Trenem Eit Pikinini Long Rod Blong Jeova i Wan Traem Mo Wan Blesing
Laef Stori
Trenem Eit Pikinini Long Rod Blong Jeova i Wan Traem Mo Wan Blesing
JOYCELYN VALENTINE I TALEM STORI YA
Long 1989 hasban blong mi i go long narafala kantri blong wok. Hem i promes se bambae hem i sanem mane long mi blong lukaot long ol eit pikinini blong mitufala. Sam wik i pas be mi no harem wan samting long hem. Plante manis i pas be mi no kasem wan nius long hasban blong mi. Mi stap talem long mi wan bakegen mo bakegen se, ‘Taem evri samting i oraet bambae hem i kambak long hom.’
MI NO gat mane blong lukaot long famle blong mi, ale tingting blong mi i stat trabol. Long ol naet we mi no save slip mi stap askem long mi wan se, ‘?Weswe hem i save mekem olsemia long famle blong hem?’ Sloslo, mi mas luksave samting we i rili hapen se, man blong mi i lego mifala finis. Afta long 16 yia, hem i no kambak yet, mekem se mi wan nomo mi lukaot long ol pikinini blong mi. Hemia wan traem blong mi, be taem mi luk we ol pikinini blong mi oli folem rod blong Jeova, samting ya i mekem mi mi glad bigwan. Be, bifo we mi tokbaot laef blong mi wetem ol pikinini, bambae mi storian long taem we mi mi pikinini.
Lukaot Advaes Blong Baebol
Mi mi bon long 1938 long Jamaika, wan aelan long Karibin Si. Nating we papa i neva go long jos, be hem i bilif long God. Plante taem,
long naet, hem i askem mi blong rid long hem ol vas long buk blong Ol Sam. Sloslo mi naf blong talem baehat plante toktok long buk blong Ol Sam. Mama i wan memba blong wan jos we i stap long ples blong mifala, mo samtaem hem i tekem mi mi go long ol miting blong olgeta.Long jos, mifala i lanem se God i tekem ol gudfala man oli go long heven mo i bonem ol rabis man long helfaea blong olwe. Mifala i lanem tu se Jisas hem i God mo i laekem ol pikinini. Tingting blong mi i fasfas mo mi fraet long God. Mi stap tingting se, ‘?Olsem wanem wan God we i laekem yumi i save spolem ol man long faea?’
Mi no save slip long naet, taem mi tingbaot helfaea. Biaen mi tekem wan kos blong stadi Baebol, we Seven-Dei Adventis Jos i sponsarem. Oli tijim se ol rabis man bambae oli no harem nogud blong olwe, be, bambae faea i bonem olgeta gogo oli kam ases. Mi harem se tijing ya i moa stret, mo mi stat blong go long ol miting blong jos blong olgeta. Be, mi faenem se ol tijing blong olgeta i fasfas, mo mi luk se wanem we mi lanem i no stretem ol rong tingting we mi gat long saed blong ol fasin we i gud.
Long taem ya, bighaf blong ol man oli agri se fasin slip olbaot i rong. Be, mi mo sam narawan i gat tingting ya se fasin slip olbaot i minim nomo se wan man i slip wetem plante woman. Taswe, mifala i ting se i no rong sipos wan man i slip wetem wan woman bifo mared, sipos hem i rili laekem woman ya mo i wantem stap wetem hem. (1 Korin 6:9, 10; Hibrus 13:4) Tingting ya i mekem we mi mi wan mama blong 6 pikinini be mi no mared yet.
Gru Long Saed Blong Spirit
Long 1965, Vaslyn Goodison mo Ethel Chambers oli kam stap long vilej ya Bath we i stap klosap long ples blong mifala. Tufala i paenia, hemia nem blong ol Witnes blong Jeova we oli prij fultaem. Wan dei tufala i kam toktok wetem papa. Hem i agri blong stadi Baebol wetem olgeta. Sipos mi mi stap long haos taem oli kam, oli stap toktok tu long mi. Mi gat nogud tingting long saed blong ol Witnes blong Jeova. Nating se i olsem, mi agri blong stadi Baebol wetem olgeta blong faenem poen agens long olgeta.
Mi mi askem plante kwestin taem mi stadi, mo ol Witnes oli yusum Baebol blong givim ansa long ol kwestin blong mi. Oli halpem mi blong save se ol dedman oli no moa save wan samting mo oli no safa long hel. (Prija 9:5, 10) Mo tu, mi lanem se ol man ol gat hop blong laef olwe long Paradaes long wol ya. (Ol Sam 37:11, 29; Revelesen 21:3, 4) Nating se papa i stop blong stadi, mi mi stat blong joen long ol miting wetem kongregesen blong ol Witnes blong Jeova. Mi lanem plante samting long saed blong Jeova long ol miting ya we i gat pis mo oda long hem. Mi go tu long ol seket asembli mo distrik asembli, ol bigfala miting we ol Witnes oli rerem. Samting ya i mekem mi mi gat strong tingting blong wosipim Jeova long rod we hem i wantem. Be, i gat wan problem we i blokem mi.
Long taem ya, mi gat 6 pikinini finis mo mi stap wetem papa blong 3 long ol sikisfala ya, be mitufala i no mared. Long Baebol, mi lanem se God i agensem fasin ya blong slip wetem man no woman we yu no mared long hem, mo tingting blong mi i stat blong stikim mi. (Ol Proveb 5:15-20; Galesia 5:19) Taem lav we mi gat long trutok i gru, mi wantem tumas blong mekem laef blong mi i laenap wetem ol loa blong God. Ale, mi tekem wan desisen. Mi talem long man ya we mi stap wetem hem se, mitufala i mas mared sipos no, bambae mi no moa stap wetem hem. Nating we man ya i no gat sem bilif olsem mi, be, mitufala i mared long Ogis 15, 1970, hemia faef yia afta we ol Witnes oli toktok long mi fastaem. Long Disemba 1970, mi tekem baptaes blong soemaot se mi givim laef blong mi i go long Jeova.
Long saed blong wok blong prij neva bambae mi save fogetem faswan dei we mi go prij. Mi mi fraet mo mi no save olsem wanem blong statem storian long saed blong Baebol. Be, mi haremgud taem man blong haos i stopem storian blong mi. Afta mi no moa seksek. Long en
blong dei mi glad we mi glad, from we mi toktok smol wetem sam man long saed blong Baebol mo mi givimaot sam buk blong Baebol.Lukaotgud Long Famle Long Saed Blong Spirit
Long 1977, mi gat 8 pikinini nao. Mi gat strong tingting blong halpem famle blong mi blong wosipim Jeova. (Josua 24:15) Mi wokhad blong stadi Baebol wetem olgeta evri wik. Samtaem mi taed tumas, ale taem wan long ol pikinini i stap ridim wan haf long buk, mi mi slip, nao ol pikinini oli mas wekemap mi. Be, mifala i mekem famle stadi oltaem, nating se mifala i taed.
Mo tu, mi stap prea oltaem wetem ol pikinini blong mi. Taem oli kam bigwan, mi tijim olgeta wanwan blong oli prea long Jeova, mo mi meksua se oli prea oltaem bifo we oli slip long naet. Ale mi mi prea wetem wanwan long ol smosmol pikinini blong mi we oli no naf yet blong mekem prea.
Fastaem man blong mi i no glad we mi tekem ol pikinini i go long ol miting blong kongregesen. Be taem hem i tingbaot se hem nao bambae i mas lukaot long ol pikinini taem mi mi go long ol miting, ale hem i no moa agens tumas. !Long naet taem, hem i wantem go luk ol fren blong hem, be hem i no wantem karem eit pikinini i go wetem hem! Biaen, hem tu i stat givhan long mi blong rerem ol pikinini blong go long Haos Kingdom.
Sloslo ol pikinini oli lan blong go long ol miting blong kongregesen mo long wok blong prij. Long taem we oli spel long skul, oltaem oli go long wok blong prij wetem ol paenia long kongregesen. Samting ya i givhan long ol pikinini blong mi blong oli laekem moa ol brata sista mo wok blong prij.—Matiu 24:14.
Ol Taem Blong Traem
Blong halpem famle long saed blong mane, man blong mi i mas go long narafala kantri blong wok. Hem i stap longwe long famle blong plante manis, be i kambak long taem blong spel blong hem. Be, long 1989, hem i aot mo i no moa kambak. Olsem we mi talem finis, mi mi harem nogud tumas taem man blong mi i lego mifala. Plante naet mi stap krae mo prea long Jeova blong i givim paoa long mi blong stanap strong, mo mi harem se hem i ansa long ol prea blong mi. Ol vas olsem Aesea 54:4 mo , oli givim pis long tingting blong mi mo mi gat paoa blong gohed long laef blong mi. Long Kristin kongregesen, ol famle mo ol fren tu oli givhan long mi long saed blong bodi mo filing. Mi mi talem tangkiu long Jeova mo ol man blong hem from we oli halpem mi. 1 Korin 7:15
Mifala i kasem ol narafala traem bakegen. Kongregesen i putumaot wan long ol gel blong mi from we fasin blong laef blong hem i no laenap wetem Baebol. Mi mi laekem tumas ol pikinini blong mi, be mi mas stap tru long Jeova fastaem. Mekem se, mi mo ol narafala pikinini i mas folemgud ol advaes long Baebol olsem wanem blong mekem long olgeta we kongregesen i putumaot olgeta. (1 Korin 5:11, 13) Plante man we oli no kasem save desisen we mifala i tekem, oli tok agens long mifala. Be, biaen gel blong mi i kambak long kongregesen, mo man blong hem i talem long mi se hem i laekem fasin blong mifala blong holemstrong long ol rul blong Baebol. Naoia hem mo famle blong hem oli wosip long Jeova.
Ol Problem Long Saed Mane
Taem man blong mi i lego mifala, mi no stap kasem mane evri manis, mo hem i no stap givim mane long mifala. Samting we i hapen i tijim mifala blong glad nomo long wanem we mifala i gat finis, mo blong tinghae moa long ol samting long saed blong spirit bitim ol samting blong bodi. Taem ol pikinini oli lanem blong laeklaekem olgeta mo blong wok tugeta, oli frengud moa tugeta. Taem olgeta we oli bigwan moa oli stat blong wok, oli glad blong givhan long olgeta we oli smol moa. Bigfala gel blong mi, Marseree, i givhan blong pem skul fi blong smol sista blong hem, Nicole, gogo hem i finisim sekendri skul. Mo tu, mi naf blong gat wan smol stoa. Smol mane we mifala i kasem, mifala i yusum blong pem ol samting we mifala i nidim blong laef.
Jeova i neva lego mifala. Wan taem mi talem long wan Kristin sista se, mifala i no save go long distrik asembli from we mifala i no gat naf mane blong go. Sista i talem se: “!Sista Val, taem yu harem se i gat wan asembli, yu mas rerem olting blong go long asembli! Jeova bambae i givim samting we yu nidim.” Mi folem advaes we sista i givim. Jeova i givhan long mi, mo i gohed blong mekem olsem. Famle blong mifala i neva mestem wan asembli, oltaem mifala i gat mane blong go long ol asembli.
Long 1988, Hariken Gilbert i spolem Jamaika, mo mifala i mas ronwe long haos blong mifala blong stap sef. Taem win i stop smol, mi mo boe blong mi, mitufala i aot long ples we mifala i stap haed long hem blong go lukluk eria we haos blong mifala i stap long hem. Taem mi stap lukluk long hip blong ol doti, mi luk wan samting we mi mi laekem tumas. Wantaem nomo, win i blu strong bakegen, be mi stap holemtaet samting ya we mi mi laekem tumas. Boe blong mi i singaot se: “Mama, yu lego televisin ya. ?Yu yu waef blong Lot?” (Luk 17:31, 32) Tok ya i mekem mi mi tingting stret bakegen. Mi lego televisin we i wetwet, mo mitufala i ronwe i go haed.
Mi mi seksek taem mi tingbaot se, klosap mi lusum laef blong mi from wan televisin nomo. Be, hat blong mi i haremgud taem mi tingbaot gudfala tok we boe blong mi i talem long taem ya. From gudfala trening we hem i kasem long Kristin miting, hem i givhan long mi blong no kasem kil long saed blong bodi mo maet long saed blong spirit tu.
Hariken ya i spolem haos mo olting blong mifala, mo i mekem tingting i foldaon. Biaen, ol Kristin brata oli kam. Oli leftemap tingting blong mifala blong trastem Jeova mo gohed
strong long wok blong prij, mo oli halpem mifala blong wokem bakegen haos blong mifala. Lav mo ol wok we ol Witnes long Jamaika mo ol narafala kantri oli mekem we oli rere blong lego samting we olgeta nomo oli wantem, i rili tajem hat blong mifala.Putum Jeova Long Fasples
Taem Melaine, seken bon pikinini blong mi i finisim skul blong hem, hem i kam wan paenia. Biaen, hem i glad blong mekem wok blong paenia long wan narafala kongregesen, samting ya i minim se hem i mas lego wok blong hem blong winim mane. Nating se wok ya blong hem i givhan bigwan long mifala long saed blong mane, be, mifala i trastem Jeova se bambae hem i lukaot gud long mifala sipos wanwan long mifala i putum Kingdom fastaem. (Matiu 6:33) Biaen, Ewan, boe blong mi tu i kasem wan leta we i singaot hem blong joen long wok blong paenia. Hem i stap givhan long famle blong mifala long saed blong mane, be mifala i leftemap tingting blong hem blong joen long wok ya mo mifala i talem se bambae Jeova i blesem hem. Mi mi neva daonem tingting blong ol pikinini blong gohed long wok ya blong Kingdom, mo mifala we i stap long haos neva mifala i sot long wan samting. Defren olgeta, mifala i glad moa, mo sam samtaem mifala i bin givhan long sam narafala we oli gat nid.
Tede, mi mi glad we mi glad blong luk ol pikinini blong mi oli ‘stap folem trutok.’ (3 Jon 4, NTB) Melaine, wan long ol gel blong mi, naoia i stap go wetem man blong hem long wok blong visitim ol kongregesen. Gel blong mi Andrea, mo man blong hem oli spesel paenia, mo hem i stap go wetem man blong hem we wanwan taem i stap tekem ples blong seket elda blong visitim ol kongregesen. Boe blong mi Ewan mo woman blong hem tufala i spesel paenia, mo hem i wan elda long kongregesen. Wan narafala gel, Ava-Gay i wok wetem man blong hem long branj ofis blong ol Witnes blong Jeova long Jamaika. Jennifer, Genieve, mo Nicole wetem ol man blong olgeta mo ol pikinini, oli gohedgud long ol kongregesen we oli stap long hem. Marseree i stap wetem mi long haos, mo mitufala i joen wetem Kongregesen blong Port Morant. Mi mi kasem plante blesing, from eit pikinini blong mi oli gohed blong wosipim Jeova.
Taem mi kam olfala mi stat gat problem long helt blong mi. Naoia mi gat sik ya rumatis, be mi glad blong paenia yet. Sam yia bifo, mi stat harem se i hadwok blong wokbaot long ol hil raonabaot, we ol man oli stap long hem. I hadwok long mi blong go oltaem long wok blong prij. Mi harem se i moa isi long mi blong ron long baskel bitim we mi wokbaot. Ale, mi pem wan baskel we i sekenhan mo mi stat yusum baskel ya blong go prij. Fastaem, i hadwok long ol pikinini blong luk mama blong olgeta we i gat sik ya rumatis i stap ron long baskel. Be, oli glad blong luk se mi gohed long wok blong prij olsem we mi wantem.
Mi glad bigwan blong luk ol man we mi bin mekem stadi long olgeta oli folem trutok blong Baebol. Oltaem mi prea long Jeova se bambae hem i halpem evriwan long famle blong mi blong holemstrong long Jeova long ol lasdei tede mo blong olwe. Mi presem mo tangkiu long Jeova, Man we i “stap ansa long ol prea,” we i mekem mi mi naf blong winim traem ya blong trenem eit pikinini blong mi long ol rod blong hem.—Ol Sam 65:2.
[Tok blong pija long pej 10]
Mi wetem ol pikinini blong mi, ol man mo woman blong olgeta, mo ol smol bubu blong mi
[Tok blong pija long pej 12]
Mi yusum baskel long wok blong prij