?Bambae Yu Yu Wokbaot Wetem God?

“Yu mas wokbaot wetem God we tingting blong yu i stap daon.” —MAEKA 6:​8, NW.

1, 2. ?Olsem wanem ol filing we Jeova i gat long yumi i sem mak long wan papa no mama we i tijim pikinini blong hem blong wokbaot?

 TRAEM tingbaot faswan taem we wan bebi i wokbaot. Nating se leg blong hem i no strong gud yet, be hem i wantem tumas blong wokbaot i go kasem papa no mama blong hem. Maet hemia i wan smol samting nomo, be long tingting blong mama mo papa, ol faswan step ya we pikinini i mekem, oli rerem hem from fiuja blong hem. Papa mo mama ya tufala i wantem tumas se long ol manis mo yia we oli kam, bambae tufala i save wokbaot wetem pikinini blong tufala. Tufala i stap tingbaot finis, olsem wanem bambae tufala i save soem rod mo givhan long pikinini blong tufala taem hem i stap gruap gogo kasem taem we hem i bigman.

² Filing we Jeova i gat long ol man blong hem long wol i sem mak long filing ya we papa mama i gat long pikinini. Wan taem bifo, Jeova i bin talem tok ya long ol man Isrel, i se: “Mi nomo mi lanem olgeta blong wokbaot, mo mi stap karemgud olgeta long han blong mi, . . . Mi mi stap mekem long olgeta olsem wan pikinini blong mi, we mi lavem hem, mo mi sore tumas long hem, nao oltaem mi stap pulum hem i kam long mi.” (Hosea 11:​3, 4) Long ples ya, Jeova i tokbaot hem wan olsem wan papa we i gat lav mo we i gat longfala tingting blong tijim pikinini blong hem blong wokbaot. Samtaem hem i mas karem pikinini long han blong hem taem pikinini ya i foldaon. Yes, Jeova i Beswan Papa we yumi save gat mo hem i wantem tumas blong tijim yumi olsem wanem blong wokbaot. Mo hem i glad blong wokbaot wetem yumi long olgeta taem ya we yumi stap kam strong moa. !Olsem stamba vas blong stadi ya i talem, yumi save wokbaot wetem God! (Maeka 6:8) ?Be wokbaot wetem God i minim wanem? ?From wanem yumi mas mekem olsem? ?Mo olsem wanem yumi save mekem olsem? ?Mo bakegen, wanem blesing i stap taem yumi wokbaot wetem God? I gud yumi tokbaot wanwan long ol fo kwestin ya.

?Wokbaot Wetem God i Minim Wanem?

3, 4. (a) ?From wanem pijatok ya se yumi wokbaot wetem God i nambawan? (b) ?Wanem mining blong tok ya wokbaot wetem God?

³ Jeova hem i wan spirit man. Taswe, yumi ol man long wol ya, yumi no save stanap long saed blong hem stret mo wokbaot wetem hem. (Eksodas 33:20; Jon 4:24) Taem Baebol i talem se man i wokbaot wetem God, hemia wan pijatok. Hem i blong soemaot wan fasin we i no gat kantri mo kalja i save blokem, mo nating se taem i pas be wokbaot ya i no save finis. Tru ya, fasin blong wokbaot wetem narafala, hem i wan fasin we i stap bifo, tede, mo long fiuja tu, hem i no wan samting we bambae i lus. Hem i wan gudfala pijatok blong soemaot fasin blong tu man we tufala i laekem tufala mo tufala i frengud. Ol filing ya oli soemaot se i olsem wanem taem yumi wokbaot wetem God. Be i gud sipos yumi traem kasem save we i klia moa long saed ya.

⁴ Tingbaot tufala man ya, Inok mo Noa, we tufala i  strong long bilif. ?From wanem Baebol i talem se tufala i wokbaot wetem God? (Jenesis 5:​24, NW; 6:​9, NW ) Plante taem, long Baebol, tok ya “wokbaot” i minim wan man we i folem wan fasin blong laef. Inok mo Noa, tufala i jusum wan fasin blong laef we i laenap wetem wanem we Jeova God i wantem. Tufala i no olsem ol narafala man long taem blong tufala from we tufala i lukluk i go long Jeova blong i lidim tufala, mo tufala i obei long Hem. Tufala i trastem hem. ?Hemia i min se Jeova i tekem ol desisen long ples blong tufala? Nogat. Jeova i mekem man i fri blong jus, mo hem i wantem we yumi yusum fasin fri ya blong yumi ‘wetem tingting’ blong yumi. (Rom 12:1) Be blong mekem ol desisen, yumi putum yumi i stap daon blong letem save blong Jeova we i hae moa long save blong yumi i lidim tingting blong yumi. (Ol Proveb 3:​5, 6; Aesea 55:​8, 9) Taem ol yia blong laef blong yumi oli stap pas, i olsem we yumi stap wokbaot, mo long wokbaot ya Jeova i stap wetem yumi.

5. ?From wanem Jisas i yusum tok ya kiubit blong talem se yumi no save mekem laef blong yumi i longfala moa?

⁵ Plante taem Baebol i tokbaot laef blong wan man olsem wan wokbaot we man i mekem taem hem i aot long wan ples blong go long nara ples. Samtaem, Baebol i talem stret se laef i wan ‘wokbaot’, be samtaem hem i yusum tok we i givim tingting olsem. Eksampol, Jisas i talem se: “?Yufala i ting se taem man i stap tingting tumas from laef blong hem we i sotfala nomo, bambae i save mekem laef blong hem i kam longfala moa long fasin ya [olfala hanraet i rid se: “i save ademap wan kiubit long laef blong hem”]?” (Matiu 6:27) ?From wanem Jisas i yusum tok ya “kiubit” we man i yusum blong makem longfala blong wan samting, blong tokbaot ol yia blong laef we yumi no save makem long kiubit? * Ating from we Jisas i tingbaot laef olsem wan wokbaot no trip we man i mekem blong go kasem wan ples. Yes, Jisas i wantem tijim se wari bambae i no halpem yumi blong mekem wokbaot blong yumi, no ol yia blong laef blong yumi, oli longfala moa. ?Be olsem wanem nao? ?Hemia i min se i no gat wan samting we yumi save mekem blong wokbaot ya i longfala moa? !No, i no minim olsem! Taswe i gat wan narafala kwestin nao blong tingbaot se, ?From wanem yumi mas wokbaot wetem God?

?From Wanem Yumi Mas Wokbaot Wetem God?

6, 7. ?Ol sinman oli nidim wanem? ?Mo from wanem i stret blong lukluk i go long Jeova blong i givim samting ya we yumi nidim?

⁶ Wan risen from wanem yumi mas wokbaot wetem Jeova God, i stap long Jeremaea 10:23: “[Jeova]. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” Taswe yumi ol man, yumi no naf, mo yumi no gat raet tu, blong bos mo lidim laef blong yumi. Yumi nidim we God i lidim yumi. Ol man we oli mekem stronghed se oli wantem gowe long God, oli mekem semfala mastik we Adam mo Iv tufala i mekem. Faswan man mo woman ya, tufala i talem se tufala i gat raet blong jusumaot wanem i gud mo wanem i nogud. (Jenesis 3:​1-6) Be “i no gat man” we i kasem raet ya.

⁷ Tru ya, yumi rili nidim wan man blong lidim yumi long wokbaot blong yumi tru long laef. Evri dei, yumi fesem ol desisen, sam oli bigwan sam oli smol. Sam long ol desisen ya oli hadwok blong mekem mo oli save jenisim laef blong yumi, mo oli save jenisim laef blong ol fren mo famle blong yumi tu. Be tingbaot se i gat wan man we i olfala moa long yumi mo i waes moa long yumi, i gat gladhat mo lav blong halpem yumi blong tekem ol stret desisen. Plante man tede oli trastem moa prapa tingting blong olgeta mo oli laekem moa blong lidim olgeta wan. Oli no wantem save long trutok ya we i stap long Ol Proveb 28:26 we i se: “Man we oltaem i stap folem tingting blong hem nomo, hem i krangke we i bitim mak. I moa gud yu stap folem tok blong ol waes man, we oli stap tijim yu long hem.” Jeova i wantem blokem yumi blong yumi no kasem ol trabol ya we i kamaot taem man i trastem tingting blong hem nomo we i save giaman bigwan. (Jeremaea 17:9) Hem i wantem we yumi wokbaot wetem waes fasin. Hem i wantem we yumi trastem hem olsem Man ya we i save lidim yumi mo tijim yumi. Taem yumi mekem olsem, yumi harem se wokbaot blong yumi long laef i sef, i gat mining mo yumi harem gud long hem.

8. ?Sin i lidim olgeta man oli go wea? ?Be, Jeova i wantem se yumi kasem wanem?

⁸ Wan narafala risen from wanem yumi mas wokbaot  wetem God, hemia sipos yumi wantem we wokbaot ya i longfala. Baebol i talemaot wan tok we i tru tumas. Hem i talem se olgeta sinman oli stap wokbaot i go blong kasem sem ples nomo. Prija 12:5 i tokbaot ol trabol we ol man oli kasem taem oli kam olfala, i se: “Bambae yumi evriwan i mas go slip long las ples blong yumi, we bambae yumi stap [“longtaem,” NW ] long hem. Mo olbaot long ol bigrod, bambae ol man oli stap harem nogud, oli stap krae.” ?Wanem ya “las ples blong yumi, we bambae yumi stap longtaem long hem”? Hemia gref, we sin i tekem evri man i go long hem. (Rom 6:23) Be, Jeova i no wantem se wokbaot blong man i sot nomo, olsem se hem i bon i kam long wol ya blong kasem trabol nomo nao i go long gref. Nogat. (Job 14:1) Sipos yumi wokbaot wetem God bambae yumi save gohed blong wokbaot blong olwe olsem we hem i bin wantem fastaem. ?Hemia nao samting we yu yu wantem? Taswe, i klia se yu nidim blong wokbaot wetem God we i Papa blong yu.

?Olsem Wanem Blong Wokbaot Wetem God?

9. ?From wanem samtaem i olsem we Jeova i tanem fes blong hem, i no wantem lukluk ol man blong hem? ?Be wanem gudfala toktok i stap long Aesea 30:20?

⁹ Namba tri kwestin we bambae yumi tokbaot i rili impoten. Hemia: ?Olsem wanem blong wokbaot wetem God? Ansa blong kwestin ya i stap long Aesea 30:​20, 21: “Bambae yufala i no moa save traehad blong faenem hem [Bigfala Tija blong yufala], from we bambae yufala i luksave we hem i stap klosap long yufala blong tijim yufala. Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod. Yufala i folem.’ ” Ating ol tok blong Jeova long vas 20 oli mekem ol man Isrel oli tingbaot se taem oli mekem stronghed agensem hem, hem i tanem fes blong hem i gowe long olgeta, i olsem we hem i haed. (Aesea 1:15; 59:2) Be, vas ya i no tokbaot Jeova se hem i tanem fes blong hem i gowe long ol gudfala man blong hem. Vas ya i talem se Jeova i stap stanap long klia ples fored long olgeta ya, olsem wan tija we i stap stanap fored long ol studen blong hem, i stap soemaot long olgeta wanem we oli mas lanem.

10. ?Olsem wanem yumi ‘harem voes blong [Bigfala Tija] blong yumi biaen long yumi’?

¹⁰ Vas 21 i tokbaot wan narafala pijatok. Hem i tokbaot Jeova olsem we i stap wokbaot biaen long ol man blong hem, i stap talem long olgeta wanem rod blong folem. Sam man we oli stadi long ol tok long Baebol, oli faenemaot se ating tok ya i laenap wetem fasin blong man blong lukaot long sipsip. Samtaem, man olsem i wokbaot biaen long ol sipsip blong hem, olsem nao hem i save toktok i go long olgeta blong talem long olgeta wanem rod blong folem no blong blokem olgeta blong oli no folem rong rod. ?Olsem wanem pijatok ya i laenap wetem wokbaot blong yumi? Ale tingbaot. Taem yumi lukaot ol tok blong God long Baebol, blong lidim yumi, yumi stap ridim ol tok we ol man oli raetem plante taosen yia bifo. I olsem we ol tok ya blong bifo oli stap biaen long yumi. Be ol tok blong olgeta oli stret yet long laef blong yumi tede, olsem we oli stret tu long ol man bifo. Ol advaes blong Baebol oli lidim yumi long ol desisen we yumi mas mekem evri dei, mo oli halpem yumi blong plan from ol yia we oli stap kam. (Ol Sam 119:105) Taem yumi lukaotem advaes ya mo  yumi folem, ale i min se Jeova i stap lidim yumi. Yes, i min se yumi stap wokbaot wetem God.

11. ?Long Jeremaea 6:​16, wanem pijatok we Jeova i talem long ol man blong hem, be olgeta ya oli mekem wanem?

¹¹ ?Yu yu stap letem Tok blong God i lidim yu fulwan? I gud we samtaem yumi tekem smoltaem blong jekemap yumi. Tingbaot ol tok blong vas ya we i save halpem yumi blong mekem olsem: “[Jeova] i talem se, ‘Olgeta. Mi mi talem long yufala, se yufala i go stanap long ples we ol rod i joen long hem, mo yufala i traem askem long ol man se, “?Ol rod ya we i blong bifo, weswan long olgeta i gudfala rod blong folem?” Mo taem oli soemaot wan rod long yufala, be rod ya nao, bambae yufala i wokbaot long hem, nao yufala i save stap gud, we yufala i gat pis long laef blong yufala.’ ” (Jeremaea 6:16) Wan man we i stap wokbaot nao i kasem wan ples we ol rod oli joen long hem, maet hem i stop fastaem blong askem long ol man se weswan rod we i stret blong folem. Ol man Isrel we oli go agensem Jeova oli mas mekem sem mak, be long saed blong spirit. Oli mas kambak long “ol rod ya we i blong bifo.” “Gudfala rod” ya hemia rod we ol bubu blong olgeta oli bin wokbaot long hem bifo, mo we ol man Isrel oli gowe long hem. Be sore tumas, ol man Isrel oli gohed blong mekem stronghed, oli no wantem lesin long advaes ya blong Jeova. Semfala vas ya long Jeremaea i talem se: “Be yufala i girap, yufala i talem se, ‘!No! !Mifala i no wantem go!’ ” Long taem blong yumi, ol man blong God oli no mekem olsem.

12, 13. (a) ?Olsem wanem ol tabu brata blong Kraes oli folem tok blong Jeremaea 6:16? (b) ?Olsem wanem yumi save jekemap rod we yumi stap folem?

¹² Klosap long en blong ol yia 18 handred, ol tabu brata blong Kraes oli folem tok blong Jeremaea 6:16. Grup blong ol tabu brata ya oli mekemap tingting blong olgeta fulwan blong gobak long ‘ol rod ya blong bifo.’ Oli no mekem olsem Krisendom * we i lego trufala God, be oli traem bes blong olgeta blong ‘holem strong ol tok ya we [Jisas Kraes] i tijim finis’ mo we ol man blong hem oli bin strong blong folem long faswan handred yia K.T. (2 Timoti 1:13) Ol tabu brata ya oli stap givgivhan long olgeta mo ol “narafala sipsip” tu blong oli gohed folem rod ya blong laef we i gud mo i hapi. Rod ya nao we Krisendom i lego longtaem finis.​—Jon 10:16.

¹³ Taem slef we i stret mo waes i givim kakae long stret taem blong hem, hem i halpem plante milian man blong faenem mo wokbaot wetem God, folem “ol rod ya we i blong bifo.” (Matiu 24:​45-47, NW ) ?Yu yu wan long olgeta milian man ya? Sipos yes, ?yu save mekem wanem blong lukaot se yu no gowe long rod ya blong folem tingting blong yu nomo? Wanwan taem, i waes blong jekemap yu wan blong luk se yu stap wokbaot folem wanem rod. Sipos yu ridim Baebol mo ol buk we oli tokbaot Baebol mo yu joen long ol miting mo asembli we ol tabu brata oli wokem tede, hemia i min se yu stap kasem trening blong wokbaot wetem God. Mo taem yu gat tingting daon mo yu folem ol advaes we oli givim long yu, ale yu rili stap wokbaot wetem God, yu stap folem “ol rod ya we i blong bifo.”

Wokbaot Olsem We Yu “Luk God Ya We Man i No Save Luk”

14. ?Sipos yumi bilif se Jeova i rili stap, bambae yumi mekem olsem wanem taem yumi tekem ol desisen?

¹⁴ Sipos yumi wantem wokbaot wetem Jeova, long tingting blong yumi, yumi mas sua fulwan se God i stap. Tingbaot wanem we Jeova i talem long ol man Isrel we oli stap tru long hem. Hem i talem se hem i stap wetem olgeta, hem i no haedem fes blong hem long olgeta. Tede tu, hem i soemaot long ol man blong hem se hem i Bigfala Tija blong olgeta. ?Yu yu rili bilif se Jeova i stap, olsem we hem i stap stanap long fored blong yu i stap tijim yu? Yumi mas bilif long samting ya sipos yumi wantem wokbaot wetem God. Moses i bilif olsem, taswe “i stap gohed olwe nomo, olsem we i stap luk God ya we man i no save luk long ae blong hem.” (Hibrus 11:27) Sipos yumi bilif se Jeova i rili stap, ale bambae yumi tingbaot ol filing blong hem taem yumi mekem ol desisen blong yumi. Olsem nao, bambae yumi neva tingbaot blong mekem wan samting we i nogud mo traem blong haedem sin blong yumi blong ol Kristin elda  no famle blong yumi oli no save. Defren olgeta, bambae yumi traem wokbaot wetem God oltaem, nating se man i luk yumi no nogat. Yumi mekemap maen blong yumi blong mekem olsem King Deved bifo: “Long haos blong mi, bambae mi stap folem ol fasin we i klin gud long fes blong yu.”​—Ol Sam 101:2.

15. ?Olsem wanem kampani blong ol Kristin brata mo sista i halpem yumi blong bilif strong se Jeova i rili stap?

¹⁵ Jeova i save se yumi sinman, mo from samting ya, samtaem bambae yumi faenem i had blong bilif long wan samting we yumi no save luk. (Ol Sam 103:14) Taswe, hem i mekem plante samting blong halpem yumi blong winim slak fasin ya. Wan samting we hem i mekem, hemia se hem i hivimap wan bigfala grup blong man we oli kamaot long olgeta kantri long wol blong “oli holem nem blong hem.” (Ol Wok 15:14) Taem yumi wok wanples tugeta wetem grup ya, yumi givgivhan long yumi. Taem yumi harem nius blong wan Kristin brata no sista blong yumi we Jeova i halpem hem blong winim wan slak fasin blong hem, no blong winim wan strongfala traem, ale yumi bilif moa se God i rili stap.​—1 Pita 5:9.

16. ?Olsem wanem save long saed blong Jisas i save halpem yumi blong wokbaot wetem God?

¹⁶ Antap long samting ya, Jeova i givim Pikinini blong hem we i olsem wan eksampol blong yumi. Jisas i talem se: “Mi nao rod ya, mo mi mi stamba blong trutok, mo mi stamba blong laef. I no gat man i save kam long Papa blong mi, sipos mi mi no tekem hem i kam.” (Jon 14:6) Taem yumi stadi long laef blong Jisas long wol ya, hemia wan gudfala rod blong luksave se Jeova i rili stap. Evri samting we Jisas i talem no mekem i stret pija blong ol tingting mo fasin blong Papa blong hem long heven. (Jon 14:9) Taem yumi mekem ol desisen, yumi mas tingtinggud se, sipos Jisas i stap long ples blong yumi, bambae hem i mekem wanem. Sipos yumi tingtinggud olsem mo yumi prea bifo we yumi mekem ol desisen blong yumi, ale yumi stap biaenem Kraes. (1 Pita 2:21) Long rod ya tu, yumi stap wokbaot wetem God.

?Wanem Blesing i Save Kamaot From?

17. ?Sipos yumi wokbaot long rod blong Jeova, bambae yumi “stap gud” olsem wanem?

¹⁷ Man we i wokbaot wetem Jeova God hem i glad long laef blong hem. Tingbaot wanem we Jeova i promes blong givim long ol man we oli lukaot “gudfala rod.” Hem i se: “Yufala i wokbaot long hem, nao yufala i save stap gud, we yufala i gat pis long laef blong yufala.” (Jeremaea 6:16) ?Tok ya “stap gud” i minim wanem? ?Hem i min se laef blong yumi i isi mo yumi gat plante samting? No, i no minim olsem. Jeova i save givim wan samting we i moagud yet, we ol bigbigfala rijman long wol ya tu oli no save faenem. Hem i save givim pis long tingting blong yu, glad long hat blong yu, mo filing blong harem gud from we yu yu fulapgud long saed blong spirit. Taem yu stap gud olsem, ale yu save sua se yu jusum beswan rod ya. !Long wol ya we i had tumas, i no gat plante man we oli gat pis long tingting!

18. ?Wanem blesing we Jeova i wantem givim long yu, mo tingting blong yu i strong blong mekem wanem?

¹⁸ I tru se laef i wan bigfala blesing. Nating se laef blong yumi i sot, hemia i moagud yet i bitim we yumi no gat laef nating. Be Jeova i no gat tingting ya se wokbaot blong yumi tru long laef ya i stat taem yumi bon mo i go finis nomo taem yumi olfala. Nogat. Jeova i wantem we yu gat blesing ya we i gud moa i winim ol narafala blesing. Hem i wantem we yu wokbaot wetem hem blong olwe. Hemia nao wanem we Maeka 4:5 i tokbaot: “Nating we olgeta man long wol ya oli stap mekem wosip long ol god blong olgeta, mo oli stap obei long olgeta, be yumi ya, Hae God i God blong yumi, mo bambae yumi stap mekem wosip long hem, mo yumi stap obei long hem oltaem nomo, gogo i no save finis.” ?Yu yu wantem kasem blesing ya? ?Bambae yu yu kasem laef ya we Jeova i talem se hem i “prapa wan”? (1 Timoti 6:19) Ale, i gud we tingting blong yu i strong blong wokbaot wetem Jeova tede, tumora, mo evri dei biaen, gogo i no save finis.

[Ol Futnot]

?Bambae Yu Yu Ansa Olsem Wanem?

• ?Wokbaot wetem God i minim wanem?

• ?From wanem yumi nidim blong wokbaot wetem God?

• ?Wanem i save halpem yu blong wokbaot wetem God?

• ?Ol man we oli wokbaot wetem God oli kasem wanem blesing?

[Kwestin]

[Tok blong pija long pej 23]

Taem yumi ridim Baebol, i olsem we yumi stap harem voes blong Jeova we i stap biaen long yumi, i stap singaot se “Hemia rod”

[Tok blong pija long pej 25]

Long ol miting, yumi kasem kakae long saed blong spirit long stret taem