Ol Man We “Lanwis Blong Olgeta i Naranarafala” Oli Harem Gud Nius
Ol Man We “Lanwis Blong Olgeta i Naranarafala” Oli Harem Gud Nius
“Bambae i gat ten man we oli strenja, we lanwis blong olgeta i naranarafala, bambae . . . [oli talem se], ‘Mifala i wantem kam fren blong yufala, from we mifala i harem nius se God i stap givhan long yufala.’ ”—SEKARAEA 8:23.
1. ?From wanem Jeova i jusum lafet blong Pentekos blong statem Kristin wok ya blong tijim ol man long defdefren lanwis?
PLANTE wik bifo long lafet blong Pentekos, long yia 33 K.T., * ol man Jiu mo ol man blong narafala kantri we oli joenem skul blong ol man Jiu, oli wokbaot i kam long Jerusalem. Ol man ya oli kamaot long ol 15 defdefren kantri we gavman blong Rom i rul long olgeta mo long ol narafala kantri bakegen, oli kam blong joen long lafet blong Pasova. Nao long dei blong Pentekos wan samting i hapen. Plante taosen man long taem ya oli harem gud nius long prapa lanwis blong olgeta. Yes, tabu spirit i givim paoa long sam man mo woman olsem yumi nomo, blong oli save toktok long lanwis blong ol man ya, nao oli kasem save klia wanem we oli harem, i no olsem ol man long taoa blong Babel bifo. (Ol Wok 2:1-12) Long taem blong Pentekos ya nao, faswan Kristin kongregesen i stanap mo wan bigfala wok i stat, hemia wok blong tijim ol man raon long wol long prapa lanwis blong olgeta. Wok ya i gohed kam kasem tede.
2. ?Olsem wanem ol disaepol blong Jisas oli mekem plante man oli “sek gud” long Pentekos 33 K.T.?
2 Ating ol disaepol blong Jisas oli save toktok lanwis Grik from we hemia lanwis blong plante man long taem ya. Mo tu, oli yusum lanwis Hibru long wosip blong olgeta long haos tempol. Be long dei blong lafet blong Pentekos, ol disaepol oli mekem ol man ya blong defdefren kantri oli “sek gud” taem oli storian wetem olgeta stret long lanwis blong olgeta. ?Wanem frut blong samting ya? Ol trutok we ol man ya oli harem long prapa lanwis blong olgeta i tajem hat blong olgeta. !Ale long sem dei ya nomo, 3,000 man oli baptaes, oli joenem smol grup blong ol disaepol!—Ol Wok 2:37-42.
3, 4. ?Olsem wanem wok blong prij i gru taem ol disaepol oli muvaot long Jerusalem, Judia, mo Galili?
3 Afta we bigfala merikel ya i hapen, ol man oli stat agensem ol trufala Kristin long Jerusalem mo oli ronemaot olgeta long ples blong olgeta. Nao “olgeta ya we oli bilif long Jisas . . . oli go wanwan, oli goaot long evri ples, oli stap talemaot gud nius blong Jisas.” (Ol Wok 8:1-4) Long Ol Wok japta 8, yumi ridim stori blong Filip, wan prija we i toktok lanwis Grik. Filip i prij long ol man Sameria. Mo tu, hem i prij long wan bigman blong Itiopia nao man ya i bilif long gud nius long saed blong Kraes.—Ol Wok 6:1-5; 8:5-13, 26-40; 21:8, 9.
4 Taem ol Kristin oli aot long Jerusalem, Judia, mo Galili, blong faenem wan narafala ples blong stap long hem, oli miks wetem ol man we kalja mo lanwis blong olgeta i defren. Ating sam long ol Kristin ya oli prij long ol narafala man Jiu we oli stap long ol niufala ples we oli go long hem. Be disaepol Luk i soemaot se oli mekem moa, hem i se: “Sam long olgeta, we oli man Saepras mo Saerin, oli kam long Antiok, nao oli stap talemaot gud nius ya blong Jisas, Masta blong yumi, long ol man tu we oli no laen blong Isrel.”—Ol Wok 11:19-21.
God i Stap Mekem i Sem Mak Nomo Long Olgeta Man—Gud Nius i Goaot Long Evriwan
5. ?Olsem wanem gud nius i soemaot se Jeova i stap mekem i sem mak nomo long olgeta man?
5 Olgeta samting ya we oli bin hapen long faswan handred yia oli laenap wetem fasin blong God. Yes, Jeova i no stap mekem i gud moa long wan man i bitim nara man. Taswe, Hem i stretem tingting we aposol Pita i gat long ol man blong nara kantri. Pita i glad se God i stretem hem olsem, nao hem i talem se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10:34, 35; Ol Sam 145:9) Aposol Pol, we bifo i stap kilim ol Kristin, i talemaot se God i “wantem sevem olgeta man.” Pol i soemaot bakegen, tingting ya se God i no stap mekem i gud moa long sam man i bitim nara man. (1 Timoti 2:4) Yumi luksave klia se God ya we i wokem evri samting, i stap mekem i sem mak nomo long olgeta man, from we hop blong Kingdom i blong ol man mo ol woman, nomata wanem kala blong skin, wanem kantri, no lanwis blong olgeta.
6, 7. ?Wanem ol profet tok blong Baebol we oli talemaot se gud nius bambae i go long olgeta ples long wol mo i kasem ol man blong plante lanwis?
6 Plante handred yia bifo finis, God i bin talemaot se wosip blong hem bambae i gru gogo i kasem olgeta ples long wol. Profet tok blong Daniel i talem se Jisas Kraes i kasem ‘bigfala paoa, blong bambae olgeta man blong olgeta kantri mo olgeta kala mo olgeta lanwis oli wok blong hem.’ (Daniel 7:14) Wajtaoa ya we i stap givim save long saed blong Kingdom blong Jeova, oli wokem long 151 lanwis mo serem raon long wol. From we yu stap ridim magasin ya naoia long lanwis blong yu, samting ya i soem se profet tok ya blong Baebol i stap kamtru.
7 Baebol i tokbaot wan taem we ol man we oli toktok long defdefren lanwis bambae oli harem nius blong Baebol we i givim laef. Sekaraea i raetem wan profet tok we i tokbaot olsem wanem trufala wosip bambae i pulum plante man i kam. Hem i raetem se: “Long dei ya, bambae i gat ten man we oli strenja, we lanwis blong olgeta i naranarafala, bambae oli kam luk wan laen blong Isrel, oli talem long hem se, ‘Mifala i wantem kam fren blong yufala, from we mifala i harem nius se God i stap givhan long yufala.’ ” (Sekaraea 8:23; Galesia 6:16) Mo aposol Jon i tokbaot wanem we hem i luk long wan vison i se: “Mi luk wan bigfala hip blong ol man, we olgeta i plante we plante, i no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen, mo long olgeta lanwis. . . . oli stap stanap long fran blong bigfala jea blong king, mo long fes blong Smol Sipsip ya.” (Revelesen 7:9) !Yumi luk se ol profet tok ya oli kamtru finis!
Kasem Olkaen Man
8. ?Wanem samting i stap hapen long wol tede we i jenisim wok blong prij blong yumi?
8 Tede plante man oli muvaot long ples blong olgeta blong go stap long narafala ples. Ol kantri oli wok tugeta blong mekem bisnes mo narafala samting, mekem se plante moa man oli stap muf i go long narafala kantri. Taosen man oli ronwe long ples blong olgeta from we i gat faet no from we i gat hadtaem blong kasem mane, ale oli go long ol ples we oli ting se bambae oli save gat wan laef we i moagud. Samtaem, namba blong ol man we oli muf i go long wan narafala kantri, no we oli ronwe i go stap long wan narafala kantri olsem refuji, oli plante we oli plante nao oli mekemap wanwan komuniti blong olgeta long niufala kantri blong olgeta. Long Finlan, i gat ol man we oli kamaot long bitim 120 defren ples, mo long Ostrelia, i gat ol man we oli kamaot long bitim 200 ples. !Long Yunaeted Stet, long wan taon nomo, we oli kolem San Diego, i gat ol man we oli kamaot long bitim 100 ples!
9. ?Wanem tingting we yumi mas gat long ol man long teritori blong yumi we oli toktok ol narafala lanwis?
9 ?Ol man ya we oli toktok ol naranarafala lanwis, oli mekem wok blong prij blong yumi i kam had moa? !Nogat! I gud tumas blong gat ol man ya we oli toktok defdefren lanwis from we i mekem se teritori blong yumi i kam bigwan moa. Tru ya, ol man ya oli olsem ol kakae long garen we “lif blong olgeta i drae finis, i taem blong go tekem kakae nao.” (Jon 4:35) Yumi traem bes blong yumi blong halpem ol man we oli gat nid long saed blong spirit, nomata wanem kantri no lanwis blong olgeta. (Matiu 5:3) From samting ya, evri yia i gat plante man blong ‘olgeta lanwis’ we oli kam disaepol blong Kraes. (Revelesen 14:6) Eksampol, stat long Ogis 2004, ol brata long Jemani oli stap talemaot gud nius long ol man long 40 defren lanwis. Long sem taem ya, ol brata long Ostrelia oli stap talemaot gud nius long 30 lanwis, hemia i mekem 18 lanwis moa i bitim ten yia bifo. Long Gris, ol Witnes blong Jeova oli stap prij long ol man long klosap 20 defren lanwis. Nating se Inglis hem i intenasnal lanwis blong wol, klosap 80 pesen blong olgeta Witnes blong Jeova raon long wol oli toktok wan narafala lanwis.
10. ?Wanem wok blong wanwan pablisa taem oli go pulum ol man long “olgeta ples long wol” blong oli kam disaepol?
10 !Tru ya, oda we Jisas i talem se yumi mas “go long ol man long olgeta ples long wol, blong pulum olgeta oli kam man blong [Kraes]” i rili stap kamtru! (Matiu 28:19) Ol Witnes blong Jeova long 235 kantri oli stap obei long oda ya mo oli stap serem ol buk long bitim 400 lanwis. Yes, ogenaesesen blong Jeova i wokem plante buk we oli stret blong plante man, be wanwan pablisa blong Kingdom nao i mas girap mo i mas go long “olkaen man” blong serem nius blong Baebol long lanwis we ol man ya oli save long hem. (Jon 1:7, NW ) Wok ya we yumi evriwan i mekem tugeta i halpem plante milian man blong oli kasem gud nius long lanwis blong olgeta. (Rom 10:14, 15) !Yes, wanwan long yumi i gat wan impoten wok blong mekem long saed ya!
Winim Traem We i Stap
11, 12. (a) ?Wanem traem we yumi mas winim, mo olsem wanem tabu spirit i save givhan long yumi? (b) ?From wanem i moagud blong prij long man long lanwis blong hem?
11 Tede, plante pablisa blong Kingdom oli glad blong lanem narafala lanwis. Be oli save se tabu spirit blong God bambae i no mekem wan merikel long olgeta blong oli save lanwis ya wantaem nomo. Nogat. (1 Korin 13:8) Man i mas wokhad blong lanem wan narafala lanwis. Mo olgeta we maet oli save toktok tu lanwis finis, be ating oli mas jenisim tingting mo fasin blong toktok blong olgeta sipos oli wantem we man blong narafala kalja mo kantri we i toktok long narafala lanwis ya, i glad blong harem nius blong Baebol we oli talemaot. Mo tu, ol man we oli kamaot long narafala kantri, plante taem oli sem mo oli no toktok plante, taswe i hadwok blong kasem save wanem i stap long tingting blong olgeta.
12 Nating se i olsem, tabu spirit i stap wok yet long ol man blong Jeova we oli stap traehad blong halpem olgeta we oli toktok long narafala lanwis. (Luk 11:13) Tabu spirit i no mekem merikel long yumi blong yumi save toktok narafala lanwis, be hem i save mekem we yumi wantem tumas blong toktok wetem ol man we oli no save lanwis blong yumi. (Ol Sam 143:10) Taem yumi prij no tijim tok blong Baebol long ol man long wan lanwis we oli no savegud, maet save ya i kasem tingting blong olgeta. Be, sipos yumi wantem kasem hat blong olgeta, i moagud blong toktok long lanwis blong olgeta. Long lanwis blong man ya nao, yu save tajem dip filing blong hem, yu save kasem tingting we i pusum hem blong mekem samting, mo ol samting we hem i wantem tumas blong kasem.—Luk 24:32.
13, 14. (a) ?Wanem i halpem sam brata sista blong prij long nara lanwis? (b) ?Olsem wanem yumi luksave se samfala oli wokhad blong tingbaot ol narafala fastaem?
13 Plante pablisa blong Kingdom oli tekem desisen blong lanem wan narafala lanwis mo blong prij long ol man we oli toktok lanwis ya, taem oli luk intres we ol man ya oli gat long trutok blong Baebol. Sam narafala pablisa oli harem se tingting blong olgeta i kam strong moa long wok blong prij taem oli prij long narafala lanwis, from we samting ya i mekem wok blong olgeta i jenis mo oli mas lanem sam defdefren fasin blong prij. Wan branj ofis blong ol Witnes blong Jeova long saot blong Yurop i talem se: “Plante man we oli aot long Is Yurop oli kam, oli tosta tumas from trutok.” !Tru ya, yumi rili glad blong halpem ol man olsem!—Aesea 55:1, 2.
14 Be blong karem frut long wok ya, yumi mas gat strong tingting mo yumi mas rere tu blong lego sam samting we yumi nomo i wantem. (Ol Sam 110:3) Plante famle long Japan we oli Witnes blong Jeova oli salem ol gudfala haos blong olgeta long taon, mo oli muf i go stap long ol ples afsaed long taon from we oli wantem prijimaot tok blong Baebol long ol man Jaena we oli muf i kam long Japan. Long wes kos blong Yunaeted Stet, sam pablisa oli ron long trak wan no tu aoa blong go mekem Baebol stadi wetem ol man Filipin. Long Nowei, wan brata wetem woman blong hem tufala i stap mekem stadi wetem wan famle we oli blong Afganistan. Blong mekem stadi ya, brata mo sista ya tufala i karem buklet ya ?Wanem Samting We God i Wantem Yumi Blong Mekem? * long lanwis Inglis mo Nowei. Ale, famle blong Afganistan i ridim buklet blong olgeta we i stap long lanwis Pesia. Lanwis ya i klosap sem mak long lanwis blong olgeta we oli kolem Dari. Oli stori tugeta long Inglis mo lanwis Nowei. Taem ol brata mo sista olsem oli traem bes blong olgeta blong halpem narafala mo oli yusum olkaen rod blong kasem hat blong narafala long lanwis blong hem, oli save glad taem ol man ya oli kam long trutok. *
15. ?Olsem wanem yumi evriwan i save joen long wok ya blong prij long ol man long narafala lanwis?
15 ?Yu yu save joen long wok ya blong halpem man long narafala lanwis? Maet yu save raetem wan lis blong olgeta lanwis blong narafala kantri we yu save faenem long teritori blong yu. Nao maet yu save karem sam traket no buklet long ol lanwis ya. Smol buk ya Good News for People of All Nations, we i kamaot long 2004, i halpem plante long yumi finis blong talemaot hop blong Kingdom long plante defdefren lanwis, long fasin we i isi mo i klia blong man i harem save.—Lukluk stori long pej 32 Good News for People of All Nations.
“Lavem Ol Strenja”
16. ?Olsem wanem ol brata we oli holem wok insaed long kongregesen, oli save tingbaot rod blong halpem ol man we oli toktok long narafala lanwis?
16 Nating se yumi no lanem wan narafala lanwis, yumi save givhan yet long ol man nara kantri we oli stap long ples blong yumi, blong oli gru long saed blong spirit. Jeova i tijim ol man blong hem blong “lavem ol strenja.” (Dutronome 10:18, 19) Eksampol, long wan bigfala taon long Not Amerika, i gat faef kongregesen we oli yusum semfala Haos Kingdom blong mekem ol miting. Evri yia oli stap jenisim taem blong miting, olsem we plante narafala Haos Kingdom oli stap mekem. Be oli faenemaot se jenis ya bambae i mekem we ol miting long lanwis Jaenis bambae oli stap let long Sande. Samting ya i blokem plante Jaenis we oli wok long ol restoron blong oli no save kam long miting. Ale, ol elda long ol narafala kongregesen oli glad blong jenisim taem blong miting blong olgeta blong mekem se ol Jaenis brata oli save holem miting eli long Sande.
17. ?Wanem tingting blong yumi long olgeta we oli wantem go long narafala ples no grup blong halpem ol man long narafala lanwis?
17 Ol elda we oli soemaot lav, oli save talem gudfala toktok long ol brata mo sista we oli wantem muf i go blong givhan long ol grup long narafala lanwis. Maet ol elda long kongregesen bambae oli sore blong talem tata long ol brata sista ya we oli gat gudhan blong tijim Baebol, be ol elda ya oli mas gat tingting we i sem mak olsem ol elda long Listra mo Ikoniam bifo. Ol elda ya oli no blokem Timoti blong folem Pol i go long narafala ples, nating se Timoti i bin mekem bigfala wok long kongregesen blong olgeta. (Ol Wok 16:1-4) Mo tu, olgeta we oli lidim wok blong prij oli no letem defren tingting, kastom, mo fasin blong ol strenja i spolem tingting blong olgeta. Defren olgeta, oli glad blong lanem ol defdefren fasin ya blong laef blong ol man, mo oli lukaot rod blong joengud wetem ol man ya. Oli mekem olsem from gud nius.—1 Korin 9:22, 23.
18. ?Wanem doa i open long yumi evriwan?
18 Olsem profet tok blong Baebol i bin talemaot, gud nius i stap goaot long ol man “we lanwis blong olgeta i naranarafala.” I gat plante bigfala wok yet blong mekem long ol man we oli toktok lanwis blong narafala kantri. Plante taosen pablisa oli tekem janis ya we i olsem ‘doa we i open long olgeta blong mekem gudfala wok.’ (1 Korin 16:9) Be i gat sam narafala samting blong tingbaot taem yumi wok long ol teritori olsem. Nekis stadi bambae i tokbaot samting ya.
[Ol Futnot]
^ K.T. i minim Kristin Taem.
^ Wan buk we ol Witnes blong Jeova oli wokem.
^ I gat narafala eksampol long Wajtaoa blong Eprel 1, 2004, pej 24-28, long stori ya “Smol Samting We Mitufala i Lego i Karem Plante Blesing Long Mitufala.”
?Yu Yu Save Eksplenem?
• ?Olsem wanem yumi save folem fasin blong Jeova we i mekem i sem mak nomo long olgeta man?
• ?Wanem tingting we yumi mas gat long ol man long teritori blong yumi we oli no save lanwis blong yumi?
• ?From wanem i gud blong prij long man long lanwis blong hem?
• ?Olsem wanem yumi save soem se yumi tingbaot ol strenja long ples blong yumi?
[Kwestin]
[Map blong pija long pej 23]
(Lukluk niuspepa)
Rom
ESIA
KRIT
LIBIA
FRIJIA
PAMFILIA
Jerusalem
JUDIA
IJIP
PONTAS
KAPADOSIA
MESOPOTEMIA
MEDIA
ELAM
AREBIA
PATIA
Mediterenian Si
Blak Si
Red Si
Big Bei Blong Pesia
[Foto]
Long lafet blong Pentekos long yia 33 K.T., ol man blong 15 defren kantri we Rom i rul long olgeta mo long ol narafala kantri bakegen, oli harem gud nius long lanwis blong olgeta
[Tok blong pija long pej 24]
Plante man blong nara kantri oli lesin long trutok blong Baebol
[Tok blong pija long pej 25]
Saen long wan Haos Kingdom we oli mekem miting long faef lanwis