Tok Blong Jeova i Gru Bigwan Long “Kantri Blong Igel”

“KANTRI blong Igel.” Long lanwis blong ol man Albania, hemia tok we oli yusum blong tokbaot kantri blong olgeta. Kantri ya i stap klosap long solwota blong Adriatik long Balkan Peninsula we i stap bitwin Gris mo kantri ya we bifo oli kolem Yugoslavia. Nating se i gat plante tingting long saed blong ol man Albania se oli kam wea, be fulap man blong raetem histri oli agri se ol man Albania mo lanwis we oli yusum, i kamaot long ol man bifo we nem blong olgeta ol Illyrian. Buk ya The Encyclopædia Britannica i talem se kalja blong olgeta i stat long ol yia 2000 B.K.T. *

Ol naesfala samting long Albania hemia ol bigbigfala hil long not mo ol waet sanbij long saot long Solwota blong Adriatik. Be samting we i moa naes, hemia ol man Albania. Oli kaen mo oli gat fasin blong welkam, ol toktok mo fasin blong olgeta i laef, oli lanem samting kwiktaem, mo oli laekem tumas blong talemaot tingting blong olgeta wetem filing.

Wan Misinari We Plante Man Oli Save Long Hem

Gudfala fasin blong ol man Albania mo ol naesfala samting long kantri ya, i pulum intres blong wan man we i wokbaot i go long kantri ya plante handred yia bifo. Raonabaot long yia 56 K.T., aposol Pol we i wokbaot plante, i raetem se: “I stat long Jerusalem i kam kasem Ilirikam, oltaem long rod, mi mi stap talemaot gud nius blong Kraes, long fulmak blong hem.” (Rom 15:19) Ol ples we bifo oli olsem saot blong Ilirikam, tede oli pat blong sentrol mo not Albania. Pol i raetem ol tok ya taem hem i stap long Korin, hemia Gris, long saot blong IIirikam. Hem i talem se hem i talemaot gud nius long fulmak blong hem i “kam kasem IIirikam,” i minim se hem i prij kasem boda blong IIirikam no long kantri ya. Nomata se i olsem wanem, be i min se ating Pol i bin prij long ples we tede hem i saot blong Albania. Taswe, Pol i faswan we i mekem wok blong talemaot Kingdom long kantri ya Albania.

Plante handred yia i pas. Ol gavman oli stanap mo oli foldaon. Ol narafala kantri we oli rulum smol ples ya long Yurop oli kam mo oli go, ale long 1912 Albania i kam independen. Klosap ten yia biaen, nius blong Kingdom blong Jeova i kasem Albania bakegen.

Wan Nambawan Stat

Long ol yia 1920, sam man Albania we oli laef long Yunaeted Stet oli joen wetem ol Baebol Studen, hemia nem blong ol Witnes blong Jeova bifo. Ol man ya oli gobak long Albania blong serem wanem we oli bin lanem. Wan long olgeta ya, hemia Nasho Idrizi. Sam man oli laekem wanem we oli harem. Long 1924, ofis blong Romania i lukaot long wok blong prij long Albania blong givhan long ol man we oli intres.

Long taem ya, Thanas Duli (Athan Doulis) i wan long olgeta we oli kasem save blong Jeova long Albania. Hem i talem se: “Long 1925, i gat tri kongregesen long Albania, mo i gat sam Baebol Studen mo sam we oli intres oli stap olbaot long kantri. !Lav we oli soemaot bitwin long olgeta, i defren olgeta long fasin blong ol man we oli stap raonabaot!” *

 I no isi blong go long ol defdefren ples, from we ol rod oli nogud. Be, nating se i olsem, ol pablisa oli gat strong tingting blong go long plante ples. Eksampol, long saot blong Vlorë klosap long solwota, i gat Areti Pina we i tekem baptaes long 1928 taem hem i gat 18 yia. Hem i stap klaemap mo godaon long ol bigfala hil blong prij wetem Baebol long han blong hem. Hem i joen long  kongregesen blong Vlorë we ol man blong hem oli wok strong long ol yia 1930.

Long 1930, branj ofis long Gris i lukaot long wok blong prij long Albania. Long 1932, wan elda blong Gris we i stap visitim ol kongregesen, i visitim ol brata long Albania blong leftemap tingting blong olgeta mo halpem olgeta blong stanap strong. Plante long olgeta ya we oli lanem trutok long taem ya oli gat hop ya blong laef long heven. Ol man long olgeta ples oli respektem olgeta, from fasin klin mo stret fasin we oli soemaot. Wok blong ol brata ya we oli stanap strong i karem gudfala frut. Long ol yia 1935 mo 1936, oli givimaot samting olsem 6,500 buk blong Baebol long Albania.

Wan dei, long Vlorë, Nasho Idrizi i yusum wan gramafon blong talemaot tok blong J. F. Rutherford. Ol man oli sarem ol bisnes blong olgeta, mo oli kam lesin long Brata Idrizi we i tanem ol tok blong Rutherford i go long lanwis Albania. Strong tingting we ol tija ya blong Baebol oli gat bifo, i karem plante blesing. Long 1940, i gat 50 Witnes blong Jeova long Albania.

Wan Kantri We i No Bilif Se God i Stap

Long 1939, ol Fasis blong Itali oli kam long Albania. Gavman i no moa luksave ol Witnes blong Jeova olsem wan skul, mekem se oli putum tabu long wok blong prij blong olgeta. Smoltaem biaen, ami blong Jemani i kam insaed long Albania. Taem Wol Wo Tu i finis, wan lida blong ami we i gat paoa, nem blong hem Enver Hoxha, i rul long kantri ya. Long eleksen blong 1946 hem i kam praeminista taem Komunis pati blong hem i win. Ol man oli talem se ol yia we i kam biaen bambae hemia ol yia blong fridom, be long ol Witnes blong Jeova hemia taem blong trabol.

Sloslo gavman i no moa laekem ol skul. Ol trufala Kristin oli no joen long wol ya, mekem se ol Witnes blong Jeova long Albania oli no joen long ol faet mo long politik. (Aesea 2:​2-4; Jon 15:​17-19) Ale ol man oli sakem plante brata long kalabus, oli no givim kakae no ol samting we oli nidim. Plante taem, ol Kristin sista we oli no go long kalabus, oli wasem ol klos mo kukum kakae blong ol brata ya.

No Fraet Long Taem Blong Trabol

Long stat blong ol yia 1940, Frosina Xheka we i wan yangfala nomo long vilej ya Përmet, i harem long ol stret brata blong hem wanem we oli lanem long wan Witnes we nem blong hem Nasho Dori, hem i man blong wokem sus. * Ol man blong gavman oli mekem i strong long ol Witnes blong Jeova, be bilif blong Frosina i kam moa strong, mekem se papa mama blong hem oli harem nogud. “Oli haedem ol sus blong mi mo wipim mi sipos mi go long ol Kristin miting. Oli mekem wan plan blong mi mared long wan man we i no wosip long Jeova. Taem mi mi no wantem, oli ronemaot mi long haos. Long dei ya i gat sno. Brata Nasho Dori i askem long brata Gole Flloko blong Gjirokastër blong givhan long mi. Oli mekem plan se mi go stap wetem famle blong hem. Long taem ya ol stret brata blong mi oli stap long kalabus blong tu yia, from we oli no wantem joen long politik. Afta we oli gofri, mi muv i go long Vlorë blong stap wetem olgeta.

 “Polis i traem fosem mi blong joen long ol wok blong politik. Mi mi no wantem. Oli holem mi, tekem mi mi go long wan rum, mo oli raonem mi. Wan long olgeta i tok strong long mi se: ‘?Yu yu save wanem we mifala i save mekem long yu?’ Mi mi ansa se: ‘Yu save mekem nomo wanem we Jeova i letem yu blong mekem.’ Hem i ansa bak se: ‘!Yu yu krangke! !Yu aot long ples ya!’ ”

Olgeta brata mo sista long Albania oli soem gudfala fasin ya blong stanap strong long ol trabol yia ya. Long 1957, Albania i kasem wan niufala namba blong 75 man we oli talemaot Kingdom. Long stat blong ol yia 1960, hedkwota blong ol Witnes blong Jeova i sanem John Marks, wan man Albania we i laef long Yunaeted Stet, i go long Tiranë blong givhan long Kristin wok longwe. * Be, i no longtaem, gavman i sanem Luçi Xheka, Mihal Sveci, mo Leonidha Pope, mo sam narafala brata, oli go mekem strongfala wok long ol kamp blong presina.

I Gat Hop Se Trabol Bambae i Finis

Long ol yia bifo long 1967, ol man Albania oli no agri tumas long ol skul. Be afta long yia ya, oli no moa letem ol Katolik, Otodoks, no ol pris blong Muslim, oli mekem ol prea blong olgeta. Ol jos haos mo ol haos prea blong ol muslim i kam ol haos blong spot, ol musium, no ol ples blong maket. Oli no letem man i gat wan Baebol. Man i no gat raet blong talemaot se hem i bilif long God.

I no isi blong go prij mo blong joen wanples long ol miting. Ol Witnes wanwan oli traem bes blong mekem wok blong Jeova, nating se oli no joen wetem ol narafala Witnes. Long 1960 go kasem 1980, namba blong ol Witnes i smol nomo. Be, oli strong long saed blong spirit.

Long en blong ol yia 1980, gavman blong Albania i jenis smol. I no gat naf kakae mo klos. Ol man oli no glad. Ol jenis we i hapen long is blong Yurop i kasem Albania long stat blong ol yia 1990. Biaen, totalitarian * gavman we i bin rul blong 45 yia, i foldaon, mo wan niufala gavman i letem ol skul oli fri bakegen blong mekem wosip.

Folem oda blong Hed Kampani blong ol Witnes blong Jeova, kwiktaem nomo branj ofis long Ostria mo Gris oli sanem toktok i go long ol brata long Albania. Sam brata blong Gris we oli save long sam brata blong Albania, oli karem sam niufala buk we oli tanem finis long lanwis Albania, i go long Tiranë mo Berat. Ol brata ya we oli harem nogud bifo, be naoia hat blong olgeta i fulap long glad, taem oli mitim ol Witnes blong narafala kantri bakegen afta long plante yia.

Ol Paenia Blong Narafala Kantri Oli Strong Blong Lidim Wok

Long stat blong 1992, Hed Kampani i sanem Michael mo Linda DiGregorio tufala i go long Albania. Tufala i misinari we tufala i savegud laef blong ol man Albania. Tufala i toktok wetem ol olfala we oli stanap strong, mo givhan long olgeta blong kam joen tugeta bakegen olsem haf long wan bigfala famle long saed blong spirit long ful wol. Long Novemba blong semfala yia ya, i gat 16 spesel paenia blong Itali oli kam long Albania wetem 4 paenia blong Gris. Oli ogenaesem wan kos blong givhan long ol paenia ya blong lanem lanwis blong Albania.

Ol paenia ya we oli kam, oli harem se laef longwe i no isi. Lektrik i kam sam samtaem nomo. Taem blong kolkol i wetwet mo i kol we i kol. Ol man oli mas stanap long laen blong plante aoa blong kasem kakae mo samting we oli nidim blong laef. !Be, bigfala traem blong ol brata, hemia blong faenem wan haos we i bigwan inaf blong mekem miting wetem olgeta we oli intres long trutok!

 Ol paenia we oli traehad blong lanem lanwis Albania oli faenemaot se lanwis hem i wan tul nomo blong mekem wok blong olgeta. Wan tija we i savegud Baebol i talem long olgeta se: “Blong smael no holem ol brata blong yumi, i no nid blong yumi savegud lanwis blong olgeta. Ol man Albania oli glad long lav we yumi soemaot nating se yumi no savegud olsem wanem blong toktok long lanwis blong olgeta. Yufala i no wari, bambae oli kasem save.”

Afta faswan kos long lanwis ya Albania, ol paenia oli stat blong mekem wok long Berat, Durres, Gjirokastër, Shkodër, Tiranë, mo Vlorë. I no longtaem namba blong ol kongregesen i gru bigwan long ol taon ya. Areti Pina, we naoia i gat 80 yia mo helt blong hem i nogud, i stap laef yet long Vlorë. Oli sanem tu spesel paenia i go long Vlorë blong prij wetem Areti. Ol man oli sapraes blong luk se, olgeta blong narafala kantri oli toktok long lanwis Albania, oli talem se: “!Ol misinari blong narafala skul oli mekem mifala i lanem Inglis no lanwis Itali sipos mifala wantem lanem wan samting! !Ating yufala i rili laekem mifala mo gat wan impoten samting blong talem long mifala, taswe yufala i lanem lanwis blong Albania!” Areti i finisim wok blong hem long wol ya long Jenuware 1994. Hem i mekem wok blong prij go kasem manis we hem i ded. Jeova i blesem strong tingting we Areti mo ol paenia ya oli gat. Long 1995, wan kongregesen i stanap bakegen long Vlorë. Tede, i gat tri kongregesen we oli stap bisi blong prij long taon ya we i stap klosap long solwota.

Long kantri ya, ol man oli hanggri long saed blong spirit mo oli no agens tumas long man blong narafala skul. Oli glad blong ridim ol buk blong Baebol we oli kasem long ol Witnes. Plante yangfala oli stat blong stadi Baebol mo oli gohed gud.

Bitim 90 kongregesen mo ol smolsmol grup oli gohed “blong kam strong moa long bilif blong olgeta, mo evri dei, namba blong olgeta i stap kam antap moa” long kantri ya. (Ol Wok 16:5) Ol 3,513 Witnes long Albania oli gat fulap wok yet blong mekem. Long Maj 2005, i gat 10,144 man oli kam long Memoriol blong ded blong Kraes. Gudfala storian we ol Witnes oli mekem long wok blong prij wetem ol man Albania we oli intres, i pulum bitim 6,000 man blong stadi Baebol. Mo tu, Baebol ya New World Translation we i kamaot long lanwis Albania i no longtaem, bambae i givhan bigwan long plante taosen man. Tru ya, tok blong Jeova i stap gru bigwan long “Kantri blong Igel” mo samting ya i presem Jeova.

[Ol Futnot]

[Bokis blong pija long pej 20]

!FAET BITWIN OL LAEN I FINIS LONG KOSOVO!

Long en blong ol yia 1990, ol man oli harem nem ya Kosovo plante taem, from faet we i kamaot long kantri ya bitwin ol man we oli rao long graon mo ol laen we oli agensem narafala laen. Ol narafala kantri blong wol oli mas kam blong givhan blong stopem faet ya.

Taem we faet i stap gohed long ol kantri blong Balkan, plante Witnes oli mas ronwe i go long ol narafala kantri. Afta we wo i godaon smol, wan smol grup blong olgeta i gobak long Kosovo, mo oli rere blong mekem wok blong prij. Sam spesel paenia blong Albania mo Itali oli glad blong muf i go long Kosovo blong givhan long ol 2,350,000 man we oli laef long kantri ya. I gat fo kongregesen mo sikis smol grup we oli gohed gud, mekem se i gat 130 pablisa we oli stap mekem wok blong Jeova long Kosovo.

Long 2003, taem ol tri oli stap putum flaoa, oli holem spesel dei asembli long taon ya Piština, mo i gat 252 man oli kam. Long olgeta ya i gat sam blong Albania, Jemani, Itali, sam Jipsi mo sam man Sebia. Long en blong tok blong baptaes, brata we i givim tok i askem tu kwestin long trifala we i rere blong baptaes, mo trifala i glad blong ansa yes. Trifala ya i gat wan man Albania, wan woman Jipsi, mo wan woman Sebia.

Ol man we oli hivap oli klaphan gogo noes blong olgeta i olsem tanda, taem oli harem trifala ya oli ansa long lanwis blong trifala se: “!Va!” long lanwis blong ol Jipsi, “!Da!” long lanwis Sebia mo “!Po!” long lanwis Albania. Trifala ya oli holem trifala from we oli glad. Oli faenem ansa long ol stamba problem we i mekem se kantri blong olgeta i gat ol faet bitwin ol laen blong man.

[Map blong pija long pej 17]

(Lukluk niuspepa)

Mediterenian Si

ITALI

ALBANIA

GRIS

[Tok blong pija long pej 18]

Ol yangfala Witnes we oli folem eksampol blong ol olfala we oli wok strong

[Tok blong pija long pej 18]

Areti Pina i holemstrong long Jeova long 1928 go kasem we hem i ded long 1994

[Tok blong pija long pej 19]

Faswan grup blong ol paenia blong narafala kantri we oli lanem lanwis blong Albania

[Foto Credit Line blong pija long pej 16]

Eagle: © Brian K. Wheeler/VIREO