Lukaot Se Fasin Flas i No Bos Long Hat Blong Yu

“God i agensem olgeta we oli [“flas,” NTB].”​—JEMES 4:6.

1. Givim wan eksampol blong soem se fasin praod i gat gud saed blong hem.

 ?SAMTAEM wan samting i bin kamaot we i mekem yu yu harem se yu praod? Ating bighaf blong yumi i harem filing ya finis we i mekem yumi glad. Fasin blong praod smol long yumi wan i no wan nogud samting. Tingbaot filing blong wan Kristin papa mama taem tufala i ridim ripot blong skul we i talem se pikinini gel blong tufala i wan gudfala studen mo i stap wok had. I sua se papa mama ya, tufala i glad tumas long gel blong tufala mo tufala i praod long hem. Hemia i no wan nogud samting. Aposol Pol mo ol fren blong hem, oli praod long niufala kongregesen we oli bin stanemap from we oli luk se ol brata long kongregesen ya oli stanap strong taem oli kasem trabol.​—1 Tesalonaeka 1:​1, 6; 2:​19, 20; 2 Tesalonaeka 1:​1, 4.

2. ?From wanem plante taem filing blong praod i nogud?

² Ol eksampol we yumi jes tokbaot oli soemaot se fasin praod i kamaot taem yumi glad long wan wok we yumi mekem no from wan samting we yumi gat. Be plante taem, fasin praod i save mekem we man i gat sam narafala fasin we oli no rili gud. Olsem, maet man i stat tinghae tumas long hem wan, maet hem i ting se hem i antap moa long ol narafala from we hem i naf blong mekem wan samting, no from we hem i naes, i gat mane, no posisen. Man i soemaot fasin ya long ol toktok mo aksen blong hem we oli daonem narafala. Fasin praod olsemia hem i wan nogud fasin we yumi ol Kristin yumi mas blokem. ?From wanem? From we yumi bon wetem fasin ya we i isi nomo blong yumi tingbaot yumi wan nomo, hemia wan fasin we i kamaot long bubu blong yumi Adam. (Jenesis 8:21) Ale, kwiktaem nomo, hat blong yumi i save pulum yumi blong praod long sam samting we i no stret. Wan Kristin i mas faet agensem fasin blong praod from kala blong skin, mane, edukesen, gudhan we hem i gat blong mekem samting, no wok we hem i mekem we i gud moa i winim narafala. Fasin blong praod long ol samting olsem, hem i no stret mo Jeova i no laekem.​—Jeremaea 9:23; Ol Wok 10:​34, 35; 1 Korin 4:7; Galesia 5:26; 6:​3, 4.

3. ?Wanem ya fasin flas? ?Jisas i talem wanem long saed blong fasin ya?

³ I gat wan narafala risen from wanem yumi mas sakemaot fasin praod we i no stret. Sipos yumi letem fasin praod ya i gru long hat blong yumi, bambae yumi kam flas. Fasin flas i kamaot long fasin praod mo hem i rabis olgeta. ?Wanem ya fasin flas? Man we i flas, hem i tinghae long hem wan, be antap long hemia, hem i ting rabis long ol narafala we long lukluk blong hem oli daon moa. (Luk 18:9; Jon 7:​47-49) Jisas i tokbaot ‘fasin flas’ se hem i sem mak long ol narafala rabis fasin ya we oli “kamaot long tingting” no hat blong man, mo we oli stap “mekem man i doti long fes blong God.” (Mak 7:​20-23) Taswe ol Kristin ol mas luksave se i impoten tumas blong lukaotgud se fasin flas i no kam stap long hat blong olgeta.

4. ?Olsem wanem ol stori blong Baebol long saed blong ol man we oli flas, i save halpem yumi?

⁴ Ol stori long Baebol long saed blong ol man we oli gat fasin flas, oli save halpem yu blong blokem fasin ya. Long rod ya bambae yu luksave sipos ol rong filing blong fasin praod oli stap long hat  blong yu, no sipos yu yu stat blong gat fasin ya. Ale bambae yu yu naf blong sakemaot ol tingting no filing we oli save mekem we fasin flas i bos long hat blong yu. Nao bambae God i save mekem i gud long yu taem hem i mekem tok ya blong hem i kamtru we i se: “Olgeta we oli praod, mo oli stap mekem hed, bambae mi tekemaot olgeta evriwan, nao bambae yufala i no moa save girap agens long mi bakegen long tabu hil blong mi.”​—Sefanaea 3:11.

God i Stretem Ol Man We Oli Flas

5, 6. ?Olsem wanem Fero i soem se hem i flas, mo wanem i kamaot from?

⁵ Yumi luk tingting we Jeova i gat long fasin flas taem yumi tingbaot wanem we hem i mekem long ol haeman olsem Fero. Ol fasin blong Fero oli soemaot klia nomo se hem i wan flas man. Hem i ting se hem i wan god we ol man oli mas wosipim hem, hem i no laekem nating ol slef blong hem, hemia ol man Isrel. Tingbaot wanem we hem i mekem taem God i sanem toktok i go long hem se hem i mas letem ol man Isrel oli go long draeples blong “mekem wan lafet blong ona” long Jeova. Fero i tokflas se, “?Hu ya [Jeova] ya? ?Weswe mi mi mas harem hem? ?From wanem mi mi mas letem ol man blong hem oli go?”​—Eksodas 5:​1, 2.

⁶ Jeova i sanem sikis trabol i kam long Fero. Nao, hem i sanem Moses i go tok long king ya blong Ijip se: “Kam kasem naoia, yu yu stap mekemhed yet, yu no wantem nating blong letem ol man blong mi oli go.” (Eksodas 9:17) Ale, Moses i talemaot namba seven trabol we bambae i kasem Ijip, hemia ol ston blong aes we oli folfoldaon bigwan. Afta long namba ten trabol, Fero i letem ol man Isrel oli gofri. Be smoltaem nomo biaen, hem i jenisim tingting blong hem mo i biaenem olgeta. Ale, Fero mo ol ami blong hem oli lus long Red Si. !Tingbaot filing blong ol man ya taem oli luk we bigbigfala solwota ya i kamdaon long olgeta! ?Wanem frut i kamaot from flas fasin blong Fero? Ol strong man long ami blong hem oli talem se: “!Hemia [Jeova] ya! !Hem i stap faet long saed blong olgeta! !Taswe yumi fas olsem! !Yumi mas ronwe long olgeta ya!”​—Eksodas 14:25.

7. ?Olsem wanem ol haeman blong Babilon oli soemaot se oli flas?

⁷ I gat sam narafala king tu we Jeova i daonem flas blong olgeta. Wan long olgeta ya hemia Senakerib, king blong Asiria. (Aesea 36:​1-4, 20; 37:​36-38) Ol man Babilon oli bin faet agensem Asiria mo oli winim neson ya. Be biaen, Jeova i daonem tufala flas king blong Babilon tu. Tingbaot taem ya we King Belsasa i mekem wan bigfala kakae nao hem wetem sam haeman blong hem oli dring waen long ol kap we oli tekemaot long haos tempol blong Jeova, mo oli presem ol god blong Babilon. Wantaem nomo oli luk han blong wan man i stap raet long wol blong haos blong king. Ale oli askem profet Daniel blong i talem mining blong hanraet ya. Daniel i talem long Belsasa se: “God ya we i hae we i hae, hem i mekem bubu ya blong yu King Nebukadnesa i kam wan king . . . Be from we hem i flas tumas . . . God i tekemaot paoa blong king long hem, nao ol man oli no moa ona long hem. Yu yu wan bubu blong hem, mo yu savegud samting ya, be yu no mekem tingting blong yu i kamdaon nating.” (Daniel 5:​3, 18, 20, 22) Long sem naet ya nomo, ami blong ol man Media mo Pesia i kam spolem Babilon mo oli kilim Belsasa i ded.​—Daniel 5:​30, 31.

8. ?Jeova i mekem wanem long sam man we oli flas?

⁸ Tingbaot sam narafala flas man ya we oli agensem ol man blong Jeova. I gat man Filistia ya, Golaeat, wetem praeminista blong Pesia, Haman, mo King Herod Agripa we i rulum provins blong Judia. From we trifala man ya oli flas tumas, God i kilim trifala i ded long fasin we i mekem bigfala sem long trifala. (1 Samuel 17:​42-51; Esta 3:​5, 6; 7:10; Ol Wok 12:​1-3, 21-23) Fasin we Jeova i mekem long ol flas man ya i makem stret se tok ya long Baebol i tru tumas we i se: “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.” (Ol Proveb 16:18) Yes, i klia nomo se ‘God i agensem olgeta we oli flas.’​—Jemes 4:6.

9. ?From wanem ol king blong Taea oli no ol trufala fren?

⁹ King blong Taea hem i defren lelebet long ol flas king blong Ijip, Asiria, mo Babilon. Fastaem, fasin blong hem i gud mo hem i rere blong halpem ol man blong God. Taem King Deved i rul, mo biaen taem Solomon i rul, king blong Taea i sanem sam nambawan wokman blong hem wetem plante gudgudfala samting i go long Isrel blong oli wokem ol haos blong king mo tempol blong God tu. (2 Samuel 5:11; 2 Kronikel 2:​11-16) Be taem ol yia  oli pas, ol man Taea oli stat agensem ol man blong Jeova. ?From wanem fasin blong olgeta i jenis?​—Ol Sam 83:​3-7; Joel 3:​4-6; Amos 1:​9, 10.

“Yu Yu Stap Flas Tumas”

10, 11. (a) ?Hu i olsem ol king blong Taea? (b) ?Wanem i mekem se ol man Taea oli no moa frengud wetem ol man Isrel?

¹⁰ Jeova i pulum profet Esikel blong talemaot klia tok blong hem agensem laen blong ol king blong Taea se bambae oli lus. Long toktok blong hem we i go long “king blong Taea” i gat sam tok we oli laenap stret wetem ol king blong ples ya mo wetem faswan bigfala enemi blong God tu, hemia Setan, we hem i no “stap wetem olgeta we oli tok tru.” (Esikel 28:12; Jon 8:44) Fastaem olgeta, Setan i wan gudfala spirit pikinini blong Jeova long heven. Toktok we Jeova God i yusum Esikel blong raetem, i soemaot klia wanem nao i mekem we ol king blong Taea mo Setan oli gorong:

¹¹ “Yu yu stap long Iden, we i gudfala ples blong mi, nao yu stap flasem yu long ol flas ston. . . . Mi mi makemaot yu se yu wan jerubim, blong yu lukaot long gudfala ples ya blong mi. . . . I stat long taem we mi mi mekem yu, fasin blong yu i stret gud, be biaen, yu stat blong mekem ol rabis fasin. Yu yu stap bisi tumas blong mekem bisnes wetem ol narafala man, mo fasin ya i mekem yu yu stap faet, mo yu stap mekem sin. . . . Yu yu jerubim ya we yu stap gad, be mi mi ronemaot yu yu gowe . . . Yu yu stap flas tumas from we yu naes we yu naes, mo hae nem blong yu i mekem yu yu folem fasin blong man we i no gat hed.” (Esikel 28:​13-17, jekem futnot blong vas 14 mo 17) Yes, fasin flas nao i pulum ol king blong Taea blong faet agensem ol man blong Jeova. Taea i kam wan taon we i rij we i rij from we hem i ples blong ol man oli kam mekem bisnes long hem. Ol man oli savegud taon ya from ol gudgudfala samting we ol man blong hem i wokem. (Aesea 23:​8, 9) Ol king blong Taea oli stat tinghae tumas long olgeta, nao oli stat agensem mo givim hadtaem long ol man blong God.

12. ?Wanem i pulum Setan blong lego God, mo hem i stap gohed yet blong mekem wanem?

¹² Long sem fasin, spirit man ya we i kam Setan hem i gat bigfala waes blong mekem eni wok we God i givim long hem blong mekem. Be hem i no gat tangkiu long God. Defren olgeta, “tingting blong hem i go antap tumas,” nao hem i stat blong no laekem nating fasin blong God blong rulum olgeta samting. (1 Timoti 3:6) Hem i tingbaot hem wan gogo i wantem we Adam mo Iv tufala i wosipim hem olsem we tufala i stap wosipim God. Rabis tingting ya i gru gogo i pusum hem blong mekem sin. (Jemes 1:​14, 15) Setan i pulum Iv blong kakae frut blong tri ya we God i putum tabu long hem. Ale hem i yusum Iv blong pulum Adam tu blong i kakae frut ya. (Jenesis 3:​1-6) Yes, faswan man mo woman, tufala i no wantem we God i rulum tufala, nating se hem i gat raet blong mekem olsem. Nao, i olsem we tufala i go wosipim Setan. Setan ya i wan man blong flas bitim mak. Hem i traem pulum evri enjel mo evri man, wetem Jisas Kraes tu, blong oli sakemaot hae rul blong Jeova mo blong oli wosipim hem.​—Matiu 4:​8-10; Revelesen 12:​3, 4, 9.

13. ?Wanem frut i kamaot from fasin flas?

¹³ Yes, naoia yumi luksave se Setan i stamba blong fasin flas, mo se fasin ya nao i stamba blong sin wetem fasin blong safa mo kruked fasin we i stap long wol tede. Setan hem i “rabis god blong wol ya” mo hem i gohed blong pulum ol man blong oli praod mo blong oli tinghae tumas long  olgeta wan. (2 Korin 4:4) Hem i save se hem i gat smoltaem nomo i stap, taswe hem i mekem faet agensem ol trufala Kristin. Mak blong hem i blong pulum olgeta oli gowe long God mo tingbaot olgeta nomo, oli man blong tok flas, mo tingting blong olgeta i go antap tumas. Baebol i talem se ol fasin ya bambae oli kam plante long taem blong “ol las dei.”​—2 Timoti 3:​1, 2, NW; Revelesen 12:​12, 17.

14. ?Wanem rul we Jeova i folem long saed blong fasin we hem i mekem long ol man mo ol enjel tu?

¹⁴ Jisas Kraes i no sem blong soemaot klia rabis frut we i kamaot from fasin flas blong Setan. Long tri defren taem, taem Jisas i stap wetem ol enemi blong hem we oli ting se oli stret man, hem i talem rul ya we Jeova i folem long saed blong fasin we hem i mekem long ol man, hem i se: “Man we hem i stap leftemap hem blong i kam haeman, bambae God i putum hem i stap daon. Be man we tingting blong hem i stap daon, bambae God i leftemap hem i kam haeman tru.”​—Luk 14:11; 18:14; Matiu 23:12.

Blokem Hat Blong Yu Blong i No Kam Flas

15, 16. ?Wanem i mekem we Hega i kam flas?

¹⁵ Ating yu luksave long ol stori antap se ol man ya we oli kam flas oli man we oli gat hae posisen. ?Hemia i min se ol narafala man we oli no gat hae posisen oli no save gat flas fasin? Si, oli save gat fasin ya. Tingbaot wan samting we i kamaot long famle blong Ebraham. Olfala Ebraham i no gat pikinini we bambae i save holem nem blong famle, mo woman blong hem, Sera, i bitim finis yia blong karem pikinini. Long taem ya, kastom hemia se sipos wan man, olsem Ebraham, i no gat pikinini, hem i save tekem wan narafala woman mo gat pikinini wetem woman ya. God i letem ol man oli folem fasin ya smoltaem, from we i no taem yet blong putumap bakegen faswan loa blong hem long saed blong mared.​—Matiu 19:​3-9.

¹⁶ Folem tok blong Sera, Ebraham i agri blong tekem Hega, wan woman Ijip we i slef blong Sera, blong i bonem wan pikinini blong Sera. Ale Hega i stap wetem Ebraham olsem narafala woman blong hem, mo hem i gat bel. Hega i mas gat bigfala tangkiu from ona ya we oli givim long hem. Be nogat. Hem i letem flas i bos long hat blong hem. Baebol i stori se: “Taem hem i save we hem i gat bel, tingting blong hem i go antap tumas, nao oltaem hem i stap lukluk rabis long [Sera].” Fasin blong Hega i mekem se bigfala trabol i kamaot long famle blong Ebraham gogo Sera i ronemaot Hega. Be i gat rod blong stretem problem ya. Enjel blong God i givim advaes ya long Hega, i se: “Yu mas gobak long hem. Yu mas kam slef blong hem bakegen [“yu mas putum tingting blong yu i stap daon,” NW ] .” (Jenesis 16:​4, 9) I luk olsem se Hega i folem advaes ya, hem i stretem tingting we hem i gat long saed blong Sera, nao ol pikinini we oli kamaot biaen long hem oli kam wan bigfala neson.

17, 18. ?From wanem yumi evriwan i mas lukaot long fasin flas?

¹⁷ Stori blong Hega i soem se flas fasin i save  kamaot taem laef blong wan man i jenis i kam moagud. Lesen we yumi lanem se nating sipos wan Kristin i mekem wok blong God wetem gudfala tingting, be maet fasin flas i save kasem hem taem hem i winim mane no posisen. Fasin flas i save kamaot tu, taem ol man oli presem hem from we hem i win, no from we hem i waes no i naf gud. Yes, wan Kristin i mas lukaot gud blong blokem flas fasin i no kam long hat blong hem. Hemia i tru moa taem laef blong hem i go gud no taem oli givim moa wok long hem.

¹⁸ Faswan impoten risen from wanem yumi mas blokem fasin flas, hemia se God i no laekem fasin ya. Baebol i talem se: “Ol man nogud, fasin blong flas blong olgeta wetem tingting ya se olgeta nomo oli nambawan, hem i stap holem olgeta, be fasin ya i sin ya.” (Ol Proveb 21:4) Yumi intres blong makem se Baebol i givim woning ya speseli long ol Kristin “we oli rijman long ol samting blong wol ya,” se oli no mas “letem tingting blong olgeta i go antap tumas.” (1 Timoti 6:17; Dutronome 8:​11-17) Mo ol Kristin we oli pua, oli mas lukaot long fasin blong “wantem tumas ol samting blong narafala man,” mo oli mas rimemba se fasin flas i save stap long hat blong eniman, nating se hem i rij no i pua.​—Mak 7:​21-23; Jemes 4:5.

19. ?Long wanem fasin Usia i spolem gud nem we hem i bin gat long fes blong God?

¹⁹ Fasin flas wetem ol narafala rabis fasin oli save spolem gudfala fasin fren we man i gat wetem Jeova. Tingbaot King Usia taem we hem i jes stat blong rul: “King ya i stap mekem ol samting we Hae God i glad long hem, . . . [Hem] i ona long Hae God, hem i stap mekem wok blong Hae God we tingting blong hem i stap strong long hem, mo Hae God i stap blesem hem.” (2 Kronikel 26:​4, 5) Be sore tumas, King Usia i lusum gudfala fasin ya blong hem, from we “hem i kam praod tumas, nao hem i kasem trabol.” Hem i tinghae tumas long hem wan gogo hem i go insaed long tempol blong bonem insens i go long God. Taem ol pris oli talem long hem se hem i no gat raet blong mekem wok ya, “hem i kros tumas.” Aksen blong hem i soemaot se hem i flas bitim mak. From samting ya, Jeova i kilim hem wetem rabis sik ya leprosi, mo hem i ded we God i no glad nating long hem. ​—2 Kronikel 26:​16-21.

20. (a) ?Olsem wanem klosap King Hesekia i lusum gudnem long fes blong God? (b) ?Bambae yumi tokbaot wanem long nekis stadi?

²⁰ Yu save skelem stori ya wetem eksampol blong King Hesekia. Long wan taem, klosap king ya i lusum gudnem we hem i gat long fes blong God from we “hem i praod tumas.” Be laki nomo se hem i ‘tanem tingting blong hem, i mekem tingting blong hem i stap daon’ nao God i glad long hem bakegen. (2 Kronikel 32:​25, 26) Yumi makem long ples ya se tingting daon nao i halpem Hesekia blong winim flas tingting. Yes, tingting daon hem i defren olgeta long flas fasin. Taswe, long nekis stadi bambae yumi luk olsem wanem yumi save wokem mo holemtaet Kristin fasin ya, tingting daon.

21. ?Ol Kristin we oli gat tingting daon oli save hop blong kasem wanem?

²¹ Yumi no mas fogetem ol nogud frut we oli kamaot from fasin flas. From we God i ‘agensem olgeta we oli flas,’ i gud yumi mekem tingting blong yumi i strong blong sakemaot ol  filing blong fasin praod. Taem yumi traem wokem Kristin fasin blong stap daon, yumi save putum tingting blong yumi i stap long bigfala dei blong God, taem ol man we oli flas wetem ol rabis wok blong olgeta bambae oli lus. Long taem ya, “ol man we oli praod, Hae God bambae i daonem olgeta, mo fasin blong flas blong man bambae i finis. . . . Mo bambae yumi stap leftemap nem blong [Jeova] nomo.”​—Aesea 2:17.

Tingting Dip Long Ol Poen Ya

• ?Yu save talem se wan flas man i olsem wanem?

• ?Fasin flas i kamaot wea?

• ?Wanem i save mekem we wan man i kam flas?

• ?From wanem yumi mas blokem fasin flas?

[Kwestin]

[Tok blong pija long pej 23]

Fasin flas i lidim Fero blong kasem bigfala sem nomo

[Tok blong pija long pej 24]

Taem Hega i karem pikinini blong Ebraham, hem i kam flas

[Tok blong pija long pej 25]

Hesekia i mekem tingting blong hem i stap daon, nao God i glad long hem bakegen