Glad We i Kamaot Taem Yu Folem Stret Fasin

“Blesing blong Jeova, hemia nao samting we i mekem man i rij. Mo hem i no givim soa wetem.”​—OL PROVEB 10:​22, NW.

1, 2. ?From wanem yumi mas lukaot blong no tingting nomo oltaem long fiuja?

 WAN man Amerika we i waes long save blong wol, i talem se: “Taem yumi bisi tumas blong tingbaot fiuja . . . yumi fogetem blong luk se laef naoia i olsem wanem.” Hemia nao samting we ol pikinini oli mekem. Oli tingting tumas se bambae oli mekem wanem taem oli bigwan, mekem se oli no luksave gudtaem ya we oli gat olsem pikinini gogo gudtaem ya i pas.

² Samtaem ol man blong Jeova tu oli save tingting olsem. Maet yumi wantem tumas we ol promes blong God oli kamtru mo wol ya i kam wan paradaes. Yumi wantem tumas blong gat wan laef we i no moa gat sik, i no moa gat fasin blong kam olfala, i no moa gat soa mo safa. I gud blong tingbaot ol samting ya. ?Be olsem wanem sipos tingting blong yumi i stap nomo long ol blesing long saed blong bodi we bambae yumi kasem long fiuja nao yumi no luksave ol blesing long saed blong spirit we yumi stap kasem naoia? !Sore tumas sipos i olsem! Tingting blong yumi i save foldaon isi nomo mo maet ‘hat blong yumi i trabol from we samting we yumi putum tingting blong yumi i stap strong long hem, i no kamtru’ long taem we yumi ting se i mas kamtru. (Ol Proveb 13:​12, NW ) Maet ol trabol no hadtaem we yumi kasem oli mekem yumi foldaon long wan trap, se filing blong harem nogud i holemtaet yumi no yumi stap sore long yumi wan tumas. Ale yumi no moa traem winim trabol no hadtaem ya, be yumi komplen nomo oltaem. Yumi save blokem samting ya sipos yumi tingting dip long ol blesing we yumi gat naoia mo yumi gat tangkiu from ol blesing ya.

3. ?Long stadi ya bambae yumi tokbaot wanem?

³ Ol Proveb 10:22 (NW ) i talem se: “Blesing blong Jeova, hemia nao samting we i mekem man i rij. Mo hem i no givim soa wetem.” Ol gudgudfala samting long saed blong spirit we ol man blong Jeova oli stap kasem tede, hemia nao wan blesing we yumi save glad from.  Bambae yumi tokbaot sam long ol gudgudfala samting ya we yumi kasem long saed blong spirit mo wanem we ol samting ya oli mekem long yumi wanwan. I gud yumi tekem taem blong tingbaot ol gudgudfala samting we Jeova i givim long “stret man we i stap folem ol stret fasin.” Long rod ya bambae tingting blong yumi i kam strong moa blong mekem wok blong Papa blong yumi long heven wetem glad.​—Ol Proveb 20:7.

‘Ol Blesing We Oli Mekem Yumi Rij Tede’

4, 5. ?Wanem tijing blong Baebol we i rili impoten long yu, mo from wanem?

⁴ Stret save long saed blong ol tijing blong Baebol. Ol skul blong Krisendom * oli talem se oli bilif long Baebol. Be oli no save agri tugeta se wanem tijing i rili kamaot long Baebol. Samtaem ol memba blong wan jos nomo be oli gat defdefren tingting long saed blong wanem we Baebol i tijim. !Ol man blong Jeova oli no olsem! Nomata wantem kantri, kalja no kala blong skin blong yumi, yumi wosipim trufala God ya we yumi save nem blong hem. God ya i no wan triniti we yumi no sua gud se hem i olsem wanem. (Dutronome 6:4; Ol Sam 83:​18, NW; Mak 12:29) Yumi luksave tu se God i gat wan impoten bisnes blong stretem long saed blong hae rul blong hem, mo sipos yumi wanwan i holemstrong long hem, yumi sapotem hae rul blong hem. Yumi save trutok long saed blong ded mo yumi no moa fraet bitim mak olsem plante man we oli ting se God i bonem man long helfaea no i sanem olgeta long pegatri.​—Prija 9:​5, 10.

⁵ Mo tu, yumi glad tumas blong save se yumi no kamaot long evolusen. * Be God nao i wokem yumi long pija blong hem. (Jenesis 1:26; Malakae 2:10) Man blong raetem Sam i sing long God i se: “Yu yu mekem mi long fasin we i narafala, mo i nambawan olgeta. Mi mi ona long yu, mo mi presem nem blong yu from. Olgeta samting we yu yu mekem oli gud we i gud tumas. Samting ya, mi mi save we, mi savegud.”​—Ol Sam 139:14.

6, 7. ?Wanem jenis long laef blong yu, no long laef blong narafala man we yu save, we i olsem wan blesing?

⁶ Yumi fri long ol fasin blong laef we oli save spolem yumi. Long televisin, radio mo niuspepa i gat plante toktok i kamaot blong givim woning se i nogud blong smok, i nogud blong drong, mo i nogud blong slip olbaot. Bighaf blong ol man oli no lesin long ol woning ya. ?Be olsem wanem taem wan man we i laekem God i lanem se trufala God i no laekem ol fasin olsem mo i harem nogud taem ol man oli mekem ol fasin ya? !Wantaem nomo man ya bambae i sakemaot ol fasin ya long laef blong hem! (Aesea 63:10; 1 Korin 6:​9, 10; 2 Korin 7:1; Efesas 4:30) Man ya i mekem olsem from we hem i wantem mekem Jeova God i glad long hem, be nao, hem i kasem blesing tu from samting ya. Hem i blokem hem wan long ol rabis sik we oli save kamaot from nogud fasin blong laef mo hem i gat pis long tingting.

⁷ Plante man oli faenem i had blong stopem sam fasin we oli bin folem longtaem finis. Nating se i olsem, evri yia i gat plante taosen man we oli stap mekem olsem. Ol man ya oli givim laef blong olgeta long Jeova mo oli tekem baptaes blong soemaot long ol man se oli lego ol nogud fasin blong laef we God i no laekem. !Traehad blong olgeta ya i leftemap tingting blong yumi evriwan! Tingting blong yumi i strong moa blong no letem sin i bos long yumi mo blong no foldaon long olkaen nogud fasin ya we i save spolem yumi.

8. ?Wanem advaes blong Baebol we i mekem famle i hapi?

⁸ Famle laef we i hapi. Long plante kantri, laef insaed long ol famle i stap kam nogud olgeta. Plante mared man mo woman oli divos, mo samting ya i spolem filing blong ol pikinini blong olgeta. Long sam kantri long Yurop, long klosap 20 pesen blong olgeta famle, ol pikinini oli laef wetem papa nomo no mama nomo. ?Olsem wanem Jeova i halpem yumi blong wokbaot folem stret fasin long saed ya? Plis ridim Efesas 5:22 kasem japta 6:4. Bambae yu  luk nambawan advaes we Tok blong God i givim long ol hasban, ol waef, mo ol pikinini. Man we i folem ol advaes long ol vas ya mo long plante narafala vas bakegen, hem i save mekem mared blong hem i stap gud, i save tijimgud ol pikinini blong hem, mo i save mekem laef long famle i hapi. ?Yu no ting se hemia wan nambawan blesing we yu save glad long hem?

9, 10. ?From wanem tingting we yumi gat long saed blong fiuja i defren long tingting blong ol man blong wol?

⁹ Yumi sua se ol trabol long wol bambae oli finis i no longtaem. Nating se save blong man long saens mo teknoloji i kam antap mo sam lida blong wol oli wokhad, ol trabol long laef oli plante yet. Klaus Schwab, man ya we i stanemap World Economic Forum, i talem se “ol trabol long wol oli stap kam antap plante tumas be, taem we yumi gat blong stretem ol trabol ya, i smol tumas.” Hem i stap tokbaot “ol denja we oli save kasem eni kantri nomo, olsem ol teroris, ol trabol long weta mo ekonomi we i jenis oltaem.” Nao Masta Klaus i talem se: “Taem naoia i impoten moa i bitim bifo, from we wol i fesem sam problem we olgeta man tugeta oli mas stretem mo oli mas stretem kwiktaem.” Ol yia 2000 oli stap gohed, be i luk olsem se fiuja blong ol man long wol ya i no wan gudfala fiuja.

¹⁰ !Taswe, yumi glad tumas blong save se Jeova i stanemap wan rod finis blong karemaot ol trabol blong man! !Rod ya hemia Kingdom blong God we Mesaea i rul long hem! From Kingdom ya, trufala God bambae i “mekem ol faet i finis” mo ‘i gat pis long evri ples.’ (Ol Sam 46:9; 72:​7, NW ) King we God i jusumaot, hemia Jisas Kraes. King ya bambae i ‘sevem ol puaman, olgeta we oli sot long ol samting, mo olgeta we oli no strong. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta.’ (Ol Sam 72:​12-14) Taem Kingdom ya i rulum wol, bambae i no moa gat man i sot long kakae. (Ol Sam 72:16) Bambae Jeova i “ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:4) Kingdom i stanap finis long heven mo i no longtaem bambae hem i tekem aksin blong stretem evri trabol long wol.​—Daniel 2:44; Revelesen 11:15.

11, 12. (a) ?Man we i ronem samting blong harem gud long laef hem i save glad longtaem? ?Talem from wanem i olsem? (b) ?Wanem i givim trufala glad?

¹¹ Yumi save olsem wanem blong kasem trufala glad. ?Ale, wanem nao i givim trufala glad? Wan man we i stadi long fasin blong yumi ol man i talem se i gat tri samting we i givim glad long yumi, hemia (1) taem yumi harem gud long wan samting long laef, (2) taem yumi joen wetem ol narafala (olsem taem yumi tekpat long wan wok mo yumi joen wetem famle), mo (3) taem yumi harem se yumi gat wan risen blong laef (olsem taem yumi wok from wan samting we i mekem i gud long narafala). Long trifala samting ya, man ya i talem se faswan poen (ol samting blong laef we oli mekem man i harem gud) i no impoten olsem tufala narafala samting blong givim glad, hem i se: “Be narakaen samting hemia se plante man oli rili ting se glad i kamaot nomo taem oli harem gud long wan samting blong laef, ale, oli spenem taem blong olgeta blong ronem ol samting blong harem gud olsem ol pleplei mo gudtaem.” ?Wanem tingting blong Baebol long saed ya?

¹² King Solomon blong Isrel bifo i talem se: “Mi talem se bambae mi traem kasem hapi taem we mi save harem gud long hem, blong mi save faenemaot se hapi taem ya i olsem wanem, be mi faenemaot se hem tu i blong nating nomo. Mo mi faenemaot tu se fasin we man i stap laf tumas, hem tu i krangke, mo ol samting ya we i mekem man i glad oli no save givhan long hem nating.” (Prija 2:​1, 2) Yes, Baebol i klia se maet fasin blong harem gud long ol samting blong laef i mekem yumi glad, be glad ya i blong smoltaem nomo. ?Olsem wanem long namba tu  poen ya se glad i kamaot taem yumi tekpat long wan wok? Yumi stap tekpat finis long wan wok we i impoten bigwan, hemia wok blong talemaot Kingdom mo pulum man i kam disaepol. (Matiu 24:14; 28:​19, 20) Taem yumi serem tok blong laef we i stap long Baebol wetem ol man, yumi joen long wan wok we i save sevem laef blong yumi be i save sevem laef blong ol man ya tu we oli lesin long yumi. (1 Timoti 4:16) Taem yumi “joen wetem God blong mekem wok blong hem” yumi faenemaot we yumi ‘harem gud moa, i winim we yumi stap kasem presen.’ (1 Korin 3:9; Ol Wok 20:35) Wok ya i givim mining long laef blong yumi mo i sapotem toktok blong God blong soemaot se Devel Setan i giaman. (Ol Proveb 27:11) Yes, Jeova i soem long yumi se taem yumi traehad oltaem blong mekem ol fasin we hem i wantem, samting ya nao i givim trufala glad mo glad ya i stap longtaem.​—1 Timoti 4:8.

13. (a) ?From wanem Tiokratik Skul i wan blesing we yumi save glad long hem? (b) ?Tiokratik Skul i givhan long yu olsem wanem?

¹³ Wan trening we i impoten tumas mo we i save givhangud long yumi. Gerhard i wan elda long wan kongregesen blong ol Witnes blong Jeova. Hem i tingtingbak long taem we hem i yang, i se: “Taem mi mi yangfala, i had long mi blong toktok long ol man. Taem mi fraet no mi wari tumas, ol toktok blong mi oli fasfas mo i olsem se tang blong mi i sot. Samting ya i mekem mi mi harem se mi daon moa long ol narafala mo mi stap sem blong toktok long ol man. Papa mama blong mi, tufala i putum mi long wan spesel kos blong i traem trenem mi blong toktok gud be samting ya i no givhan. Problem blong mi i kamaot from tingting blong mi, i no from we tang blong mi i sot no from we mi sik. Be i gat wan nambawan samting i stap we Jeova i givim. Hemia Tiokratik Skul. Skul ya i halpem mi blong winim fraet mo gat strong tingting. Mi traehad blong folem ol advaes we mi lanem. !Mo samting ya i givhan bigwan! Ol toktok blong mi oli no moa fasfas, mi no moa sem, mo mi no moa fraet tumas long wok blong prij. Naoia mi naf blong mekem pablik tok. Mi tangkiu bigwan long Jeova we i mekem laef blong mi i kam moagud from skul ya.” Tru ya, fasin blong Jeova blong trenem yumi long wok blong hem i mekem yumi glad bigwan.

14, 15. ?Long taem blong trabol, wanem samting i save halpem yumi? Talem wan stori we i soemaot samting ya.

¹⁴ Yumi kam fren blong Jeova mo yumi joen long famle blong ol brata sista we i stap long evri ples long wol. Katrin i wan woman we i stap long Jemani. Hem i wari we i wari taem i harem nius se wan bigfala taedel wef i kilim saot is Esia. Gel blong hem i stap spel long Taelan taem trabol ya i kamaot. Katrin i stap wet 32 aoa we hem i no save nating sipos gel blong hem i laef no i ded. !Taem hem i harem nius se gel blong hem i laef, hem i harem gud bakegen!

¹⁵ ?Wanem i halpem Katrin long taem ya we hem i wari tumas long gel blong hem? Hem i raetem se: “Klosap long ful taem ya mi stap prea nomo long Jeova. Mi luksave se evri taem we mi mekem olsem, Jeova i givim paoa long mi mo i putum pis long tingting blong mi. Mo tu, ol Kristin brata mo sista oli kam luk mi mo oli stap wetem mi.” (Filipae 4:​6, 7) !Sipos hem i no bin save Jeova mo gudfala kampani blong ol Kristin brata sista ya, ating bambae i hadwok moa long hem blong bos long filing blong hem long olgeta aoa ya we hem i stap wet! Gudfala fasin fren we yumi gat wetem Jeova mo Pikinini blong hem, mo gudfala kampani blong ol Kristin brata sista i rili wan nambawan blesing. Blesing ya i sas tumas, yumi no save ting nating long hem.

16. Talem wan stori we i soem se laef bakegen long ded i wan hop we i sas tumas long yumi.

 ¹⁶ Yumi gat hop se wan dei bambae yumi save luk bakegen ol fren mo famle blong yumi we oli ded. (Jon 5:​28, 29) Wan yangfala we nem blong hem Matthias i gruap long wan famle we oli Witnes blong Jeova. Yangfala ya i no luksave se hemia wan blesing long hem, ale hem i lego Kristin kongregesen. Tede hem i raetem se: “Mi mi neva toktok gud wetem papa blong mi. Taem mi yangfala, oltaem nomo mi rao wetem hem. Be papa blong mi i wantem we mi gat wan gudfala laef. Hem i lavem mi bigwan, mo long taem ya we mi yangfala, mi no luksave samting ya. Long 1996, taem mi sidaon klosap long bed we papa i ledaon long hem, mi holem han blong hem mo mi krae we mi krae. Mi talem long hem se mi sore tumas from ol samting we mi bin mekem, mo mi talem se mi lavem hem tumas. Be Papa i no save harem ol tok ya blong mi. Hem i ded finis, sik i kilim hem. Sipos mi stap taem Papa i laef bakegen long ded, bambae mi gat janis blong toktokgud wetem hem, samting ya we mi no bin mekem bifo. Ating bambae Papa i glad tumas taem mi talem long hem se mi mi wan elda mo se mi wetem waef blong mi mitufala i wok olsem paenia.” !Tru ya, hop blong laef bakegen long ded i wan blesing long yumi!

“Hem i No Givim Soa Wetem”

17. ?From wanem fasin blong tingting dip long ol blesing blong Jeova, i save mekem i gud long yumi?

¹⁷ Jisas Kraes i tokbaot Papa blong hem long heven i se: “Hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Matiu 5:45) !Sipos Jeova i glad blong givim blesing long ol man nogud mo rabis man, i sua se bambae hem i glad moa blong blesem olgeta we oli mekem ol stret fasin! Ol Sam 84:11 i talem se: ‘Jeova i no save holemtaet ol gudgudfala samting blong hem, oltaem hem i stap givim long olgeta we oli stap mekem ol stret fasin.’ !Taem yumi tingting dip long fasin we Jeova i mekem blong kea gud long ol man blong hem mo blong tingbaot olgeta oltaem, yumi gat bigfala tangkiu mo yumi glad bigwan!

18. (a) ?Olsem wanem blesing blong Jeova i no givim soa? (b) ?From wanem plante gudfala man blong God oli safa?

¹⁸ “Blesing blong Jeova” nao i mekem se ol man blong hem oli gat fulap samting long saed blong spirit. Mo yumi sua se taem yumi kasem blesing ya “hem i no givim soa wetem.” (Ol Proveb 10:​22, NW ) ?From wanem ol traem mo trabol i kasem plante gudfala man blong God, nao i mekem oli harem nogud bigwan? Ol hadtaem mo trabol oli kasem yumi from tri risen. (1) Sin we yumi bon wetem. (Jenesis 6:5; 8:21; Jemes 1:​14, 15) (2) Setan mo ol rabis enjel blong hem. (Efesas 6:​11, 12) (3) Rabis wol ya. (Jon 15:19) I tru se Jeova i letem we nogud samting i kasem yumi, be i no hem we i stamba blong ol nogud samting ya. Tru ya, “evri samting we oli gud mo evri presen we oli nambawan we yumi kasem, oli kamaot long heven nomo. God i mekem olgeta laet blong skae, mo hem i stap givim ol gudgudfala samting ya long yumi.” (Jemes 1:17) Taem Jeova i blesem man, blesing ya i no givim soa.

19. ?Olgeta we oli gohed blong folem stret fasin bambae oli save kasem wanem?

¹⁹ Blong kasem plante gudfala samting long saed blong spirit, man i mas kam fren blong God. Taem yumi frengud wetem hem, yumi stap ‘putumgud plante gudgudfala samting blong yumi, we i olsem fandesen blong laef blong yumi, we i save stap strong oltaem. Nao bambae yumi save kasem laef ya we i prapa wan’​—hemia laef we i no save finis. (1 Timoti 6:​12, 17-19) Long niufala wol we God bambae i mekem, bambae yumi no kasem blesing nomo long saed blong spirit be bambae yumi kasem blesing tu long saed blong bodi. Laef ya we i prapa wan, wetem ol blesing blong God, hemia nao laef we olgeta man ya we oli stap ‘obei long Jeova’ bambae oli kasem. (Dutronome 28:2) I gud yumi mekem tingting blong yumi i strong bakegen, mo stap glad blong folem stret fasin.

[Ol Futnot]

?Yu Yu Lanem Wanem?

• ?From wanem i no waes blong letem tingting blong yumi i stap bisi oltaem long ol samting we bambae oli kamaot long fiuja?

• ?Wanem ol blesing we yumi stap harem gud long olgeta naoia?

• ?From wanem ol gudfala man blong God oli safa?

[Kwestin]