?Tras We Yu Gat Long God Hem i Strong Olsem Wanem?
?Tras We Yu Gat Long God Hem i Strong Olsem Wanem?
‘Yufala i mas gohed blong lukaot kingdom fastaem.’—MATIU 6:33, NW.
1, 2. ?Wan man i mekem wanem desisen long saed blong wok blong hem blong winim mane? ?Mo from wanem hem i tekem desisen olsem?
WAN man i wantem givim moa taem blong hem long ol wok blong kongregesen. Be hem i no save mekem olsem from we wok blong hem blong winim mane i blokem hem blong i no stap long evri miting. ?Hem i mekem wanem? Hem i jenisim program blong hem, hem i finis long wok blong hem, mo, biaen, hem i faenem wan narafala wok we i no blokem hem blong mekem wok insaed long Kristin kongregesen. Tede, pei blong hem i smol, be hem i naf blong givim samting we famle blong hem i nidim, mo hem i gat moa taem blong mekem wok insaed long kongregesen.
2 ?Yu yu kasem save from wanem man ya i tekem wan desisen olsem? ?Yu ting se sipos yu yu man ya bambae yu mekem olsem hem? Yumi glad blong talem se plante Kristin oli mekem desisen olsem, mo long rod ya oli soemaot se oli trastem promes ya we Jisas i bin mekem se: “Taswe, yufala i mas gohed blong lukaot kingdom mo stret fasin blong hem fastaem. Nao bambae hem i givim olgeta narafala samting ya tu long yufala.” (Matiu 6:33, NW ) Yes, oli trastem Jeova blong mekem oli stap sef gud i bitim we oli trastem wok blong olgeta long wol.—Ol Proveb 3:23, 26.
3. ?From wanem maet samfala oli ting se i had tumas blong lukaot Kingdom fastaem?
3 From we laef i had, maet samfala oli ting se desisen blong man ya i no waes. Long wol tede, i gat ol man we oli stap safa from we oli pua we oli pua tumas, mo i gat ol man we oli stap harem gud from we oli save kasem plante samting blong mekem laef blong olgeta i gud moa i bitim bifo. Bighaf blong olgeta we oli laef long ol pua kantri bambae oli tekem eni janis we oli gat blong mekem laef blong olgeta i moagud lelebet. Mo, plante man we oli rij lelebet oli wokhad tumas blong no lusum gudfala laef ya we oli gat taem ekonomi i godaon, taem oli no moa save winim plante mane long wok blong olgeta, mo taem masta blong olgeta i strong long olgeta blong spenem moa taem mo paoa long wok blong olgeta. I tru, blong kasem ol samting we yumi nidim blong laef, yumi mas wokhad mo maet yumi mas wok plante, taswe samfala maet oli tingting se, ‘?I stret yet blong talem se man i mas lukaot Kingdom fastaem?’ Blong ansa long kwestin ya, i gud yumi tingbaot hu ol man ya we Jisas i bin talem tok ya long olgeta.
“I Nogud Yufala i Stap Tingting Tumas”
4, 5. ?Olsem wanem Jisas i soemaot se ol man blong God oli no mas wari bitim mak long ol samting blong laef evri dei?
4 Jisas i stap long Galili, mo i stap toktok long wan bigfala hip man we oli aot long ol defdefren ples oli kam. (Matiu 4:25) Ating smol man nomo long olgeta ya oli rij, no maet i no gat wan rijman nating i stap. Bighaf blong olgeta ya oli puaman. Nating se i olsem, Jisas i talem long olgeta se oli no mas tingting tumas long mane be oli mas hivimap samting we i sas moa, hemia ol samting long saed blong spirit. (Matiu 6:19-21, 24) Hem i talem se: “I nogud yufala i stap tingting tumas from laef blong yufala se, ‘?Bambae mifala i kakae wanem?’ no ‘?Bambae mifala i dring wanem?’ Mo i nogud yufala i stap tingting tumas from bodi blong yufala se, ‘?Bambae mifala i kasem klos blong mifala olsem wanem?’ I nogud yufala i stap tingting olsem, from we laef blong yufala i moa long kakae, mo bodi blong yufala i moa long klos.”—Matiu 6:25.
5 Plante man we oli stap lesin long Jisas, maet oli tingting se ol tok ya oli no givhan long laef blong olgeta. Oli save se oli mas wokhad, sipos no, famle blong olgeta bambae i safa. Be Jisas i mekem oli tingbaot ol pijin. Olgeta ya oli mas lukaot kakae evri dei, be Jeova i no fogetem olgeta. Mo tu, Jisas i tokbaot ol flaoa we oli stap gru olbaot, se oli naes moa i bitim ol flas klos blong Solomon. ?Sipos Jeova i kea long ol pijin mo ol flaoa, yu no ting se hem i save keagud tu long yumi? (Matiu 6:26-30) Olsem Jisas i talem, laef mo bodi blong yumi i moa impoten i bitim kakae we yumi pem blong laef, mo klos we yumi pem blong kavremap bodi blong yumi. Sipos yumi spenem olgeta paoa blong yumi blong lukaot kakae mo klos nomo nao yumi no moa gat taem blong mekem wok blong Jeova, yumi mestem wan bigfala samting. Samting ya hemia se, ?From wanem yumi stap laef?—Prija 12:13.
Holem Tingting We i Stret
6. (a) ?Ol Kristin oli mas mekem wanem? (b) ?Ol Kristin oli putum ful tras blong olgeta long hu?
6 Jisas i no stap talem se ol man ya oli mas lego ol wok blong olgeta mo wet blong God i givim samting we famle blong olgeta i nidim. Nogat. Ol pijin oli no mekem olsem. Oli go lukaot kakae blong olgeta mo blong ol pikinini blong olgeta. Taswe, ol faswan Kristin oli mas wok sipos oli wantem kakae. Yes, oli mas lukaotgud long famle blong olgeta. Ol Kristin we oli wok blong wan masta no we oli slef oli mas wokhad. (2 Tesalonaeka 3:10-12; 1 Timoti 5:8; 1 Pita 2:18) Plante taem, aposol Pol i mekem wok blong somap ol haos tapolen blong winim mane we hem i nidim blong laef. (Ol Wok 18:1-4; 1 Tesalonaeka 2:9) Be taem ol Kristin ya oli wok blong winim mane, oli no tingting se wok ya nao bambae i mekem oli stapgud. Oli trastem Jeova fastaem. From samting ya, tingting blong olgeta i kwaet, i stap long pis. Hemia wan samting we ol narafala man oli no gat. Man blong raetem Sam i talem se: “Ol man we oli stap trastem Hae God oli olsem hil ya Saeon, we i no save seksek samtaem, i no save kamaot long ples blong hem.”—Ol Sam 125:1.
7. ?Man we i no trastem Jeova fulwan maet hem i tingting olsem wanem?
7 Man we i no trastem Jeova fulwan bambae i gat wan tingting we i defren. Bighaf blong ol man oli ting se mane i stamba samting we i mekem man i harem se hem i stapgud. Taswe ol papa mama oli pulum ol pikinini blong olgeta blong skul plante, from we oli hop se long rod ya bambae pikinini i save faenem wok wetem gudfala pei. Sore tumas, sam Kristin famle tu oli mekem olsem mo oli lusum samting we i moa impoten i bitim mane, hemia se pikinini blong olgeta i gowe long trutok mo i ronem mane nomo.
8. ?Ol Kristin oli mas traem holem stret tingting long saed blong wanem?
8 Taswe, ol Kristin we oli waes oli luksave se advaes ya blong Jisas i stret yet tede olsem we i stret long ol man blong faswan handred yia. Ale, oli traem holem stret tingting. Maet oli mas wok sam moa aoa evri wik blong lukaotgud long famle blong olgeta olsem we Baebol I talem. Be oli no letem wari long saed blong mane i blokem olgeta blong holem tingting ya se ol samting long saed blong spirit oli moa impoten.—Prija 7:12.
Sam Moa Advaes Blong No Tingting Tumas
9. ?Olsem wanem Jisas i leftemap tingting blong ol man we oli trastem Jeova fulwan?
9 Taem Jisas i toktok long ol man antap long hil, hem i talem long olgeta se: “I nogud yufala i stap tingting tumas se, ‘?Bambae mifala i kakae wanem?’ no ‘?Bambae mifala i dring wanem?’ no ‘?Bambae mifala i kasem klos blong mifala olsem wanem?’ Ol hiten man, oltaem oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya.” (Matiu 6:31, 32) !Ol tok ya oli leftemap tingting bigwan! Sipos yumi trastem Jeova fulwan, bambae hem i stap oltaem blong givhan long yumi. Be ol tok ya blong Jisas oli pulum tingting blong yumi i go long wan narafala samting tu. Oli mekem yumi tingbaot se sipos yumi “tingting tumas” long ol samting blong bodi, ale, tingting blong yumi i kam olsem tingting blong “ol hiten man,” hemia ol man we oli no ol trufala Kristin.
10. ?Olsem wanem Jisas i soemaot long yangfala rijman ya samting we hem i lavem moa?
10 Wan taem, wan yang man we i rij i askem long Jisas wanem we hem i mas mekem blong kasem laef we i no save finis. Jisas i mekem yang man ya i tingbaot bakegen wanem we Loa i talem, we ol man blong God oli stap folem yet long taem ya. Yang man ya i talem long Jisas se: “Olgeta loa ya, mi mi stap obei long olgeta evriwan. ?Wanem samting moa i stap, we mi mi no mekem yet?” Ansa blong Jisas i narakaen, maet plante man oli ting se i bitim mak lelebet. Hem i se: “Sipos yu wantem kam stret gud olgeta, yu go, yu salemaot olgeta samting blong yu, yu tekem mane blong hem, yu go givim long ol puaman, nao bambae yu yu gat plante samting blong yu long heven. Mo yu kam, yu biaen long mi, yu man blong mi.” (Matiu 19:16-21) Yang man ya i gowe long Jisas we i harem nogud tumas, from we i had long hem blong lego ol sas samting blong hem. Ating hem i lavem Jeova, be hem i lavem olting blong hem moa.
11, 12. (a) ?Wanem tok we Jisas i talem long saed blong ol sas samting, we i mekem yumi tingting? (b) ?Olsem wanem ol samting we yumi gat oli save blokem yumi blong mekem wok blong Jeova?
11 Taem Jisas i toktok wetem yangfala rijman ya finis, hem i talem wan samting we hem i no bin talem yet. Hem i se: “Tru mi talem long yufala, bambae i strong long rijman blong i go insaed long niufala wol ya we God i king long hem. Bakegen, mi talem long yufala, i strong blong kamel i gotru long ae blong nidel, be i strong moa blong rijman i kam we God i King blong hem.” (Matiu 19:23, 24) ?Jisas i minim se i no gat wan rijman nating we bambae i save kasem Kingdom? No, hem i no minim olsem, from we hem i gohed i se: “God i save mekem olgeta samting.” (Matiu 19:25, 26) Mo i tru, sam rijman long taem bifo, oli bin kam ol tabu Kristin from we oli letem Jeova i halpem olgeta. (1 Timoti 6:17) Nating se i olsem, Jisas i talem ol tok ya from wan gudfala risen. Hem i stap givim wan woning.
12 Sipos wan man i laekem tumas ol samting we hem i gat, olsem yangfala rijman ya, ol samting ya oli save blokem hem blong mekem wok blong Jeova long fulhat blong hem. Hemia i sem mak long man we i rijman finis mo long man we i stap “wantem kam rijman.” (1 Timoti 6:9, 10) Man we i trastem tumas ol sas samting, hem i save kam we hem i no ‘luksave se hem i nidim ol samting long saed blong spirit.’ (Matiu 5:3, NW ) Ale from samting ya, maet hem i harem se hem i no nidim we Jeova i halpem hem. (Dutronome 6:10-12) Maet hem i save gat tingting se ol man long kongregesen oli mas mekem i gud long hem bitim ol narafala. (Jemes 2:1-4) Mo maet hem i spenem plante taem blong haremgud long ol samting we hem i gat i bitim we hem i mekem wok blong Jeova.
Stretem Tingting Blong Yumi
13. ?Wanem rong tingting we ol Kristin long Laodisia oli gat?
13 Kongregesen blong Laodisia long faswan handred yia i gat tingting we i no stret long saed blong ol sas samting. Jisas i talem long olgeta se: “Yufala i stap talem se yufala i rijman, yufala i gat evri samting, yufala i no sot long wan samting, be yufala i no save. Yufala i puaman we yufala i trabol gud, we olgeta man oli sore tumas long yufala, mo ae blong yufala i blaen mo yufala i neked.” Tru ya, i no mane mo ol sas samting we i mekem se ol man Laodisia oli slak long saed blong spirit. Be oli trastem ol sas samting ya moa i bitim we oli trastem Jeova. From samting ya, oli hafhaf nomo long saed blong spirit, i olsem we oli no hot gud mo oli no kol gud. Mo klosap nomo bambae Jisas i sakemaot olgeta olsem we “man i traot long kakae we i no stret.”—Revelesen 3:14-17.
14. ?From wanem i stret we Pol i leftemap ol Kristin Hibru man?
14 Bifo long taem ya, Pol i talem ol gudfala toktok i go long ol Kristin man Hibru from fasin blong olgeta taem sam narafala oli mekem trabol long olgeta. Hem i se: “Yufala i kasem haf blong ol trabol ya finis, we ol man we oli stap long kalabus oli stap kasem. Mo taem ol man oli tekemaot olting blong yufala, be yufala i harem gud nomo, from we yufala i save finis we yufala i gat ol narafala samting ya blong yufala i stap, we oli moa gud, mo ol samting ya bambae oli no save lus samtaem.” (Hibrus 10:34) Ol Kristin ya oli no foldaon from we oli lusum olting blong olgeta. Nogat. Oli stap glad nomo from we oli holem yet samting ya we i sas moa, i ‘moa gud, mo i no save lus samtaem.’ Oli mekem olsem man ya long parabol blong Jisas, we hem i go salemaot olgeta samting we hem i gat blong go pem wan perel we i nambawan. Yes, ol Kristin ya oli no wantem lusum hop blong Kingdom, nating se oli lusum hamas samting. (Matiu 13:45, 46) !Fasin blong olgeta i nambawan tumas!
15. ?Olsem wanem wan Kristin woman long Laeberia i putum Kingdom fastaem?
15 Plante man tede oli wokem semfala tingting we i stret. Tingbaot wan yangfala Kristin woman long Laeberia. Hem i kasem janis blong i save gohed blong skul long yunivesiti. Long kantri ya Laeberia, janis we sista ya i kasem hem i wan bigfala samting from we maet hem i rod blong gat wan gudfala laef. Be sista ya hem i wan paenia, hem i stap talemaot gud nius fultaem, mo hem i bin kasem wan leta tu we i singaot hem blong joen smoltaem long wok blong spesel paenia. Hem i jusum blong lukaot Kingdom fastaem mo gohed long wok blong paenia. Ale oli sanem hem i go long ples we hem i mas wok olsem spesel paenia, mo long tri manis nomo hem i statem 21 Baebol stadi. Yangfala sista ya, mo plante taosen narafala brata mo sista, oli putum Kingdom fastaem, nating se maet oli mestem janis blong kasem wan laef we i moagud no mane. ?Olsem wanem oli save holem tingting ya long wan wol we ol man oli ronem mane bitim mak? Oli wokem plante nambawan fasin. I gud yumi tokbaot sam long ol fasin ya.
16, 17. (a) ?From wanem i impoten we yumi gat tingting daon sipos yumi wantem trastem Jeova? (b) ?From wanem yumi mas trastem ol promes blong God?
16 Tingting daon: Baebol i talem se: “I nogud yu ting se save ya blong yu naoia, hem i naf blong givhan long yu. Yu mas trastem [Jeova] long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem. I nogud yu ting se yu yu wan waes man.” (Ol Proveb 3:5-7) Samtaem, maet yumi luk wan rod se hem i beswan folem wanem we wol i ting se i gud. (Jeremaea 17:9) Be wan Kristin we i rili wantem mekem samting we i stret, bambae hem i lukluk i go long Jeova blong i lidim hem. (Ol Sam 48:14) Yes, Kristin olsem i gat tingting daon blong lukaot advaes blong Jeova long ‘olgeta samting we hem i mekem,’ maet insaed long kongregesen, long skul no long wok, taem hem i spel, no long eni narafala samting bakegen.—Ol Sam 73:24.
17 Trastem ol promes blong Jeova: Pol i talem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6) Sipos yumi no rili sua se Jeova bambae i mekem ol promes blong hem oli kamtru, maet bambae yumi ting se i stret nomo blong ‘yusum wol’ fulwan. (1 Korin 7:31) Defren olgeta nao, sipos bilif blong yumi i strong, bambae yumi strong tu blong lukaot kingdom fastaem. ?Olsem wanem blong gat bilif we i strong? Taem yumi prea oltaem wetem fulhat blong yumi, mo taem yumi stadi oltaem long Baebol, yumi kam klosap moa long Jeova. Hemia nao i save mekem bilif blong yumi i strong. (Ol Sam 1:1-3; Filipae 4:6, 7; Jemes 4:8) Maet yumi save prea olsem King Deved se: “[Jeova], mi mi trastem yu. Mi talem se, ‘Yu yu God blong mi.’ !Hae God, yu yu gud tumas!”—Ol Sam 31:14, 19.
18, 19. (a) ?Olsem wanem fasin blong wok strong i save mekem we tras blong yumi long Jeova i kam strong moa? (b) ?From wanem wan Kristin i mas rere blong lego sam samting long laef blong hem?
18 Wok strong long ol wok blong Jeova: Pol i soemaot se man we i trastem ol promes blong Jeova hem i man we i wok strong. Hem i raetem se: “Mifala i wantem tumas we tingting blong yufala bambae i stap strong oltaem [“we yufala i wok strong,” NW ], nao bambae yufala i save kasem ol samting ya we yufala i putum tingting blong yufala i stap strong long hem.” (Hibrus 6:11) Sipos yumi bisi long wok blong Jeova, bambae hem i givhan long yumi. Nao evri taem we yumi luk se Jeova i stap wetem yumi, ale tras blong yumi long hem bambae i kam strong moa, nao bambae yumi ‘stanap strong, yumi no slak.’ (1 Korin 15:58) Bilif blong yumi bambae i kam niuwan bakegen oltaem, mo hop blong yumi bambae i sua.—Efesas 3:16-19.
19 Rere blong lego sam samting: Pol i lego wan haefala posisen blong i save folem Jisas. I klia se jus ya we hem i mekem i stret, nating se samtaem laef blong hem i had from we hem i no gat samting we hem i nidim. (1 Korin 4:11-13) Jeova i no promes se sipos yumi mekem wok blong hem bambae yumi gat gud laef wetem plante samting, nogat. Samtaem ol man blong hem oli gotru long bigfala hadtaem. Taem yumi rere blong jenisim fasin blong laef blong yumi mo lego sam samting, yumi pruvum se tingting blong yumi i rili strong blong mekem wok blong Jeova.—1 Timoti 6:6-8.
20. ?From wanem man we i putum Kingdom fastaem i mas gat longfala tingting?
20 Longfala tingting: Disaepol Jemes i talem long ol Kristin brata sista blong hem se: “Yufala i mas mekem tingting blong yufala i longfala, blong wet gogo Masta blong yumi i kambak.” (Jemes 5:7) Long wol ya we evri samting i spid, i hadwok samtaem blong gat longfala tingting. Yumi wantem we ol samting oli kamtru hareap. Be Pol i pulum yumi blong traem folem fasin blong “olgeta ya we oli bilif strong, mo we tingting blong olgeta i longfala, nao oli save kasem ol samting we God i promes blong givim long olgeta.” (Hibrus 6:12) Yumi mas glad blong wet long Jeova. !Mo bambae yumi no wet blong nating from we long en blong hem yumi save kasem laef we i no save finis long paradaes long wol!
21. (a) ?Taem yumi lukaot Kingdom fastaem yumi soemaot wanem? (b) ?Bambae yumi tokbaot wanem long nekis stadi?
21 Advaes we Jisas i talem se yumi mas lukaot Kingdom fastaem, i save givhan bigwan long laef blong yumi. Taem yumi folem advaes ya, yumi soemaot se yumi rili trastem Jeova, mo hemia nomo rod we tede i sef blong wan Kristin man i folem. Be Jisas i givim advaes ya tu se yumi mas gohed blong “lukaot . . . stret fasin blong [God] fastaem.” Long nekis stadi bambae yumi luk from wanem yumi nidim tumas blong folem advaes ya tede.
?Yu Yu Save Eksplenem?
• ?Jisas i pulum yumi blong gat wanem tingting long saed blong ol samting blong laef?
• ?Yumi lanem wanem long pijatok blong Jisas long kamel mo ae blong nidel?
• ?Wanem ol Kristin fasin we oli save halpem yumi blong lukaot Kingdom blong God fastaem?
[Kwestin]
[Tok blong pija long pej 21]
Plante man we oli stap lesin long Jisas oli puaman
[Tok blong pija long pej 23]
Yangfala rijman ya i laekem olting blong hem moa i bitim we hem i lavem God
[Tok blong pija long pej 23]
Bisnes man ya long parabol blong Jisas i salem olgeta samting we hem i gat blong pem wan perel ya we i nambawan
[Tok blong pija long pej 24]
Sipos yumi bisi long wok blong Jeova, bambae Hem i givhan long yumi oltaem