Wan Kwestin

?Olsem wanem? ?Wan Kristin i save holem stret tingting long fes blong God sipos hem i wok long wan ples we hem i mas karem masket?

Ol Witnes blong Jeova long fulwol oli tinghevi long wok we God i givim long olgeta blong lukaot long famle long saed blong bodi. (1 Timoti 5:8) Be, i gat sam wok we i go agens long ol rul blong Baebol stret, mo wan Kristin i no mas joen long ol wok olsem. Hemia ol wok we i joen long fasin blong plei laki, yusum blad long fasin we i no stret, mo we oli leftemap fasin blong yusum tabak. (Aesea 65:11; Ol Wok 15:29; 2 Korin 7:1; Kolosi 3:5) Be i gat ol narafala wok, we Baebol i no talem stret se oli rong, mo we oli save spolem tingting blong yumi mo tingting blong ol narafala tu.

Blong wok long wan ples we yu mas karem masket no narafala tul blong faet, hemia desisen we yu wan yu mas tekem. Be, ol wok olsem i save mekem we man i kilim narafala man i ded from we taem trabol i kamaot maet man ya i hareap blong yusum masket blong protektem hem wan. Taswe wan Kristin i mas prea mo tingting gud bifo we hem i karem wok olsem. Hem i mas tingbaot sipos hem i naf blong holem tingting we i stret long fes blong God, sipos i hapen we wan trabol i kamaot nao hem i kilim wan man i ded. Mo tu, taem man i karem masket hem i save kasem kil no i save ded taem narafala i sutum hem tu blong protektem hem wan.

Desisen blong Kristin ya maet i save gat paoa long laef blong ol narafala tu. Eksampol, faswan wok blong wan Kristin i blong talemaot gud nius blong Kingdom blong God. (Matiu 24:14) ?Olsem wanem? ?Wan man i save tijim narafala blong ‘faenem rod blong gat pis wetem olgeta man,’ be long semtaem hem i stap karem masket long wok blong hem? (Rom 12:18) ?Olsem wanem long ol pikinini no ol memba blong famle blong hem? ?Laef blong ol famle blong hem i no stap long denja sipos oli gat wan masket i stap long haos? ?Mo tu, sam narafala bambae oli foldaon from desisen we Kristin ya i tekem?​—Filipae 1:10.

Long ol “las dei,” plante moa man oli ‘wael olgeta, we oli no laekem ol samting we oli gud.’ (2 Timoti 3:​1, 3, NW ) Taem wan Kristin i save samting ya, ?Hem i save stap we ‘i no gat poen long hem’ sipos hem i jusum wan wok blong karem masket, nao maet hem i mas faet wetem ol man olsem? (1 Timoti 3:​10, NW ) Nogat. Ale, sipos Kristin ya i gohed nomo blong karem masket, afta we hem i kasem advaes finis long Baebol, kongregesen bambae i no save luk Kristin ya se hem “i no gat rabis poen long hem nating.” (1 Timoti 3:2; Taetas 1:​5, 6) Taswe, man no woman olsem i no naf blong kasem sam spesel wok insaed long kongregesen.

Jisas i promes long ol man blong hem se sipos oli putum Kingdom fasples long laef blong olgeta, oli no nid blong wari tumas long ol samting we oli nidim blong laef. (Matiu 6:​25, 33) Yes, sipos yumi trastem Jeova fulwan, “hem wan bambae i givim paoa long [yumi]. Neva bambae hem i save letem stret man i foldaon.”​—Ol Sam 55:​22, NW.