?Yu Yu Olsem Tri Ya Lagani Auna?

LONG wan vilej klosap long Port Moresby, hemia long Papua Niugini, tu Witnes blong Jeova tufala i finis long wok blong prij mo tufala i stap wokbaot i gobak long haos. Taem tufala i stap wokbaot i go, tufala i luk wan naesfala tri. Wan long tufala we i olfala moa i talem se, “!Yu luk, hemia wan lagani auna!” Hem i lukluk fren blong hem we i yang moa, mo i talem se: “Nem ya i minim ‘tri we i laef wan taem long yia.’ Yes, tri ya i no olsem ol narafala tri we oli stap long ol ples we oli hot. Evri yia, tri ya i stap lusum olgeta lif blong hem mo i luk olsem se hem i ded. Be, taem ren i kam, i olsem we hem i laef bakegen, i gat flaoa mo i naes.”

Yumi save lanem lesen from tri ya lagani auna, we long ples blong yumi plante man oli kolem krismestri. Sam man we oli stadi long saed blong ol tri oli talem se tri ya i wan long ol faef beswan tri long wol we oli gat ol naesfala flaoa. Nating se long drae taem tri ya i lusum ol flaoa mo ol lif blong hem, be hem i save holem wota i stap gud long stamba blong hem. Ol rus blong hem oli strong mo oli save gru i goraon long ol ston we oli stap dip aninit long graon. From samting ya, hem i save stanap strong taem i gat bigfala win. Yes, plante taem, tri ya i grugud nating se hem i stap long trabol ples.

Maet yumi kasem hadtaem we i traem bilif blong yumi bigwan. ?Wanem samting i save halpem yumi blong stanap strong long bilif? Olsem tri ya lagani auna, yumi save dring mo holemgud wota ya we i givim laef, hemia Tok blong God. Mo tu, yumi mas fas strong long Jeova we i olsem “bigfala ston” blong yumi, mo ogenaesesen blong hem. (2 Samuel 22:​3, NW ) Tru ya, lagani auna i wan tri we i pulum tingting blong man blong tingbaot se nating we yumi stap long wan wol we i nogud, yumi save stap strong mo stap naes oltaem long saed blong spirit sipos yumi yusum ol samting we Jeova i givim blong halpem yumi. Taem yumi mekem olsem, bambae yumi “kasem ol samting we God i promes blong givim,” we wan long olgeta ya hemia laef we i no save finis.​—Hibrus 6:12; Revelesen 21:4.