!I Gat Wan Rod Nomo Blong Winim Ded!

MAN ya Lasaros mo tufala sista blong hem, Mata mo Meri, trifala i stap long taon ya Betani, hemia tri kilometa afsaed long Jerusalem. Wan dei, Lasaros i sik bigwan. Jisas i no stap long taem ya. Tufala sista blong Lasaros i wari tumas, ale tufala i sanem toktok i go long Jisas. Smoltaem afta we Jisas i kasem nius ya, hem i stat wokbaot i go blong luk Lasaros. Long rod ya, Jisas i talem long ol disaepol blong hem se Lasaros i stap slip, mo se hem i stap go blong wekemap hem. Tingting blong ol disaepol i fasfas. Nao Jisas i talemaot klia se: “Lasaros i ded.”​—Jon 11:​1-14.

Taem Jisas i kamtru long gref blong Lasaros, hem i talem long ol man blong oli tekemaot ston we i stap blokem hol ya. Nao hem i prea long bigfala voes, mo i singaot se: “!Lasaros! !Yu kamaot!” Nao Lasaros i stanap, i wokbaot, i kamaot. Man ya we hem i ded fo dei finis, i laef bakegen.​—Jon 11:​38-44.

Stori ya blong Lasaros i soemaot se laef bakegen nao i rod blong winim ded. ?Be merikel ya we Lasaros i laef bakegen, hem i rili hapen? Yes, Baebol i talem olsem. Ridim stori blong Lasaros long Jon 11:​1-44, mo bambae yu luk olsem wanem i talemaot klia ol samting we oli hapen long taem ya. ?Olsem wanem? ?Yu yu ting se samting ya i no rili bin hapen? Sipos stori ya i no tru, hemia i min se olgeta merikel we Baebol i tokbaot oli no tru, wetem merikel ya we Jisas Kraes tu i laef bakegen. Baebol i talem se: “Sipos [Kraes] i no laef bakegen, hemia i min se yufala i bilif blong nating.” (1 Korin 15:17) Laef bakegen long ded i wan stamba tijing blong Baebol. (Hibrus 6:​1, 2) ?Be tok ya “laef bakegen” i minim wanem?

?“Laef Bakegen” i Minim Wanem?

Tok ya “laef bakegen” i stap bitim 40 taem long ol buk blong Baebol we oli raetem olgeta long Grik fastaem. Tok ya i kamaot long wan Grik tok we mining blong hem se “stanap bakegen,” mo i kamaot long wan Hibru tok we mining blong hem se “putumbak laef long dedman.” ?Be afta we man i ded, bodi blong hem i save kambak bakegen? Bodi ya we i ded i no save kambak, from we hem i kam roten mo i gobak long graon. Samting we i kambak i no semfala bodi we i ded, be semfala man we i ded. Taswe, laef bakegen i min se evri samting long saed blong laef blong man ya i kambak, olsem ol fasin blong hem, ol memori blong ol samting we hem i bin mekem, mo evri samting long saed blong hem we i mekem se hem i defren long ol narafala.

Memori blong Jeova God i stretgud olgeta. From samting ya, i isi nomo blong hem i rimemba evri samting long saed blong laef blong ol man we oli ded. (Aesea 40:26) Jeova i givim laef long man fastaem, taswe i isi nomo blong hem i mekem man i laef bakegen wetem wan niufala bodi. (Ol Sam 36:9) Mo tu, Baebol i talem se Jeova God i “glad” mo i wantem tumas blong mekem man i laef bakegen. (Job 14:​14, 15) !Yumi haremgud tumas blong save se Jeova i naf blong mekem man i laef bakegen, mo se hem i wantem mekem olsemia!

Bambae Jisas Kraes tu i mekem wan bigfala wok blong givim laef bakegen long ol dedman. Samwe long wan yia afta we Jisas i statem wok blong hem long wol ya, hem i talem se: “Papa blong mi i save mekem ol dedman oli laef bakegen, mo long sem fasin, mi tu mi save givim laef long olgeta man we mi wantem mekem olsem long olgeta.” (Jon 5:21) Stori blong Lasaros i soemaot se Jisas Kraes i gat paoa blong mekem dedman i laef bakegen, mo se hem i wantem mekem olsem.

?Be olsem wanem long tingting ya se i gat wan samting insaed long yumi we i gohed blong laef afta we yumi ded? Tingting ya se yumi gat wan spirit we i no save ded samtaem, i no laenap nating wetem tijing blong laef bakegen. Sipos i gat wan samting insaed long yumi we i gohed blong laef, bambae yumi no nidim we God i mekem  yumi laef bakegen. Mata we hem i sista blong Lasaros, hem i no bilif se spirit blong brata blong hem i laef i stap samples afta we bodi blong hem i ded, nogat. Mata i bilif long laef bakegen. Jisas i talem long hem se: “Brata blong yu bambae i laef bakegen.” Nao Mata i talem se: ‘Mi mi save we bambae hem i save laef bakegen long las dei.’ (Jon 11:​23, 24) Taem Lasaros i laef bakegen, hem i no tokbaot wan narafala ples we spirit blong hem i bin go long hem, nogat. Hem i bin ded. Baebol i talem se: “Ol man we oli ded finis oli no moa save wan samting. . . . i no gat wok, mo tingting, mo save, mo waes long [“Seol,” NW, we i minim beregraon blong ol man], mo hemia nao ples we bambae yumi go long hem.”​—Prija 9:​5, 10.

Taswe, folem ol tok blong Baebol, i gat wan rod nomo blong winim ded, hemia laef bakegen. Be i gat plante milian dedman. ?Hu long olgeta bambae oli laef bakegen? ?Mo bambae oli laef bakegen weples?

?Hu Bambae i Laef Bakegen?

Jisas i talem se: “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta [‘gref we i olsem memori,’ NW ].” (Jon 5:​28, 29) Folem promes ya, olgeta we oli stap long ol gref we oli olsem memori, no olgeta we Jeova i stap tingbaot olgeta, bambae oli laef bakegen. Be kwestin i stap se: ?Long olgeta man long beregraon, Jeova i stap tingbaot hu?

Long Hibrus japta 11, Baebol i talem nem blong plante man mo woman we oli bin mekem wok blong God wetem strong bilif. Olgeta ya mo ol man tede we oli bin mekem wok blong God wetem strong bilif gogo oli ded, bambae oli laef bakegen. ?Olsem wanem long ol man we oli no bin folem ol stret fasin blong God long laef blong olgeta, maet from we oli no save long olgeta? ?God i stap tingbaot olgeta yet? Yes, hem i stap tingbaot plante long olgeta, from we Baebol i promes se: ‘God bambae i mekem man we i ded i laef bakegen, man we i stret wetem man we i no stret.’​—Ol Wok 24:15.

Be i no olgeta man evriwan we oli ded long ol yia we oli pas finis we bambae oli laef bakegen. Baebol i talem se: “Yumi ya we yumi kasem save long trutok finis, sipos yumi girap, yumi stap gohed blong mekem sin, bambae i no moa gat wan sakrefaes i stap we i save tekemaot ol sin ya blong yumi. Bambae yumi stap fraet nomo long God, mo yumi wet blong hem bambae i jajem yumi se yumi mas panis.” (Hibrus 10:​26, 27) Sam man oli bin mekem sin we God i no save fogivim. Olgeta ya oli no stap long Hades (hemia beregraon blong ol man) be oli stap long Gehena, hemia wan pijatok we i min se man i lus blong olwe. (Matiu 23:​33, NW ) Be yumi mas lukaot se yumi no traem jajem wan man se bambae hem i laef bakegen no nogat. God nomo i naf blong jajem man. Hem i save hu olgeta we oli stap long Hades mo hu olgeta we oli stap long Gehena. Yumi ya, i moagud we yumi traehad blong mekem ol samting we God i wantem long laef blong yumi.

?Hu Bambae Oli Laef Bakegen Long Heven?

Merikel we i bigwan moa, hemia taem Jisas Kraes i laef bakegen. ‘Long laef blong hem we hem i man, ol man oli kilim hem i ded, be God i mekem hem i laef bakegen long laef blong hem we i blong heven.’ (1 Pita 3:18) Bifo long Jisas, i no gat wan man we i laef bakegen long laef ya blong heven. Jisas tu i talem se: “I no gat man we i go antap long heven samtaem. Mi, mi Pikinini blong Man, mi nomo mi kamaot long heven, mi kamdaon.” (Jon 3:13) Yes, Pikinini blong Man i faswan man blong laef bakegen long bodi blong spirit man. (Ol Wok 26:23) Biaen, i gat sam narafala we oli laef bakegen wetem spirit bodi. Baebol i talem se: “Olgeta bambae oli kasem [laef ya] long taem we i stret nomo long olgeta wanwan. Faswan blong kasem, hemia Kraes we i olsem faswan kakae we i rere long garen. Nao biaen, long taem ya we Kraes bambae i stap finis, ol man blong hem bambae oli kasem [laef ya].”​—1 Korin 15:​23, NW.

Wan smol grup blong man​—‘olgeta we oli blong Kraes’—​bambae oli laef bakegen long heven blong mekem wan spesel wok. (Rom 6:5) Bambae oli rul wetem Kraes, ‘oli king long olgeta man long wol.’ (Revelesen 5:​9, 10) Mo bambae oli mekem wok blong pris tu. Blong mekem olsemia, bambae oli givhan blong tekemaot ol nogud frut blong sin ya we ol man oli kasem long faswan man Adam. (Rom 5:12) I gat 144,000 man we  bambae oli rul wetem Kraes olsem ol king mo pris. (Revelesen 14:​1, 3) ?Oli laef bakegen long wanem kaen bodi? Baebol i talem se: “Bodi blong olgeta bambae i blong laef wetem God.” Wetem spirit bodi ya, oli save laef long heven.​—1 Korin 15:​35, 38, 42-45.

?Ol 144,000 man ya, bambae oli laef bakegen wetaem long heven? Fas Korin 15:23 (NW ) i givim ansa long kwestin ya i se: “Long taem ya we Kraes bambae i stap finis.” Ol samting we i hapen long wol afta long yia 1914, oli soemaot klia se yia ya i makem stat blong taem ya we Kraes i stap finis mo we “rabis fasin blong wol ya i kasem en blong hem.” (Matiu 24:​3-7, NW ) Sipos i olsem, sam trufala Kristin oli laef bakegen long heven finis, nating se ol man long wol oli no luk. Ale, ol aposol mo ol faswan Kristin oli stap long heven finis. ?Olsem wanem long ol Kristin we oli laef i stap naoia mo we God i givim hop long olgeta blong rul wetem Kraes long heven? Taem bambae oli ded, “wantaem nomo” oli laef bakegen, hemia i min se stret afta we oli ded. (1 Korin 15:52) Smol grup blong ol 144,000 man ya oli laef bakegen bifo long ol dedman we bambae oli girap bakegen blong laef long wol ya. Taswe Baebol i talem se ol 144,000 oli “laef bakegen fastaem long ol narafala,” mo oli “ol faswan man blong laef bakegen.”​—Filipae 3:​11, NW; Revelesen 20:​6, NW.

?Hu Bambae i Laef Bakegen Long Wol?

Baebol i talem se bighaf blong ol man we oli ded, bambae oli laef bakegen long wol. (Ol Sam 37:29; Matiu 6:10) Aposol Jon i eksplenem nambawan vison we hem i luk long saed blong ol man we oli laef bakegen, i se: “Solwota i givimbak ol dedman we oli stap long hem, mo ded wetem Hades tufala i givimbak ol dedman we oli stap long tufala, nao kot i jajem olgeta, stret long ol samting we olgeta wanwan oli mekem. Mo ded wetem Hades, oli sakem tufala i go long lugun blong faea. Lugun blong faea ya, hemia seken ded ya.” (Revelesen 20:​11-14, NW ) Olgeta we oli stap long Hades no Seol​—hemia beregraon blong ol man—​God i stap tingbaot olgeta yet. Olgeta evriwan ya, ded bambae i no moa save holem olgeta. (Ol Sam 16:​10, NW; Ol Wok 2:​31, NW ) God bambae i jajem ol man ya wanwan long ol samting we oli mekem afta we oli laef bakegen. ?Biaen, wanem bambae i hapen long ded mo Hades? Bambae oli sakem tufala i go long “lugun blong faea.” Hemia i min se ded we ol man oli kasem long Adam, bambae i finis, bambae i no moa gat paoa long ol man.

!Traem tingbaot gudfala hop we promes ya blong laef bakegen i givim long olgeta we oli lusum wan famle no fren! !Tingbaot olsem wanem wido blong taon ya Naen i mas glad bitim mak taem Jisas i mekem boe blong hem, wan nomo we hem i gat, i laef bakegen long ded! (Luk 7:​11-17) Baebol i tokbaot wan gel we i gat 12 yia we Jisas i mekem hem tu i laef bakegen. Papa mama blong gel ya, “tufala i sapraes tumas” mo glad tumas. (Mak 5:​21-24, 35-42; Luk 8:​40-42, 49-56) Long niufala wol we God i promes long hem, bambae yumi haremgud tumas blong welkamem ol famle mo fren blong yumi we oli kambak.

?Trutok ya long saed blong laef bakegen i save mekem wanem long yumi naoia? Buk ya, The World Book Encyclopedia, i talem se: “Bighaf blong ol man oli fraet long ded mo oli traem blong no tingbaot ded.” ?From wanem? From we tingting blong plante man i fasfas long saed blong ded. Ded i wan samting we oli no save long hem, taswe oli fraet long hem. Be taem yumi save trutok long saed blong ded mo yumi gat hop ya blong laef bakegen, yumi no moa fraet taem yumi mas fesem ‘ded, we i laswan blong ol enemi’ blong yumi. (1 Korin 15:26) Mo tu, save ya i save givhan long yumi taem yumi harem nogud tumas from wan famle no fren blong yumi we i ded.

?Wetaem bambae ol dedman oli laef bakegen long wol? Tede, wol ya i fulap long faet, trabol, wo, mo ol doti we i stap spolem wol. Sipos ol dedman oli kambak naoia, bambae oli glad blong smoltaem nomo. From samting ya, God i promes se i no longtaem, bambae hem i finisim ol rabis samting long wol ya we i stap long han blong Setan. (Ol Proveb 2:​21, 22; Daniel 2:44; 1 Jon 5:19) Klosap nao, stamba tingting blong God long saed blong wol ya bambae i kamtru. Long taem ya, plante bilian man we oli stap slip long beregraon, bambae oli openem ae blong olgeta blong luk niufala wol we God bambae i mekem mo we i fulap long pis.