Ol Man Oli Gat Raet Blong Gat Wan Nem

EVRI man oli gat raet blong gat wan nem. Long Tahiti, taem wan pikinini i bon oli mas putum wan nem blong hem, nating sipos papa mama blong pikinini ya oli lego hem, mo nating sipos oli no save hu ya papa mama blong hem. Ofis blong gavman i putum fas nem mo famle nem long pikinini ya.

Be, nating se klosap olgeta man long wol oli gat raet blong gat wan nem, i gat wan man we oli no bin givim raet ya long hem. !Yumi sapraes se man ya hem i ‘Papa blong yumi we olgeta famle long heven mo long wol oli stap tekem fasin ya long hem’! (Efesas 3:​14, 15) Plante man oli no wantem yusum nem blong God ya we i wokem olgeta samting, olsem we i stap insaed long Baebol. Oli wantem blong putum ol taetel olsem “God,” “Masta,” no “Papa blong Olwe” blong tekem ples blong nem blong hem. ?Be, wanem nem blong hem? Man we i raetem Sam i givim ansa long kwestin ya: “Plis yu mekem olgeta oli save se yu, we nem blong yu Jeova, yu nomo yu Hae God long olgeta ples long wol.”​—Ol Sam 83:​18, NW.

Long fashaf blong ol yia 1800, taem ol misinari blong London Misinari Sosaeti oli go long Tahiti, ol man Polinesia oli wosip long plante defdefren god. Wanwan god ya i gat prapa nem blong hem, mo tufala god we oli hae moa long olgeta, hemia Oro mo Taaroa. Blong makemaot God we i stap long Baebol se i defren long ol narafala god, ol misinari ya oli no fraet blong yusum nem blong God ya, we oli tanem i go long lanwis Tahiti se Iehova.

Plante man oli save mo oli yusum nem ya evri dei mo taem oli stap raetem leta. King Pomare II blong Tahiti, we i rul long stat blong ol yia 1800, i yusum nem ya oltaem taem hem i raetem ol leta blong hem. Pruf blong samting ya i stap long leta long pej ya. Leta ya hem i raetem long Inglis lanwis, mo i stap long Musium blong Tahiti mo ol aelan blong hem. Leta ya i soemaot se long taem ya ol man oli rere blong yusum nem blong God. Mo tu, prapa nem blong God i stap plante taosen taem long faswan Baebol blong Tahiti, we i kamaot long yia 1835.

[Tok blong pija long pej 32]

King Pomare II

[Foto Credit Line blong pija long pej 32]

King and letter: Collection du Musée de Tahiti et de ses Îles, Punaauia, Tahiti