Wan Wol We i No Gat Stret Fasin Long Hem

?YU YU agri se yumi laef long wan wol we i no gat stret fasin long hem? Ating yes. Nating sipos yumi gat gudhan blong mekem wan wok no yumi mekem sam waes plan long laef blong yumi, be hemia i no mekem we yumi sua blong kam rijman, blong karem gudfala frut long wok blong yumi mo blong gat kakae tu. Nogat. Olsem King Solomon bifo i talem se: “Ol man maet oli gat waes be oli no gat kakae, mo ol man we oli gat hed be oli no kam rijman. Mo ol man we oli gat save, be ol narafala man oli no tinghae long olgeta.” ?From wanem? Solomon i gohed i se, from we, “samting we yumi no tingbaot, i save kamaot long yumi enitaem nomo.”​—Prija 9:​11, NW.

Taem “Trabol i Kasem Yumi Wantaem Nomo”

Yes, plante taem, “samting we yumi no tingbaot,” we i minim se yumi stap long wan ples no yumi stap mekem wan samting be wantaem nomo wan samting i kamaot, i spolem ol plan blong yumi mo ol gudfala samting we yumi wantem kasem. Folem tok blong Solomon, yumi olsem ‘pijin we i fas insaed long wan trap we i sek nomo long hem, no fis we i fas insaed long wan net, . . . taem trabol i kasem yumi wantaem nomo, we yumi no tingbaot.’ (Prija 9:12) Eksampol, plante milian man oli wokhad blong mekem garen mo kasem kakae blong fidim famle blong olgeta be wantaem nomo oli save stap long “trabol” sipos ren i no kam nao draetaem i spolem ol samting we oli bin planem.

Sam man oli traem blong halpem olgeta we oli stap long “trabol.” Be nating se ol man long wol oli halpem ol man we oli trabol maet i luk olsem se oli no mekem i stret. Traem tingbaot samting we ol man oli mekem blong traem stopem hanggri. Wan dipatmen we wok blong hem i blong givhan long ol man long taem blong trabol, i talem se, long wan yia, “ful kantri [blong Afrika] i kasem 20 pesen nomo blong olgeta mane we ol man oli givim i go blong sapotem faet long Galf.” ?Yu ting se i stret we ol kantri we oli rij oli spenem moa mane blong mekem faet long wan kantri bitim mane we oli spenem blong givhan long wan ful kantri we i safa mo i trabol from hanggri? ?Mo yu ting se i stret we plante man oli gat samting, be 25 pesen nomo blong ol man long wol oli pua? ?Yu ting se i stret we plante milian pikinini oli ded evri yia from ol sik we i gat meresin blong tritim olgeta? No, i no stret nating.

I tru se trabol i kasem yumi from sam “samting we yumi no tingbaot.” Be i gat sam narafala samting tu, we i save mekem se “trabol i kasem yumi  wantaem nomo.” Sam samting we yumi no save blokem, oli save spolem laef blong yumi. Hemia samting we i hapen long Beslan, Alania long 2004, taem we lif blong ol tri i folfoldaon. Long taem ya, hem i faswan dei blong skul mo plante handred man we bighaf blong olgeta oli ol pikinini, oli ded long wan faet we i raf tumas bitwin ol teroris mo ol polis. I tru se olgeta we oli ded no we oli laef tru long trabol taem ya oli stap long wan rong ples mo long rong taem be rili ​— stamba blong “trabol” ya hemia faet bitwin ol man.

?Bambae i Neva Gat Stret Fasin Long Wol?

Samfala man we oli tokbaot from wanem i no gat stret fasin oli talem se: “Hemia nao laef. Longtaem finis i kam, laef i olsem, mo bambae i sem mak nomo long fiuja.” Folem tingting blong ol man ya, oltaem olgeta we oli gat paoa bambae oli spolem olgeta we oli daon moa long olgeta, mo oltaem olgeta we oli rij bambae oli spolem olgeta we oli pua. Oli talem se fasin ya bambae i gohed nomo long wol ya from we hem i laenap wetem “samting we yumi no tingbaot.”

?Olsem wanem, bambae wol i olsem ya nomo, we i no gat stret fasin long hem? ?Olsem wanem long ol man we oli yusum save mo waes blong olgeta long rod we i gud, bambae oli save kasem pei from hadwok blong olgeta? ?Man i save mekem we stret fasin i stap olwe long wol? Luk wanem we nekis haf i talem long saed blong ol kwestin ya.

[Foto Credit Line blong pija long pej 3]

MAXIM MARMUR/AFP/Getty Images