Ol Man Blong Lukaot Long Sipsip We Oli Soem Eksampol
Ol Man Blong Lukaot Long Sipsip We Oli Soem Eksampol
‘Lukaot gud long ol man we God i givim long yufala, olsem we man blong lukaot long sipsip i stap lukaot gud long ol sipsip blong hem. Tingting blong yufala i mas glad blong mekem. Yufala i mas soemaot fasin [“eksampol,” NW ] we ol man oli save folem.’—1 PITA 5:2, 3.
1, 2. (a) ?Wanem nambawan wok we Jisas i putum long han blong aposol Pita, mo from wanem i stret we Jisas i trastem hem? (b) ?Wanem tingting blong Jeova long ol elda long kongregesen?
LONG wan moning, smoltaem bifo long lafet blong Pentekos long yia 33 K.T., Pita mo sikis narafala disaepol blong Jisas oli stap tekem kakae we Jisas i rerem long sanbij blong Lugun blong Galili. Hemia i no faswan taem we Pita i luk Jisas afta we hem i laef bakegen. Pita i mas glad tumas blong save se Jisas i laef i stap. Be ating Pita i wari tu. Sam dei bifo, hem i bin giaman long fes blong ol man se hem i no save Jisas. (Luk 22:55-60; 24:34; Jon 18:25-27; 21:1-14) ?Olsem wanem? ?Jisas i tok strong long Pita we i tanem tingting blong hem finis, se hem i no bin soemaot bilif? Nogat. Defren olgeta, Jisas i putum wan nambawan wok long han blong Pita, hemia blong givim kakae long “ol smol sipsip” blong hem mo lukaotgud long olgeta. (Jon 21:15-17) Stori we yumi ridim long Baebol long saed blong Kristin kongregesen long faswan handred yia, i soemaot se i stret nomo we Jisas i trastem Pita. Biaen i gat bigfala traem i kamaot, be Pita wetem ol narafala aposol mo elda long Jerusalem oli gohed blong lukaotgud long ol sipsip long Kristin kongregesen, mo kongregesen i gru i kam bigwan.—Ol Wok 1:15-26; 2:14; 15:6-9.
2 Tede, Jeova i yusum Jisas Kraes blong putumap ol man we oli nafgud long saed blong spirit, blong oli lidim ol sipsip blong Hem tru long taem ya we i fulap moa long trabol i bitim ol narafala taem bifo. (Efesas 4:11, 12; 2 Timoti 3:1) ?I stret we Jeova i trastem ol man ya? Kampani blong ol Kristin we oli stap long pis long fulwol i pruvum se i stret. I tru se ol elda ya oli sinman olsem Pita. (Galesia 2:11-14; Jemes 3:2) Be nating, Jeova i trastem olgeta blong lukaotgud long ol sipsip we ‘hem i pemaot olgeta finis long blad blong Pikinini blong hem.’ (Ol Wok 20:28) Jeova i laekem tumas ol elda ya, hem i ting se “i stret nomo we oli kasem dabol ona.”—1 Timoti 5:17, NW.
3. ?Olsem wanem ol elda oli holem fasin ya blong glad long wok blong olgeta?
3 ?Olsem wanem ol elda oli holem fasin ya blong glad oltaem long wok blong olgeta? ?Olsem wanem oli soem eksampol long ol sipsip? Olsem Pita mo ol narafala man blong lukaot long ol sipsip blong God long faswan handred yia, ol elda ya oli dipen long tabu spirit blong God. Spirit ya i givim paoa we oli nidim blong mekem bigfala wok blong olgeta. (2 Korin 4:7) Mo tu, tabu spirit i mekem se oli save wokem ol gudfala fasin olsem lav, glad, pis, longfala tingting, kaen fasin, gud fasin, bilif, kwaet fasin, mo bos long tingting. (Galesia 5:22, 23) Bambae yumi tokbaot olsem wanem ol elda oli soem eksampol long ol sipsip we God i putum long han blong olgeta, taem oli mekem ol gudfala fasin ya long olgeta.
Lavem Kampani Blong Ol Sipsip Mo Wanwan Sipsip
4, 5. (a) ?Olsem wanem Jeova mo Jisas i soemaot se tufala i lavem ful kampani blong ol sipsip? (b) ?Olsem wanem ol elda oli soemaot se oli lavem ful kampani blong ol sipsip?
4 Bigfala fasin we i kamaot long spirit blong God hemia lav. Jeova i soemaot se hem i lavem ful kampani blong ol sipsip blong hem taem hem i givim fulap kakae long saed blong spirit long olgeta. (Aesea 65:13, 14; Matiu 24:45-47) Be hem i no givim kakae long olgeta nomo. Hem i lavem wanwan long ol sipsip ya. (1 Pita 5:6, 7) Jisas tu i lavem ful kampani blong ol sipsip blong God. Hem i ded blong sevem olgeta, mo hem i save wanwan long ol sipsip ya, i singaot olgeta “long nem blong olgeta.”—Jon 10:3, 14-16.
5 Ol elda oli folem fasin blong Jeova mo Jisas. Taem oli “tijim” kongregesen, hemia wan rod blong soemaot lav long ful kampani blong ol sipsip blong God. Ol tok we oli givim long kongregesen we oli stanap long Baebol, i givim kakae long ol sipsip mo i protektem olgeta. Evriwan long kongregesen oli luk hadwok blong ol elda long saed ya. (1 Timoti 4:13, 16) Be maet oli no luk hadwok we ol elda oli mekem blong kipim ol ripot blong kongregesen, raetem ol leta, rerem ol program, mo lukaot long plante narafala samting we i mekem se ol miting blong kongregesen mo ol narafala wok oli gohed “long fasin we i stret gud.” (1 Korin 14:40) Ol elda oli no soem olgeta long fored blong kongregesen taem oli mekem ol wok ya mo maet oli no kasem tangkiu from. Taswe wok ya i rili soemaot lav blong olgeta.—Galesia 5:13.
6, 7. (a) ?Ol elda oli save mekem wanem blong savegud wanwan long ol sipsip? (b) ?From wanem i gud samtaem blong talemaot filing blong yu long ol elda?
6 Ol Kristin man blong lukaot long ol sipsip blong God wetem lav, oli traehad blong soemaot intres long wanwan long ol sipsip long kongregesen. (Filipae 2:4) Wan rod blong savegud ol wanwan sipsip, i blong wok wetem olgeta long wok blong prij. Oltaem Jisas i joen wetem ol man blong hem long wok blong prij mo hem i yusum taem ya blong leftemap tingting blong olgeta. (Luk 8:1) Wan Kristin elda i talem se: “Mi faenem se beswan rod blong save ol brata mo sista mo blong leftemap tingting blong olgeta, i blong prij wetem olgeta.” Sipos yu no prij wetem wan elda longtaem lelebet, i gud yu mekem plan naoia.
7 Lav i pulum Jisas blong glad taem ol man blong hem oli glad mo blong sore taem ol man blong hem oli harem nogud. Olsem nao, taem 70 disaepol blong hem oli kambak long wok blong prij mo oli glad tumas, Jisas tu i “harem gud tumas.” (Luk 10:17-21) Be taem Lasaros i ded mo Jisas i luk we Meri wetem ol famle mo fren blong hem oli harem nogud, ‘hem tu i krae.’ (Jon 11:33-35) Long sem fasin, ol elda tede we oli gat sore, oli haremsave filing blong ol sipsip. Lav i pulum olgeta blong ‘harem gud wetem olgeta we oli harem gud’ mo ‘krae wetem olgeta we oli krae.’ (Rom 12:15) Sipos wan samting long laef blong yu i mekem we yu yu glad, no sipos wan samting i mekem we yu yu harem nogud, talemaot long ol Kristin elda. Sipos yu yu glad, samting ya bambae i leftemap tingting blong olgeta. (Rom 1:11, 12) Sipos yu talemaot wan traem long olgeta, bambae oli save leftemap tingting blong yu mo mekem yu yu strong.—1 Tesalonaeka 1:6; 3:1-3.
8, 9. (a) ?Olsem wanem wan elda i soem lav long woman blong hem? (b) ?I impoten olsem wanem blong ol elda oli soem lav long famle blong olgeta?
8 Lav we elda i gat long ol sipsip blong God, i kamaot klia long fasin we hem i mekem long prapa famle blong hem. (1 Timoti 3:1, 4) Sipos hem i mared, hem i soem lav mo ona long woman blong hem. Long rod ya, hem i soem eksampol long ol narafala hasban. (Efesas 5:25; 1 Pita 3:7) Ridim ol toktok blong wan Kristin woman we nem blong hem Linda. Bifo we hasban blong hem i ded, hem i wan elda blong bitim 20 yia. Linda i talem se: “Oltaem man blong mi i bisi long wok blong lukaot long kongregesen. Be hem i mekem mi mi harem se mitufala i wan tim. Plante taem hem i talem tangkiu long mi from we mi sapotemgud hem, mo sipos hem i gat fri taem, hem i spenem wetem mi. From samting ya, mi harem se hem i lavem mi, mo mi no jalus from we hem i mas spenem taem wetem ol narafala long kongregesen.”
9 Sipos wan Kristin elda i gat pikinini, hem i soem eksampol long ol narafala papa mama taem hem i stretem pikinini blong hem wetem lav mo taem hem i talem ol gudfala toktok long pikinini blong hem. (Efesas 6:4) Yes, lav we hem i soemaot oltaem long famle blong hem i givim pruf se i stret nomo we Jeova i trastem hem blong mekem wok ya blong lukaot long ol sipsip, we tabu spirit i putumap hem blong mekem.—1 Timoti 3:4, 5.
Toktok Oltaem Wetem Ol Narafala Blong Mekem Oli Glad Mo i Gat Pis
10. (a) ?Wanem i save daonem glad mo pis long kongregesen? (b) ?Wanem rao i kamaot long faswan handred yia we klosap i spolem pis long kongregesen, mo olsem wanem oli stretem rao ya?
10 Tabu spirit i save mekem se i gat glad mo pis long hat blong wanwan Kristin, long grup blong ol elda long kongregesen, mo long ful kongregesen. Be sipos i no gat fasin blong toktok tugeta long fasin we i tru, glad mo pis i save godaon. King Solomon bifo i talem se: “Olgeta plan blong man oli save foldaon sipos oli no toktok gud tugeta.” (Ol Proveb 15:22, NW ) Taem ol man oli toktok tugeta wetem respek mo oli tok tru, glad mo pis i kam antap moa. Tingbaot kongregesen blong ol Kristin long faswan handred yia. Taem rao long saed blong sakomsaes i kamaot mo i luk olsem se i save spolem pis blong kongregesen, hed kampani long Jerusalem i lukaot tabu spirit blong givhan long olgeta. Mo tu, wanwan long olgeta oli talemaot tingting blong olgeta. Afta we oli toktok plante, oli tekem wan desisen. Taem oli talemaot desisen ya we evriwan long olgeta oli glad long hem, kongregesen ‘i harem gud, from we tok blong olgeta i leftemap tingting blong ol brata.’ (Ol Wok 15:6-23, 25, 31; 16:4, 5) Yes, oli mekem glad mo pis i kam antap moa.
11. ?Olsem wanem ol elda oli save mekem se i gat moa glad mo pis long kongregesen?
11 Sem mak tede, taem ol man blong lukaot long sipsip oli toktok oltaem tugeta mo wetem ol brata sista, oli mekem se i gat moa glad mo pis long kongregesen. Taem i gat sam trabol we i save spolem pis blong kongregesen, ol elda oli miting tugeta mo oli toktok isi, we oli no fraet blong talemaot filing blong olgeta. Mo oli lesin wetem respek taem ol narafala elda oli talemaot tingting blong olgeta. (Ol Proveb 13:10; 18:13) Nao oli prea from tabu spirit, mo oli tekem desisen we i stanap long ol rul blong Baebol mo long advaes we i kamaot long ol buk blong “slef ya we i stret mo waes.” (Matiu 24:45-47, NW; 1 Korin 4:6) Taem grup blong ol elda i tekem wan desisen we i laenapgud wetem Baebol, ol wanwan elda oli sapotem desisen ya, nating se maet wan elda i gat prapa tingting blong hem we i defren. Long rod ya, elda ya i letem tabu spirit i lidim bisnes ya. Taem ol elda oli gat tingting daon olsem, bambae i gat moa glad mo pis, mo oli soem eksampol long ol sipsip olsem wanem blong wokbaot wetem God. (Maeka 6:8) ?Olsem wanem? ?Yu yu gat tingting daon blong agri wetem ol elda blong kongregesen, taem oli tekem desisen we i stanap long Baebol?
Longfala Tingting Mo Kaen Fasin
12. ?From wanem Jisas i nidim longfala tingting mo kaen fasin taem i stap wetem ol aposol blong hem?
12 Jisas i soemaot longfala tingting mo kaen fasin long ol aposol blong hem, nating se oli mestem plante taem. Tingbaot olsem wanem Jisas i tijim olgeta bakegen mo bakegen se oli mas gat tingting daon. (Matiu 18:1-4; 20:25-27) Nating se i olsem, long laswan naet blong laef blong Jisas long wol ya, afta we hem i wasem leg blong ol aposol blong soemaot eksampol blong tingting daon, “oli rao from tingting ya se hu nao i hae moa long olgeta.” (Luk 22:24; Jon 13:1-5) ?Olsem wanem? ?Jisas i tok strong long olgeta? Nogat. Long kaen fasin, hem i pulum tingting blong olgeta bakegen, i se: “?Hu man we i hae moa? ?Man we i stap kakae long tebol, no man we i stap karem kakae i kam? Yufala i save se man we i stap kakae long tebol, hem nao i hae moa. Be mi mi stap long medel blong yufala olsem man blong karem kakae nomo.” (Luk 22:27) Sloslo, longfala tingting mo kaen fasin blong Jisas—wetem gudfala eksampol we hem i soemaot tu—i tajem hat blong ol aposol.
13, 14. ?Wetaem ol elda oli rili nidim blong soemaot kaen fasin?
13 Sem mak tede. Maet wan elda i mas givim advaes bakegen mo bakegen long wan brata no sista long saed blong wan slak fasin blong hem. Maet elda ya i save les long brata no sista ya. Be taem hem i ‘tok blong wekemap man we i stap les,’ hem i mas holem tingting ya se hem tu i gat sam slak fasin. Olsem nao, bambae hem i naf blong soemaot longfala tingting mo kaen fasin long brata blong hem. Taem hem i mekem olsem, hem i stap folem fasin blong Jisas mo Jeova, we tufala i stap soemaot longfala tingting mo kaen fasin long ol Kristin—mo long ol elda tu.—1 Tesalonaeka 5:14; Jemes 2:13.
14 Sam samtaem, wan brata no sista i mekem wan bigfala sin mo ol elda oli mas stretem hem long strong fasin. Sipos brata ya no sista ya i no tanem tingting blong hem from sin ya, ol elda oli mas putumaot hem long kongregesen. (1 Korin 5:11-13) Nating se i olsem, fasin we oli mekem long brata ya no sista ya i mas soemaot se oli no agensem hem be oli agensem sin blong hem. (Jud 23) Sipos ol man blong lukaot long sipsip oli soemaot kaen fasin long sipsip ya we i lusum rod, samting ya i save mekem i isi moa blong bambae hem i kambak insaed long kongregesen.—Luk 15:11-24.
Bilif i Pusum Man Blong Mekem Ol Gudfala Wok
15. ?Long wanem rod ol elda oli folem fasin blong Jeova mo mekem i gud long ol narafala, mo wanem i pusum olgeta blong mekem olsem?
15 “Oltaem [Jeova] i stap mekem i gud tumas long yumi evriwan.” Hem i mekem olsem long olgeta tu we oli no talem tangkiu long hem from kaen fasin we hem i mekem long olgeta. (Ol Sam 145:9; Matiu 5:45) Wan spesel rod we Jeova i yusum blong mekem i gud long ol man, hemia se i sanem ol man blong hem oli go talemaot ‘gud nius blong kingdom’ long olgeta. (Matiu 24:14, NW ) Ol elda oli folem fasin blong God mo mekem i gud long ol narafala, taem oli lidim ol brata mo sista long wok blong prij. ?Wanem i pusum olgeta blong no les long wok ya? Strong bilif long Jeova mo long ol promes blong hem.—Rom 10:10, 13, 14.
16. ?Olsem wanem ol man blong lukaot long sipsip oli save “mekem i gud” long ol sipsip?
16 Ol man blong lukaot long sipsip oli “mekem i gud long olgeta man” taem oli prij. Be oli gat wan narafala wok blong mekem tu. ‘Oli mas mekem i gud long olgeta we oli brata mo sista blong olgeta’ long saed blong bilif. (Galesia 6:10) Wan rod we oli folem blong mekem olsem, se oli go luk ol sipsip blong leftemap tingting blong olgeta. Wan elda i talem se: “Mi mi laekem wok ya blong visitim ol brata mo sista blong leftemap tingting blong olgeta. Mi gat janis blong talem ol gudfala toktok long olgeta from bigfala traehad blong olgeta, mo blong givhan long olgeta blong kasem save se Jeova i tinghae long hadwok blong olgeta.” Maet ol elda oli givim advaes long wan brata no sista olsem wanem hem i save kamgud moa long wok blong Jeova. Taem oli mekem olsemia, i gud oli folem fasin blong aposol Pol. Ridim olsem wanem Pol i toktok gud long ol Kristin brata long Tesalonaeka: “Masta ya blong yumi, hem i stap mekem mitrifala i trastem yufala, se naoia yufala i stap mekem olsem we mitrifala i talem long yufala, mo we bambae yufala i gohed blong mekem olsem.” (2 Tesalonaeka 3:4) Ol tok olsem we i soem tras, i pulum ol sipsip blong mekem gudfala wok, mo i mekem i isi moa long olgeta blong oli ‘ona long ol lida blong olgeta.’ (Hibrus 13:17) Taem yu haremgud long visit blong wan elda we i leftemap tingting blong yu, i gud yu talem tangkiu long hem from.
Blong Gat Kwaet Fasin, i Nidim Bos Long Tingting
17. ?Wanem lesen we Pita i lanem from eksampol blong Jisas?
17 Jisas i wan kwaet man, mo hem i stap kwaet taem ol man oli wantem rao long hem. (Matiu 11:29) Taem ol man oli putum hem long han blong ol enemi blong hem, hem i stap kwaet mo i bos long tingting blong hem. Be Pita i mekem defren fasin. Hem i pulumaot naef blong faet blong hem, mo i katem wan man. Nao Jisas i pulum Pita blong tingbaot wan samting i se: “?[Yu yu] ting se mi no save singaot long Papa blong mi blong i givhan long mi? Sipos mi singaot long hem, wantaem nomo bambae hem i sanem ol enjel, we oli moa long twelef kampani blong ol soldia, blong oli kam lukaot long mi.” (Matiu 26:51-53; Jon 18:10) Pita i lanem wan bigfala lesen long taem ya, mo plante yia biaen hem i talem long ol Kristin se: “Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem. . . . Taem ol man oli tok nogud long hem, hem i no tok nogud bakegen long olgeta. Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta.”—1 Pita 2:21-23.
18, 19. (a) Wetaem ol elda oli mas gat kwaet fasin mo bos long tingting? (b) ?Wanem ol kwestin we bambae yumi tokbaot long nekis stadi?
18 Long sem fasin, ol gudfala elda oli stap kwaet taem narafala i mekem i no stret long olgeta. Maet samfala long kongregesen we ol elda oli traem halpem olgeta, oli no wantem folem advaes blong olgeta. Sipos wan Kristin i slak no i sik long saed blong spirit, maet hem i sakem sam nogud tok long elda we i traem blong givhan long hem. Ol tok ya i save mekem elda i harem nogud, “olsem we naef blong faet i stikim hem.” (Ol Proveb 12:18) Be ol elda oli folem fasin blong Jisas. Oli no sakem ol strong tok i gobak long ol sipsip, mo oli no mekem wan samting long olgeta blong givimbak long olgeta. Nogat. Oli bos long tingting blong olgeta mo oli gohed blong soemaot se oli kea long olgeta. Maet fasin blong olgeta i givhan long ol sipsip ya blong oli kam strong bakegen. (1 Pita 3:8, 9) ?Olsem wanem long yu? ?Yu yu folem eksampol blong ol elda mo soemaot kwaet fasin mo bos long tingting taem narafala i givim advaes long yu?
19 Yumi save se Jeova mo Jisas i tinghae long hadwok blong plante taosen elda we oli glad blong lukaot long ol sipsip blong God long olgeta ples blong wol. Mo tu, Jeova mo Jisas i laekem tumas plante taosen man blong givhan we oli sapotem ol elda long wok blong ‘givhan long ol narafala Kristin.’ (Hibrus 6:10) ?Taswe, from wanem sam brata we oli baptaes finis oli fraet blong traehad blong kasem “gudfala wok ya”? (1 Timoti 3:1) ?Mo olsem wanem Jeova i stap trenem olgeta we hem i putumap blong oli lukaot long ol sipsip blong hem? Bambae yumi tokbaot ol kwestin ya long nekis stadi.
?Yu Yu Tingbaot?
• ?Wanem ol samting we ol elda oli mekem blong soemaot se oli lavem ol sipsip?
• ?Olsem wanem evriwan long kongregesen oli save mekem glad mo pis i kam antap?
• ?From wanem ol elda oli soemaot longfala tingting mo kaen fasin taem oli stretem wan sipsip?
• ?Olsem wanem ol elda oli mekem i gud long ol narafala mo soemaot bilif?
[Kwestin]
[Tok blong pija long pej 18]
Lav i pusum ol elda blong oli givhan long kongregesen
[Tok blong pija long pej 18]
Mo tu, oli spenem taem wetem famle blong olgeta blong pleplei . . .
. . . mo long wok blong prij
[Tok blong pija long pej 20]
Ol elda we oli toktok tugeta oltaem oli mekem se i gat moa glad mo pis long kongregesen