Wan Visit We i Mekem Hem i Jenis Bigwan

WAN man we tu Witnes blong Jeova oli storian wetem hem, i raetem se: “Mi wantem tumas blong talem long famle blong mi long saed blong tu Witnes we tufala i olsem ‘enjel’ we God i sanem i kam long mi.” Sam wik bifo we tufala Witnes ya i kam, waef blong man ya i ded. Tufala i bin mared blong 45 yia. Hem i harem nogud tumas. Tu pikinini blong hem we oli bigwan finis oli givhan long hem, be tufala i laef longwe long hem. Ol fren mo ol man raonabaot long hem oli no stap kam luk hem.

Taem tufala Witnes ya i storian wetem man ya, hem i talem long tufala se: “Mi mi no stap prea long God.” Be tufala i kasem save filing blong hem mo tufala i givim wan smol pepa long hem we i tokbaot Baebol. Toktok long pepa ya i talem se ?Olsem Wanem Long Ol Fren Blong Yumi We Oli Ded? Hem i ridim pepa ya mo i haremgud.

Smoltaem biaen, tufala Witnes ya i kambak. Tufala i tingbaot olsem wanem man ya i bin harem nogud mo tufala i wantem save olsem wanem long laef blong hem naoia. Man ya i raetem se: “Mi mi sapraes se tu strenja i kea long mi mo tingbaot laef blong mi.” Ol tok long Baebol we tufala i talem i leftemap tingting blong hem. Tufala Witnes ya i talem se bambae tufala i kambak. Man ya i glad mo from samting ya, hem i raetem wan leta i go long Haos Kingdom blong ol Witnes blong Jeova long ples blong hem. Ol tok blong leta ya i stap antap.

Bifo we man ya i muf i go long wan ples we i klosap moa long wan long tufala pikinini blong hem, hem i go long wan Kristin miting blong ol Witnes blong Jeova mo i go kakae long haos blong wan long tufala Witnes ya. Hem i raetem se: “Bambae mi lego ples ya, be oltaem, long hat blong mi mo long prea blong mi, bambae mi mi tingbaot tufala yangfala Witnes ya mo jos blong yufala. Naoia mi mi stap prea plante. Fasin blong mi i jenis bigwan. Tufala yangfala Witnes ya i givhan bigwan long saed ya, mo bambae mi gat tangkiu oltaem long tufala from.”