Fastaem Oli Ronem Tufala, Biaen Oli Frengud Wetem Tufala

SAM yia bifo, Santiago mo woman blong hem Lourdes, tufala i muv i go long wan naesfala taon blong Huillcapata long Peru. Tufala i go blong talemaot mesej blong hop we i stap long Baebol long ol man longwe. I no longtaem biaen, wan pris blong Katolik we i kam long Cuzco i singaot ol man blong taon ya Huillcapata oli kam wanples. Pris ya i talem long olgeta se, from we ol Witnes blong Jeova oli stap long ples ya bambae ol man oli sik mo sno bambae i foldaon we i kilim ol buluk i ded mo i spolem ol garen.

Plante oli bilivim ol tok blong pris ya, mo blong bitim 6 manis, i no gat wan man long taon ya we i wantem stadi Baebol wetem Santiago mo Lourdes. Miguel we i wan haeman long taon ya, i ronem Santiago mo Lourdes long rod mo i stonem tufala long ston. Be tufala i gohed nomo blong soemaot Kristin fasin mo gat pis wetem ol man.

Sloslo sam man long taon ya oli agri blong stadi Baebol. Miguel tu, i jenisim tingting blong hem. Hem i stat stadi wetem Santiago, i no moa drong, mo i kam wan kwaet man. Afta, woman blong Miguel mo tu gel blong hem, olgeta tu oli folem trutok blong Baebol.

Long taon ya tede, i gat wan kongregesen blong ol Witnes blong Jeova we i gru long saed blong spirit. Miguel i glad from we ol ston we hem i sakem long Santiago mo Lourdes i no kilim tufala, mo hem i glad from gudfala fasin blong tufala.

[Tok blong pija long pej 32]

Kwaet fasin blong Santiago mo Lourdes (antap), i givhan long Miguel (long raetsaed) blong jenisim tingting blong hem