?Yu Yu Rimemba?
?Yu Yu Rimemba?
?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:
• ?From wanem sin we Adam i mekem taem hem i no obei long God, i olsem wan rabis sik we wan papa i pasem i go long pikinini blong hem?
Yes sin i olsem wan sik, from we Adam i pasem sin i go long ol pikinini blong hem. Yumi kasem rabis samting ya sin, olsem we sam pikinini oli kasem sik long papa mama blong olgeta.—8/15, pej 5.
• ?Wanem i mekem se ol raf fasin long wol tede i kam antap?
Setan i traem pulum ol man oli gowe long Jeova. Ale hem i yusum ol nogud film, miusik, mo gem long kompiuta blong traem putum raf fasin long hat blong yumi. Sam long ol gem ya long kompiuta oli pulum man we i plei blong kilim man i ded mo faet long fasin we i raf bitim mak. Ol raf fasin we oli kamaot long televisin mo ol buk tu i stap pulum ol man blong oli kilim narafala.—9/1, pej 29.
• ?Ponjes Paelat hem i hu?
Hem i wan man Rom we i daon moa long ol haeman we oli kamaot long ol impoten famle mo maet hem i bin joen long ami blong Rom. Long 26 K.T., Taebirias we i empera blong Rom, i putumap Paelat i kam haeman we i lukaot long provins blong Judia. Taem Jisas i pas long kot, Paelat i harem ol poen we ol lida blong ol man Jiu oli talem agens long Jisas. Paelat i agri blong oli kilim Jisas i ded from we hem i wantem mekem ol man oli glad.—9/15, pej 10-12.
• ?Wanem “saen” ya we Matiu 24:3 (NW) i tokbaot?
Saen ya i gat plante haf blong hem we ol haf ya tugeta oli olsem wan saen. Ol wo, hadtaem blong kasem kakae, ol sik, mo graon i seksek, hemia sam haf blong saen ya. Mo ol samting ya i givhan long ol man blong Jisas blong oli luksave se hem i “stap finis” mo “rabis fasin blong wol ya i kasem en blong hem.”—10/1, pej 4-5.
• ?Wanem ya ol Diaspora mo oli stap wea?
Tok ya i minim ol man Jiu we oli go stap olbaot long ol ples afsaed long Palestaen. Long faswan handred yia bighaf blong ol man Jiu oli stap long ol ples olsem Siria, Esia Maena, Babilon, mo Ijip, mo smolhaf oli stap long Yurop long eria we gavman blong Rom i rul long hem.—10/15, pej 12.
• ?Wan Kristin i save holem stret tingting long fes blong God sipos hem i wok long wan ples we hem i mas karem masket?
Blong wok long wan ples we yu mas karem masket no narafala tul blong faet, hemia desisen we yu wan yu mas tekem. Be, ol wok olsem i save mekem we man i kilim narafala man i ded sipos hem i nidim blong yusum masket blong hem, mo taem trabol i kamaot maet hem i save kasem kil no i save ded from we narafala i sutum hem tu. Wan Kristin we i karem tul blong faet i no save kasem sam spesel wok insaed long kongregesen. (1 Timoti 3:3, 10)—11/1, pej 31.
• ?Tok ya “Amagedon” i kamaot long tok ya “Bigfala Hil blong Megido.” ?Hemia i min se faet ya blong Amagedon bambae i stap long wan hil long Medel Is?
Nogat, from we i no gat wan bigfala hil long Megido, i gat wan smol hil nomo we i hae olsem 20 meta antap long flat ples. Ples ya i smol tumas blong evri “king blong wol wetem ol soldia blong olgeta” oli save hivap long hem. Bigfala faet ya blong God bambae i kamaot long fulwol, mo bambae i finisim olgeta faet. (Revelesen 16:14, 16; 19:19; Ol Sam 46:8, 9)—12/1, pej 4-7.