Wan Kwestin

?Wanem i mekem se “ol gudgudfala samting blong olgeta neson” oli kam insaed long “haos” blong trufala wosip?​—Hagae 2:​7, futnot NW.

Tru long profet Hagae, Jeova i talem se: “Bambae mi mi mekem olgeta neson oli seksek, nao bambae ol gudgudfala samting blong olgeta neson oli mas kam insaed. Mo bambae mi mi fulumap haos ya wetem glori.” (Hagae 2:​7, futnot NW) “Ol gudgudfala samting” blong ol neson hemia, ol man we oli laekem God. ?Olsem wanem? ?Ol man ya oli joen long trufala wosip from we “ol neson” oli seksek? Nogat.

I gud blong save se wanem i seksekem olgeta neson mo wanem samting i kamaot from. Baebol i talem se: “?From wanem ol narafala kantri [“olgeta neson,” NW] oli stap mekem plan blong mekem trabol? ?From wanem ol man blong olgeta oli stap mekem ol plan we oli no save win long hem nating?” (Ol Sam 2:1) Ol ‘plan we i no save win’ we ol neson oli stap “mekem,” no tingting dip long hem, hemia ol plan we oli folem blong holemtaet paoa blong olgeta. Taswe, samting we i mekem ol neson ya i seksek, hemia sipos narafala i karemaot paoa ya long han blong olgeta.

Wok blong talemaot Kingdom blong God we ol Witnes blong Jeova oli stap mekem raon long wol i olsem wan denja long ol neson. Yes, Kingdom blong God we Jisas Kraes i rul long hem bambae i “smasem mo i finisim olgeta narafala kingdom.” (Daniel 2:​44, NW) Mesej blong jajmen we yumi stap talemaot i seksekem olgeta neson. (Aesea 61:2) Moa we wok blong prij i stap kam bigwan, moa we ol neson oli stap seksek. ?Seksek ya we Hagae 2:7 i tokbaot i saen blong wanem samting?

Long Hagae 2:​6, yumi ridim se: “Mi mi Hae God, mi gat olgeta paoa, mo mi talem long yufala, se bambae i no longtaem, mi mekem heven mo wol ya mo solwota, olgeta evriwan i seksek.” Aposol Pol i yusum vas ya taem hem i raetem se: “Hem i promes long yumi se, ‘Wan taem moa, mi bambae mi mekem graon i seksek bakegen. Mo long taem ya, bambae i no graon nomo we i seksek, heven tu bambae i seksek.’ Tok ya we God i talem se ‘Wan taem moa’, hemia i soemaot i klia we God i stap tokbaot olgeta samting blong wol ya we hem nomo i mekem. Hem bambae i mekem olgeta samting ya oli seksek, nao bambae i tekemaot olgeta. Be olgeta samting we bambae oli no save seksek samtaem, olgeta ya nomo bambae oli stap.” (Hibrus 12:​26, 27) Yes, rabis wol ya bambae i lus bifo we niufala wol blong God i kam.

Ol man we oli laekem God oli joen long trufala wosip. Be, oli no jes joen from we ol neson oli seksek. Nogat. I gat wan wok we i pulum olgeta i kam long Jeova mo long wosip blong hem mo semfala wok ya i stap seksekem ol neson. Hemia wok blong talemaot Kingdom blong God. Wok blong talemaot ‘gud nius we i mekem man i glad’ i pulum ol man we oli stret blong kasem laef blong olwe blong joen blong wosipim trufala God.​—Revelesen 14:​6, 7.

Mesej blong Kingdom i wan mesej blong talemaot jajmen mo blong sevem ol man. (Aesea 61:​1, 2) I gat tu samting i kamaot from wok blong talemaot gud nius blong Kingdom. Faswan hemia blong seksekem ol neson mo narawan hemia blong fulumap haos blong Jeova wetem ol gudgudfala samting blong olgeta neson.