“Ol Rod Blong Jeova Oli Stretgud”

“Ol rod blong Jeova oli stretgud, mo ol stret man nao bambae oli wokbaot long ol rod ya.”​—HOSEA 14:​9, NW.

1, 2. ?Long taem blong Moses, Jeova i talemaot wanem long ol man Isrel, be wanem i hapen biaen?

 LONG taem blong profet Moses, Jeova i talemaot ol stret rod long ol man Isrel. Be oli lego ol rod ya, gogo, long ol yia 700 B.K.T., Jeova i krosgud long olgeta from ol bigfala sin we oli stap mekem. Yumi luk samting ya long japta 10 kasem 14 long buk blong Hosea.

² Ol man Isrel oli gat tu fes. Ol ten laen blong Isrel oli ‘girap, oli go mekem ol rabis fasin, olsem we oli planem rabis sid.’ Ale, oli kasem nogud frut from. (Hosea 10:​1, 13) Jeova i talem se: “Ol laen blong Isrel. Bifo, taem ol bubu blong yufala oli olsem smol pikinini yet, mi mi lavem olgeta tumas. Mi mi stap singaot olgeta, se ‘Pikinini blong mi,’ mo mi singaot olgeta oli aot long Ijip i kam.” (Hosea 11:1) Yes, God i tekemaot ol man Isrel long wok slef long Ijip. Be olgeta ya oli no talem tangkiu long hem. Oli girap oli giaman nomo long hem long ol toktok mo fasin blong olgeta. (Hosea 11:12) Taswe Jeova i talem long olgeta se: “Yufala i mas tanem tingting blong yufala, yufala i kambak long God blong [yufala] bakegen. Tingting blong yufala i mas stap strong long hem, yufala i mas folem ol stret fasin.”​—Hosea 12:6.

3. ?Wanem bambae i hapen long ol man Sameria we oli mekem stronghed, be ol man Isrel oli save mekem wanem blong God i sore long olgeta?

³ Ol enemi bambae oli kam kilim i ded ol man Sameria we oli mekem stronghed, mo king blong olgeta. (Hosea 13:​11, 16) Be laswan japta blong Hosea i stat wetem ol gudfala tok ya se: “Olgeta. Hae God [Jeova] i God blong yumi, mo yufala i mas kambak long hem.” Sipos ol man Isrel oli tanem tingting blong olgeta mo askem long God blong i fogivim olgeta, bambae hem i sore long olgeta. Be oli mas luksave se “ol rod blong Jeova oli stretgud,” mo oli mas wokbaot long ol rod ya.​—Hosea 14:​1-6, 9.

4. ?Wanem ol rul we bambae yumi tokbaot long profet tok blong Hosea?

⁴ Long haf ya blong profet tok blong Hosea, i gat plante gudfala rul we oli save givhan long yumi blong wokbaot wetem God. Bambae yumi tokbaot sam long olgeta: (1) Jeova i no wantem se man blong wosip i gat tu fes, (2) God i soemaot long ol man blong hem se hem i lavem olgeta tumas, (3) yumi mas putum tingting blong yumi i stap strong oltaem long Jeova, (4) ol rod blong Jeova oli stretgud oltaem, (5) ol man we oli mekem bigfala sin oli save kambak long Jeova.

Jeova i No Wantem Se Man Blong Wosip i Gat Tu Fes

5. ?Jeova i wantem se yumi mekem wanem kaen wosip?

⁵ Jeova i wantem se yumi mekem wosip we i klin, mo yumi no gat tu fes. Neson blong Isrel i kam olsem ‘wan rop blong grep we i no moa karem plante frut.’ Oli “wokem plante olta” blong mekem wosip long ol giaman god. Ol man ya we oli lego trufala God, oli stanemap ol longlongfala ston blong mekem wosip long ol narafala god. Bambae Jeova i brekemdaon ol olta ya mo spolemgud ol longlongfala ston ya.​—Hosea 10:​1, 2.

6. ?Blong wokbaot wetem God, yumi no mas gat wanem fasin?

⁶ Ol man blong Jeova oli no mas gat tu fes. ?Be olsem wanem long ol man Isrel? !‘Tingting blong olgeta i fulap long ol fasin blong giaman’! Oli bin mekem wan kontrak wetem Jeova blong kam ol man we oli blong hem nomo, be biaen, hem i luk se oli giaman nomo. ?Yumi lanem wanem samting from fasin blong olgeta? Yumi lanem se, sipos yumi givim laef blong yumi i go long God, yumi no mas giaman. Ol Proveb 3:32 (NW ) i givim woning se: “Jeova i no laekem nating man we ol rod blong hem oli kruked, be Hem i frengud wetem olgeta we oli mekem stret fasin.” Blong wokbaot wetem God, lav we yumi gat long hem i mas ‘kamaot long hat mo tingting we i klin, mo i mas stanap long bilif we i no giaman.’​—1 Timoti 1:​5, NW.

God i Soemaot Se Hem i Lavem Olgeta

7, 8. (a) ?Yumi mas mekem wanem blong God i lavem yumi? (b) ?Yu mas mekem wanem sipos yu bin mekem wan bigfala sin?

⁷ Sipos yumi mekem wosip long fasin we i stret mo yumi no gat tu fes, Jeova bambae i lavem yumi tumas  mo bambae i stap tru long yumi. Hem i talem long ol stronghed man Isrel se: “Yufala i mas mekem ol fasin we i stret gud. Mo yufala i mas lavem mi, . . . blong yufala i save karem ol gudfala frut long laef blong yufala. Fasin ya i olsem we man i wokem wan niufala garen, we i brebrekem graon blong hem, mo i planem ol gudfala sid long hem, mo biaen, i karem ol gudgudfala frut blong hem. Naoia i taem blong yufala i kambak long mi bakegen, mo sipos yufala i mekem olsem, bambae mi mi [“tijim yufala long ol stret fasin,” NW ].”​—Hosea 10:12.

⁸ !I gud tumas sipos ol man Isrel oli tanem tingting blong olgeta mo kambak long Jeova! Olsemia, bambae Jeova i glad blong ‘tijim olgeta long ol stret fasin.’ Sipos yu bin mekem wan bigfala sin, i gud yu kambak long Jeova, yu prea blong askem long hem blong i fogivim yu, mo yu askem long ol Kristin elda blong oli givhan long yu blong kam strong bakegen long saed blong spirit. (Jemes 5:​13-16) Mo tu, yu mas lukaot tabu spirit blong God blong lidim yu. ‘Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we ded nomo. Be sipos hem i planem fasin we tabu spirit i wantem, tabu spirit bambae i givim kakae long hem, we hemia laef ya we i no save finis.’ (Galesia 6:8) Sipos yumi ‘planem fasin we tabu spirit i wantem,’ bambae God i lavem yumi olwe.

9, 10. ?Olsem wanem Hosea 11:​1-4 i stret long neson blong Isrel?

⁹ Yumi save holem strong tingting se oltaem Jeova i mekem fasin we i soem lav long ol man blong hem. Yumi luk samting ya long Hosea 11:​1-4 we i talem se: “Ol laen blong Isrel. Bifo, taem ol bubu blong yufala oli olsem smol pikinini yet, mi mi lavem olgeta tumas. Mi mi stap singaot olgeta, se ‘Pikinini blong mi,’ mo mi singaot olgeta oli aot long Ijip i kam. Be . . . oli go bonem sakrefaes long god ya Bal, mo oli stap bonem insens long ol narafala god. Mi nomo mi lanem olgeta blong wokbaot, mo mi stap karemgud olgeta long han blong mi, be oli no luksave nating we mi nomo mi stap lukaot gud long olgeta. Mi mi stap mekem long olgeta olsem wan pikinini blong mi, we mi lavem hem, mo mi sore tumas long hem, nao oltaem mi stap pulum hem i kam long mi [“wetem ol rop blong lav,” NW ]. Oltaem mi stap leftemap hem blong karem long han blong mi, mi stap holemtaet hem long jes blong mi, mo mi stap bendaon [“tekemaot yok we i stap long nek blong hem,” NW ] blong givim kakae long hem.”

¹⁰ Ol vas ya oli talem se neson blong Isrel i olsem wan smol pikinini. Wetem bigfala lav, Jeova i tijim ol man Isrel blong wokbaot, mo hem i leftemap olgeta blong karem olgeta long han blong hem. Hem i pulum olgeta oli kam long hem wetem “ol rop blong lav.” !Pijatok ya i soemaotgud sore we Jeova i gat! Sipos yu yu wan papa no mama, tingbaot ol faswan step we pikinini blong yu i tekem blong wokbaot. Ating yu yu stanap long fored blong hem, yu stretem tufala han blong yu blong pulum hem i kam. Maet yu givim wan rop long hem blong holem, blong hem i no save foldaon. Ale, Jeova i gat semfala bigfala lav. Hem i glad tumas blong lidim yu wetem “ol rop blong lav.”

11. ?Olsem wanem God i kam olsem wan man we i ‘tekemaot yok we i stap long nek blong ol man Isrel’?

¹¹ Long saed blong ol man Isrel, Jeova ‘i tekemaot yok we i stap long nek blong olgeta, blong givim kakae long olgeta.’ Yes, God i mekem olsem wan man we i pulumaot yok we i holem wan anamol, nao hem i save kakaegud. Taem ol man Isrel oli brekem yok we Jeova i putum long olgeta mo oli no moa obei long hem, long taem ya oli kam aninit long yok blong ol enemi blong olgeta we oli mekem i strong tumas long olgeta. (Dutronome 28:​45, 48; Jeremaea 28:14) I nogud yumi foldaon long han blong bigfala enemi blong yumi, Setan, mo harem nogud aninit long strong yok we hem i putum long yumi. I moagud we yumi gohed blong wokbaot wetem God blong yumi we i lavem yumi, mo yumi stap tru long hem.

Putum Tingting i Stap Strong Oltaem Long Jeova

12. ?Hosea 12:6 i talem wanem samting we yumi mas mekem blong wokbaot wetem God?

¹² Blong wokbaot wetem God, yumi mas putum tingting  blong yumi i stap strong oltaem long hem. Hem i talem long ol man Isrel se: “Yufala i mas tanem tingting blong yufala, yufala i kambak long God blong [yufala] bakegen. Tingting blong yufala i mas stap strong long hem, yufala i mas folem ol stret fasin.” (Hosea 12:6) Blong soemaot se oli tanem tingting blong olgeta mo oli kambak long Jeova, ol man Isrel oli mas gat lav mo kaen fasin, oli mas folem ol stret fasin, mo oli mas ‘putum tingting blong olgeta i stap strong long God.’ Nomata se yumi wokbaot longtaem finis wetem God, be yumi mas gohed nomo blong soemaot lav mo kaen fasin, mekem ol stret fasin, mo trastem Jeova.​—Ol Sam 27:14.

13, 14. ?Olsem wanem Pol i yusum tok blong Hosea 13:​14, mo hem i givim wanem spesel risen long yumi blong putum tingting blong yumi i stap strong long Jeova?

¹³ Profet tok blong Hosea long saed blong ol man Isrel, i givim wan spesel risen long yumi blong putum tingting blong yumi i stap strong long God. Jeova i talem se: “Bambae mi pemaot olgeta long han blong Seol. Bambae mi tekembak olgeta long ded. ?E, Ded, ol nil blong yu blong stikim man, oli stap wea? ?E, Seol, paoa blong yu blong spolem man hem i stap wea?” (Hosea 13:​14, NW ) Jeova i no blokem ol man Isrel blong oli no save ded. Be long fiuja, bambae hem i finisim ded blong olwe, mo bambae hem i tekemaot ol trabol we ded i mekem long ol man.

¹⁴ Pol i talem profet tok ya blong Hosea taem hem i raetem leta long ol Kristin, i se: “Bodi ya we i blong lus, bambae i mas jenis blong kam we i no moa save lus samtaem. Nao taem samting ya i hapen, tok blong Baebol bambae i kamtru, we i talem se, ‘Ded. God i spolem yu finis. !Hem i winim yu olgeta! ?E, ded, olsem wanem yu save win? ?Olsem wanem yu save spolem mifala?’ Ded i kasem paoa blong hem blong spolem yumi long sin. Mo sin i kasem paoa blong hem long Loa. Be yumi stap talem tangkiu long God, from we hem i joenem yumi long Jisas Kraes, Masta blong yumi, nao oltaem hem i stap mekem yumi win.” (1 Korin 15:​54-57) Jeova i mekem Jisas i laef bakegen long ded. Hemia i olsem wan gudfala promes se ol dedman we God i tingbaot olgeta, bambae hem i mekem olgeta oli laef bakegen. (Jon 5:​28, 29) !Hemia wan nambawan risen blong putum tingting blong yumi i stap strong long Jeova! Be i no hop blong laef bakegen nomo we i pusum yumi blong wokbaot wetem God. I gat wan moa samting yet.

Ol Rod Blong Jeova Oli Stretgud Olwe

15, 16. ?Profet tok i talem wanem long saed blong Sameria, mo olsem wanem profet tok ya i kamtru?

¹⁵ Bilif blong yumi se “ol rod blong Jeova oli stretgud” i givhan long yumi blong wokbaot oltaem wetem hem. Ol man Sameria oli no wokbaot long ol stret rod blong God. Taswe, oli kasem panis from ol sin blong olgeta mo from we oli no gat bilif long Jeova. Profet tok i talem se: “Ol man Sameria. Bambae mi givim panis long yufala, from we oltaem yufala i stap girap agens long mi. Ol enemi blong yufala bambae oli kam kilim yufala evriwan i ded long taem blong faet. Bambae oli kam smasemgud ol pikinini blong yufala long graon, mo bambae oli holem ol woman blong yufala we oli gat bel, oli splitim bel blong olgeta blong kilim olgeta i ded.” (Hosea 13:16) Ol buk blong histri oli soemaot se, ol man Asiria we oli spolem Sameria, oli rili stap mekem i nogud olsem long ol enemi blong olgeta.

¹⁶ Sameria i bigfala taon blong ol ten laen blong Isrel. Be long vas ya, maet Sameria i minim olgeta graon blong ol ten laen ya. (1 King 21:1) Long 742 B.K.T., king blong Asiria we nem blong hem Salmanesa 5, i raonem taon blong Sameria. Long 740 B.K.T., ol soldia oli winim taon ya fulwan, mo oli karem plante man oli go kalabus long Mesopotemia mo Midia. Yumi no savegud sipos Salmanesa 5 no king we i rul biaen long hem, Sargon 2, i winim Sameria. (2 King 17:​1-6, 22, 23; 18:​9-12) Nating se i olsem wanem, ol buk blong Sargon oli tokbaot 27,290 man Isrel we oli tekem olgeta oli go long ol ples long hed blong Yufretes Reva mo long Midia.

17. ?Yumi no mas tanem baksaed long ol stret rul blong God, be yumi mas mekem wanem?

¹⁷ Ol man Sameria we oli no folem ol stret rod blong Jeova, oli kasem strong panis. Yumi ol Kristin we yumi givim laef blong yumi i go long Jeova finis,  bambae yumi kasem strong panis tu sipos yumi tanem baksaed long ol stret rul blong God nao yumi kam ol man blong mekem nogud fasin. !Yumi neva mas folem rabis rod ya! I gud we yumi evriwan i folem advaes ya blong aposol Pita se: “Man we i kilim man, no i stil no i brekem loa, no i stap go insaed long ol bisnes blong narafala man, hem bambae i kasem panis. Be i no stret sipos wan long yufala i kasem panis from ol fasin olsem. Be sipos yufala i stap kasem panis from we yufala i man blong Kraes, hemia i no samting blong sem. Yufala i mas presem God from we nem blong Kraes i stap long yufala olsem.”​—1 Pita 4:​15, 16.

18. ?Olsem wanem yumi save gohed blong “presem God”?

¹⁸ Yumi “presem God” taem yumi wokbaot long ol stret rod blong hem, be i no long taem ya we yumi mekem ol samting folem prapa tingting blong yumi. Ken i folem tingting blong hem, from samting ya hem i girap i kilim brata blong hem i ded. Hem i no lesin long woning we Jeova i givim se sin i olsem wan wael anamol we i rere blong kakae hem. (Jenesis 4:​1-8) Balam i letem king blong Moab i pem hem blong singaot trabol i kam long ol man Isrel, be taem hem i singaot, trabol i no kasem olgeta. (Namba 24:10) Mo God i kilim Livaet ya Kora mo sam narafala i ded, from we oli girap agens long Moses mo Eron we God i putumap tufala blong lidim ol man Isrel. (Namba 16:​1-3, 31-33) Tru ya, yumi no wantem folem “rod blong man ya Ken” we i kilim brata blong hem i ded. Mo yumi no wantem foldaon long “sem mastik we Profet Balam” i mekem. Mo yumi no wantem ded olsem ‘Kora we i girap agens long God.’ (Jud 11) Be sipos samtaem yumi mestem mo yumi mekem wan bigfala sin, profet tok blong Hosea i save leftemap tingting blong yumi.

Ol Man We Oli Mekem Bigfala Sin Oli Save Kambak Long Jeova

19, 20. ?Ol man Isrel we oli tanem tingting blong olgeta oli save mekem wanem sakrefaes?

¹⁹ Olgeta we oli foldaon, oli mekem wan bigfala sin, oli save kambak long Jeova. Long Hosea 14:​1, 2, yumi faenem gudfala tok ya: “Olgeta. Hae God [Jeova] i God blong yumi, mo yufala i mas kambak long hem. Ol sin blong yufala i plante tumas, i mekem yufala i stambol, yufala i foldaon. Yufala i mas tanem tingting blong yufala, blong kambak long hem bakegen. Yufala i mas kam prea long hem, yufala i mas talem se, Hae God [Jeova]. Plis yu fogivim mifala, yu tekemaot ol sin blong mifala, mo yu lesin long prea blong mifala, nao bambae mifala i stap presem yu bakegen [“long ol toktok blong mifala, olsem we mifala i kilim yangfala buluk blong givim long yu,” NW ]. ”

²⁰ Ol man Isrel we oli tanem tingting blong olgeta, oli save ‘presem God bakegen long ol toktok blong olgeta, olsem we oli kilim yangfala buluk blong givim long hem.’ Ol sakrefaes ya, hemia ol toktok we i rili kamaot long hat blong olgeta, blong presem God. Ating Pol i stap tingbaot profet tok ya taem hem i talem long ol Kristin se oli mas ‘talemaot nem blong God olsem wan sakrefaes blong presem hem.’ (Hibrus 13:​15, NW ) !Tede yumi gat nambawan blesing ya blong wokbaot wetem God mo mekem ol sakrefaes olsem!

21, 22. ?Olsem wanem ol man Isrel we oli tanem tingting blong olgeta bambae oli kamgud bakegen?

²¹ Ol man Isrel we oli lego stronghed fasin mo kambak long God, oli ‘presem hem bakegen long ol toktok blong olgeta, olsem we oli kilim yangfala buluk blong givim long hem.’ Oli kam strong bakegen long saed blong spirit, olsem God i bin promes. Hosea 14:​4-7 i talem se: “Ol man Isrel. Naoia mi [Jeova] mi no moa kros long yufala. Bambae mi tekem yufala i kambak long mi bakegen, nao bambae mi lavem yufala long olgeta tingting blong mi. Bambae mi mekem i gud long yufala, olsem we ren i foldaon long graon we i drae, i mekem i kam gud bakegen. Bambae yufala i olsem tri we i karem ol gudgudfala flaoa blong hem. Bambae yufala i stanap strong olsem ol sida blong Lebanon, we rus blong olgeta i godaon olgeta. Bambae laef blong yufala i kam niuwan bakegen, i olsem bigfala tri ya olif we i gat ol niufala lif blong hem. Bambae yufala i gat gudfala laef, we ol man oli harem gud long hem, olsem we oli save harem smel blong sida blong Lebanon we i naes we i  naes. Bambae yufala i stap bakegen aninit long han blong mi, mo mi bambae mi lukaot gud long yufala. Bambae yufala i olsem garen we i stap karem plante kakae. Bambae yufala i olsem plantesen blong grep, we i stap karem fulap frut long hem. Nem blong yufala bambae i go kasem evri ples, olsem nem blong waen blong Lebanon.”

²² Ol man Isrel we oli tanem tingting blong olgeta, bambae oli kam strong bakegen long saed blong spirit, mo bambae God i lavem olgeta bakegen. Jeova bambae i kam olsem ren we i foldaon long graon we i drae, bambae hem i mekem olgeta oli haremgud mo givim fulap blesing long olgeta. Bambae Jeova i mekem se laef blong ol man blong hem i kam niuwan, “olsem bigfala tri ya olif we i gat ol niufala lif blong hem.” Bambae oli wokbaot long ol rod blong God. Yumi tu yumi gat strong tingting blong wokbaot wetem Jeova God. ?Ale yumi mas mekem wanem?

Wokbaot Oltaem Long Ol Stret Rod Blong Jeova

23, 24. ?Wanem laswan gudfala profet tok long buk blong Hosea, mo tok ya i mekem wanem long yumi?

²³ Blong wokbaot oltaem wetem God, yumi mas folem “waes we i kam long heven” mo mekem olgeta fasin blong yumi oli laenap wetem ol stret rod blong hem. (Jemes 3:​17, 18) Las vas blong profet tok blong Hosea i talem se: “?Hu i waes, we i save kasem save ol samting ya? ?Hu i lukaotgud, blong hem i mas save olgeta? Ol rod blong Jeova oli stretgud, mo ol stret man nao bambae oli wokbaot long ol rod ya; be ol man we oli brekem tok blong hem, bambae oli stambol long olgeta.”​—Hosea 14:​9, NW.

²⁴ I nogud we yumi letem ol waes blong wol mo ol rul we ol man blong wol oli folem, oli lidim yumi. Be yumi mas gat strong tingting blong wokbaot long ol stret rod blong Jeova. (Dutronome 32:4) Hosea i mekem samting ya blong 59 yia, no maet blong longtaem moa. Hem i holemstrong long wok ya blong talemaot ol tok blong God, hem i save se olgeta we oli waes mo oli lukaotgud, bambae oli kasem save long ol tok ya. ?Olsem wanem long yumi? Long taem we i stap yet mo we Jeova i letem yumi blong gohed blong givim witnes, bambae yumi lukaot olgeta we oli waes mo oli glad long kaen fasin we Jeova i soemaot long olgeta wetem gladhat. Yumi haremgud tumas blong mekem wok ya wetem grup we i olsem ‘slef we i stret mo waes.’​—Matiu 24:​45-47, NW.

25. ?Stadi blong yumi long profet tok blong Hosea i mas halpem yumi olsem wanem?

²⁵ Stadi blong yumi long profet tok blong Hosea i mas givhan long yumi blong gohed olwe blong wokbaot wetem God, mo putum tingting blong yumi i stap strong long laef we i no save finis long niufala wol we God i promes blong mekem. (2 Pita 3:13; Jud 20, 21) !Hop ya i nambawan! Hop ya bambae i kamtru long yumi wanwan sipos yumi soemaot long ol toktok mo aksen blong yumi we yumi rili bilif se “ol rod blong Jeova oli stretgud.”

?Bambae Yu Yu Ansa Olsem Wanem?

• ?Sipos yumi mekem klin wosip long God, bambae hem i mekem olsem wanem long yumi?

• ?From wanem yumi mas putum tingting blong yumi i stap strong oltaem long Jeova?

• ?From wanem yu yu bilif se ol rod blong Jeova oli stretgud?

• ?Olsem wanem yumi save gohed olwe blong wokbaot long ol stret rod blong Jeova?

[Kwestin]

[Tok blong pija long pej 28]

Yumi mas glad taem ol Kristin elda oli givhan long yumi long saed blong spirit

[Tok blong pija long pej 29]

Profet tok blong Hosea i mekem yumi strong moa blong trastem promes blong Jeova long saed blong laef bakegen

[Tok blong pija long pej 31]

Oltaem yumi mas wokbaot wetem God mo putum tingting blong yumi long laef we i no save finis