?Wanem Kaen Edukesen i Save Givhan Long Yu Blong Winim Ol Trabol Long Laef?

?SAMTAEM ol problem we yu kasem oli mekem yu yu harem olsem we yu stap draon long dip solwota? !Traem tingbaot sipos yu mekem mastik taem yu stap traem blong stretem wan long ol problem ya! Ating samting ya i save mekem yu yu safa bigwan. I no gat wan man we i bon wetem save ya blong stretem gud olgeta problem no we evritaem hem i mekem ol gudfala desisen. Hemia nao from wanem i gud blong gat edukesen. ?Weples yu save kasem edukesen we i save rerem yu blong dil wetem ol problem long laef?

Plante yangfala mo olfala oli luksave se wan gudfala edukesen long skul i impoten. Sam man we oli gat gud save oli talem se oli “bilif fulwan se neva wan man i naf blong faenem wan gudfala wok sipos hem i no gat ol pepa blong yunivesiti.” Be nating se maet hae edukesen i givhan long man blong kasem wok be i gat sam nid blong man we hae edukesen i no givim. ?Olsem wanem? ?Hae edukesen i halpem yu blong kam wan gudfala papa no mama, wan gudfala hasban no waef, no wan gudfala fren? Sam man we ol narafala oli tinghae long olgeta from we oli gat hae save, oli gat sam nogud fasin, no maet oli no haremgud insaed long famle blong olgeta, mo samtaem oli kilim olgeta wan i ded.

Samfala oli go long jos blong kasem advaes. Jos hem i wan ples blong kasem edukesen tu. Be tingting blong ol man ya i foldaon from we oli no kasem advaes we i save halpem olgeta blong fesem ol trabol long laef blong olgeta. Emilia * blong Meksiko i talem se: “Fiftin yia bifo, mi harem olsem se mi mo hasban blong mi, mitufala i no moa save stap tugeta. Mitufala i raorao oltaem. Mi no save blokem hem blong drong. Klosap oltaem mi mas lego ol pikinini oli stap olgeta nomo long haos from we mi mas go lukaotem hasban blong mi. Mi harem mi taed long hem. Plante taem mi go long jos blong kasem wan samting we i save givhan long mi blong faenem rod blong stretem problem ya. Nating se long jos oli yusum Baebol be mi neva harem wan advaes nating we i stret long problem blong mi mo i no gat man nating we i kam luk mi blong talem long mi wanem we mi save mekem. Fasin ya we mi go long jos blong sidaon mo ripitim baehat sam prea, i no mekem mi mi harem gud.” Sam narafala maet oli harem nogud from we oli luk se ol lida blong jos blong olgeta oli no soemaot gudfala eksampol long saed blong laef. From samting ya, plante man oli no moa trastem ol jos olsem ples we oli save kasem edukesen, no trening, we oli nidim blong winim ol problem blong olgeta.

Ale, maet yu yu askem se, ‘?Wanem kaen edukesen i save givhan long mi blong winim ol trabol long laef?’ ?Trufala Kristin skul i gat ansa long kwestin ya? Bambae yumi tokbaot ansa blong ol kwestin ya long haf we i kam biaen.

[Futnot]