Wokbaot Long Rod We Laet i Stap Saen Moa Oltaem Long Hem

“Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.”​—OL PROVEB 4:18.

1, 2. ?Taem laet blong Jeova i stap kam antap moa, ol man blong God oli kasem wanem?

 ?HU MAN i naf blong talem olsem wanem laet blong san i ronemaot tudak? Jeova God we i Stamba blong laet, hem nomo i naf blong eksplenem. (Ol Sam 36:9) God i talem se: “Taem i brok delaet, man i save luk ol hil mo ol krik i kamaot we i klia we i klia, oli go antap i godaon olsem blangket we i benben olbaot. Saed blong ol hil i kamaot i klia gud, olsem trak blong man long sanbij.” (Job 38:​ 12-14) Taem laet blong san i stap kam antap, sloslo ol samting oli stap kam klia, mo yumi naf moa blong luksave ol samting, olsem sanbij we fastaem i smut gud nao i jenis taem man i wokbaot long hem mo i livim mak long hem.

² Jeova i Stamba blong wan narafala laet tu, hemia laet long saed blong save blong hem. (Ol Sam 43:3) Ol man long wol oli stap long tudak, be ol man blong God oli gat laet from we Jeova i soemaot laet blong hem long olgeta. ?Wanem i kamaot from? Baebol i ansa se: “Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.” (Ol Proveb 4:18) Laet we i kamaot long Jeova i gohed blong saenem rod blong ol man blong hem mo i mekem oli kam gud moa long wok blong olgeta insaed long ogenaesesen, i stretem ol tijing blong olgeta, mo ol fasin blong olgeta tu.

Moa We Laet i Saen Moa We Wok Blong Ogenaesesen i Kam Gud

3. ?Wanem promes we God i mekem long Aesea 60:17?

³ Jeova i talemaot long profet Aesea se: “Fastaem yufala i stap yusum bras blong wokem ol samting, be bambae mi mi givim gol long yufala. Fastaem yufala i stap yusum aean mo wud, be bambae mi mi givim silva mo bras long yufala. Fastaem yufala i stap yusum ston, be bambae mi mi givim aean long yufala.” (Aesea 60:17) Taem man blong wokem haos i yusum wan samting we i no strong, nao i jenisim samting ya mo i yusum samting we i moa strong, wok blong hem bambae i kamgud moa. Long sem fasin, long taem naoia we Baebol i kolem “en blong fasin blong laef blong wol ya,” no “ol las dei,” ol Witnes blong Jeova oli jenisim sam samting insaed long ogenaesesen we i mekem se wok blong hem i kamgud moa.​—Matiu 24:​3, NW; 2 Timoti 3:​1, NW.

4. ?Wanem niufala plan i stanap long 1919, mo plan ya i givhan olsem wanem?

⁴ Long stat blong ol las dei, ol Baebol Studen, hemia nem blong ol Witnes blong Jeova bifo, oli stap vot blong putumap ol elda mo dikon long ol kongregesen blong olgeta. Be sam long ol elda ya oli no rili tinghevi long wok blong prij. Sam long olgeta oli no wantem prij mo oli talem sam toktok we i mekem se ol narafala tu oli no wantem joen long wok ya. Ale long 1919 ol brata oli stanemap wan niufala plan blong wok. Oli jusum wan elda long wanwan kongregesen blong i lukaot long wok blong prij. Blong jusum elda we bambae i holem wok ya, oli folem tiokratik oda. I min se, i no kongregesen we i vot blong putumap brata ya, be branj ofis nao i jusum hem. Wok blong elda ya i blong mekem ol plan long saed blong wok blong prij, talem long ol brata weples blong prij, mo givim toktok we i save leftemap tingting blong kongregesen blong mekem wok blong prij. Long ol yia afta we niufala plan ya i stanap, wok blong talemaot Kingdom i kam antap bigwan.

5. ?Wanem i kamaot long ol yia 1920 we i soemaot se wok i stap kam moagud?

⁵ Ale long 1922 ol Baebol Studen oli holem wan asembli long Cedar Point, Ohio, mo long asembli ya oli leftemap tingting blong ol kongregesen bakegen se “Talemaot, talemaot, talemaot, King ya mo kingdom blong hem.” Ol plan blong wok blong prij oli stap gohedgud gogo, long 1927, Sande i kam olsem dei we plante brata sista oli tekem blong prij long ol haos wanwan. ?From wanem oli jusum Sande? From we hemia dei we bighaf blong ol man oli no wok. Ol Witnes blong Jeova tede oli soemaot semfala tingting, oli traem prij long taem we bighaf blong ol man oli stap long haos, olsem long wiken mo long sapa.

6. ?Wanem desisen we ol Baebol Studen oli tekem long 1931, mo samting ya i mekem wanem long wok blong talemaot Kingdom?

⁶ Wan samting we i pusum wok blong talemaot Kingdom i go moa, hemia wan desisen we ol Baebol Studen oli agri long hem long Sande 26 Julae, 1931. Oli ridimaot desisen ya fastaem long asembli long Columbus, Ohio, be biaen oli ridimaot mo agri long desisen ya raon long wol tu. Wan haf blong desisen ya i talem se: “Yumi ol man blong wok blong Jeova God. Hem i givim wan wok long yumi, we yumi mekem long nem blong hem, mo, yumi obei long oda blong hem, blong givim witnes long saed blong Jisas Kraes, mo blong talemaot long ol man se Jeova i trufala God mo i God ya we i gat Olgeta paoa. Taswe yumi glad mo yumi agri blong tekem wan nem we Bigman i bin putum long ol man blong hem, yes, yumi wantem we ol man oli save yumi mo oli singaot yumi long nem ya ol Witnes blong Jeova.” (Aesea 43:10) Niufala nem ya i  stretgud long faswan bigfala wok blong ol man we oli holem nem ya. Yes, Jeova i putum wan wok long han blong ol man blong hem. !Plante plante brata sista oli glad we oli glad tumas long samting ya!

7. ?Wanem jenis i kamaot long 1932, mo from wanem?

⁷ Plante elda oli soemaot tingting daon mo oli tekem taem blong joen long wok blong prij. Be long sam ples, ol elda we kongregesen i bin putumap olgeta, oli no agri se evriwan long kongregesen i mas prij mo oli agensem samting ya. Ale sam narafala jenis bambae i mas kam. Long 1932, Wajtaoa i givim advaes i go long olgeta kongregesen se bambae oli no moa vot blong putumap ol elda mo dikon. Defren nao, bambae oli mas vot from sam brata we oli strong long saed blong spirit mo we oli joen long wok blong prij long ol haos wanwan, olgeta ya bambae oli mekemap wanem we oli kolem wan seves komiti insaed long kongregesen. Long rod ya nao, wok blong lukaot long kongregesen i go long han blong ol brata we oli tekpat long wok blong prij, mo from samting ya wok i gohed moa.

Laet i Saen Moa Wok i Kam Gud Moa

8. ?Long 1938, oli mekem wanem jenis insaed long ol kongregesen?

⁸ Laet i “stap kam klia moa.” Long 1938 Sosaeti i stopem fulwan, fasin ya blong vot blong putumap man we bambae i holem wok insaed long kongregesen. Fasin blong putumap ol brata insaed long kongregesen i mas folem tiokratik oda, mo oli mas folem wanem we ‘slef we i stret mo waes’ i talem long saed blong ol desisen ya. (Matiu 24:​45-47, NW ) Klosap evri kongregesen blong ol Witnes blong Jeova oli akseptem jenis ya, mo wok blong prij i gohed blong karem frut.

9. ?Long 1972 wanem plan i stanap, mo from wanem rod ya i mekem wok i kam gud moa?

⁹ Stat long Oktoba 1, 1972, wan narafala jenis i kamaot long saed blong fasin blong lukaot long kongregesen. Ol Witnes blong Jeova raon long wol oli lego fasin ya we wan man nomo i lidim kongregesen, mo oli putumap wan grup blong ol elda blong lukaot long wok ya. Niufala rod ya i leftemap tingting blong plante brata we oli bigman long saed blong spirit blong oli save kam naf blong holem wok blong lukaot long kongregesen. (1 Timoti 3:​1-7) From samting ya, plante moa brata oli lanem blong lukaot long ol wok insaed long kongregesen. !Ol brata ya oli givhan bigwan blong lidim olgeta niuwan we oli kam long trutok long ol yia biaen!

10. ?Wanem niufala rod i stanap long 1976?

¹⁰ Oli seraotem ol memba blong Hed Kampani i go long sikis komiti. Nao stat long Jenuware 1, 1976, ol sikisfala komiti ya oli lukluk long olgeta wok we i stap gohed insaed long ogenaesesen mo long ol kongregesen raon long wol. !Bigfala blesing i kamaot from we naoia wok blong Kingdom i stap long han blong “plante man blong givim gudfala advaes”!​—Ol Proveb 15:22; 24:6.

11. ?Wanem samting we oli mekem long 1992 blong mekem se wok i kamgud moa, mo from wanem oli mekem olsem?

¹¹ Wan narafala jenis i kamaot long 1992 we i mekem fasin blong wok i kam stret moa. Jenis ya i sem mak nomo long wanem we ol man Isrel mo sam narafala oli bin mekem taem oli aot long Babilon blong gobak long Jerusalem. Long taem ya, i no bin gat i naf man Livae blong mekem ol wok insaed long tempol. Ale oli jusum sam man we oli no man Isrel blong givhan long laen blong Livae, oli kolem ol man ya ol Netinim. Sem fasin ya nao we Sosaeti i folem long 1992. Oli jusum sam man we oli blong grup blong ol “narafala sipsip” blong oli holem sam wok blong halpem slef we i stret mo waes blong lukaot long ol wok blong God we i stap gru bigwan. Ol man ya oli wok wetem ol komiti blong Hed Kampani.​—Jon 10:16.

12. ?Olsem wanem Jeova i mekem we pis i rul long yumi?

¹² ?Wanem frut i kamaot from ol jenis ya? Jeova i talem se: “Mi bambae mi mekem we pis mo stret fasin, tufala i rul long yufala.” (Aesea 60:17) Yes i gat “pis” long medel blong ol man blong Jeova tede. Mo from we oli laekem “stret fasin” ale stret fasin nao i ‘rul long olgeta,’ i min se fasin ya nao i pusum olgeta blong wantem mekem wok blong God. Oli folem gudfala plan blong mekem se wok blong talemaot Kingdom mo pulum man i kam disaepol i wokgud.​—Matiu 24:14; 28:​19, 20.

Laet Blong Jeova i Soemaot Klia Ol Tijing

13. ?Long ol yia 1920, olsem wanem Jeova i saenem rod blong ol man blong hem long saed blong ol tijing?

¹³ Jeova i stap saenem laet blong hem blong soem rod long ol man blong hem tu long saed blong ol tijing. Revelesen 12:​1-9 i givim wan eksampol long saed ya. Vas ya i tokbaot “wan  woman” we hem i gat bel, wan “bigfala algita,” mo “wan pikinini we i boe.” ?Yu yu save se trifala ya i pija blong wanem? Wan Wajtaoa we i kamaot long Maj 1, 1925 i talem mining blong profet tok ya long wan haf we oli putum nem blong hem se “Wan Neson i Bon.” Haf ya i givhan long ol man blong God blong kasem klia save long ol profet tok long saed blong Kingdom we i bon. Save ya i soemaot klia se i gat tu ogenaesesen​—wan i blong Jeova, narawan i blong Setan. Ale long ol yia 1927 mo 1928, ol man blong God oli luksave tu se ol lafet blong Krismas mo betde oli no stanap nating long Baebol, ale oli no moa joen long ol lafet ya.

14. ?Wanem tijing we i kam klia moa long ol yia 1930?

¹⁴ Long ol yia 1930, laet i soemaot moa save long saed blong tri trutok blong Baebol. Longtaem finis ol Baebol Studen oli bin ridim tok long saed blong “bigfala hip blong ol man,” no bigfala kampani, we Revelesen 7:​9-17 i tokbaot hem se i defren long grup blong ol 144,000 man we bambae oli rul wetem Kraes olsem king mo pris. (Revelesen 5:​9, 10; 14:​1-5) Be oli no klia yet se bigfala kampani ya i minim hu. Ale, long 1935 laet i saen moa nao oli luk samting i klia moa, olsem laet blong moning we i soemaot saes mo kala blong ol samting i klia moa. Oli kasem save se bigfala kampani ya hemia ol man we bambae oli laef tru long taem blong “bigfala trabol” mo we hop blong olgeta i blong laef olwe long wol ya. Long sem yia ya nomo, save i kam moa klia tu long saed blong wan samting we ol pikinini blong ol Witnes blong Jeova oli fesem long skul long plante kantri. Long taem ya ol man raon long wol oli stap leftemap kantri blong olgeta bigwan, from we hemia taem blong seken wol wo. Be ol Witnes oli luksave se fasin blong salut long flaeg i sem mak nomo long fasin blong wosip long aedol. Long yia 1936, i kam klia se Kraes i ded long wan pos be i no long wan kros.​—Ol Wok 10:​39, NW.

15. ?Wetaem i kam klia se blad i wan samting we i tabu, mo olsem wanem poen ya i kam klia?

¹⁵ Long taem blong Wol Wo Tu, taem ol soldia oli kasem kil long faet, ol dokta oli stap givim blad long olgeta, nao hemia i kam wan fasin we plante man oli ting se i gud. Be jes afta long faet ya, laet blong Jeova i soemaot klia se blad i wan samting we i tabu. Wajtaoa blong Julae 1, 1945 i leftemap tingting blong “olgeta we oli wosipim Jeova mo we oli wantem laef olwe long niufala wol blong hem we stret fasin nomo i stap long hem, se oli mas respektem blad olsem wan samting we i tabu mo oli mas mekem laef blong olgeta i laenap wetem ol stretfala rul we God i putum long impoten bisnes ya.”

16. ?Wetaem New World Translation of the Holy Scriptures i kamaot fastaem? ?Wanem tu nambawan samting long saed blong Baebol ya?

¹⁶ Long 1946, Sosaeti i luksave se i nidim wan niufala Baebol we i laenap wetem ol olfala hanraet we man i faenem i no longtaem, mo we i no folem ol tijing mo kastom blong Krisendom. Ale, long Disemba 1947, oli stat blong transletem Baebol. Long 1950, New World Translation of the Christian Greek Scriptures i kamaot long Inglis. Oli stat transletem Hibru haf blong Baebol long 1953 mo taem oli finisim wanwan haf blong hem oli printim i go long buk. Oli wokem faef buk evriwan we i mekemap fulwan Hibru haf blong Baebol, namba faef buk ya i kamaot long 1960, hemia 12 yia afta we oli bin statem wok ya. Nao long 1961, oli printim fulwan Grik mo Hibru haf long Baebol ya New World Translation of the Holy Scriptures. Baebol ya i stap naoia long plante lanwis, mo hem i wan nambawan tul blong yusum. Hem i putumbak nem blong God, Jeova, long ol ples we i sud stap long hem. Mo tu, fasin blong Baebol ya blong tanem tok folem stret mining olsem we i stap long olfala hanraet, i givhan long ol man blong oli gohed oltaem blong lanem niu samting long saed blong Tok blong God.

17. ?Laet i soemaot wanem moa long 1962?

¹⁷ Long 1962, i kam klia moa se hu ya “ol haeman  we oli stap rul,” we Rom 13:1 (NW ) i tokbaot, mo i kam klia tu se ol Kristin oli mas obei long olgeta ya go kasem wanem mak. Oli mekem dip stadi long Rom japta 13 mo ol narafala vas olsem Taetas 3:​1, 2 mo 1 Pita 2:​13, 17, nao oli luksave klia se tok ya “haeman” i no minim Jeova God mo Jisas Kraes, be i minim ol gavman blong man long wol.

18. ?Wanem sam trutok we oli kam klia moa long ol yia 1980?

¹⁸ Long ol yia biaen, laet i saen moa oltaem long rod blong ol stret man. Ale long 1985 mining i kam klia moa long saed blong tok ya se man i kam stretman blong i “save laef,” mo i kam stretman blong i save fren wetem God. (Rom 5:18; Jemes 2:23) Mo long 1987 oli eksplenem klia moa, mining blong Jubili we ol Kristin oli holem.

19. ?Long ol yia we oli jes pas, olsem wanem Jeova i mekem laet blong hem i saenaot moa long ol man blong hem?

¹⁹ Long 1995 yumi kasem moa save long mining blong wok blong seraotem ol sipsip long ol nani. Long 1998 yumi gat klia save long mining blong tempol we Esikel i bin luk long wan vison, we i stap kamtru naoia. Long 1999 yumi kam klia moa se wetaem mo olsem wanem nao, ‘rabis samting ya i stanap long wan tabu ples.’ (Matiu 24:​15, 16, NW; 25:32) Mo long 2002 yumi luksave klia moa se i minim wanem blong wosipim God long “spirit mo trutok.”​—Jon 4:​24, NW.

20. ?Ol man blong God oli mekem jenis tu long saed blong wanem narafala samting?

²⁰ I tru, ol jenis oli kamaot long saed blong wok insaed long ogenaesesen mo long saed blong ol tijing. Be i gat jenis tu i kamaot long saed blong ol Kristin fasin blong yumi. Long 1973, yumi kasem klia save se fasin blong smok tabak i “mekem yumi doti” mo Kristin we i mekem fasin ya hem i sin. (2 Korin 7:1) Ten yia biaen, Wajtaoa blong Julae 15, 1983 i talemaot klia wanem tingting we Kristin i mas gat long fasin blong holem masket. Hemia sam eksampol nomo long saed blong wanem we laet blong Jeova i soemaot long yumi tede.

Gohed Blong Wokbaot Long Rod We Laet i Stap Saen Long Hem

21. ?Wanem i save halpem yumi blong gohed blong wokbaot long rod blong laet?

²¹ Wan brata we i elda longtaem finis i talem se: “Taem wan jenis i kamaot, i had blong agri mo blong jenisim tingting tu folem jenis ya.” ?Wanem i halpem brata ya blong agri wetem olgeta jenis we hem i bin luk long ol 48 yia we hem i wok blong talemaot gud nius blong Kingdom? Brata i talem se: “I impoten tumas blong gat stret tingting. Sipos yumi no agri long wan jenis we i mekem wok blong yumi i kam moagud, ale i olsem se ogenaesesen blong Jeova i stap muf i go fored, be yumi, yumi stap biaen. Sipos samtaem i gat wan jenis we mi mi harem i had blong agri long hem, ale mi tingbaot ol tok ya we Pita i bin talem long Jisas se: ‘Masta. ?Bambae mifala i save go long hu? Yu nomo yu gat ol tok blong laef ya we i no save finis.’ Nao mi askem long mi wan se, ‘?Sipos mi aot long ogenaesesen blong Jeova, bambae mi go wea? Bambae mi gobak nomo long tudak blong wol ya.’ Samting ya i halpem mi blong mi stap oltaem insaed long ogenaesesen blong God.”​—Jon 6:68.

22. ?Olsem wanem fasin blong wokbaot long laet i mekem i gud long yumi?

²² Wol ya raonabaot long yumi i stap long tudak. Moa we Jeova i saenem laet blong hem long ol man blong hem, moa we samting ya bambae i seraotem olgeta long ol man blong wol. ?Laet ya i mekem wanem long yumi? Laet blong Baebol i no karemaot ol trap we i stap be i save halpem yumi blong no foldaon long ol trap ya, sem mak olsem taem yu tosem rod blong yu, toslaet i no karemaot ol hol we i stap long rod be hem i soemaot long yu weples nao i gat hol, nao yu lukaot blong no foldaon long ol hol ya. Yes, laet blong Baebol i halpem yumi blong no foldaon long ol trap, nao yumi save gohed blong wokbaot long rod ya blong laet. Taswe, i gud yumi gohed blong lesingud long ol tok blong Jeova we oli olsem “wan laet we i stap saen long ples we i tudak.”​—2 Pita 1:19.

?Yu Yu Tingbaot?

• ?Wanem ol jenis we Jeova i mekem long ogenaesesen blong hem blong wok i gohed gud?

• ?Taem laet i saen moa, wanem ol niufala save we i kamaot long saed blong ol tijing?

• ?Wanem sam jenis we yu wan yu bin luk long laef blong yu, mo wanem i halpem yu blong agri long ol jenis ya?

• ?From wanem yu yu wantem gohed blong wokbaot long rod we laet i saen long hem?

[Kwestin]

[Tok blong pija long pej 15]

N. H. Knorr i stap holem “New World Translation of the Christian Greek Scriptures” we i kamaot long 1950