Tingting Dip i Wan Taem We Yu Save Haremgud Long Hem

SAM man oli harem se tingting dip i wan samting we i had tumas blong mekem. Maet oli ting se hem i wan wok we man i mas putum tingting blong hem i stap strong long hem. Ol man ya maet oli harem se oli sem from we oli no stap tingting dip, speseli sipos oli save se i impoten blong mekem olsem. (Filipae 4:8) Be, kwaet taem we yumi gat blong tingbaot ol trutok long saed blong Jeova, ol gudfala fasin blong hem, ol nambawan wok blong hem, ol samting we hem i wantem yumi blong mekem, mo ol stamba tingting blong hem, i save mo i mas kam wan gudfala samting we yumi yusum taem blong yumi blong mekem. ?From wanem?

Jeova God i Haefala Rula blong heven mo wol, mo hem i stap bisi blong mekem bigfala stamba tingting blong hem i kamtru. (Jon 5:17) Nating se i olsem, be hem i intres long ol samting we i stap long tingting blong ol wanwan man we oli wosip long hem. Deved, we i man blong raetem Sam, i save samting ya mo i raetem se: “Hae God. Yu yu lukluk gud long mi finis, mo yu savegud mi. Yu yu save evri samting we mi stap mekem. Yu stap longwe, be yu save olgeta tingting blong mi.”​—Ol Sam 139:​1, 2.

Maet fastaem, tingting blong wan man i foldaon from ol tok blong Sam ya. Maet hem i gat tingting se, ‘Nating se God i “stap longwe” hem i luk olgeta nogud tingting we i stap long tingting blong mi.’ I tru, i gud blong yumi save se God i luk ol nogud tingting we i stap long yumi. Samting ya i save givhan long yumi blong faet strong agens long ol nogud tingting mo, taem yumi gat ol nogud tingting olsem, yumi save talemaot long God, nao yumi sua se hem bambae i fogivim yumi tru long sakrefaes blong Jisas from bilif blong yumi. (1 Jon 1:​8, 9; 2:​1, 2) Be, long sem taem, yumi mas rimemba se Jeova i gat stret tingting taem hem lukluk long ol man we oli wosipim hem. Hem i luk taem yumi tingbaot hem wetem gudfala tingting.

Maet yu yu askem se, ‘?Olsem wanem? ?Jeova i rili tingbaot ol gudfala tingting blong ol milian man we oli wosip long hem?’ Yes hem i mekem olsem ya. Jisas i tokbaot poen ya se Jeova i intres long yumi taem hem i talem se Jeova i luk evri smolsmol pijin, nao hem i se: “Yufala i gud moa, i winim plante smosmol pijin ya.” (Luk 12:​6, 7) Ol smolsmol pijin oli no save tingbaot Jeova. !Taswe, sipos hem i tingbaot olgeta, i sua se hem i tingbaot yumi moa mo hem i glad we wanwan long yumi i tingbaot hem! Yes, olsem Deved, yumi save prea se: ‘Hae God. Yu yu strong ples blong haed blong mi, mo yu yu mekem mi mi fri. Prea blong mi, we ol tok blong mi mo ol tingting blong mi bambae oli stret gud long fes blong yu.’​—Ol Sam 19:14.

Sam moa pruf blong soem se Jeova i stap tingbaot ol man blong hem taem oli tingting dip, i stap long ol tok blong profet Malakae. Hem i tokbaot taem blong yumi hem i se: ‘Long taem ya ol man we oli ona gud long Hae God, mo oli tinghevi long hem, oli stap toktok gud wetem olgeta bakegen. Nao Hae God i stap lesin long olgeta, mo i harem ol samting we oli stap talem. Nao long fes blong hem, ol man blong hem oli raetemdaon long wan buk, ol nem blong olgeta ya we oli ona gud long hem, mo oli tinghevi long hem.’ (Malakae 3:16) Taem yumi tingbaot oltaem se Jeova i ‘stap lesin long yumi’ samting ya i save mekem yumi haremgud long taem we yumi spenem blong tingting dip long saed blong God. Taswe, yumi agri wetem ol tok blong man we i raetem Sam se: “Bambae mi stap tingting gud long olgeta bigbigfala wok ya blong yu.”​—Ol Sam 77:12.