. Ol eksampol we oli kam biaen oli soem olsem wanem edukesen, no tijing, blong Baebol i impoten.

Emilia we yumi tokbaot fastaem finis i talem se: “Mi no save stretem ol rong long famle blong mi sipos mi stap traehad mi wan nomo. Taem mi stat blong stadi Baebol wetem ol Witnes blong Jeova, mi luksave se i gat hop mo mi stat blong jenisim ol fasin blong mi. Mi lanem blong gat longfala tingting mo blong no holem kros. Sloslo, hasban blong mi tu i joen wetem mi blong stadi. I no isi long hem blong lego dring, be, biaen hem i lego fasin ya. Samting ya i mekem mared blong mitufala i haremgud. Naoia mitufala i gat wan hapi laef olsem Kristin man mo mitufala i tijim ol pikinini blong mitufala long ol gudfala rul blong Baebol.”​—Dutronome 6:7.

Tijing, no edukesen, we i kamaot long trufala Kristin skul i save mekem man i fri long ol rabis fasin blong laef. Manuel * i luksave samting ya. Taem hem i gat 13 yia, hem i ronwe long haos mo i stat blong tekem drag ya mariuana. Afta, hem i tekem wan narafala strong drag we oli kolem heroin. Blong kasem wan ples blong slip mo mane, hem i mekem seks wetem ol man mo ol woman. Samtaem, Manuel i stilim mane blong ol man, blong  hem i save pem samting we hem i nidim. Klosap oltaem, ol drag nao oli stap bos long tingting blong hem. Raf fasin blong hem i mekem se hem i go long kalabus plante taem. Long taem we hem i stap fo yia long kalabus, hem i joen long bisnes blong salem ol tul blong faet long fasin haed. Afta we hem i mared, hem i gohed blong kasem ol rabis frut from fasin blong laef blong hem bifo. Hem i talem se: “Mifala i slip long wan haos we bifo hem i haos blong ol faol. Mi tingbaot yet se long taem ya waef blong mi i stap kuk antap long sam brikis. Laef blong mifala i olbaot nomo mekem se ol prapa famle blong mi oli talem long waef blong mi blong i lego mi.”

?Wanem i jenisim laef blong hem? Manuel i ansa se: “Wan man we mi savegud hem i kam long haos blong mifala mo i stap tokbaot Baebol. Mi mi letem hem i kam from we mi wantem soem long hem se i no gat wan God we i intres long man. Mi mi luk laef blong mi olsem pruf blong samting ya. Mi mi sapraes se Witnes ya i gat longfala tingting mo kaen fasin taswe mi agri blong go long ol miting long Haos Kingdom. Nating se samfala long Haos Kingdom oli save fasin blong laef blong mi be oli talem halo long mi wetem kaen fasin. Oli mekem mi mi harem olsem we mi wan long olgeta. Fasin ya i rili leftemap tingting blong mi. Mi tekem desisen blong lego fasin blong tekem drag mo blong faenem wan gudfala wok. Fo manis afta we mi stat stadi Baebol, mi naf blong joen long wok blong prij mo fo manis biaen mi baptaes blong kam wan Witnes blong Jeova.”

?Olsem wanem trufala Kristin skul i gat paoa long Manuel mo famle blong hem? Manuel i talem se: “Sipos mi no bin stadi long Baebol, bambae mi ded longtaem finis. Fasin blong laef we Jisas i tijim i mekem se mi save joen bakegen wetem waef mo ol pikinini blong mi. Tufala pikinini blong mi oli no nid blong mekem semfala fasin olsem we mi bin mekem taem mi yangfala. Mi haremgud mo mi tangkiu tumas long Jeova from gudfala fasin fren we mi gat naoia wetem waef blong mi. Sam long ol fren blong mi blong bifo oli talem long mi se hemia nao gudfala rod we mi stap folem naoia.”

Fasin blong laef blong wan Kristin i mas klin long saed blong bodi olsem we i klin tu long  saed blong tingting. John we i laef long wan ples we i pua long Saot Afrika i luksave samting ya mo i talem se: “Samtaem gel blong mitufala i no swim blong wan wik mo i no gat wan long mifala we i wari long saed ya.” Waef blong hem i talem se haos blong olgeta i no klin. Be taem oli stadi long Baebol, ol samting oli jenis wantaem. John i stop blong go joen wetem wan grup blong man we oli stap stilim ol trak, mo i lukaot moa long famle blong hem. Hem i talem se: “Mifala i lanem se olsem Kristin, mifala i mas kipim bodi mo klos blong mifala i klin. Mi laekem tok long 1 Pita 1:16 we i talem long yumi blong stap tabu from we Jeova God i tabu. Naoia mifala i traehad blong mekem smol haos blong mifala i klingud.”

Yu Save Faenem Beswan Edukesen

Ol stori antap oli no hapen long sam man nomo. Plante taosen man oli lanem blong gat wan laef we i moagud from edukesen we oli kasem we i stanap long Baebol. Ol man ya oli tok tru, oli no stil mo oli wokhad, mekem se ol bos blong olgeta long wok oli tinghae long olgeta. Oli kam ol man we ol narafala raonabaot long olgeta oli laekem olgeta mo oli ol gudfala fren tu. Oli soem intres long ol narafala. Oli lukaotgud blong no letem ol nogud fasin mo slak fasin i spolem olgeta taswe oli lukaot gud long helt blong olgeta long saed blong bodi, tingting mo filing. Oli no yusum olting blong olgeta, olsem mane, long ol nogud fasin be oli yusum olting ya long fasin we i stret mo we i save mekem i gud long famle blong olgeta. (1 Korin 6:​9-11; Kolosi 3:​18-23) Gudfala frut we i kamaot taem man i mekem ol tijing blong Jeova we oli stap long Baebol i wok long laef blong hem, i pruvum se beswan rod blong laef hemia taem man i folem trufala Kristin skul. Hemia nao beswan edukesen we man i save kasem. Baebol i tokbaot man we laef blong hem i laenap wetem ol loa blong God i se: “Ol man ya tu oli stap win long evri samting we oli stap mekem.”​—Ol Sam 1:3.

Taem yumi save se Jeova, God ya we i Hae we i Hae, i glad nomo blong tijim yumi, samting ya i leftemap tingting blong yumi. Hem wan i talem se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.” (Aesea 48:17) Yes, Jeova i soemaot rod tru long eksampol mo ol tijing blong Pikinini blong hem, Jisas Kraes. Ol tijing blong Jisas oli jenisim laef blong plante man we oli save hem taem hem i stap long wol mo samting ya i sem mak long plante narafala man tu we oli laef folem ol tijing blong hem tede. I gud yu tekem taem blong lanem moa long saed blong ol tijing ya blong hem. Ol Witnes blong Jeova we oli stap klosap long yu bambae oli glad blong halpem yu blong kasem edukesen ya.

[Futnot]

[Bokis blong pija long pej 6]

Paoa Blong Jisas Mo Ol Tijing Blong Hem

Sakias i bos blong ol man blong tekem mane blong takis. Hem i yusum posisen blong hem blong stilim mane blong ol man mo hem i kam rij from. Be hem i jenisim fasin blong laef blong hem taem hem i mekem ol tijing blong Jisas oli wok long laef blong hem.​—Luk 19:​1-10.

Sol blong Tasas, i no moa gohed blong mekem trabol long ol Kristin mo i jenisim laef blong hem blong kam wan Kristin, hemia aposol Pol.​—Ol Wok 22:​6-21; Filipae 3:​4-9.

Sam long ol Kristin long Korin, bifo oli ol man ‘blong mekem nogud wetem woman, blong mekem wosip long ol narafala god, man blong ronem woman, stil, wantem plante samting tumas, man blong dring we i lusum hed, man we i stap spolem nem blong narafala man, mo man we i stap mekem bisnes blong stilim mane.’ Be taem oli lanem ol tijing blong trufala Kristin skul, oli ‘wasemaot ol sin blong olgeta blong mekem olgeta i klin, oli tabu mo oli stret man long nem blong Masta Jisas Kraes.’​—1 Korin 6:​9-11.

[Tok blong pija long pej 7]

Baebol i save givhan long yu blong win