Ransom i Soemaot Stret Fasin Blong God

AFTA we Adam mo Iv tufala i rebel agensem Jeova, Jeova i talemaot stamba tingting blong hem blong stanemap wan Laen, we bambae i kasem kil long leg blong hem. (Jenesis 3:15) Profet tok ya i kamtru taem ol enemi blong God oli hangem Jisas long wan wud blong kilim hem i ded. (Galesia 3:​13, 16) Jisas i no gat sin from we God i mekem wan merikel taem hem i yusum tabu spirit blong hem blong protektem Jisas long bel blong wan vejin. Taswe, God i save yusum blad blong Jisas olsem wan ransom blong pemaot ol man long sin mo ded we oli kasem long Adam.​—Rom 5:​12, 19.

I no gat wan samting we i save stopem Jeova blong mekem ol stamba tingting blong hem oli kamtru. Taswe, afta we man i sin, Jeova i tingbaot ransom finis, nating se long taem ya samting ya i no hapen yet mo Hem i save wok wetem olgeta we oli soemaot bilif long ol promes blong hem. Ransom ya i mekem se ol sinman we oli kam biaen long Adam, olsem Inok, Noa mo Ebraham, oli save wokbaot wetem God mo God i save frengud wetem olgeta long wan fasin we i no spolem tabu fasin blong Hem.​—Jenesis 5:24; 6:9; Jemes 2:23.

Sam man we oli gat bilif long Jeova oli mekem sam bigfala sin. Wan eksampol hemia King Deved. Maet yu askem se, ‘?Olsem wanem Jeova i save gohed blong blesem King Deved afta we Deved i slip wetem Batseba mo biaen i kilim Uria i ded?’ Wan impoten risen hemia from we King Deved i rili tanem tingting from sin blong hem mo hem i bilif. (2 Samuel 11:​1-17; 12:​1-14) God i save fogivim ol sin blong Deved tru long sakrefaes blong Jisas Kraes we bambae i kam long fiuja mo Hem i save holemtaet yet stret fasin blong hem. (Ol Sam 32:​1, 2) Blong pruvum samting ya, Baebol i eksplenem wanem beswan samting we ransom sakrefaes blong Jisas i mekem hemia se hem i “soemaot we fasin blong [God] i stret”, from we hem i stap fogivim sin we oli hapen “bifo” finis mo “long taem blong yumi.”​—Rom 3:​25, 26.

Yes, ol man oli kasem plante bigfala blesing from blad blong Jisas we i sas tumas. Tru long ransom ya, ol man we oli tanem tingting from ol sin blong olgeta oli save glad blong kam klosap moa long God. Antap long samting ya, ransom ya i openem rod blong ol dedman bambae oli laef bakegen long niufala wol blong God. Long olgeta  ya i gat ol man blong Jeova we oli bin ded bifo we Kraes i givim blad blong hem olsem wan ransom mo plante man tu we oli ded bifo we oli kasem save long saed blong God mo oli no wosipim Hem. Baebol i talem se: “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Long taem ya, tru long ransom, Jeova bambae i givim long olgeta man we oli obei long hem, laef we i no save finis. (Jon 3:36) Jisas hem wan i eksplenem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Ol man bambae oli kasem olgeta blesing ya from ransom sakrefaes we God i givim.

Be, impoten samting long saed blong ransom hem i no ol blesing ya we yumi kasem. Samting we i moa impoten hemia wanem we ransom sakrefaes blong Jisas i mekem long nem blong Jeova. Ransom ya i pruvum se Jeova i wan God we fasin blong hem i stretgud olgeta mo se hem i save stap klin mo tabu, nating se hem i wok wetem ol sinman. Sipos God i no gat tingting ya blong givim wan ransom, bambae i no gat wan man we i kamaot biaen long Adam, Inok, Noa mo Ebraham we oli save wokbaot wetem Jeova no stap olsem ol fren blong Hem. Man blong raetem Sam i luksave samting ya mo i raetem se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Ol Sam 130:3) Yumi mas gat bigfala tangkiu long Jeova se i sanem Pikinini blong hem i kam long wol ya, mo tu long Jisas from we hem i glad nomo blong givim laef blong hem olsem wan ransom blong yumi.​—Mak 10:45.