?Yu Yu Rere Blong God i Sevem Yu?

“Naoia, yu wetem woman blong yu mo olgeta pikinini blong yu, yufala i mas go insaed long sip ya, from we mi mi luk finis we long olgeta man long wol ya, yu nomo yu stret man.”​—JENESIS 7:1.

1. ?Wanem rod we Jeova i yusum blong sevem sam man long taem blong Noa?

 LONG taem blong Noa, Jeova ‘i letem wota i kam bigwan, i draonem ol man ya we oli no obei long hem.’ Be Hem i wokem rod tu blong sam man oli sef. (2 Pita 2:5) Trufala God i tok klia long stret man ya Noa. Ol tok ya i halpem Noa blong wokem wan bigfala sip we i save sevem laef blong man mo anamol tu, long taem we bigfala wota i kavremap wol. (Jenesis 6:​14-16) Yes, Noa i obei, hem “i mekem olgeta samting ya olsem we God i talem.” Hemia nao fasin blong man we i fasgud long Jeova. Wan risen from wanem yumi laef tede hemia from we Noa i obei.​—Jenesis 6:22.

2, 3. (a) ?Ol man we oli laef long taem blong Noa oli tingting wanem taem oli luk wok we Noa mo famle blong hem i mekem? (b) ?Wanem tingting blong Noa taem hem i go insaed long bigfala sip ya we hem i wokem?

² I no wan isi wok blong bildim bigfala sip ya. Ating plante man we oli wajem wok we Noa mo famle blong hem oli mekem, oli sapraes bigwan. Be nating se ol man ya oli sapraes, samting ya i no pulum olgeta blong bilif se sipos oli wantem sef oli mas go insaed long sip ya. God i letem taem, blong ol rabis man oli luksave samting ya, gogo longfala tingting blong hem i finis.​—Jenesis 6:3; 1 Pita 3:20.

³ Noa mo famle blong hem oli wokhad blong plante yia, nao Jeova i talem long Noa se: “Naoia, yu wetem woman blong yu mo olgeta pikinini blong yu, yufala i mas go insaed long sip ya, from we mi mi luk finis we long olgeta man long wol ya, yu nomo yu stret man.” Noa i bilif mo i trastem ol tok blong Jeova, nao “hem wetem woman blong hem, mo trifala pikinini blong hem, mo trifala woman blong trifala, oli go insaed long bigfala sip ya.” Jeova i satem doa blong sip ya blong protektem ol man ya we oli wosipim hem. Taem bigfala wota i kavremap wol, bigfala sip ya hem i rod ya nomo we God i yusum blong sevem ol man.​—Jenesis 7:​1, 7, 10, 16.

Ol Samting Tede Oli Sem Mak Long Taem Blong Noa

4, 5. (a) ?Jisas i talem se taem hem i King bambae laef long wol ya i sem mak long wanem taem? (b) ?Wanem samting long taem blong Noa we i sem mak tede?

⁴ “Long taem ya we mi, mi Pikinini blong Man mi kamtru, bambae i olsem taem blong Noa bifo.” (Matiu 24:37) Long ol tok ya, Jisas i soemaot se taem hem i stap olsem King long heven, laef long wol ya bambae i sem mak long taem blong Noa. Ol tok ya blong Jisas oli tru nomo. Stat long 1919, wan woning i stap goaot moa long olgeta man long evri ples long wol, olsem woning we Noa i bin talemaot bifo. Mo bighaf blong ol man tede we oli harem woning ya, oli mekem sem mak nomo olsem ol man long taem blong Noa.

⁵ Jeova i yusum Bigfala Wota blong finisim ol man ya bifo we “oli stap faet mo oli stap kilim man i ded.” (Jenesis 6:13) Olgeta man oli luksave klia nomo se Noa mo famle blong hem oli no gat fasin we i raf be oli stap kwaet, oli man blong pis we oli gohed nomo long wok blong bildim bigfala sip ya. Samting ya i sem mak tede. Ol gudfala man oli luksave klia nomo “wanem nao i stap mekem stret man i defren long rabis man, mo wanem nao i stap mekem man blong wok blong God i defren long man we i no wok blong God.” (Malakae 3:​18, NW ) Ol Witnes blong Jeova oli tok tru, oli kaen, oli man blong pis, mo oli man blong wok had. Plante man we oli gat stret tingting, oli luksave samting ya mo oli tinghae long ol Witnes from. Ol fasin ya oli mekem we ol man blong God oli defren olgeta long wol ya. Ol Witnes oli sakemaot  olkaen raf fasin mo oli letem spirit blong Jeova i lidim olgeta. Mo from samting ya oli kasem blesing blong pis mo oli lukaot rod oltaem blong mekem stret fasin.​—Aesea 60:17.

6, 7. (a) ?Ol man long taem blong Noa oli no luksave wanem, mo olsem wanem ol man tede oli sem mak? (b) ?Wanem stori i soem se plante man oli luk ol Witnes olsem man we i defren?

⁶ Ol man long taem blong Noa oli no luksave se God i stap lidim Noa mo se God nao i talem long Noa blong mekem ol wok ya we hem i stap mekem. Taswe oli ting nating nomo long woning we Noa i stap talemaot mo oli no mekem wan samting folem woning ya. ?Olsem wanem tede? Plante man oli tinghae long wok mo fasin blong ol Witnes blong Jeova. Be oli no ting hevi long gud nius mo woning blong Baebol. Plante man we oli laef klosap long yumi, we oli wok wetem yumi, no maet ol famle blong yumi, oli toktok gud long saed blong gudfala Kristin fasin blong yumi. !Be wan samting nomo i stap we oli no laekem, hemia se yumi Witnes blong Jeova! Be ol man ya oli fogetem wan samting se, ol gudfala fasin we ol Witnes oli soemaot olsem lav, pis, kaen fasin, gud fasin, kwaet fasin, mo fasin blong bos long tingting, oli kamaot from we tabu spirit blong God nao i stap lidim olgeta. (Galesia 5:​22-25) Hemia i sud givim moa paoa long tok we yumi talemaot long ol man.

⁷ Long Rasia, ol Witnes blong Jeova oli stap wokem wan niufala Haos Kingdom. Wan man we i pas long rod i toktok wetem wan brata we i stap wok, i se: “Yufala we i wok long ples ya, fasin blong yufala i defren. !I no gat man i smok, i no gat man i tok swea, mo i no gat man i drong! ?Yufala ol Witnes blong Jeova?” Brata ya we i wok long Haos Kingdom ya i talem se, “Sipos mi talem long yu se ‘No, mifala i no Witnes,’ mbae yu bilivim mi?” Wantaem nomo man ya i ansa se, “Mbae mi no save bilivim yu” Long wan narafala ples long Rasia, mea i sapraes bigwan taem hem i luk ol Witnes oli stap bildim wan niufala Haos Kingdom blong olgeta. Hem i talem se, bifo, hem i ting se olgeta skul oli sem mak nomo. Be afta we hem i luk fasin blong ol Witnes blong Jeova we oli no tingbaot olgeta nomo, tingting blong hem i jenis. Ol stori ya oli soemaot se ol man blong Jeova oli defren long ol man we oli no folem wanem we Baebol i talem.

8. ?Yumi mas mekem wanem sipos yumi wantem we God i sevem yumi?

⁸ Jes bifo we “ol man ya bifo” oli lus long Bigfala Wota, Noa i strong blong mekem wok blong God blong “talemaot stret fasin.” (2 Pita 2:5) Naoia yumi stap long ol las dei, i no longtaem bambae God i mas spolem ol rabis man. Ol man blong Jeova oli stap talemaot ol stretfala rul blong Hem mo oli stap talemaot gud nius ya se God i save sevem ol man. Ol man ya we hem i sevem olgeta bambae oli laef long wan niufala wol. (2 Pita 3:​9-13) God i sevem Noa mo famle blong hem long bigfala sip ya. Long sem fasin, God bambae i save sevem ol man tede we oli bilif, mo we oli joen mo oli stap tru long ogenaesesen blong Jeova long wol.

 Yumi Nidim Bilif Sipos Yumi Wantem Sef

9, 10. ?From wanem bilif i impoten sipos yumi wantem se God i sevem yumi taem hem i spolem rabis wol ya blong Setan?

⁹ ?Man i mas mekem wanem sipos hem i wantem we God i sevem hem taem i spolem rabis wol ya we i stap long paoa blong Setan? (1 Jon 5:19) Fastaem, man ya i mas agri se hem i nidim wan samting blong protektem hem. Nao hem i mas yusum samting ya we bambae i protektem hem. Ol man long taem blong Noa oli bisi long laef blong olgeta evri dei mo oli no ting se oli nidim wan samting blong protektem olgeta long trabol we i stap kam. Oli mestem wan moa samting tu. Oli no bilif long God.

¹⁰ Defren olgeta, Noa mo famle blong hem oli luksave se oli nidim wan samting we bambae i protektem olgeta mo sevem olgeta. Mo tu, oli bilif long Haefala Masta blong Heven mo Wol, hemia Jeova God. Aposol Pol i raetem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” Nao Pol i gohed i se: “From we Noa i stap bilif strong long God, taswe hem i obei long tok blong God long taem ya we God i talemaot ol samting ya long hem fastaem, we i no gat man i luk yet. Taswe hem i obei long God, nao i wokem wan bigfala sip blong sevem olgeta famle blong hem. Long fasin ya, i olsem we Noa i jajem ol man, mo from fasin ya, hem i kasem stret laef ya we God i stap givim long olgeta we oli stap bilif long hem.”​—Hibrus 11:​6, 7.

11. ?Yumi save lanem wanem long fasin we Jeova i yusum blong protektem ol man blong hem bifo?

¹¹ Be i no naf blong bilif nomo se bambae God i spolem rabis wol ya. Sipos yumi wantem we God i sevem yumi, yumi mas mekem bilif ya i wok. Yumi mekem olsem taem yumi yusum evri rod we God i putum i stap blong sevem yumi. Tru ya, hemia i minim tu se yumi mas soemaot bilif long ransom sakrefaes blong Jisas Kraes, Pikinini blong God. (Jon 3:​16, 36) Be i gud blong tingbaot wan samting. Olgeta we oli sef taem Bigfala Wota i kavremap wol, hemia olgeta man we oli stap insaed long bigfala sip ya we Noa i wokem. Sem mak tu long taem blong Isrel bifo. Taem wan man i kilim narafala man i ded be i no minim, hem i save ronwe i go long ol taon blong haed. Hem i save sef nomo sipos hem i stap long taon ya go kasem taem we hae pris i ded. (Namba 35:​11-32) Long taem blong Moses, namba ten trabol we i kasem Ijip i kilim olgeta fasbon pikinini blong Ijip oli ded, be ol fasbon pikinini blong Isrel oli no ded. ?From wanem? Jeova i givim oda ya long Moses se: “Nao long evri haos [blong ol man Isrel], hed blong haos i mas tekem sam blad blong anamol ya [sipsip we oli kakae long Pasova], i mas ravem long tufala pos blong doa mo long kros blong doa blong haos ya we bambae oli kakae mit ya long hem. . . . Nao bambae oli mas stap nomo insaed long ol haos ya, we bambae i no gat wan long  olgeta i save kamaot bakegen, go kasem long moning.” (Eksodas 12:​7, 22) Ating ol fasbon pikinini blong ol man Isrel oli fraetgud blong brekem oda ya blong God. I sua se i no gat wan long olgeta we i wokbaot i go afsaed long haos blong olgeta we oli makem finis long blad blong sipsip ya.

12. ?Wanem kwestin we yumi wanwan i mas tingtinggud long hem, mo from wanem?

¹² Ol samting ya oli pulum yumi blong tingting gud long wanem we yumi wanwan i stap mekem. ?Yumi stap insaed long samting we Jeova i stap yusum tede blong protektem yumi long saed blong spirit? Taem bigfala trabol i stat, olgeta man we oli bin go stap long sefples ya bambae oli krae from we oli glad we oli glad mo bambae oli tangkiu bigwan from desisen ya we oli bin mekem. Be ol narafala man bambae oli krae bigwan mo bambae oli sore from we oli no jusum rod we i stret.

Ol Jenis We Ogenaesesen i Mekem Oli Rerem Yumi

13. (a) ?Ol jenis insaed long ogenaesesen oli blong mekem wanem? (b) Tokbaot sam long ol jenis ya.

¹³ Oltaem nomo Jeova i bin stretem mo jenisim sam samting long ogenaesesen blong hem long wol blong mekem wok blong hem i kam moagud. Ol jenis ya oli mekem we ol rod we hem i yusum blong protektem yumi long saed blong spirit oli kam moagud, oli moa stret, mo oli stanap strong. Stat long ol yia 1870 i go kasem 1932, ol memba blong kongregesen oli stap vot blong putumap ol elda mo dikon. Long 1932, kongregesen i vot blong putumap wan grup blong elda, we oli kolem sevis komiti. Sevis komiti ya i wok wetem wan sevis daerekta, hemia wan elda we Sosaeti nao i jusumaot. Long 1938, ogenaesesen blong Jeova i jenisim rod ya, nao oli jusum man blong i kam elda folem ol rul we oli stap insaed long Baebol, hemia nao rod we i tiokratik. Ale, stat long 1972, Hed Kampani i lidim wok ya blong lukluk long ol brata mo skelem sipos oli naf folem ol rul blong Baebol blong oli kam elda no man blong givhan, nao oli sanem leta i go long ol kongregesen blong talemaot ol brata we oli putumap olsem elda no man blong givhan. Taem ol yia oli pas, wok blong Hed Kampani i kam bigwan tumas, nao oli mekem sam jenis bakegen blong mekem wok ya i isi moa.

14. ?Wanem trening we ogenaesesen blong Jeova i stanemap long 1959?

¹⁴ Long ol yia 1950, ol tok blong Ol Sam 45:16 (NW ) i pulum ogenaesesen blong stanemap wan program blong trenem ol man. Vas ya i talem se: ‘Ol pikinini blong yu, bambae olgeta tu oli king olsem ol bubu blong yu, mo bambae oli rul olsem ol prins long olgeta ples long wol.’ Ol elda we oli stap lidim kongregesen naoia oli stap kasem trening. Trening ya i halpem olgeta blong mekem gud ol tiokratik wok blong olgeta naoia mo afta Amagedon. (Revelesen 16:​14, 16) Long 1959 oli statem Kingdom Ministri Skul. Long taem ya, skul ya i givim trening wan manis long ol elda we oli wok olsem presiden elda long kongregesen. Tede, skul ya i trenem olgeta elda mo ol man blong givhan tu. Biaen, ol brata we oli kasem trening ya oli save trenem wanwan Witnes blong Jeova long kongregesen blong olgeta. Long rod ya evri memba blong Kristin kongregesen i kasem help long saed blong spirit, mo oli kamgud moa long wok blong talemaot gud nius blong Kingdom.​—Mak 13:10.

15. ?Wanem tufala rod we i halpem kongregesen blong stap klin?

¹⁵ Ol man we oli wantem joen long Kristin kongregesen oli mas kasem sam mak. Olgeta we oli jikim tok blong God oli no save kam insaed, sem mak olsem we God i no letem ol man blong jik long taem blong Noa oli go insaed long bigfala sip. (2 Pita 3:​3-7) Stat long 1952, ol Witnes blong Jeova oli traehad moa blong folem advaes we Baebol  i givim blong mekem se kongregesen i stap klin. Advaes ya hemia blong putumaot ol man we oli mekem sin mo oli no wantem tanem tingting blong olgeta. Be sipos man we i mekem sin i rili tanem tingting blong hem, kongregesen bambae i halpem hem blong “wokbaot long gudfala rod” bakegen.​—Hibrus 12:​12, 13; Ol Proveb 28:13; Galesia 6:1.

16. ?Ol man blong Jeova oli olsem wanem long saed blong spirit?

¹⁶ Ol man blong Jeova oli rij long saed blong spirit. Yumi save se i mas olsem from we profet Aesea i talemaot tok ya blong Jeova i se: “Bambae yufala i stap hanggri tumas, mo yufala i stap tosta, mo nem blong yufala bambae i kam nogud, nao bambae yufala i sem bigwan. Be ol man blong wok blong mi we oli stap mekem wosip long mi, mo oli stap obei long mi, bambae oli save kakae gud, oli save dring gud, mo bambae oli harem gud, oli glad. Bambae olgeta oli hapi, we oli stap singsing from, be yufala, bambae tingting blong yufala i foldaon olgeta, we yufala i stap krae from.” (Aesea 65:​13, 14) Jeova i gohed blong givim plante plante kakae long saed blong spirit we oli kam long stret taem mo we oli laenapgud long nid blong ol man blong hem. Ol kakae olsemia oli halpem yumi blong stap strong long saed blong spirit.​—Matiu 24:45.

Rere Blong Kasem Laef

17. ?Wanem bambae i givhan blong rerem yumi blong kasem laef?

¹⁷ Naoia i impoten moa i bitim olgeta taem bifo, blong yumi “tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi.” (Hibrus 10:​23-25) I gat bitim 98,000 kongregesen blong ol Witnes blong Jeova raon long wol, ale yumi mas joen oltaem mo stap bisi long wok blong kongregesen long ples blong yumi. Samting ya bambae i givhan blong rerem yumi blong kasem laef. Ol Kristin brata sista blong yumi bambae oli halpem yumi blong yumi naf blong folem ol fasin blong “niufala man” mo blong wok wetem fulhat blong yumi blong givhan long ol narafala man, blong olgeta tu oli save kam long rod ya we Jeova i yusum blong sevem olgeta.​—Efesas 4:​22-24; Kolosi 3:​9, 10; 1 Timoti 4:16.

18. ?From wanem yu yu strong blong gohed blong joen oltaem long Kristin kongregesen?

¹⁸ Setan mo rabis wol blong hem, oli wantem tumas blong pulum yumi i gowe long Kristin kongregesen. Be i gud yumi stap insaed long kongregesen mo bambae God i save sevem yumi taem hem i spolem rabis wol ya. Sipos yumi lavem Jeova mo yumi gat tangkiu long hem from olgeta samting we hem i stap givim blong halpem yumi, ale bambae tingting blong yumi i strong moa oltaem blong agensem ol trik blong Setan. Sipos yumi tingting dip long ol blesing we yumi kasem naoia, bambae yumi wantem moa blong holem desisen blong yumi. Long nekis stadi bambae yumi tokbaot sam long ol blesing ya.

?Wanem Ansa Blong Yu?

• ?Olsem wanem taem blong yumi i sem mak long taem blong Noa?

• ?Wanem wan impoten fasin we man i nidim sipos hem i wantem we God i sevem hem?

• ?Wanem ol jenis we oli mekem se plan blong Jeova blong protektem yumi i kam stanap stronggud moa?

• ?Olsem wanem yumi wanwan i save stap rere blong God i sevem yumi?

[Kwestin]

[Tok blong pija long pej 4]

Ol man long taem blong Noa oli no tinghevi long samting we Noa i stap mekem

[Tok blong pija long pej 5]

Yumi save kasem blesing sipos yumi tinghevi long ol woning we i kamaot long God

[Tok blong pija long pej 6]

?Kingdom Ministri Skul i blong givhan long saed blong wanem?

[Tok blong pija long pej 7]

Naoia i taem blong stap wetem Kristin kongregesen