Good News for People of All Nations

PIJA antap i soem niufala buklet we i kamaot long Distrik Asembli ya “Wokbaot Wetem God” we ol Witnes blong Jeova oli mekem long yia 2004/2005. Buklet ya long Inglis i gat 96 pej blong hem mo i gat ol sot tok long 92 defren lanwis, stat long lanwis Afrikaans go kasem lanwis Yoruba, mo oli wokem buklet ya we i save givhan blong talemaot gud nius blong Kingdom long plante moa man. (Matiu 24⁠:14) Hemia sam stori we oli soemaot wanem i hapen, plante taem, taem oli yusum buklet ya.

• Afta we oli kasem buklet long asembli, wan famle we oli Witnes blong Jeova, oli go long tri naesfala ples blong wokbaot long bus. Long ol ples ya oli luk ol man India, Netalan, Pakistan, mo Filipin. Hasban i talem se: “Nating se olgeta man ya oli toktok smol Inglis, be oli sapraes taem mifala soem long olgeta ol toktok long prapa lanwis blong olgeta, from we oli stap longwe long kantri blong olgeta. Oli luksave bigfala wok we yumi stap mekem long ful wol mo fasin joengud we yumi gat.”

• Wan Witnes i soem buklet ya long wan man India we i wok wetem hem. Man ya i glad blong luk olgeta lanwis long buklet ya mo hem i ridim toktok we i stap long prapa lanwis blong hem. Samting ya i openem rod blong tufala i storian moa long saed blong Baebol. Wan woman Filipin we i wok wetem Witnes ya i sapraes blong faenem se lanwis blong hem i stap long buklet ya, mo samting ya i pulum hem blong wantem save moa long saed blong ol Witnes blong Jeova.

• Long Kanada, wan woman Nepal i agri blong stadi Baebol wetem wan Witnes tru long telefon be hem i no wantem askem sista i kam long haos blong hem. Be, taem Witnes i talem se hem i gat wan buk we oli raetem toktok long lanwis Nepali, woman ya i glad blong askem sista i kam long haos blong hem. !Hem i wantem luk toktok ya long prapa lanwis blong hem we i stap long buklet ya! Stat long taem ya oli mekem Baebol stadi long haos blong woman ya.