Ol Yangfala​—Jusum Blong Mekem Wok Blong Jeova

“Yufala i mas jusumaot wanem god we yufala i wantem.”​—JOSUA 24:15.

1, 2. ?Wanem kaen baptaes we Krisendom i mekem we i no stret nating?

 “LETEM [pikinini] i kam bigman naf blong i save Kraes, nao hem wan i save jusum sipos hem i wantem kam wan Kristin no nogat.” Hemia nao ol tok we man ya Tertullian i raetem klosap long yia 200 K.T. Hem i tok agensem fasin blong baptaesem ol bebi. Fasin ya i stap kam wan bigfala kastom insaed long giaman Kristin skul long taem blong hem. Wan bigman blong Jos we nem blong hem Augustine i no agri long ol tok ya blong Tertullian mo long wanem we Baebol tu i tijim. Augustine i talem se baptaes i karemaot doti blong sin mo sipos wan bebi i ded we i no baptaes yet, bambae hem i go long helfaea. Bilif blong Augustine ya nao i mekem we plante man oli hareap nomo blong baptaesem ol bebi blong olgeta.

² Plante mama jos long Krisendom * oli gohed yet blong baptaesem bebi. Mo long ol handred yia we oli pas, ol lida blong gavman mo ol lida blong jos long ol kantri we oli talem se oli Kristin, oli fosem plante “hiten” man blong baptaes taem oli winim kantri blong ol man ya. Be Baebol i no agri nating long fasin ya blong baptaesem ol bebi mo blong fosem ol man blong tekem baptaes.

I No Gat Man Tede We Laef Blong Hem i Blong God Taem Hem i Bon

3, 4. ?Wanem i save halpem pikinini blong wan Witnes blong Jeova blong jusum hem wan blong givim laef i go long Jeova?

³ Baebol i soem se ol pikinini oli tabu long ae blong God nating se papa hem wan no maet mama hem wan nomo i wan Kristin witnes blong Jeova. (1 Korin 7:14) ?Hemia i min se laef blong ol pikinini ya i blong Jeova finis blong oli mekem wok blong hem? Nogat. Taem ol pikinini oli gruap wetem tijing blong papa mama we i wosip long Jeova, ol pikinini ya oli kasem trening we i save pulum olgeta blong wantem givim laef blong olgeta i go long Jeova. Waes King Solomon i raetem se: “Pikinini blong mi. Yu mas mekem olsem we mi wetem  mama blong yu i stap talem long yu, mo yu no mas fogetem ol samting ya we mitufala i stap tijim yu long hem. . . . Taem yu stap wokbaot, bambae hem i stap lidim yu. Long dei, bambae hem i stap soemaot rod long yu, mo long naet, bambae i stap lukaot gud long yu. Hem i olsem laet we i stap saen, mo i save tijim yu long stret fasin, blong yu folem oltaem long laef blong yu.”​—Ol Proveb 6:​20-23.

⁴ Ol advaes we Kristin papa mama i givim long pikinini blong olgeta i save protektem gud olgeta sipos ol pikinini ya oli glad blong folem ol advaes ya. Solomon i talem se: “Pikinini we i waes, hem i stap mekem papa mo mama blong hem, tufala i glad long hem, be pikinini we i no gat hed, hem i stap mekem tufala i harem nogud nomo.” “!Pikinini blong mi, yu lesin gud! Yu yu mas waes, mo yu mas tingting gud long rod blong laef blong yu.” (Ol Proveb 10:1; 23:19) Yes yangfala, sipos yu wantem we trening blong papa mama i mekem i gud long yu, yu mas obei wetem gladhat taem oli givim advaes, woning, mo tok blong stretem yu. Taem yu bon, yu no gat waes. Be yu save kasem “waes” mo yu save mekem prapa desisen blong yu blong “folem [ol tijing ya] oltaem long laef blong yu.”

?I Minim Wanem Se Trenem Tingting Olsem We Jeova i Wantem?

5. ?Wanem advaes we Pol i givim long ol pikinini mo ol papa?

⁵ Aposol Pol i raetem se: “Ol pikinini, yufala i joen long Masta ya, taswe yufala i mas obei long papa mama blong yufala, from we hemia i stret fasin. From we i gat faswan loa we i olsem: ‘Yu mas ona long papa mo mama blong yu.’ Mo i gat wan promes we i joen long hem, se: ‘Blong bambae yu save stap gud, mo yu save stap longtaem long wol ya.’ Mo yufala ol papa, yufala i no mas mekem ol pikinini blong yufala oli harem nogud gogo oli kam kros. Be yufala i mas gohed blong stretem olgeta, mo blong trenem tingting blong olgeta olsem we Jeova i wantem.”​—Efesas 6:​1-4, NW.

6, 7. ?Papa mama i mas mekem wanem blong ‘trenem tingting blong pikinini blong olgeta long ol fasin we Jeova i wantem’? ?Mo from wanem hemia i no min se papa mama i stap fosem ol pikinini blong olgeta?

⁶ ?Taem ol papa mama oli ‘stretem pikinini blong olgeta mo trenem tingting blong olgeta olsem we Jeova i wantem,’ hemia i min se oli stap fosem pikinini blong wosipim Jeova? No i no minim olsem. ?Yu yu ting se i stret blong talem se papa mama i rabis from we tufala i tijim pikinini blong tufala blong gat ol fasin we i stret mo fasin blong laef we i klin? Ol papa mama we oli no bilif long God, olgeta tu oli tijim pikinini blong olgeta se i no gat God i stap. Be i no gat man i talem se ol papa mama ya oli rabis. ?Olsem wanem long ol papa mama we oli joen long Katolik Jos, nao oli wokhad blong trenem pikinini blong olgeta long ol bilif mo fasin blong jos blong olgeta? I no gat man i talem se olgeta ya oli rabis. ?Ale, olsem wanem taem ol Witnes blong Jeova oli trenem pikinini blong olgeta long ol trutok mo rul we i laenap wetem tingting blong Jeova? Ol man oli tok agensem ol Witnes ya se oli stap fosem tingting blong ol pikinini blong olgeta blong bilif long Jeova. Hemia i no stret nating.

⁷ Wan diksonari (Theological Dictionary of the New Testament) i talem se Grik tok ya we long Efesas 6:4 i se “trenem tingting blong olgeta” i minim wan wok blong “stretem tingting, blong pulum man we i gorong i kambak long stret rod, blong mekem oli tingbaot God moa.” ?Olsem wanem sipos wan yangfala i no wantem obei long papa mama blong hem, from we hem i wantem folem ol fren blong hem, no i wantem folem fasin we hem i luk long ol man raonabaot long hem? ?Long taem olsem, hu i stap fosem yangfala ya? ?Papa mama, no ol fren blong yangfala ya? ?Olsem wanem sipos ol fren blong yangfala ya oli stap pulum hem blong tekem drag, blong drong, no blong mekem nogud fasin long saed blong seks, nao papa mama i traehad blong stretem tingting blong yangfala ya mo halpem hem blong tingbaot nogud frut we i save kamaot from ol rabis fasin ya? ?Bambae yu yu talem se papa mama ya i stap spolem yangfala blong tufala? Nogat.

8. ?Mama mo bubu blong Timoti, tufala i mekem wanem blong pulum Timoti blong bilif?

⁸ Aposol Pol i raet long yangfala man ya Timoti, i se: “Yu yu mas holemstrong ol samting ya we mifala i tijim yu long hem bifo, mo we yu bilif gud long hem finis, from we yu savegud ol man we oli tijim yu. Mo yu save tu we taem yu pikinini yet, kam kasem naoia, be yu yu savegud ol tok blong Baebol. Tok ya i save mekem yu yu waes, mo i save lidim yu blong yu save stanap strong long bilif blong yu long Jisas Kraes, blong God i save sevem yu.”  (2 Timoti 3:​14, 15) Taem Timoti i pikinini yet, mama blong hem mo bubu blong hem, tufala i tijim hem long ol tok blong Baebol, samting ya i rerem hem blong gat strong bilif long God. (Ol Wok 16:1; 2 Timoti 1:5) Biaen, taem tufala i kam Kristin, tufala i no fosem Timoti blong bilif, be tufala i pulum hem wetem ol klia tijing we oli stanap long save blong Baebol.

Jeova i Singaot Yu Blong Jus

9. (a) ?Jeova i wokem ol man se oli naf blong mekem wanem, mo from wanem hem i mekem olsem? (b) ?Olsem wanem stret Pikinini ya blong God i yusum fasin fri we Papa blong hem i givim long hem?

⁹ Sipos Jeova i wantem, hem i save wokem ol man blong oli obei long hem nomo mo we oli no naf blong jusum narafala samting blong mekem, olsem ol mesin we oli stap mekem sem samting nomo oltaem. Be hem i no mekem olsem. Hem i wokem man wetem tingting we hem i naf blong jusum samting we hem i wantem mekem. God blong yumi i wantem we ol man blong hem oli wosipim hem from we olgeta wanwan nomo oli jus blong mekem olsem. Hem i glad tumas taem hem i luk we ol man, nomata oli olfala no yangfala, oli mekem wok blong hem from we oli lavem hem. Stret Pikinini blong God i soem beswan eksampol blong fasin ya we man i obei long God from we hem i lavem God. Jeova i tokbaot Pikinini ya blong hem i se: “Hemia pikinini blong mi, we mi lavem hem tumas. Mi mi glad tumas long hem.” (Matiu 3:17) Fasbon Pikinini ya i talem long Papa blong hem se: “God blong mi. Mi ya, mi kam. Ol tok blong yu blong tijim mi oli stap long buk blong Loa blong yu. Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.”​—Ol Sam 40:8; Hibrus 10:​9, 10.

10. ?Wanem tingting i mas pusum yumi blong mekem wosip long Jeova?

¹⁰ Jeova i wantem we olgeta man blong hem oli wosipim hem long sem fasin we Pikinini blong hem i mekem, hemia wetem tingting we i glad blong obei long Papa blong hem. Man blong raetem Sam i talem wan profet tok long singsing blong hem, se: “Long dei ya we bambae yu go faet long ol enemi blong yu, ol man blong yu bambae oli glad blong kam joen long yu. Olsem we wota blong naet i stap mekem gras i gru gud, long sem fasin, yu bambae yu kasem ol nambawan man blong faet oli kam joen long yu long ol hil ya we oli tabu.” (Ol Sam 110:3) Ogenaesesen blong Jeova long heven mo long wol tu, i wok from we ol memba blong hem oli letem lav i pusum olgeta blong obei long God.

11. ?Wanem jus we ol pikinini blong ol Witnes oli mas mekem olgeta nomo?

¹¹ Taswe yufala ol yangfala, yufala i mas klia long samting ya se papa mama blong yufala mo ol Kristin elda long kongregesen, bambae oli no save fosem yu blong tekem baptaes. Tingting ya blong wantem mekem wok blong Jeova, hem i mas kamaot long yu wan nomo. Long taem bifo, Josua i talem long ol man Isrel se: “Yufala i mas stap tru long [Jeova], mo tingting blong yufala i mas stap strong long hem oltaem. . . . Yufala i mas jusumaot wanem god we yufala i wantem.” (Josua 24:​14-22) Long sem fasin, yu wan nomo yu mas mekem desisen blong yu blong givim laef long Jeova mo yusum ful laef blong yu blong mekem wok blong hem.

Yu Tu Yu Gat Wok Blong Mekem

12. (a) ?Nating se papa mama i tijim pikinini, oli no save mekem wanem? (b) ?Wetaem wan yangfala i gat desisen blong mekem fored long Jeova?

¹² I gat taem i stap kam we bambae yufala ol yangfala i no moa save dipen long bilif blong papa mama, blong yufala i stap tabu long fes blong God. (1 Korin 7:14) Disaepol Jemes i raetem se: “Man we i save wanem fasin i stret blong mekem, be hem i no mekem, hem i mekem sin ya.” (Jemes 4:17) Papa mama i no save mekem wok blong God long ples blong pikinini blong olgeta, olsem we pikinini tu i no save mekem wok blong God long ples blong papa mama blong hem. (Esikel 18:20) ?Yu yu save Jeova mo ol plan blong hem? ?Yu yu bigman naf long tingting blong kasem save samting mo blong  wokem fasin fren wetem Jeova? Ale i stret nomo blong ting se long ae blong God, yu yu naf finis blong tekem desisen blong mekem wok blong hem.

13. ?Wanem kwestin we ol yangfala we oli no baptaes yet oli save askem long olgeta wan?

¹³ ?Yu yu wan yangfala we i no baptaes yet, mo papa mama blong yu i Witnes blong Jeova, yu yu stap kam long ol Kristin miting mo yu stap talemaot gud nius blong Kingdom? Sipos yes, ale askem long yu wan se: ‘?From wanem mi stap mekem ol samting ya? ?Mi mi kam long miting mo joen long wok blong prij from we hemia samting we papa mama blong mi i wantem mi blong mekem no from we mi wantem mekem Jeova i glad?’ ?Yu wan yu faenemaot finis “ol fasin we God i wantem, wanem i gud, mo wanem hem i glad long hem, mo wanem i stret gud blong mekem”?​—Rom 12:2.

?From Wanem i Had Blong Tekem Desisen Ya Blong Baptaes?

14. ?Wanem ol eksampol long Baebol we oli soem se taem man i gat save, hem i no mas wet blong baptaes?

¹⁴ “?Wanem nao i blokem mi, blong mi no save baptaes?” Man Itiopia i askem kwestin ya long Filip, afta we hem i lanem se Jisas nao hem i Mesaea. Save we man Itiopia ya i gat long Baebol i naf blong mekem hem i luksave se hem i no mas tektaem blong soemaot klia se, stat naoia i go, bambae hem i mekem wok blong Jeova olsem wan memba blong Kristin kongregesen. Samting ya i mekem hem i glad bigwan. (Ol Wok 8:​26-39) Long sem fasin, wan woman we nem blong hem Lidia, mo we “Masta blong yumi i openem tingting blong hem blong i bilif long tok blong Pol,” hem i “baptaes,” hem wetem ol famle blong hem mo ol man blong wok blong hem. (Ol Wok 16:​14, 15) Mo man ya tu we hem i stap lukaot long kalabus long Filipae, hem i lesin taem Pol mo Saelas tufala i “talemaot tok blong Masta blong yumi long hem,” mo “wantaem nomo, hem wetem ol famle blong hem mo ol man blong wok blong hem oli baptaes.” (Ol Wok 16:​25-34) ?Sipos yu yu gat save finis long saed blong Jeova mo ol plan blong hem, mo yu rili wantem mekem wok blong hem, mo yu gat gudnem tu long kongregesen, mo yu stap kam oltaem long ol miting mo yu stap talemaot gud nius blong Kingdom, ale wanem i blokem yu blong yu no save baptaes?​—Matiu 28:​19, 20.

15, 16. (a) ?Wanem rong tingting we maet i blokem sam yangfala blong tekem baptaes? (b) ?Desisen blong givim laef long Jeova mo baptaes i save halpem ol yangfala blong mekem wanem?

¹⁵ Maet yu fraet blong tekem impoten desisen ya blong baptaes from we yu ting se maet samtaem afta long baptaes bambae yu mekem wan sin nao kongregesen bambae i stretem yu. Sipos hemia tingting blong yu, ale tingbaot: ?Bambae yu no traem kasem laesens blong draevem trak jes from we yu fraet se wan dei maet bambae yu mekem aksiden long trak? !Si bambae yu traem yet! Ale, sipos yu naf finis blong tekem baptaes, yu no mas letem tingting blong yu i blokem yu. Blong talem stret, taem yu givim laef blong yu long Jeova mo yu agri blong mekem wok blong hem, samting ya bambae i mekem tingting blong yu i strong moa blong mekem stret fasin from we yu tingbaot desisen ya we yu bin mekem. (Filipae 4:13) Plis, yufala ol yangfala, yufala i no mas ting se sipos yufala i no tekem baptaes bambae God i no save jajem yufala. Taem yufala i kasem yia finis we yufala i naf blong tekem desisen, yufala i mas talemaot long God olgeta samting we yufala i mekem, nating se yufala i baptaes no nogat.​—Rom 14:​11, 12.

 ¹⁶ Plante Witnes raon long wol oli harem se desisen ya we oli bin tekem blong baptaes taem oli yang yet i halpem olgeta bigwan. Hemia tingting blong wan Witnes long Wes Yurop we naoia i gat 23 yia blong hem. Hem i tingbaot se from we hem i baptaes taem hem i gat 13 yia, samting ya i halpem hem blong lukaot gud oltaem blong no letem tingting blong hem i go folem “ol krangke fasin blong ol yangfala, we oli wantem tumas ol samting we i no stret.” (2 Timoti 2:22) Taem hem i yangfala yet, hem i putum mak ya se bambae hem i kam wan fultaem paenia. Tede hem i glad blong wok long wan branj ofis blong ol Witnes blong Jeova. Ol yangfala, mo yu tu, yufala i save kasem plante nambawan blesing sipos yufala i jusum blong mekem wok blong Jeova.

17. ?Yumi mas ‘traem save olgeta samting we [Jeova] i wantem blong yumi mekem’ long saed blong wanem?

¹⁷ Stat long taem ya we yu givim laef blong yu long Jeova mo tekem baptaes, yu tingbaot wanem we Jeova i wantem long evri samting we yu mekem long laef blong yu. Blong holem promes we yu mekem blong givim laef blong yu long Jeova, yu mas ‘pemaot taem.’ ?Olsem wanem yu pemaot taem? Maet bifo yu stap spenem taem blong yu long sam samting we oli no rili impoten, be naoia yu yusum taem ya blong mekem stadi long Baebol, blong go oltaem long ol miting, mo blong tekem evri janis we yu gat blong talemaot “gud nius blong Kingdom.” (Efesas 5:​15, 16, NW; Matiu 24:​14, NW ) Desisen we yumi tekem blong givim laef long Jeova mo filing ya se yumi wantem mekem wok blong hem, i save gat paoa long evri samting we yumi mekem long laef blong yumi. I save gat paoa long wei we yumi yusum taem blong yumi blong spel mo pleplei, fasin blong yumi blong kakae mo dring, mo olkaen miusik we yumi lesin long hem. I gud sipos yu jusum ol pleplei we bambae oli mekem yu yu harem gud gogo i no save finis. Plante taosen yangfala Witnes we oli hapi tumas, oli save talem long yu se i gat plante gudfala rod blong pleplei, we oli no go agensem ‘olgeta samting we [Jeova] i wantem blong yumi mekem.’​—Efesas 5:​17-19.

“Mifala i Wantem Kam Fren Blong Yufala”

18. ?Wanem kwestin we i gud yufala ol yangfala i tingbaot?

¹⁸ Stat long yia 1513 B.K.T. go kasem lafet blong Pentekos long 33 K.T., Jeova i gat wan ogenaesesen blong hem long wol ya we hem i jusum, blong i wosipim hem mo blong i stap olsem witnes blong hem. (Aesea 43:12) Ol yangfala long neson blong Isrel oli man blong Jeova taem oli bon. Be stat long Pentekos 33 K.T., Jeova i gat wan niufala “neson” long wol ya, hemia Isrel long saed blong spirit, we i “holem nem blong hem.” (1 Pita 2:​9, 10, NW; Ol Wok 15:14; Galesia 6:​16, NW ) Aposol Pol i talem se Kraes i tekemaot sam man ya oli blong hem we ol man ya ‘laef blong olgeta i klin, oli man blong hem nomo, mo oli strong blong mekem ol gudfala wok.’ (Taetas 2:14) Yufala ol yangfala, yufala i fri blong luksave yufala wan nomo se hu nao ol man ya. ?Hu nao ol man tede we ‘oltaem oli stap folem ol stret fasin, mo oli stap obei gud long Jeova,’ oli stap folem ol rul blong Baebol, mo oli mekem wok ya blong Witnes long nem blong Jeova, mo oli stap talemaot Kingdom olsem rod ya nomo blong man i gat hop long fiuja? (Aesea 26:​2-4) Jekemap ol jos blong Krisendom mo ol narafala skul tu, mo skelem fasin blong olgeta wetem wanem we Baebol i talem se ol trufala man blong God oli mas mekem.

19. ?Plante milian man long wol oli bilif strong long wanem?

¹⁹ Plante milian man raon long wol, we plante long olgeta ya oli ol yangfala tu, oli bilif strong se smol grup blong ol Witnes blong Jeova we tabu spirit i makemaot olgeta, hem nao neson ya ‘we i stap folem ol stret fasin.’ Ol milian man ya oli stap talem long Isrel ya long saed blong spirit se: “Mifala i wantem kam fren blong yufala, from we mifala i harem nius se God i stap givhan long yufala.” (Sekaraea 8:23) Mifala i rili hop mo prea se yufala ol yangfala bambae yufala i kam joen wetem ol man blong God nao yufala i save “jusumaot laef”​—laef we i no save finis long niufala wol blong Jeova.​—Dutronome 30:​15-20; 2 Pita 3:​11-13.

[Futnot]

Tingtingbak

• ?I minim wanem se trenem tingting?

• ?Wanem kaen wok we Jeova i glad long hem?

• ?Wanem jus i stap fored long olgeta yangfala blong ol Witnes blong Jeova?

• ?From wanem i nogud blong seftem baptaes i go longwe moa oltaem?

[Kwestin]

[Tok blong pija long pej 26]

?Yu yu lesin long hu?

[Tok blong pija long pej 28]

?Olsem wanem fasin blong givim laef long God mo baptaes i save protektem yu?

[Tok blong pija long pej 29]

?Wanem i stap blokem yu blong yu no save baptaes?