Wokbaot Wetem God Mo Kasem Gudfala Frut
Wokbaot Wetem God Mo Kasem Gudfala Frut
“Fasin nogud blong yufala i olsem smol win nomo, be samting we i kamaot long hem, bambae i olsem wan bigfala waelwin we i save spolem evri samting.”—HOSEA 8:7.
1. ?Olsem wanem yumi save wokbaot wetem Jeova?
SIPOS yu mas wokbaot long wan ples we i denja, ating bambae yu harem se yu sef moa sipos wan man we i savegud ples ya i lidim yu. I moa waes blong wokbaot wetem wan man olsem i bitim we yu wokbaot yu wan. Pijatok ya i eksplenem laef blong yumi. Wol ya i olsem wan ples we i denja, mo Jeova i wantem lidim yumi taem yumi wokbaot tru long wol ya. I moa waes blong wokbaot wetem hem, i bitim we yumi traem wokbaot yumi wan. ?Olsem wanem yumi save wokbaot wetem God? Yumi mas folem ol advaes long Tok blong hem.
2. ?Bambae yumi tokbaot wanem long stadi ya?
2 Long faswan stadi, yumi bin tokbaot wan plei long Hosea japta 1 kasem 5. Plei ya i tijim yumi long sam samting we oli save halpem yumi blong wokbaot wetem God. Naoia bambae yumi tokbaot sam bigfala poen long japta 6 kasem 9. I gud sipos fastaem yumi lukluk fulwan stori long fofala japta ya.
Lukluk Stori
3. Talem stori blong Hosea japta 6 kasem 9.
3 Jeova i sanem profet Hosea blong talemaot tok blong hem long ol ten laen blong Isrel long not. Neson ya we narafala nem blong hem Efrem from we Efrem i laen we i strong moa, i lego Jeova. Hosea japta 6 kasem 9 i soemaot se ol man Isrel oli no stap tru long Jeova, oli brekem promes we oli bin mekem wetem hem mo oli mekem rabis fasin. (Hosea 6:7) Oli trastem ol neson blong wol blong halpem olgeta, bitim we oli gobak long Jeova. From we oli stap planem rabis sid, oli mas kasem nogud frut. Hemia i min se bambae oli kasem jajmen. Be profet tok blong Hosea i talem ol gudfala tok tu blong leftemap tingting blong olgeta. Hem i talem long ol man Isrel se oli save kambak long Jeova, mo Jeova bambae i sore long olgeta sipos oli soemaot se oli rili tanem tingting blong olgeta from ol sin blong olgeta.
4. ?Long profet tok blong Hosea, bambae yumi tokbaot wanem advaes we i save lidimgud yumi?
4 Fofala japta ya blong Hosea, oli givim moa advaes we i save givhan long yumi blong wokbaot wetem God. Bambae yumi lanem fo samting: (1) I no toktok nomo, be ol aksen blong yumi we oli soemaot se yumi rili tanem tingting blong yumi; (2) ol sakrefaes nomo oli no save mekem God i glad; (3) Jeova i harem nogud taem wan man blong hem i lego hem; (4) blong kasem gudfala frut, yumi mas planem gudfala sid.
?Olsem Wanem Blong Soemaot Se Yumi Tanem Tingting?
5. Talem bigfala tingting we i stap long Hosea 6:1-3.
5 Profet tok blong Hosea i tijim yumi long plante samting long saed blong fasin blong tanem tingting mo sore. Hosea 6:1-3 i talem se: “Olgeta. I moa gud yumi gobak long Hae God. Hem nao i tekem sik ya i kam spolem yumi, be hem bambae i save tekemaot long yumi, blong yumi kam gud bakegen. Hem nomo i mekem yumi gat ol soa ya, be bambae hem i save mekem ol soa ya i kam gud bakegen. Sipos yumi mekem olsem, long tutri dei, hem bambae i tekembak yumi, nao bambae yumi stap wetem hem oltaem. Naoia yumi mas traehad blong save hem. Bambae hem i mas kamtru long yumi, olsem we san i stap kamtru long eli moning. Bambae hem i kam mekem laef blong yumi i kam gud bakegen, stret olsem we ren i kam long taem blong planem garen, blong mekem graon i wetwet gud.”
6-8. ?Wanem i rong long fasin blong ol man Isrel blong tanem tingting blong olgeta?
6 ?Hu i talem ol tok ya? Samfala oli ting se ol man Isrel we oli no stap tru long Jeova oli bin talem tok ya. Oli ting se ol stronghed man ya oli giaman se oli tanem tingting blong olgeta blong traem pulum God blong i sore long olgeta. Sam narafala oli ting se profet Hosea i talem tok ya, se hem i stap plis long ol man blong oli kambak long Jeova. Nating se hu man i talem tok ya, be bigfala kwestin se: ?Olsem wanem? ?Ol ten laen blong Isrel oli kambak long Jeova mo soemaot se oli rili tanem tingting blong olgeta? Ansa long kwestin ya, se nogat. Jeova i talem long Hosea blong talemaot long olgeta se: “Ol man Isrel, mo ol man Juda. ?Bambae mi mekem olsem wanem long yufala? Fasin blong yufala blong lavem mi i blong wan dei nomo, i stap lus olsem smok blong hil long eli moning. Hem i olsem wota blong naet, we taem san i girap, be kwiktaem nomo i mekem i kam drae.” (Hosea 6:4) !Ol tok ya i soemaot klia se ol man blong God oli kam nogud olgeta long saed blong spirit! Oli gat smol lav nomo long hem—olsem smok blong hil we i stap lus kwiktaem long eli moning. Ol man ya oli mekem olsem we oli tanem tingting blong olgeta, be Jeova i no luk wan aksen blong olgeta we i pulum hem blong sore long olgeta. ?Wanem bigfala problem blong olgeta?
7 Ol man Isrel oli talem se oli tanem tingting blong olgeta, be oli no mekem wan samting blong soem se fasin ya i kamaot long hat blong olgeta. Hosea 7:14 i tokbaot olsem wanem Jeova i harem nogud long olgeta, i se: “Yufala i stap prea long mi, be long maot nomo, i no kamaot nating long tingting [“hat,” NW ] blong yufala. Taem yufala i stap prea long mi, yufala i stap krae.” Vas 16 i talem se: “Oltaem yufala i stap tanem baksaed long mi, blong go biaen long narafala god ya we i no gat paoa nating”—hemia i min se, “long wan fasin blong wosip we i rabis.” (Futnot, NW ) Ol man Isrel oli no wantem jenisim fasin blong olgeta blong oli save kambak long Jeova, frengud wetem hem, mo mekem klin wosip long God ya we i antap olgeta. Yes, oli no rili wantem wokbaot wetem God.
8 I gat wan narafala nogud samting long saed blong fasin blong ol man Isrel blong tanem tingting blong olgeta. Oli stap gohed nomo blong mekem sin—i no wan sin, be plante defren kaen sin, olsem trikim ol man blong kasem mane, kilim man i ded, stil, wosip long aedol, mo mekem politik wetem ol narafala neson. Hosea 7:4 i talem se fasin blong olgeta i olsem ‘faea we i laet bigwan’ we maet man i yusum blong kukum bred. Yes, ol rabis fasin oli stap wok insaed long tingting mo hat blong olgeta olsem faea we i laet. ?Olsem wanem? ?Jeova i mas sore long ol man ya we oli kam nogud olsem long saed blong spirit? !Nogat! Hosea i talem long ol stronghed man ya se Jeova bambae i ‘no save fogetem ol sin blong olgeta,’ mo se ‘bambae hem i mas givim panis long olgeta from.’ (Hosea 9:9) !Bambae Jeova i no sore long olgeta!
9. ?Tok blong Hosea i tijim yumi long wanem samting long saed blong sore mo fasin blong tanem tingting?
9 ?Taem yumi ridim ol tok ya blong Hosea, yumi lanem wanem long saed blong sore mo fasin blong tanem tingting? Fasin blong ol man Isrel we oli lego Jeova, i olsem wan woning long yumi. Sipos yumi wantem we Jeova i sore long yumi, fasin ya blong tanem tingting i mas kamaot long hat blong yumi. ?Olsem wanem blong mekem samting ya? Man we i talem ol giaman tok mo i krae giaman, hem i no save trikim Jeova. Man we i rili tanem tingting blong hem, hem i soemaot samting ya long ol aksen blong hem. Sipos man we i mekem bigfala sin i wantem se God i sore long hem, hem i mas lego rabis fasin blong hem fulwan, mo i mas mekem laef blong hem i laenap wetem ol stret rul blong klin wosip blong Jeova.
Ol Sakrefaes Nomo Oli No Save Mekem Jeova i Glad
10, 11. ?From wanem ol sakrefaes nomo oli no save mekem Jeova i glad, olsem yumi luk long saed blong ol man Isrel?
10 Seken advaes we i save halpem yumi blong wokbaot wetem Jeova, hemia: Ol sakrefaes nomo oli no save mekem God i glad. Hosea 6:6 i talem se: “Mi mi no wantem fasin ya we yufala i stap kilim anamol blong mekem sakrefaes long mi, mi wantem we oltaem, yufala i stap lavem mi. Mi wantem we yufala i save mi long laef blong yufala. Fasin ya i gud tumas long mi, i winim we yufala i stap bonem sakrefaes blong givim presen i kam long mi.” Makemgud se Jeova i glad tumas long man we i gat lav mo i stap tru long hem—hemia ol fasin we oli kamaot long hat—mo long man we i savegud Hem. Be maet yu ting se: ‘?From wanem vas ya i talem se Jeova i no wantem “we man i kilim anamol blong mekem sakrefaes long hem”? Loa blong Moses i talem se oli mas mekem samting ya.’
11 I tru, Loa i talem se oli mas kilim anamol blong mekem sakrefaes. Be sam man we oli laef long taem blong Hosea oli stap mekem wan bigfala rong. Sam man Isrel we oli obei long Loa ya, oli mekem blong soem olgeta nomo, olsem we oli wantem soem se oli strong blong mekem wosip long Jeova. Be long semtaem, oli stap mekem bigfala sin. Samting ya i soemaot se oli no rili lavem Jeova long hat blong olgeta. Mo tu, oli no mekem laef blong olgeta i laenap wetem save blong God. Samting ya i soemaot se oli no rili wantem save ya. Sipos hat blong olgeta i no stret mo oli no stap mekem stret fasin long laef blong olgeta, i blong nating nomo we oli mekem sakrefaes. Ol sakrefaes ya oli mekem Jeova God i kros nomo.
12. ?Hosea 6:6 i givim wanem woning long ol man tede?
12 Tok blong Hosea i givim woning long plante man tede we oli strong long skul blong olgeta. Oli folem plante fasin blong skul blong givim presen i go long God. Be fasin blong laef blong olgeta i narakaen, i no laenap nating wetem trufala wosip. ?Sipos hat blong ol man ya i no pusum olgeta blong kasem save long God, mo blong folem save ya, mo blong lego ol rabis fasin blong olgeta, yu ting se God i save glad long olgeta? Nogat. Yumi no mas ting se sipos yumi mekem plante wok blong skul blong yumi, hemia nomo i naf blong mekem God i glad. Jeova i no laekem ol man we oli mekem wosip blong soem olgeta nomo, mo blong traem winim blesing blong hem, be oli no folem ol Tok blong hem long laef blong olgeta.—2 Timoti 3:5.
13. ?Wanem sakrefaes we yumi givim i go long God? ?Be yumi mas rimemba wanem long saed blong ol sakrefaes ya?
13 Ol trufala Kristin oli save se ol sakrefaes nomo oli no save mekem God i glad. I tru, yumi no moa kilim anamol blong givim i go long Jeova. Be ‘evritaem we yumi talemaot nem blong hem long fes blong ol man, i olsem we yumi givim presen i go long hem’ blong presem hem. (Hibrus 13:15) I impoten we yumi no kam olsem ol man Isrel long taem blong Hosea. Yumi no mas ting se sipos yumi mekem plante wok i go long God olsem sakrefaes, samting ya bambae i kavremap ol nogud fasin we yumi stap mekem. Wan gel we hem i stap haedem rabis fasin blong seks we hem i mekem, i talem biaen se: “Mi mi mekem plante moa aoa long wok blong prij, from we mi ting se samting ya bambae i kavremap rabis fasin blong mi.” Hemia tingting blong ol stronghed man Isrel tu. Be blong mekem se Jeova i glad long tok we yumi talemaot olsem wan sakrefaes blong presem hem, stret tingting i mas pusum yumi blong talemaot tok ya, mo fasin blong yumi i mas stret.
Jeova i Harem Nogud Taem Man i Lego Hem
14. ?Profet tok blong Hosea i soemaot wanem long saed blong filing blong God?
14 Namba tri samting we yumi lanem long Hosea japta 6 kasem 9, hemia long saed blong filing blong Jeova taem wan man blong hem i lego hem. God i save mekem i strong long man mo i save kaengud long man. Taem man i tanem tingting blong hem, Jeova i haremgud long hem mo i sore long hem. Be taem man i no wantem tanem tingting blong hem, Jeova i save tekem strong aksen agensem hem. Jeova i wantem tumas we yumi haremgud, taswe hem i glad tumas taem yumi holemstrong long hem mo wokbaot wetem hem. Ol Sam 149:4 i talem se: “Oltaem Hae God i stap glad long yumi.” ?Be wanem filing blong God taem wan man blong hem i lego hem?
15. ?Olsem Hosea 6:7 i talem, sam man Isrel oli stap mekem wanem?
15 Jeova i tokbaot ol man Isrel we oli no stap tru long hem, i se: “Olsem ol man we oli kamaot long graon nomo, oli girap oli brekem kontrak we mi mi mekem wetem olgeta. Oli no stap tru long mi.” (Hosea 6:7, NW ) Hibru tok we oli tanem i kam “no stap tru” i minim “giaman, brekem promes.” Hibru tok ya i stap long Malakae 2:10-16 tu. Ol vas ya oli tokbaot sam man Isrel we oli no stap tru long woman blong olgeta. Wan buk we i eksplenem Baebol i tokbaot Hibru wod ya long Hosea 6:7, se: “Hem i wan pijatok long saed blong mared we oli yusum blong soem fasin blong tufala we i mared . . . Taem wan long tufala i mekem samting ya, hem i spolem lav bitwin long tufala.”
16, 17. (a) ?Olsem wanem long promes we ol man Isrel oli mekem wetem God? (b) ?Yumi no mas fogetem wanem samting?
16 Long tingting blong Jeova, ol man Isrel oli olsem waef blong hem, from promes we oli bin mekem wetem hem. Taswe taem oli brekem promes ya, oli olsem woman we i mekem i krangke long man blong hem. !God i olsem wan gudfala hasban we i stap tru long woman blong hem, be ol man blong hem oli lego hem!
17 ?Olsem wanem long yumi? God i tingbaot yumi, i wantem se yumi stap wokbaot wetem hem oltaem. I gud yumi no fogetem se ‘God i stamba blong fasin blong lavem man,’ mo se yumi save mekem hem i haremgud no i harem nogud. (1 Jon 4:16) Sipos yumi mekem nogud fasin, yumi mekem Jeova i harem nogud, mo hem i no glad long yumi. Yumi no mas fogetem samting ya. Tingting ya i save stap olsem wan strong paoa we i blokem yumi blong yumi no foldaon long ol traem.
?Olsem Wanem Blong Kasem Gudfala Frut?
18, 19. ?Wanem rul we yumi faenem long Hosea 8:7, mo olsem wanem rul ya i kamtru long ol man Isrel?
18 Namba fo samting we yumi lanem long profet tok blong Hosea hemia: ?Olsem wanem blong kasem gudfala frut? Long saed blong ol man Isrel we krangke fasin blong olgeta blong lego Jeova i no givhan nating long olgeta, Hosea i raetem se: “Fasin nogud blong yufala i olsem smol win nomo, be samting we i kamaot long hem, bambae i olsem wan bigfala waelwin we i save spolem evri samting.” (Hosea 8:7) Rul ya, yumi neva mas fogetem. Samting we yumi mekem naoia, bambae i karem gudfala frut no nogud frut biaen. ?Olsem wanem samting ya i tru long saed blong ol man Isrel we oli lego Jeova?
19 Taem ol man Isrel oli mekem nogud fasin, i olsem we oli stap planem rabis sid. ?Bambae oli save gohed blong mekem olsem, be oli no kasem rabis frut from? Nogat. Bambae oli mas kasem jajmen. Long Hosea 8:13 Jeova i talem long olgeta se: “Bambae mi panisim yufala from ol sin blong yufala.” Mo Hosea 9:17 i talem se: “Olgeta. God ya blong yumi we mi mi stap wok blong hem, bambae hem i tanem baksaed long yufala, from we yufala i no save harem tok blong hem. Yufala i man blong hem, be bambae yufala i stap go wanwan olbaot long evri ples.” Yes, Jeova i panisim ol man Isrel from ol rabis fasin blong olgeta. Oli planem rabis sid, nao oli mas kasem rabis frut from. Jajmen blong God i kamtru long olgeta long yia 740 B.K.T., taem ol man Asiria oli winim ol ten laen blong Isrel mo oli tekem olgeta oli go kalabus.
20. ?Stori blong ol man Isrel i tijim yumi long wanem samting?
20 Stori blong ol man Isrel i tijim yumi long wan stamba trutok: Sid we yumi planem bambae yumi mas kakae frut blong hem. Tok blong God i givim woning ya se: “Yufala i no mastik long samting ya. I no gat man i save giaman long God. Wanem sid we man i planem fastaem long garen blong hem, be frut blong hem nomo, man ya bambae i mas kakae.” (Galesia 6:7) Sipos yumi planem rabis sid, bambae yumi mas kakae frut we i nogud. Olsem nao, olgeta we oli mekem rabis fasin long saed blong seks long laef blong olgeta, oli kasem bigfala trabol mo oli harem nogud tumas from. Yes, ol man we oli mekem nogud fasin be oli no tanem tingting blong olgeta, bambae oli kasem nogud frut.
21. ?Olsem wanem yumi save kasem gudfala frut long laef blong yumi?
21 ?Ale, olsem wanem yumi save kasem gudfala frut? Wan pijatok bambae i ansa long kwestin ya. ?Sipos wan man i wantem kakae yam, olsem wanem, i stret we hem i planem taro long garen blong hem? !Nogat! Hem i mas planem yam sipos hem i wantem kakae yam. Long sem fasin, sipos yumi wantem kasem gudfala frut long laef blong yumi, yumi mas mekem gudfala fasin. ?Yu yu wantem kasem gudfala frut—hemia se yu haremgud long laef naoia mo yu gat hop blong kasem laef we i no save finis long niufala wol? Sipos yes, yu mas gohed blong planem gudfala sid, hemia se yu mas wokbaot wetem God mo folem ol stret rul blong hem long laef blong yu.
22. ?Yumi lanem wanem long Hosea japta 6 kasem 9?
22 Long Hosea japta 6 kasem 9, yumi lanem fo bigfala samting we oli save givhan long yumi blong wokbaot wetem God: (1) Ol aksen blong yumi oli soemaot sipos yumi rili tanem tingting blong yumi; (2) ol sakrefaes nomo oli no save mekem God i glad; (3) Jeova i harem nogud taem wan man blong hem i lego hem; (4) blong kasem gudfala frut, yumi mas mekem gudfala fasin. ?Nao, olsem wanem ol faef laswan japta blong Hosea oli save halpem yumi blong wokbaot wetem God?
?Bambae Yu Yu Ansa Olsem Wanem?
• ?Olsem wanem yumi soemaot se yumi rili tanem tingting blong yumi?
• ?From wanem ol sakrefaes nomo oli no mekem Papa blong yumi long heven i glad?
• ?God i harem olsem wanem taem wan man blong hem i lego hem?
• ?Sipos yumi wantem kasem gudfala frut, yumi mas planem wanem sid?
[Kwestin]
[Tok blong pija long pej 23]
Lav blong ol man Isrel i lus, olsem smok blong hil long moning
[Tok blong pija long pej 23]
Rabis fasin i strong long tingting mo hat blong ol man Isrel, olsem faea we i laet
[Tok blong pija long pej 24]
?From wanem Jeova i no wantem ol sakrefaes blong ol man blong hem?
[Tok blong pija long pej 25]
Blong kasem gudfala frut, yu mas planem gudfala sid