Holide Blong Krismas Mo Niu Yia—?Bambae i Olsem We Yu Yu Wantem?

“[Bigfala] Peter i givim oda long olgeta jos blong oli holem ol spesel jos sevis blong Niu Yia long Jenuware 1. Afta, hem i talem se oli mas yusum branj blong ol grin tri blong flasem ol doa insaed long haos, mo hem i givim oda se long dei blong Niu Yia olgeta man long Moscow oli mas ‘soemaot se oli glad taem oli singaot bigwan se Hapi Niu Yia’ long ol man raonabaot long olgeta.”​—Peter the Great​—His Life and World.

?YU YU wantem tumas blong mekem wanem long ol holide blong Disemba mo Jenuware? Plante man long wol oli talem se ol holide ya oli taem blong mekem lafet blong Krismas, oli talem se hemia dei we Jisas i bon long hem, be tu oli talem se hem i wan lafet blong Niu Yia. Taswe, taem ya i wan longfala holide. Maet ol papa mama mo ol pikinini oli spel tu long taem ya, mekem se hem i wan gudfala taem blong ol famle oli joen tugeta. Sam narafala oli talem se taem ya hem i “taem blong Krismas” from we oli wantem givim ona long Kraes. Maet yu tu yu harem se hemia i wan impoten taem.

Nating se lafet ya i blong ona long Kraes, haremgud wetem ol famle, no tufala tugeta, be plante milian hasban, waef mo pikinini long ful wol oli glad blong wet long taem ya. ?Olsem wanem long yia ya? ?Sipos famle blong yu oli kam wanples, bambae yu haremgud olsem we yu yu wantem, no nogat?

Plante we oli tingbaot Krismas mo Niu Yia olsem ol spesel lafet we i joen wetem skul blong olgeta, oli luk se, plante taem, ol man oli no selebretem ol lafet ya folem tru mining blong hem. Holide ya i kam wan taem we ol man oli tingbaot blong kasem presen nomo, mo i wan eskius blong mekem ol nogud fasin we oli no ona long Kraes nating. No maet taem ya i wan spesel taem nomo blong famle i kam wanples. Plante taem, ol man we oli joen wanples long lafet ya oli bitim mak long kakae mo oli drong, nao samting ya i statem ol faet mo raorao insaed long famle. Ating yu yu luk samting ya, no i hapen long yu finis.

Sipos i olsem, ating i luk olsem se samting we i stap gohed tede i sem mak nomo long taem blong man Rasia ya Bigfala Peter, we yumi tokbaot antap. From ol samting we yumi bin tokbaot finis, plante man tede oli wantem we ol holide blong Krismas mo Niu Yia oli wan impoten samting we i joen wetem skul, mo wan gudfala taem blong ol famle oli save kam wanples. Sam oli wok strong blong jenisim ol samting ya, nao oli raetem sam tok olsem, Yumi tingbaot Jisas long taem blong Krismas. ?Be bambae i gat jenis i kamaot? ?Mo jenis ya i rili save givim ona long Kraes? ?Olsem wanem? ?I gat risen blong jenisim tingting blong ol man long saed blong Krismas holide?

Blong faenem ansa, i gud yumi tingbaot ol man long wan kantri we oli gat spesel risen blong tinghae long taem ya blong yia, mo lukluk wanem tingting we oli gat long saed ya.