Tok Blong Jeova i Wan Samting We i Laef

Ol Bigfala Poen Long Buk Blong Seken Kronikel

BUK blong seken Kronikel i stat wetem ol stori ya blong taem we Solomon i rul long Isrel. Buk ya i finis wetem ol toktok we King Sirus blong Pesia i talem long ol man Jiu we oli stap kalabus long Babilon i se: ‘Haos blong [Jeova] i stap long Juda, long taon ya Jerusalem, mo naoia wok blong wokem haos ya bakegen, [Jeova] i putum long han blong mi. Naoia i gud yufala evriwan we yufala i man blong hem, yufala i gobak long taon ya [Jerusalem] Hae God i God blong yufala, mo prea blong mi we hem bambae i stap wetem yufala.’ (2 Kronikel 36:23) Pris ya Esra i finis blong raetem buk ya long 460 B.K.T. * Buk ya i tokbaot ol stori blong ol samting we oli hapen long 500 yia​—stat long 1037 B.K.T. go kasem 537 B.K.T.

Sirus i stanemap wan loa we i mekem i isi long ol man Jiu blong oli gobak long Jerusalem mo statem bakegen trufala wosip blong Jeova. Be, taem oli stap kalabus long Babilon, sam problem i kam antap. Ol man Jiu ya oli no save ol stori blong ol man Isrel bifo. Seken Kronikel i givhan long olgeta blong save long sam samting we i bin hapen taem ol king oli rul long laen blong Deved. Mo tu, stori ya i pulum intres blong yumi from we i tokbaot ol blesing we oli kamaot taem man i lesin long tru God mo ol trabol we man i kasem taem hem i no lesin.

WAN KING I WOKEM WAN HAOS BLONG JEOVA

(2 Kronikel 1:1–9:31)

Jeova i givim waes mo save we King Solomon i bin askem. Mo tu, God i mekem Solomon i kam rijman mo i gat gudnem. King i wokem wan naesfala haos blong Jeova long Jerusalem, mo ol man oli “glad we oli glad tumas.” (2 Kronikel 7:10) Solomon i kam “rij moa, i winim ol narafala king long wol, mo hem i waes moa, long olgeta.”​—2 Kronikel 9:22.

Solomon i rul long ol man Isrel bitim 40 yia, nao ‘hem i ded, oli berem hem, mo pikinini blong hem Rehoboam i tekem ples blong hem, i kam king.’ (2 Kronikel 9:31) Esra i no tokbaot taem ya we Solomon i lego trufala wosip. Esra i tokbaot nomo ol mastik we king i mekem taem hem i tekem plante hos long Ijip mo taem hem i mared long gel  blong Fero. Esra i talemaot stori ya long wan fasin we i givhan long man we i ridim blong i kam strong moa.

Ansa Blong Sam Kwestin Long Saed Blong Baebol:

2:14​—?From wanem vas ya i talem se Huram i blong laen blong Dan be 1 King 7:14 i talem se hem i blong laen blong Naftali? Fas King i tokbaot mama blong Huram se hem i ‘wan woman long laen blong Naftali’ from we hem i bin mared long wan man blong laen ya. Be, stret famle blong woman ya i blong laen blong Dan. Afta we man blong hem i ded, woman ya i mared long wan man Taea, mo Huram, we i gat gudhan blong wokem ol samting long aean, i pikinini blong man Taea ya.

2:18; 8:10​—Ol vas ya oli talem se namba blong ol kapten mo ol bos we oli lukaot wok blong ol slef, i 3,600 mo 250 man, be long 1 King 5:16; 9:​23, ol namba ya i 3,300 mo 550 man. ?From wanem ol namba ya oli defren? Ol namba ya oli defren maet from we oli putum ol kapten ya long defdefren grup blong olgeta. Maet stori blong Seken Kronikel i seraotem 3,600 man we oli no man Isrel stret mo 250 kapten we oli blong ol man Isrel. Be, Fas King i seraotem 3,300 man we oli bos, mo 550 man we oli wok olsem ol komanda. Nomata se i olsem wanem, total namba blong ol man we oli lukaot long wok i kasem 3,850 man.

4:​2-4​—?From wanem i gat ol pija blong ol bul oli stap long stamba blong tang ya we oli kolem solwota we oli wokem long bras? Long Baebol bul i saen blong paoa. (Esikel 1:10; Revelesen 4:6, 7) I stret nomo we oli jusum pija blong ol bul from we i gat twelef bul blong bras we tang ya i sidaon antap long hem, hevi blong tang ya i bitim 30 tan. Taem oli wokem ol bul blong mekem samting ya, i no go agensem namba tu komanmen we i talem se i tabu blong mekem wosip long wan pija blong samting long heven no long wol ya.​—Eksodas 20:​4, 5.

4:5​—?Tang ya we oli wokem long bras i save holem hamas wota long hem? Taem oli fulumap tang ya, hem i save holem samting olsem 66,000 lita wota. Be, plante taem oli fulumap kasem haf nomo. Fas King 7:26 i talem se: “Tang ya i holem samwe long foti taosen lita wota.”

5:​4, 5, 10​—?Wanem sam samting long haos tapolen bifo we oli karem i kam long haos tempol blong Solomon? Bokis blong kontrak we i stap long haos tapolen, hemia nomo we oli karem i kam long haos tempol blong Solomon. Afta we oli finis blong wokem tempol, oli karem haos tapolen long Gibeon i kam long Jerusalem.​—2 Kronikel 1:​3, 4.

Ol Lesen Blong Yumi:

1:​11, 12. Samting we Solomon i askem long Jeova i soemaot se king ya i laekem tumas waes mo save. Ol prea blong yumi long Jeova oli soemaot long hem wanem we i stap long hat blong yumi. I waes blong tingting gud long wanem we yumi stap askem long prea.

6:4. Fasin tangkiu long kaengud fasin mo gud fasin blong Jeova i mas pusum yumi blong presem hem wetem dip filing mo fasin tangkiu.

6:​18-21. God i no save stap long wan haos we oli wokem long han, taswe oli wokem tempol ya olsem stamba ples blong wosip long Jeova. Tede, long ol wanwan komuniti, i gat ol Haos Kingdom blong ol Witnes blong Jeova i stap olsem ples blong mekem wosip long hem.

6:​19, 22, 32. Jeova i save harem prea blong olgeta man long neson ya​—ol king go kasem ol man nating—​mo ol strenja tu we oli prea long hem wetem ful hat blong olgeta. *​—Ol Sam 65:2.

OL KING WE OLI KAMAOT LONG LAEN BLONG DEVED

(2 Kronikel 10:1–36:23)

Kingdom blong Isrel i seraot long tu haf​—ten laen blong Isrel long not mo tu laen i mekemap kingdom blong Juda mo Benjamin long saot. Ol pris mo ol Livae we oli stap long not mo long saot blong Isrel oli stap tru long kontrak blong kingdom we God i bin putumap, taswe oli sapotem rul blong Rehoboam we i boe blong Solomon, i bitim we oli sapotem kantri no ples blong  olgeta. Bitim 30 yia afta we tempol i finis, ol man oli kam stilim ol sas samting long tempol ya.

Long 19 king we oli rul biaen long Rehoboam, i gat 5 we oli stap tru long God, i gat 3 we fastaem oli stap tru be biaen oli lego God, mo wan i tanem tingting blong hem long rong blong hem. Ol narafala king oli mekem ol rabis fasin long ae blong Jeova. * Buk blong Kronikel i tokbaot moa ol wok blong ol faef king we oli bin trastem Jeova. Stori blong ol gudfala wok blong Hesekia long tempol mo olsem wanem Josaea i rerem olting blong mekem wan bigfala Pasova, i leftemap tingting blong ol man Jiu we oli wantem gobak blong stanemap bakegen trufala wosip blong Jeova long Jerusalem.

Ansa Blong Sam Kwestin Long Saed Blong Baebol:

13:​5, (NW )​—?Wanem mining blong tok ya ‘kontrak blong sol’? From we sol i save kipim ol samting i stap longtaem, taswe sol i olsem wan pijatok blong minim se wan samting i no save jenis samtaem. Taswe ‘kontrak blong sol’ i minim wan promes we i no save lus.

14:​2-5; 15:17​—?Olsem wanem? ?King Asa i ‘tekemaot ol ples blong mekem wosip long ol narafala god’ gogo i finisim evriwan? No gat, hem i no mekem olsem. Maet Asa i tekemaot nomo ol ples blong mekem wosip long ol narafala god we oli joen long giaman wosip, be i no ol ples blong mekem wosip long Jeova. Mo tu, maet ol man oli wokem bakegen ol ples ya blong mekem wosip long ol narafala god long ol laswan yia we Asa i rul. Taswe, boe blong Asa, Jehosafat, i tekemaot ol ples ya bakegen. Be, ol ples ya blong mekem wosip long ol narafala god oli no lus evriwan, nating se Jehosafat i rul long taem ya.​—2 Kronikel 17:​5, 6; 20:​31-33.

15:9; 34:6​—?Olsem wanem long laen blong Simeon, taem kingdom blong Isrel i seraot long tu haf? Laen blong Simeon i kasem sam defdefren graon long kantri ya Juda, mekem se laen ya blong Simeon i stap insaed long kingdom ya blong Juda mo Benjamin finis. (Josua 19:1) Be, long saed blong politik mo long saed blong skul, laen ya blong Simeon i sapotem kingdom blong not. (1 King 11:​30-33; 12:​20-24) Taswe, laen ya blong Simeon oli kaontem olgeta wetem ten laen blong Isrel long not.

16:​13, 14​—?Olsem wanem? ?Oli bonem dedbodi blong Asa? Nogat, ‘taem oli mekem wan bigfala faea blong ona long hem’ i no blong bonem dedbodi blong hem, be oli bonem ol lif we i gat gudfala smel long hem nomo.

35:3​—?Bokis blong kontrak i stap wea taem Josaea i karem i kam long tempol? Baebol i no talem sipos wan long ol rabis king i bin karem bokis ya mo putum sam ples, no maet Josaea nao i putum long wan ples we i sefgud taem oli stap fiksimap tempol. Be taem ya we Josaea i karem bokis ya i kam long tempol, hemia lastaem we Baebol i tokbaot bokis ya afta long rul blong Solomon.

Ol Lesen Blong Yumi:

13:​13-18; 14:​11, 12; 32:​9-23. !Wanem we yumi lanem long stori ya se, i impoten blong dipen long Jeova!

16:​1-5, 7; 18:​1-3, 28-32; 21:​4-6; 22:​10-12; 28:​16-22. Nogud frut i kamaot taem ol man Isrel oli joen wetem ol man long narafala kantri mo ol man we oli no bilif. Yumi waes sipos yumi no joen tumas long wol ya.​—Jon 17:​14, 16; Jemes 4:4.

16:​7-12; 26:​16-21; 32:​25, 26. Flas tingting i pulum King Asa blong mekem ol rabis samting long ol laswan yia long laef blong hem. Flas tingting i mekem se Usia i foldaon. Hesekia i no waes mo maet hem i praod tumas taem hem i soem long ol man Babilon ol sas samting we hem i gat. (Aesea 39:​1-7) Baebol i givim woning se “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.”​—Ol Proveb 16:18.

16:9. Jeova i halpem olgeta man we hat blong olgeta i stap fulwan long hem, mo hem i givim paoa long ol man blong hem.

18:​12, 13, 23, 24, 27. Olsem Mikaea, yumi mas strong mo no fraet blong tokbaot Jeova mo stamba tingting blong hem.

19:​1-3. Jeova i lukaot ol gudfala fasin blong yumi nating we yumi mekem sam samting we i mekem hem i harem nogud.

 20:​1-28. Yumi save sua se Jeova bambae i letem yumi faenem hem taem yumi stap daon mo lukluk i go long hem blong i lidim yumi.​—Ol Proveb 15:29.

20:17. Blong “luk we [Jeova] i mekem yumi win,” yumi mas “stanap rere” we i min se yumi tekem desisen blong sapotem Kingdom blong God fulwan. Yumi mas “wet” mo trastem Jeova fulwan, bitim we yumi traem blong sevem yumi.

24:​17-19; 25:14. Joas mo boe blong hem Amajia tufala i foldaon long trap ya blong mekem wosip long giaman god. Tede, fasin ya blong wosip long giaman god i save kam wan trap, speseli taem i kam long wan fasin we i haed, olsem fasin ya blong wantem evri samting no blong laekem moa kantri blong yumi bitim narafala kantri.​—Kolosi 3:5; Revelesen 13:4.

32:​6, 7. Yumi mas strong mo yumi no mas fraet taem yumi “putum olgeta klos blong faet, we God i givim long [yumi]” mo gohed long faet ya long saed blong spirit.​—Efesas 6:​11-18, NW.

33:​2-9, 12, 13, 15, 16. Wan man we i rili tanem tingting blong hem bambae i lego rabis fasin mo traehad blong mekem samting we i stret. Long rod ya nomo, Jeova i save gat sore long hem nating we hem i mekem wan samting we i nogud olsem samting we King Manase i mekem.

34:​1-3. Nating se sam nogud samting i kamaot long laef blong yumi taem yumi yangfala, be ol samting ya i no save blokem yumi blong save God mo wosip long hem. Stret tingting we Josaea i gat taem hem i yangfala maet i kamaot from bubu blong hem Manase we i rili tanem tingting blong hem mo i gobak long God. Nomata wanem tingting we maet Josaea i gat taem hem i yangfala, be hem i karem gudfala frut from. Sem samting i save hapen long yumi.

36:​15-17. Jeova i gat longfala tingting mo fasin sore. Be, longfala tingting mo fasin sore blong hem i gat mak blong hem. Ol man oli mas folem wok ya blong talemaot Kingdom sipos oli wantem kasem sef taem Jeova i finisim rabis wol ya.

36:​17, 22, 23. Tok blong Jeova i kamtru oltaem.​—1 King 9:​7, 8; Jeremaea 25:​9-11.

Wan Buk We i Pusum Hem Blong Mekem Samting

Seken Kronikel 34:33 i talem se: “[Josaea] i go long olgeta ples blong ol laen blong Isrel, i brebrekem olgeta aedol blong ol narafala god we oli stap long ol ples ya, nao hem i mekem ol man ya oli stap obei long Hae God.” ?Wanem samting i pusum Josaea blong mekem olsem? Taem Safan, sekretari blong king, i karem buk blong ol Loa blong Jeova i kam, King Josaea i askem wan man blong i ridimaot loa ya long hem. Samting ya i rili tajem hat blong king mo i pusum hem blong wantem wokhad moa blong leftemap klin wosip.

Taem yumi ridim Tok blong God mo tingting dip long wanem we yumi ridim, samting ya i save gat paoa long laef blong yumi. ?Olsem wanem? ?Taem yumi tingbaot stori blong ol king long laen blong Deved, samting ya i save leftemap tingting blong yumi blong folem eksampol blong olgeta we oli trastem Jeova, mo agensem fasin blong ol narawan we oli no obei? Yes. Seken Kronikel i wekemap yumi blong yumi givim fulwan wosip i go long God mo stap tru long hem oltaem. Ol tok blong buk ya oli laef mo oli gat paoa.​—Hibrus 4:12.

[Ol Futnot]

[Tok blong pija long pej 18]

?Yu yu save from wanem i stret blong yusum pija blong ol bul blong putum long stamba blong tang ya?

[Tok blong pija long pej 21]

Josaea i stap tru long Jeova taem hem i gruap, nating se hem i no kasem plante help taem hem i yangfala