Folem Fasin Blong Jeova We i Gat Longfala Tingting
Folem Fasin Blong Jeova We i Gat Longfala Tingting
‘[Jeova i no] stap tektaem tumas blong mekem promes blong hem i kamtru, be hem i stap mekem tingting blong hem i longfala.’—2 PITA 3:9.
1. ?Wanem nambawan presen we Jeova i mekemrere blong ol man?
JEOVA i wantem givim wan samting long yumi we i no gat narafala man i save givim. Samting ya i gud tumas mo i sas tumas, yumi no save pem samting ya mo nomata yumi wokhad olsem wanem, yumi no naf blong kasem samting ya. Samting ya we Jeova i wantem givim olsem wan presen, hemia laef we i no save finis. Bighaf blong yumi i gat janis blong kasem laef ya long paradaes long wol. (Jon 3:16) !Laef long paradaes ya bambae i gud tumas! Bambae i no moa gat samting we i mekem man i krae olsem faet, vaelens, fasin pua, fasin blong brekem loa, sik, mo ded. Ol man bambae oli laef long pis mo bambae oli joengud aninit long rul blong Kingdom blong God we i gat lav. !Yumi wantem tumas we paradaes ya i kam!—Aesea 9:6, 7; Revelesen 21:4, 5.
2. ?From wanem Jeova i no spolem rabis wol blong Setan yet?
2 Jeova tu i wantem tumas we taem i kam blong mekem wol ya i kam wan Paradaes. Yes, Jeova i wantem olsem from we hem i laekem ol fasin we i stret mo i no laekem we gudfala man i safa. (Ol Sam 33:5) Hem i no harem gud nating taem hem i luk we ol man long wol ya oli no kea mo oli agensem ol gudfala rul blong hem. Hem i no glad nating blong luk we ol man oli sakemaot hae rul blong hem mo oli mekem i nogud tumas long ol man blong hem. Be i gat gudfala risen from wanem hem i no tekem aksin yet blong spolem rabis wol ya blong Setan. Ol risen ya oli laenap wetem kwestin ya se wanem nao i stret mo wanem nao i no stret long saed blong fasin blong rulum man, antap moa long saed blong hae rul blong God. Blong letem man i kasem stret ansa long saed ya, Jeova i soemaot wan fasin we i gud tumas. I no gat plante man tede we oli wokem fasin ya. Hemia longfala tingting.
3. (a) ?Long Grik mo Hibru lanwis, tok ya we long Baebol yumi ridim se “longfala tingting” i save minim wanem? (b) ?Wanem sam kwestin we bambae yumi tokbaot long stadi ya?
3 I gat wan Grik tok we long Baebol ya New World Translation oli tanem tri taem se “longfala tingting.” Taem oli talem tok ya long lanwis Grik hem i save minim se man i wet wetem kwaet fasin, mo tingting blong hem i no foldaon. Long lanwis Grik mo Hibru tugeta, ol tok we oli yusum blong talem “longfala tingting” i minim se wan man i no hareap blong agensem narafala we i mekem i rong long hem mo i slo blong kam kros. ?Olsem wanem? ?Fasin blong Jeova blong mekem tingting blong hem i longfala i mekem i gud long yumi olsem wanem? ?Fasin blong Jeova mo ol gudfala man blong hem we oli gat longfala tingting mo we oli no hareap blong stretem narafala man i save tijim yumi long wanem samting? ?Olsem wanem yumi save se longfala tingting blong Jeova i gat mak blong hem? Bambae yumi tokbaot ol kwestin ya long stadi ya.
Tingbaot Fasin Blong Jeova
4. ?Aposol Pita i talem wanem long saed blong longfala tingting blong Jeova?
4 Aposol Pita i tokbaot fasin blong Jeova blong mekem tingting blong hem i longfala i se: “I gat wan poen we yufala i mas tingbaot. Long fes blong Masta blong yumi, wan dei, mo wan taosen yia, be tufala i sem mak nomo, tufala i no naranarafala. Sam man oli ting se Masta blong yumi i stap tektaem tumas, i no mekem promes blong hem i kamtru kwik, be i no olsem. Hem i stap mekem tingting blong hem i longfala blong wet long yufala, from we hem i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (2 Pita 3:8, 9) I gud yumi makem tu poen long ples ya we tufala bambae i halpem yumi blong kasem save long fasin ya blong Jeova blong gat longfala tingting.
5. ?Olsem wanem tingting we Jeova i gat long saed blong taem i gat paoa long ol aksin blong hem?
5 Faswan poen se Jeova i no tingbaot taem olsem we yumi tingbaot taem. Long lukluk blong God we hem i laef olwe, wan taosen yia i olsem wan dei nomo. Hem i gat inaf taem blong mekem evri samting we hem i wantem mo hem i no nid blong mekem samting hareap from we taem i sot. Be hemia i no min se hem i slo blong tekem aksin. Jeova i gat olgeta waes, taswe hem i save wetaem i stret blong tekem aksin blong stretem wan bisnes long fasin we bambae i mekem i gud long evriwan. Hem i gat longfala tingting blong wet se stret taem ya i kam. Be taem Jeova i stap wet blong stret taem ya i kam, hem i gat sore long ol man blong hem we oli stap safa. Yes, hem i wan God we “i gat sore,” mo hem i lav. (Luk 1:78; 1 Jon 4:8) Hem i naf blong finisim fulwan mo blong olwe, evri trabol mo soa we i kamaot from fasin safa ya we hem i letem i stap kam kasem naoia.—Ol Sam 37:10.
6. ?Wanem tingting we yumi no mas gat long saed blong God, mo from wanem?
6 I tru se i no isi taem yumi mas wet blong kasem wan samting we yumi wantem tumas. (Ol Proveb 13:12) Taswe taem wan man i no hareap blong mekem samting we hem i promes blong mekem, maet yumi ting se man ya i no rili wantem mekem samting ya. !I rong olgeta blong ting olsem long saed blong God! Sipos yumi jajem God we i gat longfala tingting se hem i stap slo tumas, taem ol yia oli stap pas bambae yumi no moa bilif long promes blong hem, mo tingting blong yumi i save foldaon. Ale nao, samting ya i save mekem we yumi slip long saed blong spirit. Samting we i moa nogud yet se maet yumi folem tingting blong ol man ya we Pita i bin givim woning long saed blong olgeta—hemia ol man blong jik, we oli no gat bilif. Ol man olsem oli stap tok jik se: “?Olsem wanem nao? ?Hem i promes finis blong kam, be hem i stap wea? Ol olfala blong yumi oli lus evriwan finis, be i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.”—2 Pita 3:4.
7. ?Olsem wanem longfala tingting blong Jeova i laenap wetem fasin we hem i wantem se ol man oli tanem tingting?
7 Seken samting we yumi save lanem long tok blong Pita hemia se, Jeova i gat longfala tingting from we hem i wantem we olgeta man oli tanem tingting long sin blong olgeta. Ol man we oli stronghed mo we oli no wantem lego ol nogud fasin blong olgeta, Jeova i mas jajem olgeta se bambae oli lus. Be God i no laekem we wan man i ded, nating se man ya i nogud. Hem i laekem moa sipos ol man oli tanem tingting blong olgeta, oli lego nogud fasin blong olgeta, nao oli save kasem laef. (Esikel 33:11) Taswe, hem i gat longfala tingting mo i wokem rod blong bambae ol man long evri ples long wol oli save harem gud nius mo kasem janis ya blong laef.
8. ?Olsem wanem God i soem longfala tingting long neson blong Isrel?
8 Yumi luksave longfala tingting blong God long fasin we hem i mekem long neson blong Isrel bifo. Blong plante handred yia, neson ya i no obei long God. Be Jeova i sanem ol profet blong hem bakegen mo bakegen blong talem long olgeta se: “Yufala i mas lego ol rabis fasin ya blong yufala. Yufala i mas obei long tok ya blong mi we i stap finis long buk ya blong Loa blong mi we mi givim long ol bubu blong yufala bifo, mo we mi stap talem bakegen long ol profet ya we oli man blong wok blong mi, blong oli kam talemaot long yufala.” ?Ol man Isrel oli mekem wanem? Sore tumas be “oli no wantem obei.”—2 King 17:13, 14.
9. ?Olsem wanem Jisas i soemaot fasin blong Papa blong hem we i gat longfala tingting?
9 Ale, Jeova i sanem Pikinini blong hem i kam. Jisas i no taed blong talem long ol man Jiu bakegen mo bakegen se oli mas kambak long God. Taem Jisas i gat longfala tingting wetem ol man, hem i soemaot klia fasin blong Papa blong hem. Klosap long taem we Jisas bambae i ded, hem i krae from ol manples blong hem. Hem i se: “!Oo, ol man Jerusalem, ol man Jerusalem! !Sore tumas long yufala! Yufala i stap kilim ol profet oli ded, mo yufala i stap stonem ol man blong karem tok blong God oli ded. Plante taem, mi mi wantem putum han blong mi i goraon long yufala, olsem we faol i pulum ol pikinini blong hem oli kam haed aninit long wing blong hem, be yufala i no glad.” (Matiu 23:37) Sipos Jisas i wan strong jaj we i lukaot rod blong givim panis nomo long man we i stronghed, bambae hem i no save tok olsem. Tru ya, ol tok ya oli soemaot Jisas olsem wan fren we i gat lav mo longfala tingting long ol man. Jisas i olsem Papa blong hem long heven we i wantem se ol man oli tanem tingting from sin blong olgeta, olsem nao bambae oli no kasem strong jajmen. I gat sam man we oli lesin long ol woning blong Jisas. Olgeta ya oli no ded taem God i mekem jajmen blong hem i kamtru long Jerusalem long yia 70 K.T. *—Luk 21:20-22.
10. ?Olsem wanem longfala tingting blong God i mekem i gud long yumi?
10 Longfala tingting blong God i wan nambawan fasin. Traem tingbaot. Nating se ol man oli mekem hamas sin, Jeova i givim taem long yumi wanwan mo ol milian man raon long yumi, blong yumi evriwan i gat janis blong kasem save long saed blong hem mo blong yumi save kasem laef. Pita i raet i go long ol Kristin brata blong hem i se: “Yufala i mas luk fasin ya blong hem [longfala tingting] olsem janis blong yufala blong God i sevem yufala.” (2 Pita 3:15) ?Yu yu gat tangkiu long Jeova from longfala tingting blong hem we i givim janis long yu blong kasem laef? ?Yu yu prea long Jeova blong hem i gohed blong gat longfala tingting long yu evri dei?—Matiu 6:12.
11. ?Taem yumi kasem save long fasin blong Jeova we i mekem tingting blong hem i longfala, samting ya bambae i pulum yumi blong mekem wanem?
11 Taem yumi kasem save from wanem Jeova i gat longfala tingting, samting ya i save halpem yumi blong gat longfala tingting tu, taem yumi wet blong bambae hem i sevem yumi. Bambae yumi no save jajem hem se hem i slo tumas blong mekem ol promes blong hem oli kamtru. (Ol Krae 3:26) Yumi gohed blong prea se Kingdom blong God i kam, be yumi sua tu se God i save wanem taem nao i beswan taem blong ansa long prea ya. Samting ya i mas pulum yumi blong folem fasin blong Jeova mo soemaot longfala tingting tu long ol Kristin brata blong yumi mo long ol man we yumi prij long olgeta. Yumi no wantem we man i lus be yumi wantem we oli tanem tingting blong olgeta nao olgeta tu oli save gat hop blong laef olwe olsem yumi.—1 Timoti 2:3, 4.
Tingbaot Fasin Blong Ol Profet Bifo
12, 13. ?Folem tok blong Jemes 5:10, olsem wanem profet Aesea i gat longfala tingting?
12 Taem yumi tingbaot fasin blong Jeova blong mekem tingting blong hem i longfala, yumi stat tinghae long fasin ya mo yumi save olsem wanem blong wokem fasin ya. I no isi long wan sinman blong gat longfala tingting, be hem i naf blong mekem. Yumi lanem samting ya tru long eksampol blong ol man blong God bifo. Disaepol Jemes i raetem se: “Ol brata mo sista. I gud yufala i stap tingbaot ol profet ya bifo we oli stap tok long nem blong [Jeova]. Ol man oli mekem olgeta oli harem nogud tumas, be tingting blong olgeta i no foldaon [“tingting blong olgeta i longfala,” NW ]. Long fasin ya, olgeta oli soemaot wan gudfala rod long yumi.” (Jemes 5:10) Taem yumi luk se i bin gat sam man we oli naf blong stanap strong long ol traem we oli sem mak long ol traem we yumi kasem, samting ya i mekem yumi harem gud mo i leftemap tingting blong yumi.
13 Tingbaot profet Aesea. Hem i nidim longfala tingting blong mekem wok ya we God i putum long han blong hem. Jeova i soemaot samting ya taem hem i talem long Aesea se: “Yu go talemaot long ol man ya we mi mi talem se, ‘Bambae yufala i harem, harem, harem, be bambae yufala i no save haremsave tok blong mi samtaem. Bambae yufala i luk, luk, luk, be bambae yufala i no save luksave samtaem.’ . . . Yu mas mekem we oli no save luklukgud. Sipos no, bambae oli luksave. Yu mas mekem we oli no save lesin gud. Sipos no, bambae oli haremsave. Yu mas mekem we tingting blong olgeta i kam strong. Sipos no, bambae oli kasem mining blong tok blong yu, mo sipos oli kasem, bambae oli tanem tingting blong olgeta, oli bilif long mi, nao mi bambae mi mekem olgeta oli gud bakegen. Be mi mi no wantem olsem.” (Aesea 6:9, 10) !Nating se ol man Isrel oli no wantem lesin, Aesea i gat longfala tingting blong gohed blong talemaot woning blong Jeova blong 46 yia! Long sem fasin, longfala tingting i save halpem yumi blong stanap strong longtaem long wok blong talemaot gud nius, nating se plante man oli no wantem lesin.
14, 15. ?Wanem i halpem Jeremaea blong gohed long wok blong prij nating se ol man oli givim hadtaem long hem mo tingting blong hem i foldaon?
14 Taem ol profet oli stap mekem wok blong God, oli mas stanap strong from we ol man oli no wantem lesin long olgeta. Be, i no hemia nomo. Ol man oli mekem i nogud tu long olgeta. Profet Jeremaea i harem nogud bigwan taem ol man oli “fasemtaet” hem, taem oli ‘lokem hem long wan haos kalabus,’ mo taem oli sakem hem i godaon long wan wel. (Jeremaea 20:2; 37:15; 38:6) Ol man ya, Jeremaea i wantem halpem olgeta, be olgeta nao oli mekem hem i safa. Nating se i olsem, Jeremaea i no kam kros, mo i no givimbak tu. Hem i stanap strong longtaem, i mekem tingting blong hem i longfala.
15 Ol man oli kilim Jeremaea mo oli jikim hem, be samting ya i no satem maot blong hem. Tede tu, ol man oli no save satem maot blong yumi. I tru, samtaem tingting blong yumi bambae i foldaon. Jeremaea tu, tingting blong hem i foldaon. Hem i raetem se: “Oltaem nomo oli stap mekfani long mi, mo oli stap tok nogud long mi, from we mi mi stap talemaot ol tok blong [Jeova].” Nao Jeremaea i tingting se, “Naoia bambae mi fogetem Hae God mi no moa talemaot nem blong hem.” ?Olsem wanem? ?Jeremaea i stop blong prij? Hem i gohed i se: “Ol tok blong [Jeova] i stap bon olsem faea insaed long tingting blong mi. Mi mi traem holem blong mi no talemaot, be mi no save mekem.” (Jeremaea 20:8, 9) Makem samting ya se, taem Jeremaea i tingting nomo long tok jik we ol man oli sakem long hem, ale hem i lusum glad blong hem. Be taem hem i putum tingting blong hem i stap long nius we hem i stap karem, se hem i gud tumas mo i impoten tumas, ale glad blong hem i kambak. Mo tu, Jeova we i “olsem wan strong man blong faet,” i stap wetem Jeremaea, i stap givim paoa long hem blong hem i naf blong talemaot tok blong God wetem strong tingting mo fasin no fraet.—Jeremaea 20:11.
16. ?Olsem wanem yumi save holem glad long wok ya blong talemaot gud nius?
16 ?Profet Jeremaea i glad long wok blong hem? !Yes! Hem i talem long Jeova se: “Mi mi faenem ol tok blong yu, nao i olsem we mi mi kakae olgeta. Tok blong yu i leftemap tingting blong mi, i mekem hat blong mi i harem gud tumas. O Jeova, . . . nem blong yu i stap long mi.” (Jeremaea 15:16, NW ) Jeremaea i glad tumas long janis ya we hem i gat blong mekem wok long nem blong trufala God mo blong talemaot ol tok blong Hem. Yumi save kasem glad olsem tu. Mo yumi glad, olsem ol enjel long heven, se raon long wol, plante man oli glad blong lesin long gud nius blong Kingdom, nao oli stap tanem tingting blong olgeta, oli stap lego rod we i nogud, mo oli stap wokbaot long rod we i go kasem laef.—Luk 15:10.
‘Job i Mekem Tingting Blong Hem i Longfala’
17, 18. ?Job i stanap strong tru long wanem trabol, mo wanem i kamaot from?
17 Afta we disaepol Jemes i tokbaot ol profet blong bifo, hem i raetem se: “Yufala i harem finis tok blong fasin blong Job, we hem i mekem tingting blong hem i longfala. Mo yufala i save finis ol samting we Hae God i mekem long hem biaen. Hae God i kaen tumas, mo hem i gat sore long man.” (Jemes 5:11) Tok we long vas ya mo long vas 10 yumi ridim se ‘tingting i longfala,’ long lanwis Grik hem i tu defren tok. Wan man we i stadi long saed blong mining blong ol tok ya i talem se: “Long vas 10, tok ya i minim longfala tingting taem man i mekem nogud long yumi, be long vas 11 i minim fasin blong gohed strong nating se yumi fesem hadtaem long laef mo yumi harem nogud.”
18 Job i fesem hadtaem we i mekem hem i harem nogud bigwan. Hem i lusum mane blong hem, i lusum ol pikinini blong hem, mo i harem i soa tumas long bodi blong hem from rabis sik we hem i kasem. Tingting blong hem tu i trabol from giaman toktok we sam narafala oli talem long hem se Jeova nao i stap panisim hem. Job i no save stap kwaet. Hem i sore long hem wan mo i tok olsem we hem i stret moa i winim God. (Job 35:2) Be Job i neva lusum bilif, mo hem i no lego God. Mo hem i no tok nogud long God olsem we Setan i talem se hem bambae i mekem. (Job 1:11, 21) ?Wanem i hapen from? Jeova ‘i blesem Job moa i winim we i blesem hem fastaem.’ (Job 42:12) Jeova i givim gudfala bodi long Job bakegen, i dabolem ol sas samting we hem i gat fastaem, i blesem hem wetem plante pikinini bakegen mo i givim wan longfala hapi laef long hem. Fasin blong Job blong stanap strong longtaem i givhan long hem tu blong kasem save moa long saed blong Jeova.
19. ?Fasin blong Job blong stanap strong longtaem from we tingting blong hem i longfala, i tijim yumi long wanem?
19 ?Fasin blong Job blong stanap strong longtaem from we tingting blong hem i longfala, i tijim yumi long wanem? Maet yumi harem nogud bigwan from wan sik no narafala hadtaem. Maet yumi no kasem save fulwan se from wanem Jeova i letem yumi gotru long wan traem olsem. Be yumi mas sua long samting ya se: Sipos yumi holemstrong long bilif, bambae God i blesem yumi. Jeova i neva mestem blong givim blesing long man we i traem faenem hem. (Hibrus 11:6) Jisas i talem se: “Man we i stanap strong gogo kasem en blong hem, bambae God i sevem hem.”—Matiu 10:22; 24:13.
‘Dei Blong Jeova Bambae i Kam’
20. ?From wanem yumi sua se dei blong Jeova bambae i kam?
20 I tru se Jeova i gat longfala tingting, be hem i gat stret fasin tu mo bambae i no save letem rabis fasin i stap olwe. Longfala tingting blong hem i gat mak blong hem. Pita i raetem se: “God i no letem ol man ya bifo long taem blong Noa oli go fri.” Noa mo famle blong hem oli sef be ol narafala man long taem ya we oli no obei long God, oli draon long bigfala wota. Jeova i panisim ol man long Sodom mo Gomora tu, i kilim olgeta oli ded long faea. Ol jajmen ya blong God oli stap olsem eksampol “blong soemaot fasin we [God] i save mekem long ol man we oli kam biaen, we oli no obei long hem.” Yes, yumi sua se: “Dei blong [Jeova] bambae i kam.”—2 Pita 2:5, 6; 3:10.
21. ?Olsem wanem yumi save soemaot longfala tingting mo fasin blong stanap strong? ?Bambae yumi tokbaot wanem long nekis stadi?
21 Taswe i gud yumi folem fasin blong Jeova we i mekem tingting blong hem i longfala nao yumi save halpem ol man blong oli tanem tingting blong olgeta long sin blong olgeta mo kasem laef. Mo i gud tu sipos yumi folem fasin blong ol profet we oli mekem tingting blong olgeta i longfala blong talemaot gud nius nating se ol man oli no wantem lesin. Ale yumi save sua se bambae Jeova i blesem yumi bigwan sipos yumi mekem olsem Job, we yumi stanap strong long taem blong ol traem mo yumi holemstrong long Jeova. Yumi save glad bigwan long wok we yumi mekem blong Jeova, taem yumi luk olsem wanem hem i blesem traehad we ol man blong hem oli mekem blong talemaot gud nius raon long wol. Bambae yumi tokbaot samting ya long nekis stadi.
[Futnot]
^ K.T. i minim Kristin Taem.
?Yu Yu Rimemba?
• ?From wanem Jeova i mekem tingting blong hem i longfala?
• ?Fasin blong ol profet blong gat longfala tingting i tijim yumi long wanem?
• ?Olsem wanem Job i soemaot se hem i gat fasin ya blong stanap strong longtaem? ?Hem i kasem wanem from fasin ya?
• ?Olsem wanem yumi save se longfala tingting blong Jeova i gat mak blong hem?
[Kwestin]