Wan Kwestin

Eksodas 23:19 i talem se: “Sipos yufala i wantem kukum wan yang sipsip no wan yang nani, bambae yufala i no mas yusum melek blong mama blong hem bakegen blong kukum long hem.” ?Loa ya i tijim yumi long wanem samting?

Loa ya we yumi faenem tri taem long Baebol, i stap long Loa blong Moses. Hem i givhan long yumi blong kasem save wanem nao tingting blong Jeova long ol samting we i stret blong mekem, mo blong kasem save long sore mo kaen fasin blong hem. Mo tu, loa ya i soemaot klia se Jeova i no laekem nating giaman wosip.​—Eksodas 34:26; Dutronome 14:21.

Sipos wan man i kukum wan yang nani no narafala anamol long melek blong mama blong hem, samting ya i agensem fasin we Jeova i stanemap. God i mekem se melek blong nani i blong givim kakae long pikinini blong hem mo i blong mekem pikinini i strong. Wan man we i stadi dip long bisnes ya i talem se, sipos wan man i kukum wan yang nani long melek blong mama blong hem, “hem i no soem respek long plan we God i putumap mo mekem i tabu, hemia fasin fren bitwin mama mo pikinini.”

Mo tu, samfala oli ting se maet fasin ya blong kukum yang nani long melek blong mama blong hem, i wan kastom blong skul blong ol hiten man. Oli mekem kastom ya blong singaot ren i kam. Sipos i olsem, loa ya i lukaotgud long ol man Isrel blong oli no joen long ol krangke mo nogud fasin blong ol skul blong ol neson raonabaot long olgeta. Loa blong Moses i talemaot klia se i tabu blong ol man Isrel oli folem fasin blong ol man blong ol narafala kantri ya.​—Levitikas 20:23.

Mo laswan samting se, loa ya i soemaot kaen fasin mo sore blong Jeova. I gat plante tok insaed long Loa we i blokem ol man blong oli no spolem ol anamol, mo blong oli no wok agensem plan mo fasin we Jeova i putumap. Olsem nao, Loa i talem se ol man Isrel oli no mas tekemaot wan anamol long mama blong hem taem hem i jes bon, blong mekem sakrefaes long hem. Oli mas wet seven dei no bitim seven dei. Loa i talem tu se oli no mas mekem sakrefaes long mama anamol wetem pikinini blong hem, tufala wantaem long sem dei. Mo bakegen, Loa i talem se sipos mama pijin i stap sidaon long ol eg no ol pikinini blong hem long nes blong hem, oli no mas tekemaot mama ya wetem pikinini blong hem wantaem.​—Levitikas 22:​27, 28; Dutronome 22:​6, 7.

I klia se Loa ya i no jes wan lis blong ol oda nomo, be hem i givhan long yumi long plante rod. Bigfala tingting insaed long ol loa ya oli givhan long yumi blong haremsave wanem fasin i stret blong mekem, mo blong soemaot ol nambawan fasin blong Jeova.​—Ol Sam 19:​7-11.

[Foto Credit Line blong pija long pej 31]

© Timothy O’Keefe/Index Stock Imagery