?Olsem Wanem Gudfala Fasin Bambae i Winim Rabis Fasin?

King Deved i wan gudfala man. Hem i gat dip lav long God, i laekem stret fasin mo i gat sore long ol puaman. Be nating se i olsem, semfala gudfala king ya i slip wetem waef blong wan nambawan man blong hem. Mo afta we Deved i faenemaot se Batseba i gat bel, wantaem nomo hem i mekem plan blong kilim hasban blong woman ya i ded. Biaen hem i mared wetem Batseba jes blong haedem rabis fasin blong hem.​—2 Samuel 11:​1-27.

I KLIA se ol man oli naf blong mekem plante gudfala samting. ?Be from wanem oli stap mekem tumas rabis fasin? Baebol i soemaot sam stamba risen from wanem i olsem. Hem i soemaot tu olsem wanem God, tru long Jisas Kraes bambae i finisim olgeta rabis fasin blong olwe.

Tingting Blong Wantem Mekem Samting We i Nogud

King Deved hem wan i eksplenem stamba blong ol rabis fasin. Afta we oli faenemaot rabis fasin blong hem, hem i agri blong kasem nogud frut from samting we hem i mekem. Biaen hem i soemaot we hem i rili sore from sin blong hem taem hem i raetem se: “Mi mi man nogud, i stat long taem we mi mi bon. Fasin blong mi i nogud, i stat long taem we mi stap yet long bel blong mama blong mi.” (Ol Sam 51:5) I no tingting blong God nating blong ol mama oli gat ol pikinini we bambae oli mekem sin. Be, taem Iv mo biaen Adam oli jusum blong rebel agensem God, oli lusum janis ya blong karem ol pikinini we oli no gat sin. (Rom 5:12) Taem namba blong ol sinman i stap kam antap, i kam klia se “taem olgeta oli smol pikinini nomo, be tingting blong olgeta i stap finis long ol rabis fasin.”​—Jenesis 8:21.

Sipos yumi no lukaot gud, tingting ya blong wantem mekem samting we i nogud bambae i pulum yumi blong ‘mekem nogud wetem woman, kam enemi, faet, jalus, kros, leftemap yumi nomo, rao oltaem, seraot, wantem kasem mak blong narafala man,’ mo plante narafala nogud fasin we  Baebol i tokbaot se hemia ol “rabis samting we tingting blong olgeta i wantem.” (Galesia 5:​19-21) Long saed blong King Deved, hem i letem slak fasin i winim hem nao i mekem nogud wetem woman. From samting ya, hem i kasem bigfala trabol. (2 Samuel 12:​1-12) Hem i save stanap strong agensem nogud tingting ya. Be, hem i girap i no sakemaot tingting ya we i wantem Batseba tumas. Deved i folem wan rod we biaen aposol Jemes i tokbaot se: “Taem wan man i wantem tumas ol samting nogud, ol fasin nogud oli holem hem, oli pulum hem, nao hem i foldaon long sin. Mo taem hem i wantem tumas ol samting nogud, fasin ya bambae i kam bigwan moa long hem, nao bambae man ya i stap mekem ol samting nogud from. Mo taem hem i stap mekem ol samting nogud, fasin ya tu bambae i kam bigwan moa long hem, nao bambae hem i ded from.”​—Jemes 1:​14, 15.

Ol nogud fasin we yumi tokbaot finis long faswan haf, olsem, ol man oli kilim plante man i ded, oli repem ol woman mo oli tekem samting blong ol narafala man, oli soemaot klia wanem i hapen taem man i letem rabis tingting i bos long ol aksin blong olgeta.

Rabis Fasin i Kamaot From Man i No Gat Save

Stori blong aposol Pol i soemaot klia namba tu risen from wanem ol man oli mekem ol rabis fasin. Taem Pol i ded, ol man oli tokbaot hem olsem wan kwaet man, wan man we i kaen. Hem i yusum taem mo paoa blong hem blong givhan long ol Kristin brata mo sista blong hem. (1 Tesalonaeka 2:​7-9) Bifo we Pol i kam wan Kristin, hem i karem nem ya Sol. Long taem ya hem i stap “tok strong yet, i stap mekem promes blong kilim” semfala grup ya we biaen hem i givhan long olgeta. (Ol Wok 9:​1, 2) ?From wanem Pol i agri blong joen long ol rabis fasin ya blong spolem ol faswan Kristin? Hem i talem se: “From mi no save ol samting ya we mi mi stap mekem.” (1 Timoti 1:13) Yes, Pol i “strong blong mekem wosip long God. Be wosip blong [hem] i no stanap long stret save.”​—Rom 10:​2, NW.

Olsem Pol, plante man we hat blong olgeta i stret oli mekem ol rabis fasin from we oli no gat stret save long saed blong wil blong God. Eksampol, Jisas i givim woning long ol man blong hem se: “I gat taem i stap kam we bambae ol man we oli kilim yufala, oli ting se oli stap mekem gudfala wok blong God.” (Jon 16:2) Tok blong Jisas i tru long ol Witnes blong Jeova tede. Long plante kantri, ol man we oli talem se oli stap mekem wok blong God oli mekem trabol long ol Witnes, mo tu, oli kilim olgeta oli ded. I klia se olkaen wok olsem oli no mekem God i glad nating.​—1 Tesalonaeka 1:6.

Man We i Stamba Blong Rabis Fasin

Jisas i eksplenem stamba risen from wanem i gat rabis fasin. Hem i tok long ol lida blong skul we oli mekem plan blong kilim hem i se: “Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting we hem i wantem. Fasin blong hem we i stat bifo olgeta, hem i man blong kilim man.” (Jon 8:44) Setan i wantem kasem samting we hem nomo i wantem taswe hem i pulum Adam mo Iv blong tufala i rebel agensem God. Fasin rebel ya i givim sin mo ded long ol man.

Fasin blong Setan blong wantem kilim man i ded i kamaot klia taem hem i traem Job. Taem Jeova i letem Setan i traem fasin blong Job blong holemstrong long Jeova, Setan i glad blong tekemaot ol samting we Job i gat be i no hemia nomo. Hem i glad tu blong kilim i ded ol ten pikinini blong Job.  (Job 1:​9-19) Long taem blong yumi, rabis fasin i stap kam antap moa. Hemia from sin we i stap long ol man mo from we oli no gat save. Mo tu, rabis fasin i kam antap, from we Setan i joen moa long ol samting we oli stap hapen long wol. Baebol i talem se Setan “wetem olgeta enjel blong hem oli aot long heven, oli kamdaon long wol.” Semfala profet tok ya i talem stret se taem Setan i kamdaon long wol be ‘sore tumas long graon.’ Nating se Setan i no save fosem ol man blong mekem ol rabis fasin be hem i gat gudhan blong “giaman long olgeta man long wol, i lidim olgeta oli go krangke.”​—Revelesen 12:​9, 12.

Sakemaot Tingting Ya Blong Wantem Mekem Samting We i Nogud

Sipos yumi wantem se rabis fasin i lus fulwan long wol, fastaem tingting blong man blong wantem mekem nogud samting, fasin we man i no gat stret save, mo ol rabis fasin blong Setan we oli save gat paoa long yumi, oli mas finis. ?Be fastaem, olsem wanem blong karemaot tingting ya we man i gat blong wantem mekem sin?

I no gat wan dokta no wan meresin we i save mekem samting ya. Be Jeova God i rerem wan samting olsem wan meresin blong finisim sin blong ol man we oli glad blong kasem. Aposol Jon i raetem se: “Blad blong Jisas Pikinini blong God, bambae i stap wasemaot olgeta sin blong yumi, i stap mekem yumi klin.” (1 Jon 1:7) Taem Jisas we i stretgud olgeta i glad nomo blong givim laef blong hem, hem i “karem olgeta sin blong yumi long bodi blong hem long pos, blong yumi save finis long sin mo yumi save stap laef long stret fasin.” (1 Pita 2:​24, NW ) Ded blong Jisas olsem wan sakrefaes bambae i karemaot ol nogud frut we oli kamaot from rabis fasin blong Adam. Pol i talem se Jisas Kraes i kam olsem “wan ransom, mo praes ya i stret blong pemaot olgeta man.” (1 Timoti 2:​6, NW ) Yes, ded blong Kraes i openem rod long olgeta man blong oli kasembak laef ya we i stretgud olgeta we Adam i bin lusum.

Be maet yu askem se, ‘?Sipos ded blong Jisas ya we i hapen klosap 2,000 yia bifo finis i blong mekem se olgeta man oli kam stretgud olgeta, from wanem rabis fasin mo ded i stap yet?’ Ansa blong kwestin ya bambae i soemaot long yumi olsem wanem namba tu risen we yumi tokbaot finis​—hemia se man i no gat save long saed blong ol stamba tingting blong God​—bambae i finis olgeta.

Gudfala Fasin i Stanap Long Stret Save

Fasin blong kasem stret save long saed blong wanem we Jeova mo Jisas oli stap mekem naoia blong finisim ol rabis fasin, i save halpem wan man we hat blong hem i stret blong i no mekem ol rabis fasin mo blong i no kam wan man we i “stap faet agens long God.” (Ol Wok 5:​38, 39) Taem wan man i mekem samting nogud from we hem i no save Jeova, Jeova i glad nomo blong no tingbaot rong blong man ya. Taem aposol Pol i stap long Atens, hem i talem se: “Long taem ya bifo we ol man oli no save God, i olsem we hem i satem ae blong hem, i no luk long ol fasin olsem. Be naoia hem i stap talem long yumi evriwan long evri ples se, ‘Yufala evriwan i mas tanem tingting blong yufala from ol sin blong yufala.’ Hem i talem olsem, from we hem i putum dei finis we bambae hem i save jajem olgeta man long wol, mo bambae hem i mekem long fasin we i stret nomo. God i jusumaot finis man ya we bambae hem i yusum blong jajem olgeta man. Mo hem i soemaot finis long olgeta man we hem bambae i mekem olsem, from we hem i mekem man ya i laef bakegen finis.”​—Ol Wok 17:​30, 31.

Pol i save se Jisas i bin laef bakegen long ded from we Jisas ya i toktok long Pol mo i stopem hem blong i no moa kilim ol Kristin oli ded. (Ol Wok 9:​3-7) Taem we Pol i kasem stret save long saed blong stamba tingting blong God, hem i jenisim tingting blong hem mo i kam wan gudfala man we i folem fasin blong Kraes. (1 Korin 11:1; Kolosi 3:​9, 10) Antap long samting ya, Pol i strong blong talemaot “gud nius ya, se God i King blong olgeta man.” (Matiu 24:14) Bitim 2,000 yia i pas nao afta we Jisas i ded mo i laef bakegen, mo long olgeta yia ya Jisas i stap jusumaot long medel blong ol man, olgeta we oli olsem Pol we bambae oli rul wetem hem long Kingdom blong hem.​—Revelesen 5:​9, 10.

Long ol yia we oli pas finis kam kasem tede, ol Witnes blong Jeova oli wok strong long wok we Jisas i askem olgeta blong mekem hemia se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong  Papa blong mi, mo long nem blong mi, mi Pikinini blong hem, mo long nem blong [tabu spirit].” (Matiu 28:​19, 20) Olgeta we oli lesin long mesej ya oli gat janis blong laef foreva long wol ya aninit long gavman blong Kraes we i stap long heven. Jisas i talem se: “Mo laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.” (Jon 17:3) Hemia beswan samting we yumi save mekem taem yumi halpem wan man blong kasem stret save ya.

Olgeta we oli akseptem gud nius ya blong Kingdom oli stap soemaot ol fasin ya olsem “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem,” nating se i gat ol rabis fasin we i stap raonabaot long olgeta. (Galesia 5:​22, 23, NW ) Taem oli folem fasin blong Kraes, oli ‘no givimbak rabis fasin long wan man we i mekem i nogud long olgeta.’ (Rom 12:17) Olgeta wanwan oli traehad blong ‘holemstrong ol stret fasin blong olgeta, blong winim ol rabis fasin.’​—Rom 12:21; Matiu 5:44.

Laswan Faet Blong Finisim Rabis Fasin

Neva ol man bambae oli naf long paoa blong olgeta nomo blong winim man ya we i stamba blong ol rabis fasin, Devel Setan. Be i no longtaem bambae Jeova i yusum Jisas blong smasem hed blong Setan. (Jenesis 3:15; Rom 16:20) Mo tu, Jeova bambae i lidim Jisas blong ‘smasem mo finisim’ olgeta politik we plante long olgeta oli mekem ol rabis fasin long laef blong ol man stat long taem bifo i kam kasem tede. (Daniel 2:44; Prija 8:9) Taem dei blong jajmen i kamtru, olgeta we oli ‘no save obei long gud nius blong Jisas, . . . Bambae oli kasem jajmen we bambae i no save finis samtaem.’​—2 Tesalonaeka 1:​8, 9; Sefanaea 1:​14-18.

Taem Setan mo ol man we oli sapotem hem oli lus evriwan, Jisas we i stap long heven bambae i halpem ol man we oli laef tru long jajmen dei ya blong oli mekem wol ya i kamgud bakegen olsem we i bin stap fastaem. Mo tu, Kraes bambae i mekem olgeta man we oli stret blong kasem laef long niufala wol ya oli laef bakegen long ded. (Luk 23:​32, 39-43; Jon 5:​26-29) Taem hem i mekem olsem, bambae hem i finisim sam long ol rabis fasin we i mekem ol man oli safa.

Jeova bambae i no fosem ol man blong oli lesin long gud nius long saed blong Jisas. Be, Hem i givim janis long ol man blong oli kasem save ya we i lidim olgeta blong kasem laef. !I impoten tumas we yu tekem janis ya naoia! (Sefanaea 2:​2, 3) Taem yu mekem olsem, bambae yu lanem olsem wanem blong dil wetem enikaen rabis fasin we i stap spolem laef blong yu naoia. Bambae yu luk tu olsem wanem Kraes bambae i lidim faet ya blong finisim ol rabis fasin.​—Revelesen 19:​11-16; 20:​1-3, 10; 21:​3, 4.

[Tok blong pija long pej 5]

Sol i mekem ol rabis fasin from we hem i no gat stret save

[Tok blong pija long pej 7]

Hemia beswan samting we yumi save mekem taem yumi halpem wan man blong kasem stret save ya