‘Pulum Ol Man Oli Kam Man Blong Mi Mo Baptaesem Olgeta’

“Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta . . . [mo] tijim olgeta blong oli folem olgeta tok ya we mi mi givim finis long yufala.”​—MATIU 28:​19, 20.

1. ?Wanem desisen we ol man Isrel oli mekem taem oli stap fored long bigfala hil ya Sinae?

 SAMWE 3,500 yia bifo, olgeta man long neson blong Isrel oli mekem wan promes long God. Taem oli stap fored long bigfala hil ya Sinae, oli talemaot klia se: “Bambae mifala i mekem olgeta samting we Hae God i talem.” Stat long taem ya ol man Isrel oli givim laef blong olgeta long God, oli kam “nambawan man” blong hem. (Eksodas 19:​5, 8; 24:3) Oli wantem se bambae Jeova i lukaotgud long olgeta mo oli wantem tumas we ol pikinini blong olgeta oli laef oltaem long wan kantri we ‘graon blong hem i gud tumas mo oltaem i stap karem fulap kakae.’​—Levitikas 20:24.

2. ?Wanem fasin fren we ol man tede oli save gat wetem God?

² Be, olsem man ya Asaf i talem, ol man Isrel oli “brekem promes ya we oli bin mekem wetem God, mo oli no wantem nating blong obei long ol loa blong hem.” (Ol Sam 78:10) Oli no holem promes ya we ol olfala blong olgeta oli bin mekem long Jeova. Ale, sloslo, neson ya i lusum gudfala fasin fren we ol olfala blong olgeta oli bin gat wetem God. (Prija 5:4; Matiu 23:​37, 38) Taswe, God i ‘kamtru long ol man we oli no laen blong Isrel blong tekemaot sam long olgeta, blong oli holem nem blong hem.’ (Ol Wok 15:14) Mo long ol las dei naoia, Jeova i stap hivimap wan “bigfala hip blong ol man [“wan bigfala kampani,” NW ], we olgeta i plante we plante, i no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen, mo long olgeta lanwis.” Olgeta ya oli glad from we oli luksave se: “God blong yumi, hem i King, i stap sidaon long bigfala jea blong hem.  Hem wetem Smol Sipsip ya, tufala ya nao i wokem rod blong sevem mifala.”​—Revelesen 7:​9, 10.

3. ?Wanem samting we man i mas mekem blong i kam fren blong God?

³ Sipos yumi wantem haremgud long fasin fren wetem God, yumi mas givim laef blong yumi i go long Jeova mo soemaot samting ya tru long baptaes long wota. Hemia i laenap stret wetem oda ya we Jisas i givim long ol disaepol blong hem, se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:​19, 20) Ol man Isrel oli lesin taem Moses i ridimaot ol tok blong ‘buk blong promes blong Hae God.’ (Eksodas 24:​3, 7, 8) Long rod ya, oli kasem save wanem samting we oli mas mekem blong Jeova. Sem samting we man i mas mekem tede. Bifo we man i baptaes, hem i mas kasem stret save long saed blong ol samting we God i wantem mekem, olsem we Baebol i eksplenem.

4. ?Wan man i mas mekem wanem blong i kam naf blong tekem baptaes? (Tokbaot bokis we i stap long pej ya.)

⁴ Jisas i wantem we bilif blong ol disaepol blong hem i stanap long wan strong fandesen bifo we oli tekem baptaes. Hem i givim oda long ol man blong hem se oli mas go pulum man i kam disaepol, be tu, oli mas tijim ol man ya blong ‘obei long olgeta tok we hem i askem olgeta blong folem.’ (Matiu 7:​24, 25; Efesas 3:​17-19) Taswe, olgeta we oli naf blong tekem baptaes, plante taem oli bin stadi Baebol blong sam manis no maet wan no tu yia, bifo we oli mekem desisen ya. Stadi olsem i halpem olgeta blong tingting gud fastaem mo kasem naf save long mining blong baptaes bifo we oli tekem desisen ya. Mo bakegen long taem blong baptaes, i gat tu impoten kwestin we oli bin ansa long hem. Jisas i talem se taem yumi talem ‘Yes yumi mas minim yes, mo taem yumi talem No i minim No.’ Taswe i gud yumi tingting bakegen long saed blong tufala kwestin ya we oli askem long yumi long taem blong baptaes.​—Matiu 5:37.

Tanem Tingting Mo Givim Laef Long God

5. ?Wanem tu impoten samting we faswan kwestin blong baptaes i soemaot?

⁵ Faswan kwestin we oli askem long taem blong baptaes hemia se: ?Yu yu tanem tingting blong yu finis from ol sin blong yu mo yu givim laef blong yu i go long Jeova blong mekem ol samting we hem i wantem? Kwestin ya i makem tu impoten step we man i mas tekem bifo baptaes. Hem i mas tanem tingting mo givim laef blong hem long God.

6, 7. (a) ?From wanem i nidim we man i tanem tingting from sin blong hem bifo we i baptaes? (b) ?Wanem ol jenis we man i mas mekem afta we hem i tanem tingting blong hem?

⁶ ?From wanem wan man i mas tanem tingting blong hem bifo we hem i baptaes? Aposol Pol i eksplenem se: “Bifo, yumi evriwan i stap . . . folem fasin we bodi blong yumi i wantem.” (Efesas 2:​3, NW ) Bifo we yumi kasem stret save se God i wantem yumi blong mekem wanem, ating laef blong yumi i sem mak long laef blong ol man blong wol ya. Maet yumi tinghae long ol samting we wol ya i givim mo yumi folem ol tingting no rul blong hem. I olsem se Setan nao, we i god blong rabis wol ya, hem i bos long laef blong yumi. (2 Korin 4:4) Be taem yumi save ol samting we God i wantem ol man blong mekem, ale yumi mekem desisen blong ‘no moa letem ol rabis samting we tingting blong yumi nomo i wantem, oli bos long yumi.’​—1 Pita 4:2.

 ⁷ Niufala fasin blong laef ya i karem plante blesing. Be wan blesing we i bigwan moa hemia se, hem i openem rod long yumi blong kam fren blong Jeova. Deved i talem se hemia i olsem we God i singaot yumi blong go long “Haos Tapolen” blong hem mo long “tabu hil” blong hem. Tru ya, hemia wan spesel blesing ya. (Ol Sam 15:1) From samting ya i klia se Jeova i no singaot enikaen man nomo i kam. Hem i singaot “man we i stap obei long [God] long evri samting, mo oltaem i stap mekem ol samting we i stret. Ol tok blong hem i tru mo i stret.” (Ol Sam 15:2) From we laef blong yumi bifo we yumi save trutok i defren, maet yumi mas mekem sam jenis long fasin mo wei blong laef blong yumi, blong folem samting we yumi lanem. (1 Korin 6:​9-11; Kolosi 3:​5-10) Samting we i pusum man blong jenisim laef blong hem hemia from we hem i tanem tingting blong hem. Tanem tingting i minim se man i harem nogud long fasin blong laef blong hem bifo, mo tingting blong hem i strong blong mekem Jeova i glad. Afta we man i tanem tingting, hem i tanem baksaed long laef blong hem bifo. Hem i lego fasin blong laef blong wol we i tingbaot hem wan nomo mo i mekem ol samting olsem we God i wantem.​—Ol Wok 3:19.

8. ?Olsem wanem yumi givim laef blong yumi i go long Jeova, mo olsem wanem samting ya i joen wetem baptaes?

⁸ Seken haf blong faswan kwestin ya i askem man we bambae i baptaes se: ?Yu yu givim laef blong yu i go long Jeova blong mekem ol samting we hem i wantem? Givim laef i go long Jeova i wan impoten step we yumi mas tekem bifo baptaes. Samting ya, yumi mekem taem yumi prea long Jeova blong talemaot se yumi wantem givim laef blong yumi i go long Hem tru long Kraes. (Rom 14:​7, 8; 2 Korin 5:15) Nao, Jeova i kam olsem Masta blong yumi mo i bos long laef blong yumi, mo, olsem Jisas, yumi glad blong mekem olgeta samting we God i wantem. (Ol Sam 40:8; Efesas 6:6) Impoten promes ya we yumi mekem long Jeova, yumi mekem wan taem nomo. Hem i wan samting we yumi mekem yumi wan wetem Jeova. Nao baptaes blong yumi i rod blong soemaot long evriwan se yumi bin mekem promes ya long Papa blong yumi long heven.​—Rom 10:10.

9, 10. (a) ?Man we i givim laef blong hem long God i mas mekem wanem? (b) ?Olsem wanem ol man Nasi oli luksave se yumi strong long promes blong yumi?

⁹ ?Taem yumi folem eksampol blong Jisas blong mekem olgeta samting we God i wantem, hemia i minim wanem? Jisas i talem long ol disaepol blong hem se: “Sipos wan man i wantem kam biaen long mi, hem i no mas tingbaot hem fastaem, mo i mas karem pos blong safa mo folem mi oltaem.” (Matiu 16:​24, NW ) Long ples ya, Jisas i tokbaot tri samting we yumi mas mekem. Faswan samting se, yumi “no mas tingbaot” yumi fastaem. Hemia i min se yumi sakemaot ol samting we yumi nomo i wantem mo ol samting we sin i pulum yumi blong mekem, nao yumi talem ‘yes’ long God blong folem olgeta advaes blong hem mo letem hem i lidim yumi. Seken samting we Jisas i talem, se “karem pos blong safa.” Long taem blong Jisas, pos ya we oli nilim man long hem, i minim sem mo fasin safa. Taswe taem yumi kam Kristin, yumi agri se sam samtaem bambae yumi safa from wok blong talemaot gud nius. (2 Timoti 1:8) Nating se ol man blong wol oli jikim yumi mo daonem yumi, yumi mekem olsem Kraes we i ‘no tingbaot bigfala sem’ ya, be yumi glad blong save se yumi stap mekem samting we God i agri long hem. (Hibrus 12:2) Namba tri samting, yumi folem Jisas “oltaem.”​—Ol Sam 73:26; 119:44; 145:2.

¹⁰ Yumi intres blong makem se, sam man we oli agensem yumi, oli luksave se ol Witnes blong Jeova oli holemstrong long promes we oli mekem long God blong mekem wok blong hem fulwan. Eksampol, long rabis kalabus ya Buchenwald long taem blong ol Nasi long Jemani, ol Witnes we oli no wantem lego bilif blong olgeta oli mas saenem wan pepa we oli raetem tok ya long hem se: “Mi mi stap olsem wan Baebol Studen mo bambae mi neva brekem  promes blong mi we mi mekem long Jeova.” !Toktok ya we oli raetem i soemaot gud tingting blong olgeta man blong God we oli givim laef i go long hem mo we oli holemstrong long bilif!​—Ol Wok 5:32.

Samting We i Makemaot Yumi Olsem Witnes Blong Jeova

11. ?Wanem blesing i kam long man we i baptaes?

¹¹ Fashaf blong seken kwestin we oli askem long man we bambae i baptaes, i se: ?Yu yu kasem save se taem yu givim laef blong yu i go long God mo yu tekem baptaes, yu yu kam wan Witnes blong Jeova? Afta long baptaes, yu kam wan man blong wok blong God mo yu karem nem blong hem, Jeova. Hemia wan blesing ya be i wan samting we yu mas tinghevi long hem tu. Mo i openem rod long yu blong yu kasem laef we i no save finis, sipos yu stap tru long Jeova gogo kasem en.​—Matiu 24:13.

12. ?Wanem wok i kam semtaem wetem ona blong karem nem blong Jeova?

¹² Yes, i wan bigfala ona blong karem nem blong God Jeova we i gat olgeta paoa. Profet Maeka i talem se: “From we olgeta pipol, bambae oli wokbaot long nem blong god blong olgeta. Be yumi, bambae yumi wokbaot olwe long nem blong Jeova, God blong yumi, yes, gogo i no save finis.” (Maeka 4:​5, NW ) Nating se i olsem, i gat wan wok i kam semtaem wetem bigfala ona ya. Yumi mas traehad blong gat wan fasin blong laef we i givim ona long nem ya we yumi karem. Pol i mekem ol Kristin long Rom oli tingbaot samting ya taem hem i talem se sipos wan man i no mekem wanem we hem i tijim narafala blong mekem, man ya i “stap spolem nem blong [God],” no i sakem doti long nem blong hem.​—Rom 2:​21-24.

13. ?From wanem ol man we oli givim laef i go long Jeova oli mas givim witnes long saed blong God blong olgeta?

¹³ Taem wan man i kam wan Witnes blong Jeova, hem i agri blong tekem wok ya tu blong givim witnes long saed blong God blong hem. Ol man Isrel oli givim laef blong olgeta long Jeova. Ale Jeova i singaot olgeta blong oli kam ol witnes blong hem blong pruvum posisen blong hem olsem trufala God. (Aesea 43:​10-12, 21) Be neson ya i no holemgud wok ya, ale sloslo Jeova i no moa glad long olgeta nating. Tede, ol trufala Kristin oli tingbaot wok blong givim witnes long saed blong Jeova se hem i wan bigfala ona blong olgeta. Yumi mekem olsem from we yumi lavem Jeova mo yumi wantem tumas blong luk we man i no moa sakem doti long tabu nem ya. Yumi no save stap kwaet taem yumi save trutok long saed blong Papa blong yumi long heven mo taem yumi save wanem we hem i wantem mekem long wol ya. Yumi gat sem tingting olsem aposol Pol we i talem se: “Hemia i wok blong mi we mi mas mekem. Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.”​—1 Korin 9:16.

14, 15. (a) ?Wanem wok we ogenaesesen blong Jeova i mekem blong yumi gru long saed blong spirit? (b) ?Wanem samting we God i givim blong halpem yumi long saed blong spirit?

¹⁴ Narafala haf blong seken kwestin i mekem man we i baptaes i tingbaot se hem i mas wok wetem ogenaesesen blong Jeova we tabu spirit i stap lidim. Yumi no save mekem wok blong Jeova yumi wan nomo. Yumi nidim help, sapot, mo ol tok blong leftemap tingting we i kam long “kampani blong ol brata” raon long wol. (1 Pita 2:​17, NW; 1 Korin 12:​12, 13) Ogenaesesen blong God i givhan bigwan long yumi blong yumi gru long saed blong spirit. Hem i givim plante plante buk we oli tokbaot Baebol blong halpem yumi blong gru long save, blong tekem ol waes desisen taem yumi fesem trabol, mo blong frengud moa oltaem wetem God. ‘Slef we i stret mo waes’ i olsem wan mama we i lukaotgud long ol pikinini blong hem mo i meksua se oli kakae gud. Taswe slef ya i givim plante plante gudfala kakae long saed blong spirit we i kam long stret taem blong halpem yumi blong gohed long saed blong spirit.​—Matiu 24:​45-47, NW; 1 Tesalonaeka 2:​7, 8.

¹⁵ Long ol miting evri wik, ol man blong Jeova oli kasem trening we oli nidim mo ol tok blong leftemap tingting blong oli holemstrong olsem ol Witnes blong Jeova. (Hibrus 10:​24, 25) Tiokratik Skul i tijim  yumi blong toktok fored long plante man, mo Miting blong Kingdom Wok i trenem yumi blong talemaot gud nius long fasin we i save karem frut. Taem yumi go long ol miting mo taem yumi wan yumi stadi long ol buk we oli tokbaot Baebol, yumi luksave se spirit blong Jeova i stap wok, i stap lidim ogenaesesen blong hem. Tru long ol miting mo buk we oli kamaot oltaem, God i givim woning long yumi, hem i trenem yumi blong kam ol gudfala man blong wok blong hem, mo i halpem yumi blong stap wekap long saed blong spirit.​—Ol Sam 19:​7, 8, 11; 1 Tesalonaeka 5:​6, 11; 1 Timoti 4:13.

Wanem We i Pusum Yu Blong Baptaes

16. ?Wanem i pulum yumi blong givim laef blong yumi i go long Jeova?

¹⁶ Yes, tufala kwestin ya we oli askem long yumi bifo baptaes, oli mekem yumi tingbaot bakegen mining blong baptaes ya long wota mo ol wok we oli kam wetem desisen ya. ?Ale wanem i mas pusum yumi blong tekem desisen ya blong baptaes? Yumi baptaes blong kam disaepol, i no from we narafala i fosem yumi, be from we Jeova nao i “pulum” yumi. (Jon 6:44) From we “God i lav,” hem i rulum heven mo wol wetem fasin ya lav, i no wetem fasin blong fos. (1 Jon 4:​8, NW ) Ol gudfala fasin blong Jeova mo fasin we hem i mekem long yumi, oli pulum yumi i go long hem. Jeova i givim wan Pikinini ya nomo we hem i gat blong i ded from yumi, mo i givim hop blong wan gudfala laef long fiuja we hemia beswan hop blong man. (Jon 3:16) Ale, samting ya i pulum yumi blong givim laef blong yumi long hem.​—Ol Proveb 3:9; 2 Korin 5:​14, 15.

17. ?Yumi no givim laef blong yumi blong mekem wanem?

¹⁷ Yumi no givim laef blong yumi from wan tingting no wan wok we yumi bilif strong long hem, be yumi givim laef blong yumi long Jeova hem wan. Wok we God i givim long ol man blong hem, bambae i jenis, be promes we ol man ya oli mekem blong givim laef i go long hem i stap sem mak nomo. Tingbaot. Wanem we Jeova i askem Ebraham blong mekem i defren olgeta long wanem we hem i talem long Jeremaea blong mekem. (Jenesis 13:​17, 18; Jeremaea 1:​6, 7) Nating se i olsem, tufala tugeta i mekem wok ya we God i putum long han blong tufala from we tufala i lavem Jeova mo tufala i wantem mekem wanem we hem i wantem tufala blong mekem. Long taem blong en, we yumi stap long hem naoia, olgeta man blong Kraes we oli baptaes oli traehad blong folem oda ya we Kraes i givim se oli mas talemaot gud nius blong Kingdom mo pulum man i kam disaepol. (Matiu 24:14; 28:​19, 20) Sipos yumi mekem wok ya wetem fulhat blong yumi, yumi soemaot se yumi lavem Papa blong yumi long heven, mo yumi rili givim ful laef blong yumi long hem.​—1 Jon 5:3.

18, 19. (a) ?Taem yumi baptaes, i olsem we yumi talemaot wanem long olgeta man? (b) ?Bambae yumi tokbaot wanem long nekis stadi?

¹⁸ I klia nomo se baptaes i openem rod long yumi blong kasem plante blesing, be hem i wan desisen we yumi mas tinghevi long hem tu. (Luk 14:​26-33) Baptaes i soemaot wan desisen we yumi tekem we i moa impoten i bitim evri narafala samting. (Luk 9:62) Taem yumi baptaes yumi stap talemaot long olgeta man, se: “God ya blong Saeon, hem i God blong yumi. Hem bambae i God blong yumi oltaem, mo bambae hem i lidim yumi, gogo i no save finis.”​—Ol Sam 48:14.

¹⁹ Long nekis stadi bambae yumi tokbaot sam narafala kwestin we maet man i save tingbaot long saed blong baptaes long wota. ?I gat sam risen we i mekem se i stret blong man i no baptaes fastaem? ?I gat wan stret yia we man i naf blong baptaes? ?Olsem wanem yumi evriwan i save mekem se taem blong baptaes i wan taem we yumi ona long hem?

?Yu Yu Save Eksplenem?

• ?From wanem olgeta Kristin wanwan oli mas tanem tingting bifo we oli baptaes?

• ?Taem man i givim laef blong hem long God hemia i minim wanem?

• ?Wanem ol wok we oli joen wetem ona ya we yumi kasem blong holem nem blong Jeova?

• ?Wanem i mas pusum yumi blong tekem desisen blong baptaes?

[Kwestin]

[Bokis/Foto blong pija long pej 22]

Tufala Kwestin Blong Baptaes

?From bilif blong yu long sakrefaes blong Jisas Kraes, yu yu tanem tingting blong yu from ol sin blong yu, mo yu yu givim laef blong yu i go long Jeova blong mekem ol samting we hem i wantem?

?Yu yu kasem save se taem yu givim laef blong yu i go long God mo yu tekem baptaes, yu yu kam wan Witnes blong Jeova mo yu stap insaed long ogenaesesen blong God we spirit blong hem i lidim?

[Tok blong pija long pej 23]

Taem yu givim laef blong yu long Jeova tru long prea yu mekem wan impoten promes long hem

[Tok blong pija long pej 25]

Wok blong prij i soemaot se yumi givim laef blong yumi long God