Jeova i No Save Livim Yu Yu Stap Yu Wan

OL KRISTIN long Judia oli kasem bigfala trabol from we ol man oli agensem wok blong olgeta. Antap long hemia, oli mas faet strong agensem tingting blong ol man raonabaot long olgeta we oli ronem mane mo wan gudfala laef. Aposol Pol i traem leftemap tingting blong ol Kristin ya taem hem i yusum ol tok ya we Jeova i bin talem long ol man Isrel jes bifo we oli go insaed long Promes Lan. Pol i raetem ol tok ya se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5; Dutronome 31:6) I sua se promes ya i mekem ol Hibru Kristin long faswan handred yia oli strong moa.

Semfala promes ya i save mekem yumi stanap strong taem yumi kasem ol wari blong laef ‘long wol ya we i kam strong tumas.’ (2 Timoti 3:1) Sipos yumi trastem Jeova mo mekem samting we i soemaot tras ya, ale bambae hem i givhan long yumi nomata se trabol blong yumi i bigwan olsem wanem. ?Be olsem wanem Jeova i save mekem promes ya blong hem i kamtru long laef blong yumi? Blong ansa long kwestin ya, bambae yumi tokbaot trabol we i kamaot taem wan man i lusum wok blong hem blong winim mane.

Taem Samting We Yumi No Tingbaot, i Kasem Yumi

Raon long wol, namba blong ol man we oli no gat wok i stap kam antap. Wan niuspepa blong ol man Polan i talem se, trabol ya we man i no gat wok i “wan long ol problem we i bigwan moa long laef blong man mo ekonomi blong kantri.” Ol kantri we oli gat plante mane mo bisnes, be oli gat problem ya tu. Long 2004, oli kaontem se long olgeta kantri we oli memba blong OECD (Organization for Economic Cooperation and Development) namba blong ol man we oli no gat wok “i go antap i bitim 32 milian, namba ya i hae moa i bitim namba blong man we i no gat wok long ol yia 1930, hemia long taem we oli kolem Great Depression.” * Statistik Ofis long Polan i gat wan lis blong tri milian man we oli no gat wok stat long Disemba 2003, hemia i “minim 18 pesen blong ol man mo woman we oli gat naf yia blong wok.” !Wan buk i talem se long Saot Afrika, namba blong ol man Afrika we oli no gat wok, i kasem 47.8 pesen long 2002!

Plante man, wetem ol man blong Jeova tu, oli wari se bambae oli no moa gat wok no se kampani i save sakemaot olgeta. “Samting we yumi no tingbaot, i save kamaot long yumi enitaem nomo.” (Prija 9:​11, NW ) Long taem olsem, maet yumi harem sem mak olsem Deved we i raetem ol tok ya long buk blong Sam, se: “Plis yu tekemaot ol samting we i stap mekem mi mi wari tumas, mo yu sevem mi long ol trabol blong mi.” (Ol Sam 25:17) ?Olsem wanem sipos trabol ya i kasem yu? ?Bambae yu save winim? Trabol ya i save spolem yumi long saed blong filing, long saed blong spirit, mo long laef tu from we yumi no gat mane. ?Sipos yu no gat wok, bambae yu naf blong stanap strong?

 Dil Wetem Filing Blong Harem Nogud

Janusz Wietrzyński, wan dokta we i stadi long tingting blong man, i talem se “ol man nao oli trabol moa taem oli lusum wok blong olgeta,” from we long kastom blong yumi, man nao we i hed blong famle i mas givim samting we famle i nidim. Dokta ya i talem se trabol ya i save mekem we man i harem nogud mo i trabol bigwan long filing blong hem. Maet i save kros kwik no maet i save ting se i stret nomo we hem i kasem trabol ya. Wan papa we i lusum wok blong hem, maet i ting se hem i nogud mo maet i “stat raorao oltaem wetem famle blong hem.”

Adam i wan Kristin man we i gat tu pikinini. Hem i talem filing we i kasem hem taem hem i lusum wok blong hem, i se: “Eni smosmol samting nomo i save mekem mi mi kam kros; mi save kam kros isi nomo. Long naet, taem mi slip, mi drim long saed blong wok mo olsem wanem bambae mi save givim samting we ol pikinini mo waef blong mi oli nidim. Waef blong mi tu i lusum wok blong hem, wan samting we mifala i sek long hem.” Wan man wetem woman blong hem, nem blong tufala Ryszard mo Mariola, tufala i gat wan pikinini. Tufala i lusum wok blong tufala, mo tufala i gat wan bigfala kaon blong pembak long bang. Mariola i talem se: “Oltaem tingting blong mi i stap stikim mi se i moagud sipos mi no bin mekem bigfala lon ya long bang. Tingting blong mi i trabol from we mi harem olsem se hemia fol blong mi.” Taem yumi fesem ol trabol olsem, yumi save kam kros, yumi save wari bigwan, mo tingting blong yumi i save kam konkon, mo maet yumi save harem olsem se yumi draon long wan dip solwota. ?Taswe, olsem wanem yumi save bos long olkaen filing ya taem oli kasem yumi?

Baebol i givim gudfala advaes blong halpem yumi blong holem wan gudfala tingting. Aposol Pol i givim advaes ya se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:​6, 7) Taem yumi prea long Jeova yumi save kasem ‘pis blong hem,’ hemia wan tingting we i kwaet from we yumi bilif long hem. Woman blong Adam, nem blong hem Irena, i talem se: “Taem mitufala i prea, mitufala i talemaot problem blong mitufala long Jeova mo wanem we bambae mitufala i mekem blong laef blong mitufala i no fasfas wetem plante samting tumas. Man blong mi i wan man we i save wari kwiktaem nomo from smosmol samting, be afta we mitufala i prea, tingting blong hem i kam klia mo hem i tingbaot se bambae i gat rod yet blong stretem problem ya.”

Sipos yu yu fesem trabol ya se yu lusum wok blong yu, ating advaes ya we Jisas Kraes i givim antap long Hil, i stret long yu: “I nogud yufala i stap tingting tumas from laef blong yufala se, ‘?Bambae mifala i kakae wanem?’ no ‘?Bambae mifala i dring wanem?’ Mo i nogud yufala i stap tingting tumas from bodi blong yufala se, ‘?Bambae mifala i kasem klos blong mifala olsem wanem?’ . . . Fastaem yufala i mas lukaot gud blong obei long God we i King blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Matiu 6:​25, 33) Ryszard mo Mariola, tufala i folem advaes ya. Mariola i tingtingbak i se: “Oltaem man blong mi i leftemap tingting blong mi mo i talem se bambae Jeova i neva save lego mifala.” Mo Ryszard i talem tu se: “Mitufala i prea bakegen mo bakegen. Samting ya i mekem we mitufala i kam klosap moa long God, mo i joenem mitufala tu. Fasin olsem nao i mekem mitufala i harem gud stret olsem we mitufala i nidim.”

Mo tu, tabu spirit blong God bambae i halpem yumi. Tabu spirit i mekem we yumi save bos long tingting blong yumi. Fasin ya bambae i halpem yumi blong yumi mekem tingting mo filing blong yumi i kam kwaet. (Galesia 5:​22, 23) Maet i no isi blong kasem samting ya be yumi naf from we Jisas i promes se: ‘Papa blong yufala long heven i save givim tabu spirit long ol man we oli askem long hem.’​—Luk 11:13; 1 Jon 5:​14, 15.

 No Fogetem Ol Kakae Long Saed Blong Spirit

Nating se wan Kristin i save bosgud long ol filing mo tingting blong hem, be taem hem i lusum wok blong hem, samting ya i save spolem hem yet. Taswe i impoten blong no fogetem ol kakae long saed blong spirit. Tingbaot Moses. Laef blong hem i jenis bigwan taem hem i gat 40 yia. Hem i bin laef long haos blong King nao wantaem nomo hem i lusum posisen blong hem mo i kam wan man blong lukaot long sipsip, hemia wan wok we ol man Ijip oli ting nating long hem. (Jenesis 46:34) Moses i mas lan long defren kaen laef ya. Ale hem i letem Jeova i jenisim ol fasin blong hem gogo 40 yia i pas, nao hem i rere blong tekem sam niufala wok we God i wantem givim long hem. (Eksodas 2:​11-22; Ol Wok 7:​29, 30; Hibrus 11:​24-26) Nating se Moses i fesem hadtaem, hem i putum tingting blong hem long ol samting long saed blong spirit mo i rere blong letem Jeova i trenem hem. !Yumi neva mas letem ol trabol oli spolem yumi gogo yumi no moa save folem ol rul we yumi lanem mo yumi no holemtaet bilif blong yumi!

I tru se taem yumi lusum wok wantaem nomo, yumi save konfius mo harem nogud. Be hemia wan gudfala taem blong mekem we fasin fren blong yumi wetem Jeova God mo ol man blong hem i kam strong moa. Man ya Adam, we yumi tokbaot hem bifo, i harem olsem. Hem i se: “Taem mi mo waef blong mi, mitufala i lusum wok blong mitufala, neva mitufala i lego ol Kristin miting mo kam slak long wok blong prij. Samting ya i no kam long tingting blong mitufala nating. From we tingting blong mitufala i stap gud olsem, mitufala i no wari bitim mak se laef blong mitufala bambae i olsem wanem.” Ryszard i talem sem mak i se: “Sipos mitufala i no bin gohed blong joen long ol miting mo long wok blong prij, bambae mitufala i no naf blong winim wari ya blong mitufala. Tru ya, maet ol wari ya oli save spolem tingting blong mitufala olgeta. Ol gudfala storian long saed blong Baebol wetem ol narafala oli leftemap tingting from we oli pulum mitufala blong tingbaot narafala i bitim we mitufala i tingbaot mitufala nomo.”​—Filipae 2:4.

 Yes, bitim we yu wari long saed blong wok, i gud yu traem yusum fri taem we yu gat naoia, blong mekem ol wok long saed blong spirit, blong stadi moa, blong joen long ol defdefren wok blong kongregesen, no blong mekem moa long wok blong prij. Bitim we yu les olsem plante man we oli lusum wok blong olgeta, i gud yu “wok strong long ol wok ya blong Masta”​—samting ya bambae i mekem yu yu glad mo bambae i givhan long plante narafala man tu we maet oli kasem trutok from we yu talemaot gud nius blong Kingdom long olgeta.​—1 Korin 15:58.

Givim Samting We Famle Blong Yu i Nidim

I tru se kakae long saed blong spirit i no save fulumap bel blong man. Taswe i gud tu blong tingbaot advaes ya se: “Man we i no wantem lukaot long olgeta famle blong hem, mo antap long hem, hem i no . . . lukaot long olgeta we oli stap long haos blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.” (1 Timoti 5:8) Adam i talem stret se: “Nating se ol brata long kongregesen oli rere oltaem blong givim samting we yumi nidim long saed blong bodi, be wan Kristin man i mas tingbaot se hem i mas traem bes blong hem blong lukaot wok.” Yumi save trastem se bambae Jeova mo ol man blong hem tu oli save givhan long yumi, be yumi no mas fogetem se yumi mas traehad tu blong faenem wan wok.

?Yu save traehad blong faenem wan wok olsem wanem? Adam i eksplenem se: “I nogud yu ting se bambae yu sidaon nomo nao God bambae i faenem wan wok blong yu. Nogat. Taem yu stap lukaot wok, yu no mas fraet blong talemaot se yu yu wan Witnes blong Jeova. Sam bos oli tinghae long yumi.” Ryszard i givim advaes ya se: “Askem long ol man we yu save olgeta, sipos oli save se i gat wok samples. Go askem wok long ol defdefren kampani, ridim niuspepa blong luk sipos man i askem wokman. Olsem maet yu ridim se: ‘Mifala i wantem wan woman we i naf blong lukaot sikman’; no, ‘Wok blong pikimap frut long plantesen, sikis manis.’ !Gohed blong lukaotem wok! Mo i nogud yu jusum wok nomo we i stret long tingting blong yu. Yu mas rere blong mekem olkaen wok nating se ol wok ya oli daon lelebet long ae blong ol man mo yu tu yu no rili laekem.”

Yes, ‘Jeova i stap givhan long yu. Bambae hem i no save livim yu yu stap yu wan, mo bambae i no save lego yu samtaem.’ (Hibrus 13:​5, 6) Yu no nid blong wari bitim mak. Deved i raetem tok ya long buk blong Ol Sam i se: “Yu mas givim laef blong yu long Hae God, yu mas trastem hem, nao bambae hem i halpem yu.” (Ol Sam 37:5) Taem yu givim laef blong yu long Jeova i min se yu dipen long hem mo yu mekem samting olsem we hem i wantem, nating we i luk olsem se rod i no klia.

Adam mo Irena, tufala i faenem wan smol wok we i blong wasem ol windo mo ol step insaed long ol stori haos, mo tufala i lukaotgud blong no spenem tumas mane taem tufala i pem samting. Semtaem we tufala i mekem wok ya, tufala i stap gohed yet blong asaskem wok olbaot. Irena i talem se: “Oltaem nomo mitufala i kasem samting stret long taem we mitufala i nidim.” Mo Adam i talem se: “Ol samting we oli hapen long laef blong mitufala oli soemaot se, sam samting we mitufala i bin askem long God, oli no rili laenap wetem wanem we hem i wantem. Samting ya i tijim mitufala blong trastem waes blong hem mo blong no tekem aksen hareap folem tingting blong mitufala nomo. I moagud blong wet se God nao bambae i faenem rod blong tekemaot yumi long trabol we i stap.”​—Jemes 1:4.

Ryszard mo Mariola, tufala i faenem sam smosmol wok, mo long semtaem tufala i prij long ol ples we i nidim moa pablisa blong Kingdom. Ryszard i talem se: “Oltaem mitufala i faenem smosmol wok stret long taem we mitufala i no moa gat kakae. Mitufala i no wantem ol wok ya we oli save givim bigfala pei long mitufala, from we oli save blokem mitufala blong mekem ol tioktratik wok. Mitufala i glad moa blong trastem Jeova.” Tufala i bilif strong se Jeova nomo i halpem tufala blong faenem smol rum we tufala i stap rentem long wan praes we i jip nomo, mo naoia Ryszard i gat wok.

Yumi harem nogud bigwan taem yumi lusum wok blong yumi. Be i gud sipos yumi luk samting ya olsem wan janis blong luksave se bambae Jeova i neva save lego yumi. Jeova i keagud long yu. (1 Pita 5:​6, 7) Hem i yusum profet Aesea blong talemaot promes ya blong hem se: “!Mi mi God blong yufala! !Yufala i no seksek! !Mi bambae mi mekem yufala i strong! !Mi bambae mi givhan long yufala!” (Aesea 41:10) Taem wan trabol i kasem yu we yu no bin tingbaot, olsem taem yu lusum wok, neva letem samting ya i blokem yu fulwan nao yu no moa mekem wan samting. I gud sipos yu traem bes blong yu blong mekem evri samting we yu naf blong mekem blong dil wetem trabol ya, mo letem Jeova i lukaot long ol narafala samting we yu no naf blong mekem. Yu mas wet long Jeova, mo “stap kwaet.” (Ol Krae 3:26) Bambae yu kasem sam bigbigfala blesing yet.​—Jeremaea 17:7.

[Futnot]

[Tok blong pija long pej 9]

Yusum taem blong yu long ol wok long saed blong spirit

[Tok blong pija long pej 10]

Lukaotgud blong no westem mane, mo taem yu lukaot wok, i nogud yu jusum nomo wok we i stret long tingting blong yu