?Setan Hem i Rili Stap?

?WANEM tingting blong yu long saed blong Setan? ?Yu yu ting se hem i wan trufala man we i stap pulum ol man blong mekem ol rabis fasin, no yu ting se hem i minim ol samting nogud nomo? ?Setan i wan man we yumi mas fraet long hem? ?Hem i wan tingting nomo we i save karem badlak i kam long yumi? ?Hem i wan man we i stap long ol kastom stori nomo? ?Olsem wanem? ?Tok ya “Setan” i minim wan bigbigfala paoa we i save kilim ol man oli ded wantaem nomo? ?Tok ya i minim nomo ol rabis fasin blong ol man, olsem plante man blong stadi long ol tijing blong ol jos oli stap talem?

Yumi no sapraes we ol man oli gat plante tingting long saed blong Setan, se hem i hu. !Tingbaot olsem wanem i hadwok blong kasem save long wan man we i jenjenisim fasin blong hem oltaem! Antap moa sipos man ya i strong blong haedem trufala fasin blong hem. Baebol i tokbaot se hemia nao fasin blong Setan, i se: “Nating we Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet.” (2 Korin 11:14) Setan i rabis, be blong trikim ol man, hem i save mekem olsem we fasin blong hem i gud. Mo sipos hem i pulum ol man blong oli bilif se hem i no stap, plan blong hem i save wokgud moa.

?Taswe, Setan hem i hu? ?Hem i stat wetaem mo hem i stat olsem wanem? ?Olsem wanem hem i gat paoa long ol man tede? ?Wanem samting yumi save mekem blong stanap strong agens long paoa blong hem? Trufala stori blong Setan we i stap insaed long Baebol, i tokbaot stat blong hem, mo i givim ol trufala ansa blong ol kwestin ya.

[Tok blong pija long pej 3]

!I hadwok blong kasem save long wan man we i stap haedem trufala fasin blong hem!