Bilif Blong Hem i Leftemap Tingting Blong Ol Narafala

TAEM Silvia i bon long Disemba 1992, hem i wan smol gel we bodi blong hem i gud nomo. Be, taem Silvia i gat tu yia, hem i kasem sik ya cystic fibrosis, wan sik we i no gat meresin blong hem mo i mekem man i hadwok blong pulum win mo bel i no tantanem gud kakae. Evri dei hem i mas tekem 36 tablet, i mas yusum pam blong pulum win, mo i mas mekem sam eksasaes. Waetleva blong hem i save holem 25 pesen nomo blong win we hem i nidim. Taswe, taem hem i go wokbaot, hem i mas karem wan smol botel oksijen blong hem i save pulum win.

Teresa we i mama blong Silvia, i talem se: “Mi sapraes blong luk olsem wanem Silvia i winim ol problem blong sik blong hem. Ol save we hem i gat long Baebol i mekem se hem i gat strong bilif. Bilif ya i givhan long hem blong i no sore tumas mo i no harem i soa tumas. Hem i tingbaot oltaem niufala wol we Jeova i promes long hem se, olgeta we oli sik bambae oli kam gud.” (Revelesen 21:4) Sam samtaem famle blong hem i harem nogud, be fasin blong Silvia blong smael oltaem i leftemap tingting blong olgeta. Hem i talem long papa mama mo brata blong hem se: “Taem yumi laef long niufala wol, bambae yumi no moa tingbaot ol sik ya we oli mekem yumi safa, bambae oli nating nomo.”

Oltaem Silvia i talemaot gud nius blong Baebol long ol narafala man, mo ol man we hem i stap toktok wetem olgeta oli luksave long fes blong hem se hem i glad mo i haremgud. Ol memba blong Kristin kongregesen we hem i joen long hem long Aelan blong Kanari, oli glad tumas blong lesin long ol ansa blong hem mo blong luk we hem joen long ol miting. Taem miting i finis, Silvia i laekem blong stap smoltaem long Haos Kingdom blong storian wetem ol Kristin brata mo sista blong hem. Fasin blong hem blong stap glad oltaem, i mekem se evriwan long kongregesen oli laekem hem.

Papa blong hem, Antonio, i talem se: “Silvia i tijim wan impoten lesen long mifala se, nating we mifala i gat ol problem, be laef i wan presen we God i givim, mo yumi mas talem tangkiu from.” Olsem Silvia, olgeta man blong God​—ol yangfala mo ol olfala—​oli wet long taem ya we “bambae i no gat wan man ples we i save talem se: ‘Mi mi sik.’ ”​—Aesea 33:​24, NW.

[Tok blong pija long pej 31]

Silvia i ridim wan vas long Baebol taem mama blong hem i holem smol botel oksijen blong hem