Tok Blong Jeova i Wan Samting We i Laef

Ol Bigfala Poen Long Buk Wan Blong Ol Sam

?WANEM nem we yu ting se i stret blong putum long wan buk blong Baebol we bighaf blong ol tok long hem i presem Jeova, God ya we i Wokem yumi? Nem we i stretgud, hemia Ol Sam, no Ol Tok blong Presem God. Buk blong Ol Sam i longfala moa i bitim ol narafala buk long Baebol. Hem i fulap long ol naesfala singsing we oli tokbaot ol nambawan fasin blong God, ol bigfala wok blong hem, mo plante profet tok. Plante long ol singsing ya oli soemaot filing blong ol man we oli wokem olgeta, taem oli kasem trabol mo traem long laef blong olgeta. Oli tekem wan taosen yia blong mekem ol singsing ya, i stat long taem blong profet Moses go kasem taem we oli kamfri long ol enemi blong olgeta we oli holem olgeta oli stap kalabus. Moses, King Deved, mo sam narafala man oli raetem Ol Sam ya. I luk olsem se pris ya Esra i putum ol haf blong buk ya long stret ples blong olgeta, olsem yumi ridim tede.

Stat long taem bifo olgeta, buk blong Ol Sam i gat faef haf blong hem, we oli fulap long ol defren singsing: (1) Ol Sam 1-41, (2) Ol Sam 42-72, (3) Ol Sam 73-89, (4) Ol Sam 90-106, mo (5) Ol Sam 107-150. Fastaem bambae yumi tokbaot Ol Sam 1-41. Deved we i king blong Isrel bifo, i wokem olgeta Sam ya, tri nomo hem i no wokem. Yumi no save nem blong ol man we oli wokem Ol Sam 1, 10, mo 33.

‘GOD I WAN STRONG SEFPLES BLONG MI’

(Ol Sam 1:1–24:10)

Faswan Sam i talem se man we i laekem loa blong Jeova, hem i save harem gud. Seken Sam i go stret long ol tok long saed blong Kingdom. * Bighaf blong Ol Sam 1-41 oli askem help blong God. Olsem nao, Ol Sam 3-5, 7, 12, 13, mo 17, oli askem God blong i sevem olgeta long ol enemi blong olgeta. Sam 8 i tokbaot bigfala paoa blong Jeova, mo paoa blong man we i olsem nating nomo.

Deved i singsing presem Jeova from we Hem i Protektem ol man blong Hem, i se: “[God blong mi] i wan strong sefples blong mi. Hem i . . . stap blokem mi.” (Ol Sam 18:2) Long Sam 19, hem i presem Jeova from we Hem i Wokem olgeta samting mo i putum ol Loa. Long Sam 20, hem i presem Jeova from we Hem i Sevem ol man. Long Sam 21, Deved i presem Jeova from we Hem i Sevem King we Hem i makemaot. Sam 23 i tokbaot Jeova olsem Bigfala Man blong lukaot long ol sipsip. Sam 24 i tokbaot hem olsem King we i gat bigfala paoa.

Ansa Blong Sam Kwestin Long Saed Blong Baebol:

2:​1, 2​—?Wanem ‘plan we i no save win’ we ol kantri oli stap mekem? ‘Plan we i no save win’ hemia traehad we ol gavman blong man oli stap mekem blong holemtaet paoa blong olgeta. I blong nating nomo we oli traehad from we plan ya i no save win. ?Weswe ol kantri oli save win taem oli wok ‘agens long Hae God, mo agens long king we hem i makemaot’?

2:​7 (NW)​—?Wanem ya “desisen we Hae God i talem”? Hemia kontrak blong Kingdom we Jeova i mekem wetem Jisas Kraes, Pikinini blong hem we hem i laekem tumas.​—Luk 22:​28, 29.

2:​12 (NW)​—?Olsem wanem ol rula blong ol kantri oli save “kisim pikinini ya”? Ol man long taem ya we oli raetem Baebol, oli kiskis blong soem se oli frengud tugeta mo se oli stap tru long olgeta. Oli kisim ol man we  oli kam long haos blong olgeta blong welkamem olgeta. Ol king blong wol ya oli mas kisim Pikinini blong God, hemia se oli mas welkamem hem olsem Mesaea we Jeova i putumap olsem King.

3:smol stamba tok long stat blong Sam ya​—?From wanem i gat wan smol stamba tok long stat blong samfala Sam? Sam stamba tok oli talem hu i wokem Sam ya, mo oli talem wanem samting i hapen blong pulum man ya blong wokem. Sam 3 i givim eksampol blong samting ya. Maet stamba tok i talem risen blong wan singsing mo wetaem ol man oli singim (Ol Sam 4 mo 5), mo maet i talem olsem wanem ol man oli mas singim (Sam 6).

3:​2 (NW)​—?Wanem ya “Selah”? I luk olsem se tok ya i blong makem ples we ol man blong singsing, no ol man blong plei miusik mo singsing, oli mas spel smol blong tingting dip. Spel ya i blong makemgud tingting no filing we singsing ya i givim. Taem yumi ridim Ol Sam long fored blong ol narafala man, yumi no nid blong ridim tok ya “Selah.”

11:​3 (NW)​—?Wanem fandesen we bambae i foldaon? Hemia fandesen blong fasin blong laef blong ol man tede, olsem loa, oda, mo stret fasin blong jajem man. Taem ol samting ya oli olbaot, ol man tu oli olbaot mo i no gat stret fasin blong jajem man. Long taem olsem, “gudfala man” i mas trastem God fulwan.​—Ol Sam 11:​4-7.

21:3​—?Wanem mining blong ‘hat blong king we oli wokem long gol’? Yumi no save sipos hemia i wan trufala hat blong king, no sipos i wan pijatok we i min se Deved i kasem moa ona from we hem i winim plante faet. Nating se i olsem wanem, vas ya i wan profet tok we i soemaot se Jeova i mekem Jisas i kam king long 1914. Oli wokem hat ya long gol, hemia i soem se rul blong Jisas i nambawan.

22:​1, 2​—?From wanem maet Deved i ting se Jeova i lego hem? Ol enemi blong Deved oli agensem hem tumas, mekem se ‘tingting blong hem i foldaon we i foldaon olgeta.’ (Ol Sam 22:14) Ating Deved i ting se Jeova i lego hem finis. Jisas tu i tingting olsemia taem oli nilim hem long pos. (Matiu 27:46) Ol tok ya blong Deved i soemaot tingting blong yumi ol man, taem yumi fesem wan bigfala traem we yumi harem se i no gat rod blong winim. Be taem yumi ridim prea blong Deved long Ol Sam 22:​16-21, yumi luksave se hem i no lusum bilif long God.

Ol Lesen Blong Yumi:

1:1. I nogud blong kampani wetem olgeta we oli no lavem Jeova.​—1 Korin 15:33.

1:2. I nogud blong letem wan dei i pas we yumi no tingbaot samting long saed blong spirit.​—Matiu 4:4.

4:4. Taem yumi kros no yumi wantem faerap, i waes blong no toktok nating. Olsem nao, yumi no save talem samting blong spolem narafala we biaen bambae yumi harem nogud from.​—Efesas 4:26.

4:​5 (NW). Ol wok long saed blong spirit we yumi mekem oli olsem sakrefaes long God, be blong mekem se oli “sakrefaes blong stret fasin,” stret tingting i mas pusum yumi blong mekem ol wok ya, mo ol fasin blong yumi oli mas laenap wetem ol rul blong Jeova.

6:5. Faswan risen from wanem yumi wantem stap laef, i blong presem Jeova.​—Ol Sam 115:17.

9:12. Jeova i panisim olgeta we oli mekem blad i ron, be hem i harem ‘krae blong olgeta we oli harem nogud.’

15:​2, 3; 24:​3-5. Ol man blong wosipim trufala God oli mas tok tru mo stret oltaem, oli no mas  mekem giaman promes mo giaman blong spolem narafala.

15:4. Sipos promes we yumi mekem i no agensem Baebol, yumi mas mekem evri samting we yumi naf blong mekem blong holem promes ya, nating se i had long yumi.

15:5. Yumi ol man blong Jeova, yumi no mas yusum mane long fasin we i no stret.

17:​14, 15 (NW). “Ol man blong wol ya” oli tingbaot blong winim plante mane, blong lukaot long famle blong olgeta, mo blong livim samting i stap taem oli ded, blong givim long ol pikinini blong olgeta. Bigfala samting we Deved i tingbaot, i blong gat gudnem wetem God. Long rod ya, i olsem we hem i save ‘luk God,’ i min se Jeova i save glad long hem. Taem Deved i “wekap” long ol promes blong Jeova mo ol tok blong Hem we i mekem tingting blong Deved i strong, hem i ‘glad tumas from we i stap wetem God,’ hemia i min se hem i harem se Jeova i stap klosap long hem. Yumi mas mekem olsem Deved mo putum tingting blong yumi i stap fastaem long ol nambawan samting long saed blong spirit.

19:​1-6. Ol samting raonabaot long yumi we Jeova i wokem, oli presem hem, nating se oli no save toktok mo tingting. Taswe, yumi, we yumi save tingting, toktok, mo mekem wosip, yumi mas presem hem moa.​—Revelesen 4:11.

19:​7-11. !Ol tok blong Jeova mo ol loa blong hem oli mekem i gud tumas long yumi!

19:​12, 13. Ol mastik blong yumi mo ol fasin nogud we yumi mekem from stronghed blong yumi, hemia ol sin we yumi mas blokem.

19:14. Yumi mas lukaotgud long ol fasin we yumi mekem, mo long ol toktok mo tingting blong yumi tu.

‘YU GIVHAN LONG MI, FROM WE MI TRAEHAD BLONG MEKEM I STRET’

(Ol Sam 25:1–41:13)

!Long Sam 25 mo 26, Deved i talem ol tok we i soemaot se hem i wantem tumas long hat mo tingting blong hem, blong mekem ol samting we i stret! Hem i singsing se: “Mi stap traehad blong mekem ol samting we i stret.” (Ol Sam 26:​11, NW) Long prea we Deved i mekem blong askem Jeova blong fogivim ol sin blong hem, hem i talem se: “Taem mi no talemaot ol sin blong mi long yu, mi mi slak we mi slak, from we evri dei nomo, mi stap krae kasem tudak.” (Ol Sam 32:3) Deved i mekem promes long ol man we oli stap tru long Jeova, i se: “Hae God i stap lukluk long ol stret man, i stap lesin blong harem krae blong olgeta.”​—Ol Sam 34:15.

!Advaes blong Sam 37 i givhan bigwan long ol man Isrel bifo, mo long yumi tu we yumi stap laef long “ol las dei” blong rabis fasin blong wol ya! (2 Timoti 3:​1-5, NW) Ol Sam 40:​7, 8 i talemaot wan profet tok long saed blong Jisas Kraes, se: “God blong mi. Mi ya, mi kam. Ol tok blong yu blong tijim mi oli stap long buk blong Loa blong yu. Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.” Long Sam 41, Deved i askem Jeova blong halpem hem long hadtaem we hem i kasem long ol yia biaen we hem i mekem sin wetem Batseba. Hem i singsing se: “Yu yu stap givhan long mi, from we mi stap traehad blong mekem ol samting we i stret.”​—Ol Sam 41:​12, NW.

Ansa Blong Sam Kwestin Long Saed Blong Baebol:

26:6​—?Olsem wanem yumi wokbaot raon long olta blong Jeova, olsem Deved i mekem? Olta ya i wan pijatok we i minim wil blong Jeova, we hem i rere blong akseptem sakrefaes blong Jisas Kraes olsem wan ransom blong pemaot ol man. (Hibrus 8:5; 10:​5-10) Yumi wokbaot raon long olta blong Jeova taem yumi bilif long sakrefaes ya.

29:​3-9​—?Wanem mining blong tok ya se voes blong Jeova i olsem tanda we i mekem man i fraet taem i faerap? Hemia i min se: !Jeova i gat bigfala paoa we i mekem man i fraet!

31:​23 (NW)​—?Olsem wanem man we i praod i kasem bigfala pei? Pei we vas ya i tokbaot i minim panis. Taem Jeova i stretem gudfala man, hemia pei blong ol mastik we hem i no minim blong mekem. Be man we i praod i no wantem jenisim nogud fasin blong hem, ale hem i kasem strong panis olsem bigfala pei blong hem.​—Ol Proveb 11:31; 1 Pita 4:18.

33:6; futnot blong NW​—?Wanem ya “spirit” no “win” we i kamaot long maot blong Jeova?  Spirit ya i minim tabu spirit blong God no paoa we hem i yusum blong wokem olgeta samting long skae. (Jenesis 1:​1, 2) Spirit ya i kamaot long maot blong hem from we hem i save sanem spirit ya i go longwe blong mekem wok we hem i wantem, olsem wan strong win we i kamaot long maot blong hem.

35:19​—?Wanem mining blong prea blong Deved se Jeova i no mas letem ol man we oli no laekem hem nating oli laf long hem? Tok ya i soemaot se ol enemi blong Deved oli haremgud from we ol rabis plan we oli mekem agens long hem oli stap win. Deved i askem se samting ya i no hapen.

Ol Lesen Blong Yumi:

26:4. Yumi waes taem yumi no joen wetem ol man we oli haedem se oli hu. Maet hemia sam strenja long Intenet, samfala long skul mo long ples blong wok we oli mekem olsem se oli fren blong yumi be oli wantem nomo blong pulum yumi blong mekem fasin nogud. Hem i minim tu ol man blong apostasi * we oli mekem olsem se oli wantem wosipim God long trufala fasin be oli stap giaman nomo, wetem olgeta we oli talem se oli Kristin be oli gat tu fes.

26:​7, 12; 35:18; 40:9. Yumi mas joen long ol miting blong presem Jeova wetem ol narafala Kristin.

26:8; 27:4. ?Yu yu laekem tumas ol Kristin miting?

26:11. Deved i talemaot strong tingting blong hem blong mekem samting we i stret, mo long semtaem hem i askem Jeova blong sevem hem. Yumi tu yumi save holemtaet fasin blong mekem ol samting we i stret, nating se yumi sinman.

29:10. Jeova i sidaon long ‘wota we i ron bigwan’ no olsem futnot blong New World Translation i talem se “solwota blong heven,” hemia i min se hem i kontrolem gud paoa blong hem.

30:5. Faswan bigfala fasin blong Jeova, hemia lav, i no kros.

32:9. Jeova i no wantem se yumi olsem wan hafkas dongki we i obei nomo taem man i putum rop long maot blong hem no i wipim hem. Defren olgeta, Jeova i wantem se yumi jusum blong obei long hem from save we yumi gat long saed blong wil blong hem.

33:​17-19. Enikaen samting we man i stanemap long wol ya, nating se i strong olsem wanem, be i no save sevem yumi. Yumi mas trastem Jeova mo Kingdom blong hem nomo.

34:10. !Vas ya i wan nambawan promes long olgeta we oli putum Kingdom i stap long fasples long laef blong olgeta!

39:​1, 2. Taem ol rabis man oli wantem faenemaot samting long saed blong ol Kristin brata blong yumi from we oli wantem nomo blong spolem olgeta, i waes blong “stap kwaet” mo no talem wan tok.

40:​1, 2. Sipos yumi wet long Jeova blong givhan long yumi, fasin ya i save halpem yumi blong winim tingting we i foldaon mo blong kamaot ‘long hol we i nogud we i nogud, i olsem swom we i fulap long sofmad.’

40:​5, 12. Nomata se plante bigfala trabol i kasem yumi mo yumi mekem plante mastik, be bambae oli no save daonem yumi sipos yumi tingbaot oltaem se ol blesing blong yumi oli ‘plante tumas, yumi no save tokbaot olgeta evriwan.’

‘Yumi Presem Jeova’

!Ol Sam 1 kasem 41 oli leftemap tingting blong yumi bigwan! Nating se yumi stap kasem traem no yumi stap harem nogud long wan bigfala sin we yumi bin mekem, Tok blong God i gat paoa, mo ol Sam ya oli save mekem yumi strong mo leftemap tingting blong yumi. (Hibrus 4:12) Oli givim plante gudfala save blong lidim yumi long laef blong yumi. Bakegen mo bakegen oli talem long yumi se nomata wanem trabol yumi fesem be Jeova i no save lego yumi.

Lastok blong Sam 41 i talem se: “Yumi presem Hae God we i God blong yumi ol laen blong Isrel. Oltaem, yumi mas presem hem gogo i no save finis. Amen. Amen.” (Ol Sam 41:13) ?Afta we yu stadi long ol Sam ya, yu yu harem se yu wantem presem Jeova mo givim ona long hem?

[Ol Futnot]

[Tok blong makem poen long pej 15]

Ol samting raonabaot long yumi we Jeova i wokem oli no save toktok mo tingting, be oli presem Jeova. !Yumi mas presem hem moa!

[Tok blong pija long pej 13]

Deved i wokem bighaf blong Ol Sam 1 kasem 41

[Tok blong pija long pej 14]

?Yu yu save weswan Sam i soemaot se Jeova i Bigfala Man blong lukaot long ol sipsip?

[Tok blong pija long pej 16]

I nogud blong letem wan dei i pas we yumi no tingbaot samting long saed blong spirit

[Foto Credit line blong pija long pej 13]

Stars: Courtesy United States Naval Observatory

[Foto Credit line blong pija long pej 15]

Stars, pages 18 and 19: Courtesy United States Naval Observatory

[Foto Credit line blong pija long pej 16]

Stars: Courtesy United States Naval Observatory