?Olsem Wanem Yu Yu Talemaot Ol Tingting Mo Filing Blong Yu?

“LETA blong lav we ol olfala oli raetem.” Hemia toktok we oli putum long wan kompetisin we wan bang blong Japan i ogenaesem sam yia bifo. Kompetisin ya i blong pulum ol olfala man mo woman Japan we oli gat 50 no 60 yia blong oli talemaot “filing” blong olgeta long ol hasban mo waef blong olgeta. Wan man we i joen long kompetisin ya i raetem toktok ya i go long waef blong hem i se: “Ating mbae yu laf taem yu ridim tok blong mi, be sipos mi neva talemaot ol samting ya long yu bambae mi sore from, taswe hemia tok blong mi we mi talemaot klia nomo se, Tangkiu we yu mared long mi.”

Long plante kantri, olsem ol kantri blong Esia, ol man mo woman oli sem no maet oli ting se i no stret blong talemaot ol filing blong olgeta. Be taem bang ya long Japan i ogenaesem kompetisin ya, i gat 15,000 man mo woman we oli joen long hem mo sanem leta blong lav. Taem bang i luk se plante man oli joen long kompetisin ya, hem i ogenaesem wan kompetisin bakegen, ale hem i printim evri leta ya long ol buk. Kompetisin ya i soemaot se, ol man mo woman oli wantem tumas blong talemaot filing blong olgeta long hasban no waef blong olgeta. Be i gat plante man mo woman we oli no wantem mekem olsem. ?From wanem? Risen hemia se ating i hadwok tumas long olgeta blong talemaot filing we oli gat long narafala​—olsem hasban no waef blong olgeta—​mo oli harem se i wan bigfala wok tumas blong faenem ol stret tok blong talem samting olsem.

Man ya Hitoshi Kato i raetem wan buk long saed blong ol olfala we oli ritae long wok blong olgeta. Hem i talem se long plante famle long Japan, ol woman nao oli wokem rod blong divos long man blong olgeta. Ol woman ya oli mekem olsem from we oli bin kros mo oli bin harem nogud long plante samting be oli neva talemaot, oli holem nomo i stap long hat blong olgeta longtaem tumas. Masta Kato i talem se: “Hemia i kamaot tu from we, taem problem i kamaot, ol hasban mo waef oli no toktok tugeta blong traem stretem.”

Maet hasban i sek se waef blong hem i givim pepa blong divos long hem afta we hem mo waef tufala i ritae. Ating plante yia i pas we hasban mo waef ya tufala i no rili talemaot filing we wan i gat long narawan. Maet tufala i bin traem talemaot ol tingting no filing long tufala be neva storian blong tufala i kasem mak we i givhan long tufala. Ale, tufala i no moa fren gud tugeta, mo sloslo tufala i stat blong raorao oltaem.

?Olsem wanem hasban mo waef i save talemaot filing blong tufala long wan fasin we i no spolem narawan mo olsem wanem tufala i save stretem problem wetem kwaet fasin? Ol beswan advaes long saed ya oli stap long wan olfala buk we blong plante handred yia finis ol man oli bin tinghae long hem. Buk ya hemia Baebol.