Jeova i Lukaot Long Yumi Olsem We Yumi Sipsip Blong Hem

“[Jeova] i stap lukaot gud long mi olsem we mi mi sipsip blong hem, nao mi no save sot long wan samting.”​—OL SAM 23:1.

1-3. ?From wanem yumi no sapraes we Deved i skelem fasin blong Jeova wetem fasin blong man blong lukaot long sipsip?

 ?SIPOS oli askem long yu blong eksplenem olsem wanem Jeova i stap lukaot long ol man blong hem, bambae yu talem wanem? ?Bambae yu yusum wanem pijatok blong soemaot fasin kea we hem i gat long ol gudfala man blong hem? Bitim 3,000 yia bifo, King Deved i raetem ol naesfala toktok long buk long Ol Sam we i tokbaot fasin blong Jeova. Hem i yusum wan pijatok blong wan wok we hem i bin mekem bifo we hem i kam king.

² Taem Deved i yangfala, hem i stap lukaot long ol sipsip. Taswe hem i savegud fasin blong ol sipsip. Hem i save se sipos ol sipsip oli no gat man blong lukaot long olgeta bambae oli save lusum rod isi nomo, mo man i save stilim olgeta no ol wael anamol oli save kakae olgeta. (1 Samuel 17:​34-36) Sipos i no gat man blong lidim ol sipsip, maet bambae oli no save faenem gudfala ples we i gat gras long hem blong kakae. Taem Deved i kam olfala, ating hem i rimembagud olsem wanem hem i bin spenem plante aoa blong lidim ol sipsip blong hem, protektem olgeta, mo givim kakae long olgeta.

³ Ale, yumi no sapraes se taem Deved i wantem tokbaot fasin blong Jeova blong keagud long ol man blong hem, hem i tingbaot wok blong man blong lukaot long sipsip. Sam namba 23 we Deved i raetem, i stat wetem ol tok ya: “[Jeova] i stap lukaot gud long mi olsem we mi mi sipsip blong hem, nao mi no save sot long wan samting.” I gud yumi tingbaot from wanem pijatok ya i stret long Jeova. Nao biaen, taem yumi ridim Sam namba 23, bambae yumi luk olsem wanem Jeova i stap keagud long ol man blong hem olsem man blong lukaot long sipsip i stap lukaotgud long ol sipsip blong hem.​—1 Pita 2:25.

Wan Pijatok We i Stret

4, 5. ?Baebol i soemaot wanem long saed blong anamol ya sipsip?

⁴ Long Baebol, Jeova i karem plante defdefren taetel no nem. Mo ating taetel ya se hem i ‘Man blong lukaot long sipsip’ i beswan taetel blong soemaot kaengud fasin blong God. (Ol Sam 80:1) Blong kasem save from wanem i stret we Jeova i Man blong Lukaot long ol sipsip, yumi mas tingbaot tu samting. Faswan samting, hemia fasin blong ol sipsip. Mo seken samting, ol wok mo fasin blong wan man blong lukaot sipsip we i holem gud wok blong hem.

⁵ Plante taem, Baebol i tokbaot fasin blong ol sipsip se oli glad taem man we i lukaot long olgeta i kaengud long olgeta (2 Samuel 12:3), oli no stronghed (Aesea 53:7), mo oli no stap faetbak. (Maeka 5:8) Wan man we i lukaot long sipsip blong plante yia, i raetem wan buk, mo long buk ya hem i se: “Sam man maet oli ting se ol sipsip oli olsem ol narafala anamol we oli save lukaot long olgeta wan. Be nogat. Ol sipsip oli nidim we man i lukluk long olgeta mo i kea long evri smosmol samting we oli nidim, oli no olsem ol buluk, hos, no narafala anamol olsem.” Tru ya, sipos i no gat man blong lukaot long ol sipsip, ating ol sipsip bambae oli sik mo oli save ded tu.​—Esikel 34:5.

6. ?Wan diksonari long saed blong Baebol i talem wanem wok we ol man blong lukaot long sipsip oli mas mekem evri dei?

 ⁶ ?Wanem wok we man blong lukaot long sipsip i mas mekem evri dei? Wan diksonari we i eksplenem ol tok we Baebol i yusum, i eksplenem se: “Eli long moning, man blong lukaot long sipsip i wokbaot fored long ol sipsip blong hem, i lidim olgeta i go long ples we bambae oli stap long hem blong kakae gras. Nao hem i stap ful dei wetem olgeta, i stap wajem olgeta blong meksua se i no gat wan long olgeta i wokbaot i go longwe tumas. Mo sipos i gat wan long ol sipsip ya we oli wokbaot i go longwe, mo hem i no luk, nao sipsip ya i lus, bambae hem i go lukaot sipsip ya gogo hem i faenem, nao i karem hem i kambak. . . . Taem tudak i kam, hem i lidim ol sipsip oli gobak long yad blong olgeta, i kaontem olgeta wanwan taem oli pastru long get, blong meksua se i no gat wan i lus. . . . Plante taem hem i mas wajem olgeta bakegen long naet blong i no gat wael anamol i kam kakae olgeta, mo blong lukaot se i no gat stilman tu i stilim olgeta.” *

7. ?From wanem samtaem ol man blong lukaot long sipsip oli mas gat longfala tingting mo soem kaen fasin?

⁷ I gat sam taem we man blong lukaot long sipsip i mas gat longfala tingting moa mo soemaot moa filing. Hemia long taem we ol mama sipsip oli gat bel mo taem i gat smol bebi sipsip we i jes bon. (Jenesis 33:13) Wan buk we i eksplenem sam samting long saed blong Baebol i talem se: “Plante taem, ol mama sipsip oli bonem pikinini blong olgeta taem ol sipsip oli stap longwe, maet antap long ol hil. Ale, man blong lukaot long sipsip i mas stap klosap long mama ya, i mas gad long hem long taem ya we hem i no strong. Maet hem i pikimap smol bebi sipsip ya, i karem hem i gobak long yad. Maet man ya i mas karem sipsip ya insaed long kaliko blong hem blong sam dei, gogo kasem taem we hem i naf blong wokbaot.” (Aesea 40:​10, 11) Long ol tok ya, i klia se wan gudfala man blong lukaot long sipsip hem i mas wan strong man be i mas wan man we i gat kaen fasin tu.

8. ?Wanem ol risen we Deved i tokbaot blong soemaot from wanem hem i trastem Jeova?

⁸ ?Yu ting se tok blong Ol Sam i stret, taem i tokbaot Papa blong yumi long heven se hem i ‘stap lukaotgud long yumi olsem we yumi sipsip blong hem’? Taem yumi ridim olgeta tok blong Sam namba 23, bambae yumi luk olsem wanem we God i kea long yumi wetem paoa mo filing we i sem mak long hemia blong man blong lukaot long sipsip. Long vas 1, Deved i talemaot tras we hem i gat se God bambae i givim olgeta samting we ol sipsip blong Hem oli nidim, nao oli “no save sot long wan samting.” Long ol narafala vas long Sam ya, Deved i tokbaot tri risen from wanem hem i gat tras ya. Trifala risen ya se Jeova i lidim ol sipsip blong Hem, i protektem olgeta, mo i givim kakae long olgeta. I gud yumi tokbaot wanwan long trifala risen ya.

‘Hem i Stap Lidim Mi’

9. ?Wanem tok we Deved i yusum blong tokbaot ples we ol sipsip oli stap long hem? ?Mo olsem wanem ol sipsip oli save faenem wan ples olsem?

⁹ Faswan risen ya, hemia se Jeova i stap lidim ol man blong hem. Deved i raetem se: “Oltaem hem i stap putum mi mi spel gud long ples we i gat gudfala gras long hem. Hem i stap lidim mi mi go long kwaet ples we wota i stap ron smol long hem. Hem i stap mekem laef blong mi i niuwan bakegen, mo i stap lidim mi long ol stret rod, from we oltaem hem i stap lukaot gud long yumi.” (Ol Sam 23:​2, 3) Taem Deved i tokbaot ol sipsip ya se oli ledaon long wan ples we i kwaet mo i gat plante samting, hem i soemaot se ol sipsip ya oli gat olgeta samting we oli nidim, oli harem gud mo oli sef. Hibru tok ya we long Bislama oli tanem i kam “ples we i gat gudfala gras long hem,” i save minim “ples blong spel.” Ating ol sipsip ya oli no save faenem wan ples we i sef blong ledaon long hem sipos i no gat man blong lidim olgeta. Yes, man blong lukaot long sipsip nao i save lidim olgeta i go long “ples blong spel” olsem.

10. ?Olsem wanem God i soem se hem i trastem yumi?

¹⁰ ?Tede, Jeova i lidim yumi olsem wanem? Wan rod we hem i yusum, hemia tru long eksampol blong hem. Baebol i pulum yumi blong “traehad blong folem fasin blong hem.” (Efesas 5:1) Ol tok raonabaot long vas ya long Efesas oli tokbaot ol fasin ya olsem fasin sore, fasin fogif, mo lav. (Efesas 4:32; 5:2) I sua se, Jeova i soemaot beswan eksampol long saed blong ol fasin ya. ?Olsem wanem? ?I stret we hem i askem yumi man, blong yumi soemaot ol semfala fasin ya olsem hem? Yes, i stret. Tok ya we tabu spirit i pusum Pol blong raetem, hem i soemaot se Jeova i trastem yumi. ?Trastem yumi long wanem? God i wokem yumi blong yumi save tekem fasin blong hem, i min se yumi save gat ol fasin we oli gud mo yumi naf blong kasem save ol samting long saed blong spirit. (Jenesis 1:26) Taswe, Jeova i save se, nomata yumi  sinman, yumi save wokem ol semfala fasin ya we hem i soemaot long yumi. Tingbaot samting ya​—God blong yumi we i gat lav i trastem yumi se yumi save gat fasin olsem hem. Sipos yumi folem eksampol blong hem, bambae hem i lidim yumi i go long ol ples we oli ‘gudfala ples blong spel.’ Long wol tede we i fulap long raf fasin, bambae yumi harem se yumi sef, tingting blong yumi i kwaet from we yumi save se God i glad long yumi.​—Ol Sam 4:8; 29:11.

11. ?Taem Jeova i lidim ol sipsip blong hem, hem i tingbaot wanem, mo olsem wanem hem i soemaot samting ya taem hem i askem yumi blong mekem samting?

¹¹ Taem Jeova i lidim yumi, hem i gat filing long yumi mo longfala tingting tu. Wan man blong lukaot long sipsip i mas tingbaot wanem we ol sipsip blong hem oli no naf blong mekem, taswe hem i “wokbaot sloslo” sipos olgeta oli “wokbaot sloslo.” (Jenesis 33:14) Jeova tu i lidim ol sipsip blong hem folem spid blong olgeta. I min se hem i tingbaot wanem we oli naf blong mekem mo wanem trabol long laef blong olgeta we i mekem se maet oli no naf blong mekem sam samting. Yes, Jeova i jenisim spid blong hem blong mekem i laenap wetem spid blong ol sipsip blong hem, hem i neva askem olgeta blong givim moa i bitim wanem we oli naf blong givim. Be i gat wan samting we hem i wantem yumi evriwan blong mekem, hemia blong mekem wok blong hem wetem ful laef blong yumi. (Kolosi 3:23) ?Be olsem wanem sipos yu yu olfala mo yu no moa stap mekem wok olsem we yu bin mekem bifo? ?No olsem wanem sipos yu gat wan sik we i stap blokem yu blong mekem plante wok? Long taem ya nao yumi luksave se tok blong Jeova we i talem se man i mas mekem wok blong hem wetem ful laef blong hem, i leftemap tingting blong yumi. I no gat tu man we laef blong tufala i sem mak. Laef blong evri man i defren. Taswe, sipos yu mekem wok blong Jeova wetem ful laef blong yu, hemia i min se yu yusum paoa mo olting blong yu go kasem mak we yu wan yu naf blong kasem long wok blong God. Nating se sam samting oli mekem se yumi slo, be Jeova i tinghae long wosip we yumi mekem long ful hat blong yumi.​—Mak 12:​29, 30.

12. ?Wanem eksampol long Loa blong Moses we i soem se Jeova i lidim ol sipsip blong hem folem spid blong olgeta?

¹² Blong soemaot se Jeova i lidim ol sipsip blong hem folem spid blong olgeta, yumi save tingbaot sakrefaes we Loa blong Moses i talem se man i mas mekem from sin blong hem. Jeova i wantem we ol man oli givim gudfala sakrefaes, mo hem i wantem se oli givim sakrefaes ya from we oli gat tangkiu long hem wetem fulhat blong olgeta. Be Jeova i save se olgeta man evriwan oli no save givim sakrefaes we i sem mak. Taswe Loa i talem se: “Sipos man . . . i no save tekem wan sipsip . . . blong givim i kam long mi, bambae i save tekem tu sotleg no tu nawimba.” ?Be olsem wanem sipos man i pua tumas mo i no naf blong givim tu pijin? Ale hem i save tekem “wan kilo flaoa we i beswan” blong i givim olsem sakrefaes. (Levitikas 5:​7, 11) Hemia i soem se God i no askem samting long man we hem i no naf blong givim. God i no save jenis, taswe yumi glad se hem i no save askem yumi blong givim samting we yumi no naf blong givim. Yes, God i glad nomo blong tekem wanem samting we yumi naf blong givim long hem. (Malakae 3:6) !I gud tumas blong save se Man we i stap lidim yumi olsem sipsip blong hem, i kasem save long filing blong yumi!

“Mi No Save Fraet Long Wan Samting, From We Yu Yu Stap Wetem Mi”

13. ?Long Ol Sam 23:​4, Deved i yusum wanem tok we i soemaot se hem i frengud wetem Jeova? ?Mo from wanem hemia i no wan samting blong sapraes?

¹³ Deved i tokbaot namba tu risen from wanem hem i trastem Jeova, se: Jeova i protektem ol sipsip blong hem. “Nating we mi pas long ples we i tudak olgeta i ples blong ded, be mi mi no save fraet long wan samting, from we yu yu stap wetem mi. Yu stap blokemgud mi long nalnal blong yu mo long wokingstik blong yu, nao mi mi stap sef.” (Ol Sam 23:4) Long vas  ya, Deved i no moa yusum tok ya “hem” blong tokbaot Jeova be i yusum tok ya “yu.” Yumi no sapraes long samting ya from we ating Deved i stap tingbaot taem we God i bin halpem hem blong stanap strong tru long hadtaem. Plante taem, Deved i fesem denja long laef blong hem, olsem we hem i stap wokbaot long ples we i tudak olgeta. Be hem i no letem fraet i winim hem, from we hem i save se God i stap wetem hem mo se hem i rere blong blokemgud Deved long “nalnal” no “wokingstik” blong hem. From we Deved i save samting ya, hem i harem gud mo hem i kam klosap moa long Jeova. *

14. ?Olsem wanem tok blong Baebol i mekem yumi sua se Jeova bambae i protektem yumi? ?Be samting ya i no minim wanem?

¹⁴ ?Olsem wanem Jeova i protektem ol sipsip blong hem tede? Baebol i mekem yumi sua se bambae i neva gat wan man no wan rabis enjel we i naf blong finisim evri sipsip blong God long wol ya. Jeova i no save letem wan samting olsem i hapen. (Aesea 54:17; 2 Pita 2:9) Be hemia i no min se Man we i stap lukaot long yumi olsem sipsip blong hem, bambae i blokem yumi long evri trabol. Yumi fesem ol traem mo trabol olsem ol narafala man, mo tu ol man oli agensem yumi olsem we oli stap agensem olgeta trufala Kristin. (2 Timoti 3:12; Jemes 1:2) I gat sam taem we yumi trabol mo i olsem we yumi stap wokbaot long “ples we i tudak olgeta.” Eksampol, maet klosap yumi lusum laef blong yumi from we ol man we oli agensem bilif blong yumi oli kilim yumi, no maet yumi gat wan strongfala sik. Maet yumi lusum wan fren no famle long ded no maet oli kasem wan bigfala aksiden we i mekem se klosap oli ded. Long ol taem olsem, maet tingting blong yumi i harem nogud, i olsem yumi stap long wan ples we i tudak olgeta. Ale, Man blong lukaot long yumi olsem sipsip, hem i save stap klosap long yumi mo hem i save blokemgud yumi. ?Hem i mekem samting ya olsem wanem?

15, 16. (a) ?Olsem wanem Jeova i halpem yumi taem yumi fesem trabol? (b) Talem wan stori we i soemaot olsem wanem Jeova i save halpem yumi long taem blong trabol.

¹⁵ Jeova i no promes se bambae hem i mekem merikel blong sevem yumi. * Be yumi save sua se bambae Jeova i halpem yumi blong stanap strong tru long enikaen trabol we yumi kasem. Hem i save givim waes we yumi nidim blong yumi naf blong winim ‘plante samting we oli stap kam blong traem yumi.’ (Jemes 1:​2-5) Wan man blong lukaot long ol sipsip i holem wan nalnal no wan wokingstik blong ronem ol anamol no man we oli save spolem ol sipsip. Be hem i yusum samting ya tu blong lidim ol sipsip long stret rod. Long sem fasin, maet Jeova i sanem wan Kristin brata no sista i kam long yumi blong pulum yumi blong folem ol advaes blong Baebol we oli save mekem bigfala jenis long laef blong yumi. Antap long hemia, Jeova i save givim paoa long yumi blong yumi stanap strong longtaem. (Filipae 4:13) Hem i save sanem tabu spirit blong hem blong i mekem se yumi gat “paoa ya we i bigwan tumas.” (2 Korin 4:7) Tabu spirit blong God i save halpem yumi blong stanap strong long enikaen traem we Setan i save mekem blong agensem yumi. (1 Korin 10:13) ?Yu yu haremgud blong save se Jeova i rere oltaem blong halpem yu?

¹⁶ Yes, nomata wanem trabol we yumi stap long hem, we i olsem ples we i tudak olgeta, yumi no stap wokbaot yumi wan. Man blong lukaot long yumi olsem sipsip, i stap halpem yumi long sam rod we maet fastaem yumi no luksave. Tingbaot stori ya blong wan Kristin elda we i faenemaot se i gat kansa i stap gru long bren blong hem. Hem i se. “Mi talem stret se, fastaem, mi mi gat tingting ya se ating Jeova i kros long mi no maet hem i no laekem mi. Nating se i olsem, mi no lego Jeova. Mi talemaot ol wari blong mi long hem. Mo Jeova i halpem mi, i yusum ol Kristin brata sista blong leftemap tingting blong mi. Plante long olgeta oli talemaot sam tingting we i bin halpem olgeta taem oli bin kasem sam bigfala sik. Ol toktok blong olgeta oli stret mo oli givhan gud. Samting ya i mekem mi mi tingbaot se hadtaem ya we mi stap gotru long hem i no wan narakaen samting from we plante narafala man oli kasem sem hadtaem. Taem oli stap klosap long mi mo oli rere blong givhan long mi wetem kaengud fasin, hemia i mekem mi mi luksave se tingting ya we mi bin gat se Jeova i kros long mi, hem i no tru. Sik blong mi i stap yet, mo mi no save se long taem we i kam bambae mi olsem wanem. Be mi sua se Jeova i stap wetem mi, mo bambae i gohed blong halpem mi tru long trabol ya we i olsem wan traem long mi.”

“Yu Yu Mekemrere Wan Lafet Blong Mi”

17. ?Deved i talem wanem moa long saed blong Jeova long Ol Sam 23:5? ?Mo olsem pijatok ya i laenap wetem pijatok ya we hem i talem finis long saed blong man blong lukaot long sipsip?

¹⁷ Naoia Deved i talem namba tri risen from  wanem hem i trastem Man we i stap lukaot long hem olsem sipsip blong hem, risen ya se: Jeova i givim kakae long ol sipsip blong hem, mo hem i givim kakae ya we i plante we i plante. Deved i raetem se: “Yu yu mekemrere wan lafet blong mi long fes blong ol enemi blong mi. Yu mekem welkam long mi olsem we yu mekem long wan haeman we i kam long haos blong yu. Yu fulumap kap blong mi i fulap we i fulap gud.” (Ol Sam 23:5) Long vas ya, Deved i tokbaot Man we i stap lukaot long hem olsem sipsip, se hem i gat gladhat blong givim kakae mo dring gogo i fulap we i fulap gud. Tufala pijatok ya, hemia blong wan man blong lukaot long sipsip wetem man we i singaot narafala i kam long wan lafet, tufala i joengud. Yes, wan gudfala man blong lukaot long sipsip i mas save wanem gudfala ples we i gat gras mo inaf wota long hem blong ol sipsip oli save dring mo kakae mo oli “no save sot long wan samting.”​—Ol Sam 23:​1, 2.

18. ?Wanem i soem se Jeova i rerem kakae blong yumi we i plante we i plante?

¹⁸ ?Man we i lukaot long yumi olsem we yumi sipsip blong hem, hem i stap fidim gud yumi? !Yes! !Tingbaot olgeta kakae long saed blong spirit we yumi stap kasem! Ol kakae ya oli gud tumas, oli plante tumas, mo oli defdefren oltaem. Jeova i stap yusum slef we i stret mo waes blong givim ol buk we oli halpem gud yumi, mo ol gudfala program long miting mo asembli we oli mekem yumi strong long saed blong spirit. (Matiu 24:​45-47, NW ) Yumi no save talem se yumi sot long kakae long saed blong spirit. ‘Slef we i stret mo waes’ i wokem plante milian Baebol mo buk we oli tokbaot Baebol. Plante long ol buk ya oli stap long 413 lanwis. Ol kakae long saed blong spirit we Jeova i givim oli no sem mak evriwan. I gat “melek” we hemia ol stamba tijing blong Baebol, mo i gat “strong kakae” we hemia ol dip save long saed blong spirit. (Hibrus 5:​11-14) From samting ya, taem yumi fesem ol problem no ol desisen, yumi save faenem stret samting we yumi nidim. ?Bambae yumi olsem wanem sipos yumi no gat ol kakae ya long saed blong spirit? !Tru ya, yumi tangkiu long Jeova we i stap lukaot long yumi olsem ol sipsip blong hem, from we hem i givim plante kakae long gladhat blong hem!​—Aesea 25:6; 65:13.

“Haos Blong Yu Bambae i Hom Blong Mi”

19, 20. (a) ?Long Ol Sam 23:6, Deved i talem se hem i sua long wanem? ?Olsem wanem yumi save sua long samting ya tu? (b) ?Bambae yumi tokbaot wanem long nekis stadi?

¹⁹ Afta we Deved i tokbaot ol fasin blong Jeova olsem man blong lukaot long ol sipsip mo man blong givim samting, hem i talem se: “Mi mi save se oltaem long laef blong mi, bambae yu gat sore long mi, mo bambae yu mekem i gud tumas long mi, mo haos blong yu bambae i hom blong mi olwe nomo.” (Ol Sam 23:6) Deved i talem ol tok ya from we hem i tangkiu bigwan long God mo hem i gat bilif. Tangkiu blong hem i kamaot from we hem i tingbaot ol samting we oli hapen long hem bifo, mo hem i gat bilif from we hem i sua long fiuja blong hem. Deved, we bifo hem i man blong lukaot long sipsip, i harem se hem i sefgud klosap long Bigfala man ya blong lukaot long sipsip. Hem i save se sipos hem i stap oltaem klosap long Jeova, olsem we hem i laef insaed long haos blong God stret, ale bambae Jeova i keagud mo i soem lav long hem oltaem.

²⁰ !Yumi tangkiu bigwan long ol naesfala tok we oli stap long Sam namba 23! I no gat wan narafala pijatok we i moagud i bitim hemia we Deved i yusum blong tokbaot fasin blong Jeova blong lidim, protektem, mo givim kakae long ol sipsip blong hem. Ol naesfala tok ya blong Deved oli stapgud long Baebol, blong yumi save ridim mo yumi tu yumi save trastem se Jeova bambae i lukaot gud long yumi olsem ol sipsip blong hem. Yes, sipos yumi gohed blong stap klosap long Jeova, bambae hem i keagud long yumi olsem we yumi ol sipsip blong hem, blong “olwe nomo.” Be yumi we yumi ol sipsip blong hem, yumi gat wan wok blong mekem, hemia blong wokbaot folem Jeova olsem bigfala Man blong lukaot long ol sipsip. Long nekis stadi, bambae yumi tokbaot olsem wanem yumi save mekem samting ya.

[Ol Futnot]

?Yu Yu Tingbaot?

• ?From wanem i stret nomo we Deved i tokbaot Jeova olsem we hem i wan man blong lukaot long sipsip?

• ?Olsem wanem Jeova i lidim yumi we long semtaem i kasem save ol filing blong yumi?

• ?Olsem wanem Jeova i halpem yumi blong stanap strong long ol traem?

• ?Wanem i soem se Jeova i wan man we i glad blong givim ol samting we yumi nidim?

[Kwestin]

[Tok blong pija long pej 18]

Olsem ol man blong lukaot long sipsip long Isrel, Jeova i stap lidim ol sipsip blong Hem