Bambae Yu Save Stapgud Sipos Yu Lukaot Stret Fasin

“Yufala i mas gohed blong lukaot . . . stret fasin blong [God] fastaem.”​—MATIU 6:​33, NW.

1, 2. ?Wanem desisen we wan yangfala Kristin woman i mekem, mo from wanem hem i mekem desisen ya?

 WAN yangfala Kristin woman long Esia i wok olsem sekretari long wan ofis blong gavman. Hem i tinghevi long wok blong hem, i kam long wok evri dei long stret taem, mo hem i no les. Be hem i stap mekem wok ya olsem trening nomo, ale i no longtaem bos i kam toktok wetem hem. Bos ya i talem se bambae hem i glad blong tekem yangfala woman ya i wok blong olgeta mo i wantem tu blong givim wan posisen we i hae moa long hem. Be bos ya i talem tu se sipos yangfala woman ya i wantem samting ya bambae hem i mas slip wetem bos ya. Wantaem nomo yangfala woman ya i talem no, mo hem i no kea sipos i lusum wok ya.

² ?Olsem wanem? ?Fasin blong yangfala Kristin ya i krangke? Fasin blong hem i stret nomo mo i laenap wetem ol tok ya blong Jisas se: “Yufala i mas gohed blong lukaot . . . stret fasin blong [God] fastaem.” (Matiu 6:​33, NW ) Long lukluk blong woman ya, ol stretfala loa blong God oli impoten moa i bitim wok ya we hem i save kasem sipos i slip wetem bos blong hem.​—1 Korin 6:18.

Stret Fasin i Impoten Tumas

3. ?Wanem ya stret fasin?

³ Inglis tok ya we yumi tanem i kam “stret fasin” i minim klin mo gudfala fasin blong laef. Long Baebol, tok ya stret fasin we oli raetem long lanwis Grik mo lanwis Hibru i givim tingting se wan man i “wokbaot stret.” Be hemia i no wan fasin we i stanap long tingting blong man ya nomo, wanem we hem i ting se i stret blong folem. Nogat. (Luk 16:15) Hem i fasin we i stret from we i laenap wetem ol rul blong Jeova. Hemia stret fasin blong God.​—Rom 1:17; 3:21.

4. ?From wanem stret fasin i wan impoten fasin we ol Kristin oli mas wokem?

⁴ ?From wanem stret fasin i impoten? From we Jeova, we “hem i stret olgeta,” i laekem ol man we oli wokem stret fasin. (Ol Sam 11:7; Ol Proveb 2:​20-22; Habakuk 1:13) Man we i no wokem stret fasin, hem i no save fren wetem Jeova. (Ol Proveb 15:8) Taswe, aposol Pol i talem long Timoti se: “I nogud yu folem ol krangke fasin blong ol yangfala, we oli wantem tumas ol samting we i no stret. . . . Oltaem yu mas traehad blong mekem ol stret fasin,” mo wokem ol narafala impoten Kristin fasin. (2 Timoti 2:22) Mo from risen ya bakegen, Pol i talem se ‘stret fasin i olsem klos blong faet we oli wokem long aean,’ mo hem i pat blong klos blong faet long saed blong spirit we ol Kristin oli mas putum.​—Efesas 6:14.

5. ?Olsem wanem ol sinman oli save lukaotem stret fasin?

⁵ Tru, i no gat wan man we i save gat ol fasin we oli stret gud olgeta. Yumi evriwan i kasem sin blong Adam, taswe taem yumi bon, yumi evriwan i sinman, yumi no stret. Nating se i olsem, Jisas i talem se yumi mas lukaotem stret fasin. ?Olsem wanem yumi save mekem samting ya? Yumi naf blong mekem samting ya from we Jisas i givim laef blong hem we i stretgud olgeta, olsem wan ransom we i pemaot yumi. Nao sipos yumi bilif long sakrefaes ya, Jeova i rere blong fogivim ol sin blong yumi. (Matiu 20:28; Jon 3:16; Rom 5:​8, 9, 12, 18) From sakrefaes ya nao, taem yumi traehad blong folem ol rul blong Jeova we oli stretgud, mo yumi prea blong hem i halpem yumi blong winim ol slak fasin, Jeova i akseptem wosip blong yumi. (Ol Sam 1:6; Rom 7:​19-25; Revelesen 7:​9, 14) !Samting ya i rili leftemap tingting blong yumi!

Stret Fasin Long Wan Wol We i No Gat Stret Fasin

6. ?From wanem wol ya i wan ples we i denja long ol faswan Kristin?

⁶ Oda ya we Jisas i givim long ol disaepol blong hem se oli mas givim witnes long saed blong hem long “olgeta ples long wol,” i no wan isi samting blong mekem. (Ol Wok 1:8) Olgeta kantri we bambae oli go prij long hem oli stap long “paoa blong Setan.” (1 Jon 5:19) Wol ya i fulap long rabis fasin mo tingting we Setan nao i leftemap. Ol rabis fasin  mo tingting oli save spolem ol Kristin ya. (Efesas 2:2) Yes, wol i wan ples we i denja long olgeta. Sipos oli lukaot stret fasin blong God fastaem, long rod ya nomo bambae oli save stanap strong longtaem mo no lego Jeova. I tru, plante long ol Kristin ya oli stanap strong, be i gat sam we oli lego rod blong “fasin we i stret.”​—Ol Proveb 12:28; 2 Timoti 4:10.

7. ?Wanem wok i stap long han blong ol Kristin we i mekem se oli mas faet strong agensem ol rabis samting blong wol?

⁷ ?Olsem wanem tede? ?Laef long wol i no moa denja tumas long ol Kristin? !Si hem i denja yet! Hem i moa nogud i bitim laef long wol long faswan handred yia. Antap long hemia, olgeta long heven oli sakemaot Setan finis i kamdaon long wol. Mo Setan ya i stap faet bigwan agensem ol tabu Kristin, hem i “faet agens long ol narafala pikinini blong [woman ya]. Hemia olgeta ya we oli stap obei long ol tok blong God, mo we oli stap holem ol tok we Jisas i talemaot se i tru.” (Revelesen 12:​12, 17) Mo Setan i faet agensem eni man we i wok wetem ol ‘pikinini ya blong woman ya.’ Nating se i olsem, ol Kristin oli no save ronwe long wol ya. Oli no joen long wol ya, be oli laef yet long wol ya. (Jon 17:​15, 16) Mo oli mas prij tu long ol man long wol ya blong faenem olgeta we oli stret blong kasem laef, nao oli mas tijim ol man ya blong oli kam disaepol blong Kraes. (Matiu 24:14; 28:​19, 20) Taswe, from we ol Kristin oli no save stap longwe long ol samting blong wol ya we oli nogud, oli mas faet oltaem agensem ol samting ya. Bambae yumi tokbaot fo long ol samting nogud ya.

Rabis Fasin Long Saed Blong Seks —Wan Trap

8. ?From wanem ol man Isrel oli go wosipim ol god blong ol man Moab?

⁸ Afta we ol man Isrel oli wokbaot klosap 40 yia finis long draeples, plante long olgeta oli gowe long rod blong stret fasin. Oli luk finis we plante taem Jeova i wokem ol bigbigfala merikel blong sevem olgeta, mo i no longtaem nao bambae oli go insaed long Promes Lan. Be jes bifo we samting ya i hapen, oli tanraon long Jeova oli go wosipim ol god blong ol man Moab. ?From wanem? From we oli foldaon long trap ya se oli “wantem tumas ol rabis samting we tingting blong [olgeta] i wantem.” (1 Jon 2:16) Stori long Baebol i talem se: “Ol man blong olgeta oli stat blong go slip wetem ol woman Moab.”​—Namba 25:1.

9, 10. ?Wanem sam samting tede we i mekem se i impoten tumas blong tingbaot oltaem se ol nogud samting we tingting i wantem oli save spolem yumi?

⁹ Stori ya i soemaot se filing blong wantem samting we i no stret i save spolem man we i no lukaot gud. Yumi mas tingbaot stori ya mo lanem lesen from, antap moa from we ol man long wol tede oli luk fasin slip olbaot olsem wan samting we i oraet nomo. (1 Korin 10:​6, 8) Wan ripot long Yunaeted Stet i talem se: “Bifo long ol yia 1970, [fasin blong stap tugeta bifo mared] hem i agensem loa long plante ples long Amerika. Be tede, klosap evri man oli stap mekem fasin ya olsem we i nating nomo. Bitim 50 pesen blong olgeta man mo woman we oli mared, oli laef tugeta finis.” Fasin ya wetem sam narafala nogud fasin long saed blong seks oli no stap long wan kantri nomo. Raon long wol, ol man oli gat ol fasin ya, mo sore tumas we sam Kristin tu oli folem ol fasin ya we wol i talem se hem i wan wei blong laef. Ol Kristin ya oli lusum gudnem we oli gat insaed long Kristin kongregesen.​—1 Korin 5:11.

¹⁰ Wol i pulum ol man blong luk ol nogud fasin blong seks olsem gudfala samting nomo, i olsem we hem i mekem advataes blong samting ya. Ol film mo televisin oli givim tingting se i oraet nomo sipos ol yangfala oli slip tugeta we oli no mared yet. Oli soem fasin blong man we i slip wetem man bakegen  olsem we fasin ya i gud nomo. Mo plante so long televisin oli soem ol pija blong seks long fasin we i klia nomo. Ol kaen pija olsemia oli stap long Intenet mo i isi nomo blong man i faenem mo lukluk. Tingbaot wanem we wan man i raetem long niuspepa. Hem i stori se wan dei, boe blong hem we i gat seven yia nomo i kambak long skul mo i glad we i glad blong talem long papa blong hem se wan fren blong hem long skul i faenem wan samting long Intenet, mo long samting ya oli save luk ol woman we oli neked oli stap mekem seks. Papa ya i sek we i sek nogud. Tru ya, laki nomo we pikinini ya i talemaot samting we hem i luk. ?Be hamas narafala pikinini we ating oli stap lukluk ol doti pija olsem be oli neva talemaot long papa mama blong olgeta? ?Mo hamas papa mama oli rili save wanem samting i stap long ol vidio gem we ol pikinini blong olgeta oli stap plei long hem? Plante gem blong ol pikinini oli soemaot ol doti fasin long saed blong seks wetem wok blong ol rabis spirit mo raf fasin tu.

11. ?Olsem wanem wan famle i save blokem ol rabis fasin blong seks we i stap long wol?

¹¹ ?Olsem wanem wan famle i save blokem ol pleplei we oli no laenap wetem ol rul blong stret fasin? Oli save mekem olsem sipos oli lukaot stret fasin blong God fastaem, mo sipos oli strong blong talem “no” long enikaen doti fasin long saed blong seks. (2 Korin 6:14; Efesas 5:3) Ol papa mama oli mas lukluk gud long wanem pleplei mo samting we ol pikinini blong olgeta oli stap mekem, mo oli mas tijim pikinini blong olgeta blong lavem Jeova mo ol stret loa blong hem. Taem oli mekem olsem, oli mekem pikinini blong olgeta i strong blong agensem ol doti pija blong seks, ol vidio gem mo film we oli soem ol rabis fasin blong seks, mo enikaen narafala traem we i save pulum olgeta blong mekem i no stret.​—Dutronome 6:​4-9. *

Denja We i Stap Taem Yumi Folem Tingting Blong Komuniti

12. ?Wanem problem i kamaot long faswan handred yia?

¹² Taem Pol i stap long Listra, hemia long Esia Maena, hem i wokem wan merikel blong hilim wan sikman. Stori long Baebol i talem se: “Taem ol man oli luk samting ya we Pol i mekem, oli stap singaot long lanwis, oli talem se, ‘!Ei! Ol god blong yumi oli jenis, oli kam man, mo oli kamdaon finis long ples blong yumi.’ Nao oli putum nem blong Banabas se Sus, we i king blong ol god blong olgeta. Mo from we Pol i man blong talemaot gud nius, oli putum nem blong hem, se Heremes, we i man blong karem tok blong ol god blong olgeta.” (Ol Wok 14:​11, 12) Biaen, semfala hip man ya oli wantem kilim Pol mo Banabas i ded. (Ol Wok 14:19) I klia se ol man ya oli hareap blong folem tingting we bighaf blong komuniti blong olgeta i folem. I luk olsem se taem sam man long ples ya oli kam Kristin, oli holem yet sam tingting long saed blong gudlak mo badlak we oli kasem from komuniti blong olgeta. Long leta we Pol i raetem i go long ol Kristin long Kolosi, hem i givim woning long fasin blong mekem “wosip long ol enjel.”​—Kolosi 2:18.

13. ?Wanem sam kastom we ol Kristin oli no mas folem, mo olsem wanem oli save gat strong tingting blong no folem ol kastom ya?

¹³ Tede tu ol trufala Kristin oli mas lukaot long ol kastom we plante man oli folem, we oli stanap long sam giaman bilif blong jos mo we oli agensem ol rul blong Baebol. Eksampol, long sam kantri i gat plante  kastom we man i folem long taem we bebi i bon no taem we man i ded. Plante long ol kastom ya oli stanap long giaman tijing ya se man i gat wan spirit we i laef samples afta we hem i ded. (Prija 9:​5, 10) Long sam kantri ol man oli gat kastom ya se oli stap mekem sakomsaes long ol gel. * Hemia wan nogud fasin we i no nidim blong mekem long ol gel. Ol Kristin papa mama we oli gat lav oli no save letem pikinini gel blong olgeta i gotru long wan samting olsem. (Dutronome 6:​6, 7; Efesas 6:4) ?Olsem wanem ol Kristin oli save agensem traem we maet oli kasem long komuniti blong olgeta blong folem olkaen kastom ya? Oli save mekem olsem, sipos oli gat ful tras long Jeova. (Ol Sam 31:6) God ya we fasin blong hem i stret olgeta bambae i givim paoa mo lukaot long ol man we long fulhat blong olgeta oli talem long hem se: “Yu yu God blong mi, mo mi mi trastem yu. Yu yu stap lukaot gud long mi, mo yu stap blokemgud mi.”​—Ol Sam 91:2; Ol Proveb 29:25.

No Fogetem Jeova

14. ?Wanem woning we Jeova i givim long ol man Isrel smoltaem bifo we oli go insaed long Promes Lan?

¹⁴ Smoltaem bifo we ol man Isrel oli go insaed long Promes Lan, Jeova i givim woning long olgeta se oli no mas fogetem hem. Moses i talem long olgeta se: “[Jeova] i God blong yumi, mo oltaem, bambae yufala i mas lukaot gud blong yufala i no fogetem hem. Yufala i mas obei long olgeta loa ya blong hem, we mi mi stap givim long yufala tede. Nao taem yufala i stap kasem plante kakae olsem we yufala i wantem, mo yufala i wokem ol gudgudfala haos blong yufala blong stap long hem, mo yufala i gat plante gol mo silva blong yufala, mo ol buluk mo sipsip blong yufala wetem olgeta narafala samting blong yufala oli kam plante, be bambae yufala i no mas flas from. Bambae yufala i no mas fogetem Hae God. Hem i God blong yumi.”​—Dutronome 8:​11-14.

15. ?Olsem wanem yumi save meksua se yumi no fogetem Jeova?

¹⁵ Sem samting i save hapen tede, sipos yumi putum ol rong samting long fasples long laef blong yumi. Be sipos yumi lukaot stret fasin blong God fastaem, klin wosip bambae i moa impoten i bitim ol narafala samting long laef blong yumi. Bambae yumi mekem olsem we Pol i leftemap tingting blong yumi blong mekem, hemia blong ‘yusumgud ol janis we yumi gat’ mo mekem wok blong prij olsem wan samting we i impoten tumas blong mekem naoia. (Kolosi 4:5; 2 Timoti 4:2) Sipos yumi tingbaot moa blong spel mo yumi tingbaot moa blong gat gudtaem, olsem we hemia i moa impoten i bitim fasin blong go long miting mo prij, ale maet bambae yumi fogetem Jeova, min se yumi putum hem long seken ples long laef blong yumi. Pol i talem se long ol las dei, ol man bambae “oli wantem tumas ol samting we oli stap harem gud long hem, i winim we oli stap lavem God.” (2 Timoti 3:4) Ol Kristin we oli rili wantem mekem Jeova i glad bambae oli jekemap olgeta wanwan oltaem blong meksua se oli no letem ol rong tingting olsemia i spolem olgeta.​—2 Korin 13:5.

Lukaot Long Independen Tingting

16. ?Wanem rong tingting i stap long Iv mo long sam Kristin long taem blong Pol?

¹⁶ Long garen blong Iden, Setan i winim Iv taem hem i pulum hem blong tingbaot hem wan nomo mo blong wantem bos long hem wan. Iv i wantem mekem ol prapa desisen blong hem long saed blong wanem we i gud mo wanem we i nogud. (Jenesis 3:​1-6) Long faswan handred yia, sam Kristin long kongregesen blong Korin oli gat tingting ya blong independen. Oli ting se oli save moa i bitim Pol. Taswe hem i jikim olgeta se oli ‘ol nambawan aposol.’​—2 Korin 11:​3-5; 1 Timoti 6:​3-5.

17. ?Olsem wanem yumi save lukaot se yumi no gat independen tingting?

 ¹⁷ Long wol tede, plante man oli ‘no kea, mo oli praod tumas.’ Sore tumas we sam Kristin tu oli karem ol tingting ya. Mo sam long olgeta oli agensem trutok tu. (2 Timoti 3:4; Filipae 3:18) Long saed blong eni samting we i joen wetem wosip blong yumi, yumi mas lukluk i go long Jeova blong i lidim yumi, mo yumi mas wokgud wetem ‘slef we i stret mo waes’ mo ol elda long kongregesen blong yumi. Hemia nao rod blong lukaot stret fasin, mo samting ya i save protektem yumi blong yumi no karem tingting ya blong stap independen. (Matiu 24:​45-47, NW; Ol Sam 25:​9, 10; Aesea 30:21) Kongregesen blong ol tabu brata hem i “olsem bigfala pos blong mekem trutok i stap strong, mo i sapotem trutok.” Jeova i putum kongregesen ya i stap blong i lukaotgud long yumi mo i lidim yumi. (1 Timoti 3:​15, NW ) Sipos yumi luksave se kongregesen ya nao we Jeova i stap yusum, ale samting ya i save halpem yumi blong no ‘mekem wan samting blong leftemap yumi nomo,’ be bambae yumi putum yumi i stap daon blong mekem ol samting we Jeova i wantem yumi blong mekem we i stret oltaem nomo.​—Filipae 2:​2-4; Ol Proveb 3:​4-6.

Folem Eksampol Blong Jisas

18. ?I gud yumi traem folem wanem fasin blong Jisas?

¹⁸ Baebol i givim profet tok ya long saed blong Jisas i se: “Yu yu laekem ol fasin we i stret, be ol fasin we i nogud yu agens long olgeta.” (Ol Sam 45:7; Hibrus 1:9) !Hemia wan gudfala fasin blong folem! (1 Korin 11:1) Jisas i save gud ol rul blong Jeova long saed blong fasin we i stret. Be hem i no jes save ol rul ya nomo, hem i laekem ol rul ya tu. Taswe taem Setan i traem Jisas long draeples, Jisas i no hafhaf long tingting blong hem mo i strong blong agensem ol traem we Setan i mekem blong pulum hem i gowe long “rod we i stret.”​—Ol Proveb 8:20; Matiu 4:​3-11.

19, 20. ?Wanem gudfala samting i kamaot taem man i lukaot stret fasin?

¹⁹ I tru, ol nogud samting we bodi i wantem oli save wok strong long yumi. (Rom 7:​19, 20) Be sipos yumi tinghevi long stret fasin, ale samting ya bambae i mekem yumi strong blong agensem rabis fasin. (Ol Sam 119:165) Taem samting nogud i kam traem yumi, ale fasin ya we yumi laekem stret fasin bambae i protektem yumi long nogud samting ya. (Ol Proveb 4:​4-6) Tingbaot se, taem yumi letem wan traem i winim yumi, yumi letem Setan i win. !I moagud blong agensem Setan mo mekem we Jeova i win!​—Ol Proveb 27:11; Jemes 4:​7, 8.

²⁰ From we ol trufala Kristin oli lukaot stret fasin, laef blong olgeta i kam fulap long ‘ol stret fasin ya we Jisas Kraes i save mekem i kamtru, blong oli save presem God, mo blong oli save leftemap nem blong hem i go antap oltaem.’ (Filipae 1:​10, 11) Ol trufala Kristin oli putum “niufala fasin blong laef we God i wokem olsem we hem i wantem. Laef ya i kamaot long stret fasin mo fasin blong stap tru long hem oltaem.” (Efesas 4:​24, NW ) Yes, ol trufala Kristin oli blong Jeova mo oli laef blong mekem wok blong hem, i no blong mekem samting we olgeta nomo i wantem. (Rom 14:8; 1 Pita 4:2) Samting ya nao i bos long ol tingting mo fasin blong olgeta. !Tru ya, oli rili mekem hat blong Papa blong olgeta long heven i glad!​—Ol Proveb 23:24.

[Ol Futnot]

?Yu Yu Save Eksplenem?

• ?From wanem i impoten tumas blong lukaot stret fasin?

• ?Olsem wanem wan Kristin we i sinman i save lukaot stret fasin?

• ?Wanem sam samting long wol ya we wan Kristin i mas blokem?

• ?Olsem wanem fasin blong lukaot stret fasin i save protektem yumi?

[Kwestin]

[Tok blong pija long pej 26]

Wol ya i wan denja ples long ol man we oli biaenem Jisas

[Tok blong pija long pej 27]

Ol pikinini we papa mama i tijim olgeta blong lavem Jeova, bambae oli naf blong agensem nogud fasin long saed blong seks

[Tok blong pija long pej 28]

Sam man Isrel oli fogetem Jeova afta we oli kamtru long Promes Lan mo oli gat plante samting

[Tok blong pija long pej 29]

Ol Kristin oli folem fasin blong Jisas, oli no laekem nating ol fasin we oli no stret