Kasem Mak We Yumi Kam Naf Blong Baptaes

“?Wanem nao i blokem mi, blong mi no save baptaes?”​—OL WOK 8:36.

1, 2. ?Olsem wanem Filip i statem storian wetem wan haeman Itiopia, mo wanem i soemaot se man ya i laekem ol samting long saed blong spirit?

 SAMTING olsem wan no tu yia afta we Jisas i ded, wan man we i wok blong gavman i aot long Jerusalem i stap folem rod we i go long Gasa. Hem i sidaon long wan kat we hos i pulum mo trip blong hem i longwan, i olsem 1,500 kilometa. Man ya i wan strong man blong bilif. Hem i bin aot long Itiopia i kam long Jerusalem blong mekem wosip long Jeova. Naoia hem i stap mekem trip i gobak long ples blong hem, mo hem i yusum taem ya blong ridim Tok blong God. Hemia wan pruf se man ya i gat bilif. Jeova i luk fasin blong gudfala man ya, ale, hem i sanem wan enjel i go long disaepol Filip blong bambae Filip i go faenem man ya mo i prij long hem.​—Ol Wok 8:​26-28.

² I isi nomo blong Filip i statem storian wetem haeman Itiopia ya from we man ya i stap rid wetem bigfala voes. Hemia fasin blong ol man long taem bifo. From samting ya, Filip i harem se man ya i stap ridim buk blong Aesea. Wan sotfala kwestin nomo we Filip i askem i naf blong pulum intres blong man ya. Hem i se: “?Yu yu save mining blong tok ya we yu stap ridim?” Nao tufala i storebaot Aesea 53:​7, 8 mo Filip i “talemaot gud nius blong Jisas long hem.”​—Ol Wok 8:​29-35.

3, 4. (a) ?From wanem Filip i baptaesem man Itiopia ya kwiktaem? (b) ?Wanem sam kwestin we bambae yumi tokbaot naoia?

³ Long smoltaem ya nomo we tufala i storian, man Itiopia ya i luksave wok we Jisas i mekem long saed blong stamba tingting blong God. Hem i kasem save tu se i impoten blong tekem baptaes blong kam wan disaepol blong Kraes. Ale, taem hem i luk wan ples we i gat wota long hem, hem i askem long Filip se: “?Wanem nao i blokem mi, blong mi no save baptaes?” Ating yumi save ting se hem i hareap tumas. Be samting we i hapen long taem ya i stret nomo. Man ya i wan man blong bilif we hem i jenisim skul blong hem finis blong mekem wosip long Jeova wetem ol man Jiu. Taem hem i gobak long kantri blong hem, ating bambae hem i mas wet longlongtaem bifo we hem i save gat janis blong  baptaes. Be samting we i moa impoten se, man ya i kasem save wanem we God i wantem hem blong mekem, mo hem i wantem samting ya wetem fulhat blong hem. Ale, Filip i baptaesem man Itiopia ya olsem we hem i askem, mo afta we man ya i baptaes, hem i “stap folem rod blong hem i go, we hem i glad tumas.” I klia nomo se man Itiopia ya i go talemaot gud nius long kantri blong hem wetem bigfala glad.​—Ol Wok 8:​36-39.

⁴ I tru se, desisen we yumi tekem blong givim laef long God mo tekem baptaes, i no wan samting we yumi mekem hareap nomo mo long fasin we i olbaot. Be, eksampol blong man Itiopia ya i soem se i bin gat sam taem we samfala man oli baptaes kwiktaem nomo afta we oli harem trutok blong Baebol. * From samting ya i gat sam kwestin we i gud blong tingbaot, olsem: ?Wanem sam samting we i rerem wan man blong hem i baptaes? ?I impoten blong tingbaot yia blong man? ?Wanem kaen level long saed blong spirit we man i mas kasem bifo we hem i baptaes? ?Mo antap long olgeta samting ya, from wanem Jeova i wantem we ol man blong hem oli baptaes?

Wan Promes We Yumi Tinghevi Long Hem

5, 6. (a) ?Olsem wanem ol man blong God bifo oli soemaot tangkiu from lav we Jeova i soem long olgeta? (b) ?Wanem gudfala fasin fren we yumi save gat wetem God afta we yumi baptaes?

⁵ Afta we Jeova i mekem ol man Isrel oli fri long Ijip, hem i glad blong tekem olgeta oli kam “nambawan man” blong hem. Hem i promes blong lavem olgeta mo protektem olgeta mo blong mekem olgeta oli kam “tabu” neson blong hem. Be sipos ol man Isrel oli wantem kasem ol blesing ya, oli mas soemaot long klia ples se oli gat tangkiu from lav we God i soem long olgeta. Oli mekem olsem, taem oli agri blong mekem ‘olgeta samting we Jeova i talem,’ nao oli kam insaed long wan kontrak wetem God. (Eksodas 19:​4-9) Long faswan handred yia, Jisas i givim oda long ol man blong hem se oli mas go pulum ol man blong olgeta kantri oli kam man blong hem. Olgeta man we oli obei long ol tijing blong Kraes oli tekem baptaes. Sipos ol man oli wantem frengud wetem God oli mas bilif long Jisas Kraes mo biaen oli mas baptaes.​—Matiu 28:​19, 20; Ol Wok 2:​38, 41.

⁶ Ol stori ya long Baebol oli soemaot se Jeova i blesem olgeta we oli mekem promes blong wosipim hem mo we oli holemstrong long promes ya. Ol Kristin tede oli luksave se fasin blong givim laef i go long God mo tekem baptaes i wan impoten step blong tekem sipos oli wantem kasem blesing blong Jeova. Yumi mekem strong desisen ya blong folem ol loa blong hem mo lukaot advaes blong hem blong lidim yumi. (Ol Sam 48:14) Taem yumi mekem olsem, nao Jeova i lidim yumi long rod we yumi mas wokbaot long hem, i olsem we hem i holem han blong yumi.​—Ol Sam 73:23; Aesea 30:21; 41:​10, 13.

7. ?From wanem desisen blong givim laef mo baptaes i wan desisen blong yumi wan?

⁷ Samting we i mas pusum yumi blong tekem ol desisen ya hemia from we yumi lavem Jeova mo yumi wantem mekem wok blong hem. I no stret nating blong baptaes from we oli talem long yu se yu stadi longtaem finis, no from we sam fren blong yu oli baptaes. Be i no rong sipos ol papa mama mo ol Kristin we oli bigman long saed blong spirit, oli leftemap tingting blong wan narafala blong i tingbaot blong givim laef blong hem mo baptaes. Aposol Pita i pulum ol man we oli stap lesin long hem long lafet blong Pentekos se “evriwan i mas baptaes.” (Ol Wok 2:38) Nating se i olsem, fasin blong givim laef long God i wan bisnes blong yumi wan, mo i no gat narafala man we i save tekem desisen ya long ples blong yumi. Desisen blong mekem wok blong God hem i desisen blong yu wan.​—Ol Sam 40:8.

Sam Samting We Oli Rerem Yu Blong Baptaes

8, 9. (a) ?From wanem fasin blong baptaesem ol bebi i no laenap wetem Baebol? (b) ?Wanem ol mak long saed blong spirit we wan yangfala i mas kasem bifo we hem i baptaes?

⁸ ?Ol pikinini oli naf blong tinghevi long wan bigfala desisen olsem? Baebol i no talem se man i mas gat hamas yia blong hem i naf blong baptaes. Be i klia se wan bebi i no save bilif, tekem desisen we i stanap long bilif, mo givim laef blong hem long God. (Ol Wok 8:12) Wan man we i tokbaot histri, nem blong hem Augustus Neander, i raetem buk  ya General History of the Christian Religion and Church. Hem i tokbaot ol Kristin long faswan handred yia i se: “Fastaem, ol bigman nomo oli stap baptaes, from we ol man oli kasem save se baptaes i joen wetem bilif.”

⁹ Long saed blong yangfala, i dipen. Sam yangfala oli naf blong tinghae long ol samting long saed blong spirit taem oli yang yet, be samfala oli tekem moa taem. Be bifo we wan yangfala i baptaes hem i mas meksua se hem i wokem finis wan fasin fren wetem Jeova, hem i mas gat stret save long ol stamba tijing blong Baebol, mo hem i mas kliagud se fasin ya blong givim laef long Jeova i minim wanem, sem mak olsem ol bigman oli mas mekem.

10. ?Wanem sam step we man i mas tekem bifo we i givim laef blong hem long Jeova mo baptaes?

¹⁰ Jisas i talem long ol disaepol blong hem se oli mas tijim ol niuwan long olgeta samting we hem i talem long olgeta. (Matiu 28:20) Taswe fastaem ol niuwan oli mas kasem stret save long trutok. Biaen, save ya bambae i halpem olgeta blong gat bilif long Jeova mo Baebol. (Rom 10:17; 1 Timoti 2:4; Hibrus 11:6) Afta, taem trutok blong Baebol i tajem hat blong wan man, samting ya i save pusum hem blong tanem tingting from sin blong hem, nao hem i save tanem baksaed mo lego fasin blong laef we hem i bin folem. (Ol Wok 3:19) Laswan samting nao, man ya i save givim laef blong hem i go long Jeova mo baptaes, olsem Jisas i givim oda blong mekem.

11. ?From wanem i impoten blong joen oltaem long wok blong prij bifo baptaes?

¹¹ Wan narafala impoten step blong tekem bifo baptaes, hemia blong joen long wok blong talemaot gud nius blong Kingdom. Hemia nao impoten wok we Jeova i putum long han blong ol man blong hem long taem blong ol las dei. (Matiu 24:14) Wok ya i givim janis long ol pablisa we oli no baptaes yet blong oli save glad bigwan blong tokbaot bilif blong olgeta long narafala. Wok ya i rerem olgeta tu blong oli gohed strong blong talemaot gud nius oltaem afta we oli baptaes.​—Rom 10:​9, 10, 14, 15.

?I Gat Samting i Blokem Yu Blong Baptaes?

12. ?Wanem samting maet i blokem samfala blong baptaes?

¹² Samfala oli fraet blong baptaes from we oli harem se maet oli no save karem ol wok we i kam wetem desisen ya. Oli luksave se blong kasem mak we Jeova i putum, bambae oli mas jenisim fulap samting long laef blong olgeta. No maet oli wari se bambae oli no save folemgud ol rul blong God oltaem afta baptaes. Maet samfala oli gat tingting olsem se, “Maet wan dei bambae mi mekem wan samting we i no stret ale kongregesen bambae i putumaot mi.”

13. ?Wanem i blokem sam man long taem blong Jisas blong oli no biaenem hem?

¹³ Long taem blong Jisas, sam man oli letem sam samting i blokem olgeta blong kam disaepol blong hem, oli laekem moa blong mekem samting we olgeta nomo i wantem mo oli tingbaot famle blong olgeta moa. Wan tija blong loa i talem se nomata weples Jisas i go long hem bambae hem tu i go. Be Jisas i talem long man ya se plante taem hem i no gat ples blong slip long hem. Wan narafala man bakegen, we Jisas i singaot hem blong i biaenem hem, be man ya i ansa se fastaem bambae hem i mas “berem” papa blong hem. Ating man ya i talem tok ya from we hem i laekem moa blong stap long haos mo wet gogo kasem taem we papa blong hem i ded. Hem i no tingbaot se i moagud blong folem Jisas fastaem, ale, bambae i jes lukaot papa blong hem long stret taem we i nidim blong mekem olsem. Namba tri man we Jisas i singaot blong i biaenem hem, i talem se bambae hem i mas go “talem tata” long famle blong hem fastaem. Jisas i talem se man we i putum wok i stap se bambae hem i jes mekem afta nomo, hem i stap “lukluk biaen.” Tru ya, olgeta man we oli stap slo oltaem blong mekem samting, bambae oli save faenem eskius oltaem  blong no mekem Kristin wok blong olgeta.​—Luk 9:​57-62.

14. (a) ?Pita, Andru, Jemes, mo Jon, oli mekem wanem taem Jisas i singaot olgeta oli kam man blong pulum man? (b) ?From wanem yumi no mas fraet long yok we Jisas i wantem givim long yumi?

¹⁴ Fasin blong Pita, Andru, Jemes, mo Jon, i defren olgeta long ol man ya we yumi jes tokbaot. Taem Jisas i singaot olgeta blong oli biaenem hem blong go pulum ol man, Baebol i talem se: ‘Wantaem nomo, oli livim ol net blong olgeta, oli biaen long hem.’ (Matiu 4:​19-22) From we oli hareap blong mekem desisen ya, samting we Jisas i talem biaen i kamtru long olgeta, se: “Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Matiu 11:​29, 30) I tru se taem yu baptaes yu gat wok blong mekem, be Jisas i leftemap tingting blong yumi taem i talem se wok ya i isi mo i wan wok we yumi naf blong mekem mo harem gud bigwan from.

15. ?Olsem wanem eksampol blong Moses mo Jeremaea i soem se yumi sua se God bambae i stap wetem yumi?

¹⁵ Yumi evriwan i harem samtaem se yumi no naf blong mekem samting. Moses mo Jeremaea tu, tufala i bin harem se tufala i no naf blong mekem ol wok ya we Jeova i putum long han blong tufala. (Eksodas 3:11; Jeremaea 1:6) ?Olsem wanem Jeova i leftemap tingting blong tufala? Hem i talem long Moses se: “Mi bambae mi stap wetem yu.” Mo i mekem promes long Jeremaea se: “Mi bambae mi stap wetem yu blong blokemgud yu.” (Eksodas 3:12; Jeremaea 1:8) Yumi tu, yumi save trastem se bambae God i lukaot long yumi. Sipos yumi rili lavem God mo yumi trastem hem, samting ya i save halpem yumi blong winim tingting we i hafhaf se maet bambae yumi no naf blong holem promes blong yumi long Hem. Aposol Jon i raetem se: “Man i no save fraet sipos hem i gat lav. Be lav we i stretgud olgeta i sakemaot fraet i go longwe.” (1 Jon 4:​18, NW ) Maet wan smol boe i fraet blong wokbaot hem wan, be sipos papa blong hem i holem han blong hem mo i wokbaot wetem hem bambae smol boe ya i no moa fraet. Long sem fasin, sipos yumi trastem Jeova wetem fulhat blong yumi, hem i promes blong ‘soemaot stret rod long yumi’ taem yumi wokbaot wetem hem.​—Ol Proveb 3:​5, 6.

Wan Taem We Yumi Mas Tinghae Long Hem

16. ?From wanem taem man i baptaes hem i mas draon fulwan long wota?

¹⁶ Plante taem, long dei blong baptaes, i gat wan tok we i stanap long Baebol blong eksplenem mining blong baptaes blong ol Kristin. Long en blong tok ya, i gat tu kwestin we i go long olgeta we bambae oli baptaes. Tufala kwestin ya oli givim janis long olgeta ya blong talemaot bilif blong olgeta long fored blong olgeta man. (Rom 10:10; lukluk bokis long pej 22.) Afta long hemia, olgeta ya oli  baptaes we oli draon fulwan long wota, folem sem fasin we Jisas hem wan i baptaes. Baebol i soem se afta we Jisas i baptaes, hem i “kamaot long wota.” (Matiu 3:16; Mak 1:10) I klia se taem Jon i baptaesem Jisas, hem i draonem ful bodi blong Jisas long wota. * Fasin blong draon fulwan long wota i laenap stret wetem bigfala jenis we yumi mekem long laef blong yumi. I olsem we yumi ded long olfala laef blong yumi bifo, from we yumi lego laef ya mo yumi statem wan niufala laef long wok blong God.

17. ?Olsem wanem ol man we bambae oli baptaes mo olgeta we oli wajem baptaes ya oli save soem respek long spesel taem ya?

¹⁷ Baptaes i wan taem blong tinghevi long hem mo i wan taem blong glad tu. Baebol i soem se taem Jon i baptaesem Jisas long Jodan reva, Jisas i stap prea. (Luk 3:​21, 22) Folem eksampol ya blong Jisas, olgeta man we oli baptaes tede, oli mas soem fasin respek mo ona long taem blong baptaes. Yumi save finis we Baebol i talem se yumi mas putum klos we i stret evri dei. !Taswe, ating advaes ya i moa impoten blong folem long taem blong baptaes! (1 Timoti 2:9) Ol man we oli stap wajem baptaes oli mas soem respek. Oli save mekem olsem sipos oli lesingud long tok blong baptaes mo sipos oli stanap wetem respek blong lukluk baptaes ya.​—1 Korin 14:40.

Blesing We Man i Kasem Taem Hem i Baptaes Blong Kam Disaepol

18, 19. ?Wanem janis mo blesing we yumi kasem taem yumi baptaes?

¹⁸ Taem yumi givim laef blong yumi long God mo yumi baptaes, yumi joen long wan famle we i spesel. Fastaem, Jeova i kam Papa blong yumi mo Fren blong yumi. Bifo we yumi baptaes yumi stap longwe long God, be naoia yumi kam klosap long hem. (2 Korin 5:19; Kolosi 1:20) Tru long sakrefaes blong Kraes, yumi kam klosap moa long God mo hem i kam klosap long yumi. (Jemes 4:8) Profet Malakae i tokbaot se Jeova i tingbaot mo i lesin long ol man we oli yusum mo holem nem blong hem. Jeova i putum nem blong ol man ya long wan buk blong rimemba. God i talem se: “Olgeta ya bambae oli man blong mi . . . bambae mi gat sore long olgeta, mi givhan long olgeta, stret olsem we wan papa i gat sore long pikinini blong hem, we i stap wok blong hem.”​—Malakae 3:​16-18.

¹⁹ Mo tu, taem yumi baptaes yumi kam pat blong wan bigfala famle blong ol brata we oli stap raon long wol. Aposol Pita i askem long Jisas wanem blesing we ol disaepol blong hem bambae oli kasem taem oli lego samting we olgeta nomo i wantem. Nao Jisas i mekem promes ya se: “Man we i lego haos blong hem, no brata no sista blong hem, no papa no mama blong hem, no pikinini blong hem, no graon blong hem from we hem i man blong mi, hem bambae i no save sot long ol samting ya. Bambae hem i save kasem ol samting ya wan handred taem antap bakegen, mo bambae hem i gat laef we i no save finis.” (Matiu 19:29) Plante yia biaen, Pita i tokbaot “kampani blong ol brata” we i stap long “evri ples long wol.” Pita i bin kasem bigfala help mo blesing blong ol Kristin brata we oli gat lav. Yumi save harem gud long semfala samting ya tu.​—1 Pita 2:​17, NW; 5:9.

20. ?Baptaes i openem rod blong wanem blesing?

²⁰ Antap moa, Jisas i talem se ol man we oli biaenem hem bambae oli save kasem “laef we i no save finis.” Yes, fasin blong givim laef long God mo baptaes i openem rod long man blong kasem “laef ya we i prapa wan”​—hemia laef we i no save finis long niufala wol blong God. (1 Timoti 6:19) I no gat wan fiuja we i moa gud long yumi mo famle blong yumi i bitim hemia. Nambawan hop ya i givim janis long yumi blong “wokbaot olwe long nem blong Jeova, God blong yumi, yes, gogo i no save finis.”​—Maeka 4:​5, NW.

[Ol Futnot]

?Yu Yu Save Eksplenem?

• ?Olsem wanem yumi mas mekem, taem Jeova i soem lav long yumi, mo from wanem yumi mas mekem olsem?

• ?Wanem mak we man i mas kasem long saed blong spirit bifo we hem i baptaes?

• ?From wanem yumi no mas slo blong baptaes from we yumi fraet se yumi no naf blong holem promes ya no yumi no naf blong mekem wok we i joen wetem?

• ?Wanem ol spesel blesing we ol disaepol blong Jisas Kraes oli kasem afta we oli baptaes?

[Kwestin]

[Tok blong pija long pej 26]

“?Wanem nao i blokem mi, blong mi no save baptaes?”

[Tok blong pija long pej 29]

Baptaes i wan samting we yumi mas tinghevi long hem mo i wan taem blong glad tu