“Mi Neva Tingbaot Se Wan Samting Olsem Bambae i Hapen”

WAN tija blong hae skul long Spen i raetem se: “Blong bitim wan handred yia, ol Witnes blong Jeova oli soemaot fasin blong wokgud tugeta, oli no stil mo giaman, mo antap long olgeta samting ya, oli stanap strong long bilif blong olgeta.” ?Wanem i pusum tija ya blong talem ol tok ya, nating se hem i no bilif se i gat wan God i stap?

Hemia from wan ripot we Noemí we i wan Witnes blong Jeova mo i wan studen blong haeskul ya, i raetem long eksam blong en blong yia. Hem i jusum blong raetem wan ripot we nem blong hem “Ol Pepol Traeangel Aninit Long Rul Blong Ol Nasi.”

?From wanem hem i jusum stamba tok ya? Noemí i eksplenem se: “From we mi save se wan tija bambae i ridim wok blong mi, mi tingbaot se mi save tekem janis ya blong givim witnes long hem. Stori blong ol Witnes blong Jeova long taem blong ol Nasi long Jemani we i soemaot olsem wanem olgeta ya oli holemstrong long God, i tajem hat blong mi. From samting ya, mi sua se bambae stori ya i pulum intres blong ol narafala tu.”

Ripot blong Noemí i gat paoa i no long tija we i jekem wok blong hem nomo be long plante moa man. Noemí i no tingbaot nating se bambae i olsem. Long Oktoba 5, 2002, Noemí i winim wan praes long wan kompetisin we ol yangfala blong ol defren ples long Spen oli joen long hem. Ol 20 man we oli ridim ol ripot ya mo jusum hemia we oli gud blong kasem ol praes, oli ol haeman blong wan bigfala yunivesiti long Spen.

Pilar del Castillo we i minista blong edukesen long Spen i givim praes ya long Noemí. Noemí i tekem janis blong givim wan vidio kaset long minista ya, hemia, Jehovah’s Witnesses Stand Firm Against Nazi Assault. Minista i glad blong karem vidio kaset ya.

Ol niuspepa long taon we Noemí i stap long hem, hemia Manresa, oli tokbaot ol nambawan wok we Noemí i bin mekem long skul mo oli raetemdaon sam haf blong ripot ya tu. Smoltaem biaen, hedmasta blong skul we Noemí i stap long hem i askem wan kopi blong ripot ya blong i save putum long wan program we skul i mekem blong selebretem 75 yia aniveseri blong skul.

Noemí i talem se: “Mi neva tingbaot se wan samting olsem bambae i hapen long skul blong mi. Mi glad tumas taem mi ridim tok ya we tija blong mi, Jorge Tomás Calot, i raetem long saed blong ripot blong mi:

“ ‘Mi mi no bilif se i gat wan God i stap, be mi luksave se i gat wan man we i Hae Olgeta, we i stap pulum ol man blong hem blong soemaot “lav long ol man raonabaot long olgeta.” ’ ”