Halpem Ol Man Jaena Long Meksiko

“TEN man we oli strenja, we lanwis blong olgeta i naranarafala, bambae oli kam luk wan laen blong Isrel, oli talem long hem se, ‘Mifala i wantem kam fren blong yufala, from we mifala i harem nius se God i stap givhan long yufala.’ ” (Sekaraea 8:23) Tede, naesfala profet tok ya i stap kamtru long olgeta ples long wol. Ol man we “lanwis blong olgeta i naranarafala” oli folem Isrel long saed blong spirit blong oli save wosipim Jeova God. Ol Witnes blong Jeova oli intres bigwan blong mekem profet tok ya i kamtru. Plante long olgeta oli lanem wan narafala lanwis blong oli save joen long wok blong prij long fulwol.

Hemia nao wanem we ol Witnes blong Jeova long Meksiko oli stap mekem. I gat samwe 30,000 Jaenis man oli laef long Meksiko. Long 2003, long bigfala taon blong Meksiko, i gat 15 Jaenis man oli joen long Memoriol blong tingbaot ded blong Kraes. From samting ya, ol Witnes long Meksiko oli luksave se moa man Jaena i save kam long trutok yet. Ale, i gat wan kos blong tri manis we i tijim ol Witnes blong Meksiko olsem wanem blong mekem wan isi storian long wan lanwis blong Jaena hemia Mandarin. Long rod ya, bambae i gat moa pablisa blong prij long ol Jaenis man. I gat 25 Witnes evriwan we i joen long kos ya. Taem kos i finis, wan haeman blong Jaenis komuniti long Meksiko i joen long taem we oli givimaot ol setifiket mo hemia i wan pruf blong soemaot se traehad blong ol studen ya i rili pulum intres blong ol man Jaena long ples ya. Wan skul blong ol Jaenis man long Meksiko i givim skolasip long tri studen blong kos ya blong oli save go long Jaena blong lanemgud lanwis Jaenis.

Oli kasem ol trening tu long kos ya. Afta we ol studen ya oli lanem sam tok long lanwis Jaenis, oli stat kwiktaem blong yusum ol tok ya blong prij long ol ofis long taon blong Meksiko. Ol studen ya we oli wok strong oli statem 21 Baebol stadi. Wan buklet we i givhan plante long olgeta hemia ?Wanem Samting We God i Wantem Yumi Blong Mekem? we i stap long lanwis Jaenis. Insaed long buklet ya, oli tanem ol tok blong hem long ol alfabet blong lanwis Rom we oli kolem se Pinyin.

?Olsem wanem ol Witnes ya we oli jes stat blong lanem lanwis Jaenis oli mekem ol Baebol stadi? Fastaem oli save talem nomo se, “Qing Du [Plis ridim]” mo oli soem wan paragraf mo kwestin tu. Afta we man i ridim paragraf mo i givim ansa, oli talem se, “Shei shei [Tangkiu]” mo, “Hen Hao [I gud tumas].”

Wan sista i statem Baebol stadi long lanwis Jaenis wetem wan woman we i talem se hem i Kristin. Afta namba tri stadi blong tufala, sista ya i wantem save sipos woman ya i kasem savegud ol samting we hem i lanem long stadi. Ale, hem i  askem wan brata we prapa lanwis blong hem i Jaenis blong kam wetem hem long stadi ya. Taem brata ya i askem long woman ya sipos hem i gat sam kwestin, woman ya i talem se: “?Mi mi mas savegud olsem wanem blong swim blong mi save tekem baptaes?”

Smoltaem biaen, wan Buk Stadi i stat mo i gat raonabaot 9 man we i toktok Jaenis mo 23 Witnes blong Meksiko, oli joen long grup ya. Long olgeta ya, i gat wan Jaenis dokta. Dokta ya i bin kasem Wajtaoa mo Wekap! long lanwis Spen. Wan sikman nao i bin givim ol magasin ya long hem. Be from we hem i no ridim lanwis Spen, hem i askem wan man blong i transletem sam tok blong magasin ya long hem. Taem hem i luksave se magasin ya i stanap long Baebol, hem i askem long sikman ya, we i wan sista, sipos hem i save karem ol magasin ya long lanwis Jaenis. Sista ya i mekem olsem we hem i talem mo tru long branj ofis blong ol Witnes blong Jeova long Meksiko, oli mekem plan blong wan Witnes we i toktok Jaenis i visitim dokta ya. Mama blong dokta ya i stap long Jaena mo hem i gat wan Baebol. Dokta ya i laekem tumas blong ridim Baebol ya. Taem hem i rere blong kam long Meksiko, mama blong hem i talem long hem se hem i mas gohed blong ridim Baebol. Dokta ya i bin prea long God blong i sanem wan man i kam halpem hem blong lanem moa long saed blong God we Baebol i tokbaot. Hem i talem se: “!God i lesin long prea blong mi!”

I gat wan Jaenis famle tu i joen long buk stadi ya. Famle ya i rentem wan rum blong wan woman Meksiko we i stap stadi Baebol wetem ol Witnes blong Jeova. Nating se famle ya i no savegud lanwis Spen be oli joen wetem woman ya long taem blong stadi. Biaen, famle ya i askem long Witnes we i mekem stadi sipos hem i gat sam buk long lanwis Jaenis. I no longtaem, Witnes ya i statem Baebol stadi wetem famle ya. Smoltaem biaen, famle ya i wantem tumas blong prij long ol manples blong olgeta mo givim laef blong olgeta i go long Jeova.

I tru, Jaenis i wan lanwis we i had blong lanem. Be, olsem ol stori long haf ya oli soemaot, wetem help blong Jeova, ol man blong plante defdefren lanwis, olsem Jaenis, oli stap lanem samting we God i wantem olgeta blong mekem, long Meksiko mo long plante narafala ples long wol tu.

[Tok blong pija long pej 17]

Wan klas blong lanem lanwis Jaenis long Meksiko

[Tok blong pija long pej 18]

Wan Witnes blong Meksiko i mekem wan Baebol stadi long lanwis Jaenis

[Tok blong pija long pej 18]

Prij long ol haos wanwan long lanwis Jaenis, Meksiko