Wan Kwestin
Wan Kwestin
Ol Sam 102:26 i talem se wol mo skae “bambae oli lus.” ?Tok ya i minim se wan dei wol blong yumi bambae i lus olgeta?
Long wan prea we man blong raetem Sam i mekem long Jeova, hem i talem se: “Bifo olgeta, yu yu mekem wol ya, mo long han blong yu nomo yu mekem evri samting we i stap long skae. Olgeta samting ya bambae oli lus, bambae oli brobrok olsem klos, be yu bambae yu stap oltaem nomo. Bambae yu yu sakem olgeta samting ya olsem klos we i kam olfala finis nao bambae oli lus olgeta.” (Ol Sam 102:25, 26) Ol vas raonabaot oli soemaot se ol vas ya oli no blong tokbaot wol ya se bambae i lus be oli blong tokbaot God we i stap oltaem nomo gogo i no save finis. Oli soemaot tu from wanem impoten trutok ya i save leftemap tingting blong ol man blong God.
Long ol faswan vas blong Sam 102 man blong raetem Sam i tokbaot ol samting we i mekem hem i safa, mo maet hem i stap kalabus long Babilon taem hem i raetem ol vas ya. Hem i talem se laef blong hem i lus “olsem smok.” Ol wari mo ol strong traem long filing blong hem i spolem bodi blong hem, i mekem ol bun blong hem i “hot olsem faea.” Hem i taed olsem “gras we san i bonem i drae,” mo hem i harem olsem se hem i no gat fren, “olsem wan pijin we i stap hem wan, we hem i stap sidaon antap long haos.” Ol trabol blong hem oli mekem se hem i no hanggri nating mo oltaem hem i stap harem nogud nomo. (Ol Sam 102:3-11) Be, man blong raetem Sam i no lego evri samting. ?From wanem? Hemia from promes we Jeova i mekem long Saeon we i minim Jerusalem
Nating se oli bin spolemgud Saeon finis, Jeova i promes se bambae hem i bildimap Saeon bakegen. (Aesea 66:8) From samting ya, man blong raetem Sam i talem stret long Jeova se: “Yu yu sore long Saeon, . . . from we taem i kam finis blong yu sore long hem, naoia i prapa taem blong hem. Taem [bambae] hem i wokem Saeon i gud bakegen.” (Ol Sam 102:13, 16) Biaen, man blong raetem Sam i tokbaot bakegen ol samting we oli stap mekem hem i safa. Hem i stap tingting se sipos Jeova i bildimap Jerusalem bakegen hemia i min se God i naf tu blong tekemaot hem long nogud laef ya blong hem. (Ol Sam 102:17, 20, 20) Mo i gat wan narafala samting we i pusum man blong raetem Sam blong trastem Jeova fulwan. ?Wanem samting ya? Hemia se God i stap oltaem gogo i no save finis.
Laef blong man blong raetem Sam i sot nomo, be Jeova i stap oltaem gogo i no save finis. Man blong raetem Sam i talem se: “Yu yu no save ded, bambae yu stap oltaem.” (Ol Sam 102:24) Hem i gohed i talem se: “Bifo olgeta, yu yu mekem wol ya, mo long han blong yu nomo yu mekem evri samting we i stap long skae.”—Ol Sam 102:25.
Yes i no gat wan narafala samting long heven no long wol we i olfala moa no i laef longtaem moa i bitim Jeova hem wan. Man blong raetem Sam i ademap se: “Olgeta samting ya [wol mo skae] bambae oli lus, bambae oli brobrok olsem klos, be yu bambae yu stap oltaem nomo.” (Ol Sam 102:26) Wol ya mo skae oli save lus. Be rili, long wan narafala vas blong Baebol, Jeova i talem se bambae wol mo skae tufala i stap olwe. (Ol Sam 119:90; Prija 1:4) I tru se sipos God i wantem, hem i save spolem wol mo skae. Be bambae hem i no mekem olsem from we hemia i no tingting blong hem. Defren olgeta, God i no save ded. Ol samting we God i wokem oli “stap olwe long ples blong olgeta” from we God nao, i holem olgeta oli stap. (Ol Sam 148:6) Sipos Jeova i stop blong mekem ol samting we hem i wokem oli kam niuwan bakegen, ale, ‘bambae oli lus, oli brobrok olsem klos we i kam olfala finis.’ (Ol Sam 102:26) Wan man i laef longtaem moa i bitim ol klos we hem i werem. Sem mak long Jeova, hem i laef longtaem moa i bitim ol samting we hem i wokem, mo sipos hem i wantem, hem i save letem ol samting ya oli lus. Be taem yumi jekem sam narafala vas, yumi kasemsave se hemia i no wil blong Jeova. Baebol i soem long yumi se Jeova i wantem se wol mo skae bambae oli stap blong olwe.—Ol Sam 104:5.
Samting ya i leftemap tingting blong yumi. Nao yumi save se oltaem Jeova bambae i mekem ol promes blong Hem oli kamtru. Nomata wanem trabol we yumi kasem, taem yumi krae i go long hem, yumi save sua se Hem bambae i “harem prea blong yumi, bambae hem i lesin long yumi.” (Ol Sam 102:17) Yes, Ol Sam 102 i soem se taem Jeova i promes blong halpem yumi, promes ya i strong moa i bitim wol we yumi stanap long hem.