?Yu Yu Bilif Se Setan i Stap?

BAEBOL i eksplenem se Setan i wan trufala man. Ol man oli no save luk hem, sem mak olsem we ol man oli no save luk God. Baebol i talem se: “God, hem i Spirit.” (Jon 4:24) Setan tu i wan spirit man. Be Setan i gat stat blong hem, God i no gat.

Bifo olgeta, taem Jeova God i no wokem ol man yet, hem i wokem plante spirit man. (Job 38:​4, 7) Baebol i talem nem blong ol spirit man ya se ol enjel. (Hibrus 1:​13, 14) God i wokem olgeta evriwan oli stretgud olgeta​—i no gat wan long olgeta we i wan devel no i gat sam rabis fasin. ?Taswe, olsem wanem Devel Setan i stat? Tok ya “devel” i minim “Man we i giaman blong spolem nem blong narafala,” taswe man we i karem nem ya, hem i stap talem ol giaman tok blong spolem nem blong ol narafala. “Setan” i minim “enemi,” no man blong agens. Tingbaot wan man we fastaem i no stil, be biaen i stat mekem fasin ya. Yumi talem se hem i kam wan stilman. Long sem fasin, wan spirit pikinini, no wan enjel blong God we i stretgud olgeta, i wantem tumas blong kasem wan samting we hem i no gat raet blong kasem, ale hem i mekem hem wan i kam Devel Setan. Baebol i eksplenem olsem wanem wan man i save spolem fasin blong hem bakegen, i se: “Taem wan man i wantem tumas ol samting nogud, ol fasin nogud oli holem hem, oli pulum hem, nao hem i foldaon long sin. Mo taem hem i wantem tumas ol samting nogud, fasin ya bambae i kam bigwan moa long hem, nao bambae man ya i stap mekem ol samting nogud from. Mo taem hem i stap mekem ol samting nogud, fasin ya tu bambae i kam bigwan moa long hem, nao bambae hem i ded from.”​—Jemes 1:​14, 15.

I klia se samting ya nao i bin hapen long taem bifo. Taem Jeova God i wokem faswan man mo woman, Adam mo Iv, enjel ya we i rere blong agensem God i stap lukluk. Hem i save se Jeova i givim oda long Adam mo Iv blong tufala i fulumap wol ya wetem ol stret man we bambae oli wosipim God. (Jenesis 1:28) Enjel ya i luk se i gat rod blong hem i kasem ona mo haenem. Hem i griri, ale samting ya i pusum hem blong kavetem wan samting we God nomo i gat raet blong kasem, hemia wosip blong ol man. Spirit pikinini ya blong God i no sakemaot rabis tingting ya, be hem i holemtaet, gogo tingting ya i pusum hem blong giaman, mo biaen hem i agensem God. Tingbaot samting we hem i mekem.

Stronghed enjel ya i yusum wan snek blong toktok long faswan woman, Iv. Snek ya i askem long Iv  se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” Taem Iv i talemaot rul we God i putum mo panis we bambae tufala i kasem sipos tufala i brekem rul ya, snek ya i talem se: “No, hemia i no tru ya. Yutufala i no save ded. Hem i talem olsem from we i save se sipos yutufala i kakae frut ya, bambae ae blong yutufala i open, nao bambae yutufala i kam olsem hem, we i save ol fasin we i nogud mo ol fasin we i gud.” (Jenesis 3:​1-5) Samting we enjel ya i talem i givim tingting se God i stap giaman long Adam mo Iv. Hem i mekem Iv i ting se sipos hem i kakae frut blong tri ya, bambae hem i kam olsem God, nao bambae hem i gat raet blong talem wanem samting i gud mo wanem samting i nogud. Hemia i faswan giaman. Taem enjel ya i talem tok ya, hem i kam wan man we i stap giaman blong spolem nem blong narafala. Mo tu, hem i kam wan enemi blong God. Taswe Baebol i kolem enemi ya blong God se, “Snek ya blong bifo we nem blong hem ‘Setan’ no ‘Man we i agensem man.’ ”​—Revelesen 12:9.

“Yufala i Mas Rere”

Giaman tok we Setan i talem long Iv i karem frut, stret olsem we hem i wantem. Baebol i talem se: “Nao woman ya i luk we tri ya i gud tumas, mo frut blong hem tu i gud blong kakae, mo hem i wantem tumas blong kasem waes ya we frut ya i save givim long hem. Nao from samting ya, hem i tekem sam frut blong tri ya, i kakae, mo i givim long man blong hem, mo man blong hem tu i kakae.” (Jenesis 3:6) Iv i bilivim tok blong Setan, ale hem i no moa obei long God. Hem i pulum Adam blong hem tu i brekem loa blong God. Taswe plan blong Setan i wok taem hem i pulum faswan man mo woman blong tufala i agensem God. Stat long taem ya, Setan i bos long laef blong ol man nating se oli no save luk hem. ?Hem i wantem kasem wanem mak? Hem i wantem pulum ol man blong oli tanem baksaed long trufala God mo oli wosipim Setan. (Matiu 4:​8, 9) Taswe, i stret nomo we Baebol i givim woning ya: “Yufala i mas lukaot gud. Yufala i mas rere, from we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.”​—1 Pita 5:8.

!Yes, Baebol i talemaot klia se Setan i wan trufala spirit man​—wan enjel we i kam rabis mo i spolem laef blong ol narafala! Blong yumi rere, faswan impoten samting we yumi mas mekem, hemia blong luksave se Setan i stap. Be yumi mas mekem sam moa samting sipos yumi wantem lukaot gud mo stap rere. Mo tu, i impoten we yumi kasem save long “ol plan” blong Setan mo ol rod we hem i yusum blong lidim ol man oli go krangke. (2 Korin 2:11) ?Wanem ol plan blong hem? ?Mo olsem wanem yumi save stanap strong agens long olgeta?

Setan i Yusum Ol Samting We Man i Nidim

Setan i stap wajemgud ol man, stat long taem we God i wokem faswan man mo woman. Hem i savegud fasin blong ol man​—ol nid blong olgeta, ol samting we oli intres long hem, mo ol samting we oli wantem tumas. Setan i save se God i wokem ol man wetem fasin ya blong nidim ol samting long saed blong spirit, mo hem i yusum fasin ya. ?Olsem wanem hem i yusum? Taem hem i wokem ol giaman skul we oli givimaot ol giaman tijing. (Jon 8:44) Plante tijing blong jos we oli tokbaot God oli no laenap gud, mo oli mekem tingting blong ol man i fasfas. Yu yu save finis hu i wantem tumas blong mekem samting ya. Sipos sam tijing oli no laenap gud, ol tijing ya oli no tru. Taswe, yumi save talem se plante tijing blong jos oli kamaot long Setan, mo hem i yusum olgeta blong lidim ol man oli go krangke. Baebol i talem stret se Setan i “rabis god blong wol ya,” we i stap satem tingting blong ol man.​—2 Korin 4:4.

Trutok we i kamaot long God i save blokem ol man long ol giaman tijing. Baebol i talem se trutok blong God i sem mak olsem bigfala strap we ol soldia bifo oli werem blong blokemgud bel blong olgeta. (Efesas 6:14) Sipos yu kasem save long Baebol mo yu mekem laef blong yu i laenap wetem, olsem wan strap we yu taetem raon long bel blong yu, bambae Tok blong God i blokemgud yu, blong ol  giaman mo rong tijing blong ol jos oli no lidim yu yu go krangke.

Fasin ya we man i wantem tumas blong wosip, i lidim hem blong traem faenemaot ol samting we oli haed. Hemia i mekem se i isi blong hem i foldaon long wan narafala trik blong Setan. From we ol man oli wantem tumas blong kasem save long ol samting we oli narakaen mo we mining blong olgeta i haed, Setan i yusum wok blong ol rabis spirit blong pulum plante long olgeta oli kam aninit long paoa blong hem. Wan man we i lukaot anamol blong kakae, i yusum bet blong pulum ol anamol oli go long trap. Long sem fasin, Setan i yusum ol defren bet blong pulum ol man long olgeta ples long wol, blong oli kam aninit long paoa blong hem. Hem i yusum ol samting olsem, fasin blong talemaot ol samting we bambae oli kamtru, lukluk ol sta blong talemaot fiuja, man i kontrolem tingting blong narafala blong i mekem samting we man ya i wantem, wok blong kleva, talemaot fiuja from ol laen long han blong man, mo mekem majik.​—Levitikas 19:31; Ol Sam 119:110.

?Olsem wanem yu save lukaotgud blong yu no foldaon long trap ya blong wok wetem ol rabis spirit? Dutronome 18:​10-12 i talem se: “Bambae yufala i no mas bonem ol pikinini blong yufala long olta, olsem we olgeta oli stap mekem blong mekem sakrefaes. Mo yufala i mas lukaot gud blong yufala i no folem fasin blong olgeta blong go luk ol kleva, mo blong makemgud ol smosmol saen we oli luk, mo blong mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long olgeta. Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta, mo from samting ya, taem yufala i stap go long kantri ya, bambae hem i stap ronemaot ol man blong hem.”

Advaes ya blong Baebol i kliagud: Yumi no mas joen nating long enikaen wok blong ol rabis spirit. ?Be olsem wanem nao sipos yu bin joen finis long wok blong ol rabis spirit, mo naoia yu wantem stop? Yu save folem eksampol blong ol faswan Kristin long taon blong Efesas. Baebol i talem se taem oli bilif long ‘tok blong Jeova,’ “plante long olgeta we bifo oli gat posen mo oli stap mekem majik, oli tekem ol buk blong ol samting ya i kam, nao oli bonem long fes blong ol man.” Ol buk ya oli sas tumas. Praes blong olgeta i 50,000 silva mane. (Ol Wok 19:​19, 20) Nating se i olsem, be ol Kristin long Efesas oli glad nomo blong bonem ol buk ya.

Setan i Yusum Slak Fasin Blong Ol Man

Wan enjel we i stretgud olgeta i kam Devel Setan from we hem i wantem se ol man oli presem hem. Mo tu, hem i pulum Iv blong i kam praod mo i tingbaot hem wan nomo, mo blong i wantem kam olsem God. Tede, Setan i holemtaet plante man long paoa blong hem taem hem i pulum olgeta blong oli kam praod. Olsem nao, samfala oli ting se kala blong skin, laen blong olgeta, no kantri blong olgeta i moagud i bitim ol narafala. !Hemia i defren olgeta long samting we Baebol i tijim! (Ol Wok 10:​34, 35) Baebol i talem klia se: “[God] i mekem wan man nomo, nao olgeta man long wol oli kamaot long man ya.”​—Ol Wok 17:26.

Gudfala fasin ya tingting daon, i save givhan long yumi blong blokem Setan blong i no pulum yumi blong kam praod. Baebol i givim advaes long yumi  se yumi “no mas letem tingting blong [yumi] i go antap.” (Rom 12:3) Hem i talem bakegen se: “God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem.” (Jemes 4:6) Wan gudfala rod blong agensem Setan, hemia blong gat tingting daon mo blong gat ol narafala gudfala fasin we God i glad long olgeta.

Mo tu, Setan i yusum wan narafala slak fasin blong man, hemia blong mekem ol rabis fasin long saed blong seks. Jeova God i wantem se ol man oli harem gud long laef blong olgeta. Taem ol samting we man i wantem oli laenap wetem samting we God i wantem, bambae man i kasem trufala glad. Be Setan i pulum ol man blong oli mekem rabis fasin long saed blong seks blong kasem ol samting we olgeta nomo oli wantem. (1 Korin 6:​9, 10) I moagud we yu putum tingting blong yu i stap strong long ol samting we oli stret mo oli klingud. (Filipae 4:8) Hemia bambae i givhan long yu blong bos long ol tingting mo filing blong yu.

Stanap Strong Oltaem Agens Long Setan

?Yu yu save stanap strong agens long Setan mo win? Yes, yu yu naf. Baebol i talem se: “Yufala i mas blokem Setan, nao hem bambae i ronwe long yufala.” (Jemes 4:7) Be nating sipos yu agensem Setan taem yu stap gohed blong kasem save long God, hem bambae i no lego yu wantaem mo stop blong mekem trabol long yu. Nogat. Setan “bambae i kambak” blong traem yu bakegen. (Luk 4:13) Be yu no mas fraet long Setan. Sipos yu stanap strong agensem hem oltaem, hem bambae i no naf blong pulum yu yu gowe long trufala God.

Be blong stanap strong agensem Setan, yumi mas kasem save se hem i hu mo olsem wanem hem i lidim ol man oli go krangke. Mo yumi mas kasem save tu long ol rod we i save givhan long yumi blong stanap strong agens long ol plan blong hem. I gat wan ples nomo we trufala save i kamaot long hem​—Tok blong God, Baebol. Taswe yu mas gat strong tingting blong stadi Baebol, mo blong mekem laef blong yu i laenap wetem ol samting we yu yu lanem. Ol Witnes blong Jeova long ples blong yu bambae oli glad blong givhan long yu, fri nomo, blong yu stadi long wan taem we i stret long yu. Plis yu no fraet blong toktok wetem olgeta no blong raet i go long olgeta we oli wokem magasin ya.

Yu mas save se taem yu stadi Baebol, Setan bambae i mekem se samfala oli mekem trabol long yu no oli agensem yu, blong traem pulum yu blong yu no moa lanem ol trutok blong Baebol. Maet sam famle blong yu oli save kam kros tumas long yu from we yu stadi Baebol. Hemia from we oli no save ol nambawan trutok we i stap insaed long Baebol. Maet sam narafala oli save jikim yu. ?Be olsem wanem? ?God bambae i glad sipos yu yu stop blong stadi Baebol from ol traem ya? Setan i wantem mekem yu yu fraet, blong bambae yu no gohed blong kasem save long saed blong God. Yu no mas letem Setan i win. (Matiu 10:​34-39) Yu yu no gat kaon nating long Setan. Jeova i givim laef long yu, taswe yu gat kaon long hem. From samting ya, yu mas gat strong tingting blong agensem Setan mo ‘mekem Jeova i glad.’​—Ol Proveb 27:11.

[Tok blong pija long pej 6]

Olgeta we oli kam Kristin oli bonem ol buk blong olgeta we oli joen wetem wok blong ol rabis spirit

[Tok blong pija long pej 7]

Tekem wan strong desisen blong stadi Baebol