!Kam Waes Mo Fraet Long God!

“Sipos yu wantem kam waes, oraet, fastaem yu yu mas fraetgud long Jeova.”—OL PROVEB 9:​10, NW.

1. ?From wanem plante man oli faenem i had blong kasem save long fasin ya blong fraet long God?

 LONG taem bifo, sipos oli tokbaot wan man se hem i fraet long God, oli stap leftemap hem. Tede plante man oli ting se fraet long God i wan gudfala fasin blong ol man bifo, be oli no rili kasem save se fasin ya i olsem wanem. Maet oli talem se: ‘?Sipos God i lavem ol man, from wanem mi mi mas fraet long hem?’ Long tingting blong olgeta, fraet i wan nogud filing we i blokem man blong i no save mekem wan samting. Be fraet long God i no wan filing nomo. Bambae yumi luk bigfala mining blong hem.

2, 3. ?Man we i fraet long God i olsem wanem?

² Baebol i tokbaot fraet long God se hem i wan gudfala fasin. (Aesea 11:​3, NW ) Man we i fraet long God i onagud long God, i gat bigfala respek long God, mo i no wantem nating blong mekem samting we God i harem nogud long hem. (Sam 115:​11, NW ) Hem i agri long ol rul blong God long saed blong stret fasin mo hem i folemgud ol rul ya. Long laef blong hem, hem i traehad blong obei long tok blong God long saed blong samting we i gud mo samting we i nogud. Wan buk we i eksplenem Baebol i talem se gudfala fraet ya i “wan tingting we yumi holem long saed blong God, we i lidim yumi blong mekem waes fasin mo blong tanem baksaed long evri samting we i nogud.” Yes, i stret nomo we Tok blong God i talem se: “Sipos yu wantem kam waes, oraet, fastaem yu yu mas fraetgud long Jeova.”​—Ol Proveb 9:​10, NW.

³ Fraet long God i joen wetem plante samting long laef blong yumi. I no waes nomo we i kamaot from fraet long God, be man we i fraet long God i glad, i gat pis, i save kasem plante samting mo gat longfala laef, hem i gat hop, tras, mo strong tingting. (Ol Sam 2:​11, NW; Ol Proveb 1:​7, NW; 10:​27, NW; 14:​26, NW; 22:​4, NW; 23:​17, 18, NW; Ol Wok 9:​31, NW ) Blong gat bilif mo lav, yumi mas fraet long God fulwan. Long fasin fren blong yumi wetem God mo wetem ol man, oltaem yumi nidim fasin ya blong fraet long God. (Dutronome 10:​12, NW; Job 6:​14, NW; Hibrus 11:​7, NW ) Man we i fraet long God i bilif strong se Papa blong yumi long heven i stap tingbaot yumi wanwan, mo se hem i rere blong fogivim yumi from ol mastik blong yumi. (Ol Sam 130:4) Ol rabis man we oli no tanem tingting blong olgeta, olgeta nomo oli nidim blong seksek long fored blong God from panis we bambae oli kasem. *​—Hibrus 10:​26-31.

Lanem Blong Fraet Long Jeova

4. ?Wanem i save givhan long yumi blong ‘lanem fasin ya blong fraet long Jeova’?

⁴ Yes, blong mekem ol desisen we oli waes mo blong kasem blesing blong Jeova, yumi nidim fasin ya blong fraet long God. ?Taswe, olsem wanem yumi save ‘lanem blong fraet long Jeova’? (Dutronome 17:​19, NW ) Baebol i storian long saed blong plante man mo woman we oli fraet long God. Ol stori ya oli save “tijim yumi.” (Rom 15:4) Blong kasem save olsem wanem blong fraet long God, bambae yumi tingting long laef blong wan man long Baebol, hemia Deved we i king blong Isrel bifo.

5. ?Olsem wanem wok blong lukaot long sipsip i givhan long Deved blong lanem fasin ya blong fraet long Jeova?

⁵ Jeova i sakemaot faswan king blong Isrel we nem blong hem Sol. Hemia from we Sol i fraet long ol man be i no fraet long God. (1 Samuel 15:​24-26) Deved i defren. Hem i frengud wetem Jeova, mo hem i soemaot long laef blong hem se hem i fraet long God. Taem Deved i wan smol boe nomo, hem i mekem wok ya blong lukaot long ol sipsip blong papa blong hem. (1 Samuel 16:11) Taem hem i stap lukaot long ol sipsip ya long naet, ating hem i stap lukluk i go antap long ol sta long skae, mo samting ya i givhan long hem blong kasem save long fasin ya blong fraet long Jeova. Deved i save luk wan smol haf nomo blong skae, be hemia i naf blong mekem hem i luksave se hem i mas givim bigfala respek mo ona long God. Biaen, Deved i raetem se: “Taem mi mi luk skae we yu yu mekem, mo mi luk mun mo ol sta we yu yu putum olgeta oli stap long stret ples blong olgeta,  mi luk man se hem i nating nomo. I no stret blong yu yu tingbaot hem. I no stret nating blong yu lukaot gud long hem.” ​—Ol Sam 8:​3, 4.

6. ?Taem Deved i luksave bigfala paoa blong Jeova, hem i harem olsem wanem?

⁶ I stret nomo we Deved i sapraes long bigfala skae we i fulap long ol sta. I stret nomo we hem i luksave se hem i smol nomo taem i skelem hem wan wetem skae ya. Deved i no harem nogud taem i luksave samting ya. Hem i presem Jeova from, i se: “Oltaem skae i stap soemaot bigfala paoa blong God, mo olgeta samting we oli stap long hem oli stap soemaot ol gudgudfala wok we God i mekem.” (Ol Sam 19:1) From we Deved i onagud long Jeova, samting ya i pulum hem blong kam klosap moa long Jeova, mo i mekem se Deved i wantem lanem blong folem ol rod blong Jeova we oli stretgud. Traem tingbaot filing blong Deved taem hem i singsing long Jeova se: “Yu nomo yu God. Yu yu gat paoa, mo yu stap mekem ol bigbigfala samting. Hae God, plis yu tijim mi long ol samting we yu wantem blong mi mi mekem, nao bambae mi obei long yu, mi holem trutok blong yu. [“Plis yu mekem we mi mi gat wan tingting nomo i stap long hat blong mi, hemia blong fraet long nem blong yu,” NW ].​—Ol Sam 86:​10, 11.

7. ?Olsem wanem fasin ya blong fraet long God i halpem Deved blong faetem Golaeat?

⁷ Taem ol ami blong Filistia oli kam insaed long kantri blong Isrel, jampion soldia blong olgeta, Golaeat, we i longfala olsem 3 meta, i jikim ol man Isrel, se: ‘!Yufala i jusum wan soldia we hem wan i naf blong faetem mi! Sipos hem i win, bambae mifala i kam slef blong yufala.’ (1 Samuel 17:​4-10) Sol wetem olgeta soldia blong hem oli fraet we oli fraet. Be Deved i no fraet long Golaeat. Hem i save se Jeova nao we man i mas fraet long hem, be i no ol narafala man, nating se oli strong olsem wanem. Ale Deved i talem long Golaeat se: “Mi mi kam blong faet long yu long nem blong Hae God [Jeova]. Hem i . . . gat olgeta paoa . . . mo olgeta man long ples ya bambae oli luk we hem i no nidim naef blong faet mo spia blong sevem ol man blong hem. Hem i gat paoa blong win long faet.” Deved i holem sling blong hem mo wan ston nomo, be wetem help blong Jeova hem i kilim bigfala man ya i ded.​—1 Samuel 17:​45-47.

8. ?Ol man long Baebol we oli fraet long God oli tijim yumi long wanem samting?

⁸ Maet yumi fesem ol trabol mo ol enemi we oli bigwan olsem enemi ya blong Deved. ?Yumi save mekem wanem? Yumi save mekem olsem Deved mo ol narafala man blong God bifo​—yumi fraet long God. Fraet long God i save ronemaot fraet long man. Nehemaea i wan man blong bilif, nao hem i toktok i go long ol brata blong hem long Isrel long saed blong ol enemi blong olgeta, i se: “!Yufala i no fraet long ol enemi ya blong yumi! !Masta blong yumi [Jeova] i gat paoa, mo olgeta man oli fraet long hem!” (Nehemaea 4:14) Yes, Deved, Nehemaea, mo ol narafala man blong God oli naf blong mekem wok we God i givim long olgeta, from we Jeova i givhan long olgeta. Yumi tu yumi naf blong mekem wok ya sipos yumi fraet long God.

Fesem Ol Trabol Wetem Fasin Blong Fraet Long God

9. ?Deved i soem se hem i fraet long God, nating we hem i kasem wanem trabol?

⁹ Afta we Deved i kilim Golaeat i ded, Jeova i mekem hem i win long plante faet. Nao Sol i jalus. Ale, hem i traem blong kilim Deved i ded. Fastaem, hem i girap i holem spia i traem sperem Deved long wol. Nekis taem, hem i mekem plan blong narafala man i kilim Deved i ded, be plan ya i no wok. Biaen bakegen, hem i tekem ol soldia blong hem oli go lukaot Deved blong kilim hem i ded. Nating se plante yia bifo Jeova i bin promes long Deved se bambae hem i king, be long olgeta yia ya, Deved i mas ronwe mo haed, hem i mas faet tu, mo i mas wet long stret taem we Jeova i wantem mekem hem i kam king. Long olgeta trabol ya, Deved i soemaot se hem i fraet long trufala God.​—1 Samuel 18:​9, 11, 17; 24:2.

10. ?Olsem wanem Deved i soemaot se hem i fraet long God taem laef blong hem i stap long denja?

¹⁰ Wan taem, Deved i haed long ples blong King Akis, long wan taon blong ol man Filistia we nem blong hem Gat. Taon ya hem i ples blong Golaeat tu. (1 Samuel 21:​10-15) Ol man blong wok blong King Akis oli tok agensem Deved se hem i enemi blong kantri blong olgeta. Laef blong Deved i stap long denja. ?Hem i mekem wanem? Hem i prea long Jeova, i talemaot evri samting we i stap long hat blong hem. (Ol Sam 56:​1-4, 11-13) Blong sevem laef blong hem, hem i mekem olsem we hed blong hem i krangke. Be Deved i save se Jeova nomo i sevem hem, from we Hem nao i mekem se ol traehad blong Deved oli win. Deved i trastem Jeova wetem fulhat blong hem, hem i bilif fulwan long Jeova. Samting ya i soemaot se Deved i fraet long God. ​—Ol Sam 34:​4-6, 9-11.

11. ?Taem yumi fesem trabol, olsem wanem yumi save soemaot se yumi fraet long God, olsem Deved?

 ¹¹ Yumi save fraet long God olsem Deved. Yumi mekem olsem taem yumi trastem promes blong God se bambae hem i givhan long yumi blong winim ol trabol blong yumi. Deved i talem se: “Yu mas givim laef blong yu long Hae God, yu mas trastem hem, nao bambae hem i halpem yu.” (Ol Sam 37:5) ?Olsem wanem? ?Vas ya i minim se yumi mas putum ol trabol blong yumi long han blong Jeova, nao yumi wet nomo, yumi no mekem wan samting blong traem winim trabol ya, ale Jeova bambae i jes stretem evri samting blong yumi? Nogat. Taem Deved i prea long God, hem i askem long Jeova blong halpem hem, be hem i no stop long ples ya. Hem i yusum tingting mo bodi we Jeova i givim long hem blong mekem samting blong traem winim trabol blong hem. Be Deved i save tu, se maet ol traehad blong hem oli no naf. Yumi tu yumi mas luksave samting ya. Yumi mas mekem evri samting we yumi naf blong mekem blong traem winim ol trabol blong yumi, nao biaen, yumi livim i stap nomo long han blong Jeova. Plante taem yumi no save mekem wan samting, yumi mas trastem Jeova nomo. Hemia nao taem we yumi wan i rili nidim fasin ya blong fraet long God. Ol tok we Deved i talem wetem fulhat blong hem, oli save leftemap tingting blong yumi, hem i se: “Yu [Jeova] yu fren blong olgeta we oli stap [“fraet,” NW ] long yu.”​—Ol Sam 25:14.

12. ?From wanem yumi mas tinghevi long ol prea blong yumi? ?Wanem fasin we yumi neva mas gat?

¹² From samting ya, yumi mas tinghevi long ol prea blong yumi mo long fasin fren blong yumi wetem God. Taem yumi prea long Jeova yumi mas “bilif we God i stap, mo we i stap mekem i gud long olgeta we oli stap traem faenem hem.” (Hibrus 11:6; Jemes 1:​5-8) Mo taem yumi luk se hem i givhan long yumi, yumi mas “talem tangkiu” long hem, olsem aposol Pol i talem long yumi blong mekem. (Kolosi 3:​15, 17) Yumi no mas gat fasin olsem samfala. Wan olfala Kristin we tabu spirit i makemaot hem finis, i tokbaot olgeta ya se: “Oli ting se God we i stap long heven, i olsem wan slef blong olgeta nomo. Taem oli nidim samting, oli singaot long God nao oli wantem se wantaem nomo hem i mas givim samting ya long olgeta. Taem oli kasem samting we oli wantem, oli no moa tingbaot God go kasem nekis taem we oli nidim hem.” Man we i gat fasin olsem, hem i no fraet long God.

Taem Man i Kam Slak Blong Fraet Long God

13. ?Wetaem Deved i no respektem Loa blong God?

¹³ Taem Deved i luk se Jeova i stap givhan long hem blong winim ol trabol, hem i fraet moa long God mo i trastem God moa. (Ol Sam 31:​22-24) Be Baebol i tokbaot tri taem we Deved i kam slak blong fraet long God, nao hem i mekem bigfala sin. Faswan, hemia taem we Deved i traem blong karem bokis blong kontrak i go long Jerusalem long wan kat we buluk i pulum, i no long solda blong ol Livaet olsem Loa blong God i talem. Usaha we i lukaot long kat ya, i pusum han blong hem blong holemtaet Bokis ya, ale God i kilim hem i ded wantaem from we “hem i no gat raet blong tajem Bokis ya.” Yes, Usaha i mekem wan bigfala sin. Be Deved nao i rili stamba blong trabol ya, from we hem i no respektem Loa blong God. Man we i fraet long God i mekem ol samting long rod we God i wantem.​—2 Samuel 6:​2-9; Namba 4:15; 7:9.

14. ?Wanem i kamaot taem Deved i mekem sensas blong kaontem ol man Isrel?

¹⁴ Namba tu bigfala sin we Deved i mekem, hemia taem we Setan i pusum hem blong i go mekem sensas blong kaontem ol soldia blong Isrel. (1 Kronikel 21:1) Samting ya we Deved i mekem, i soemaot se hem i kam slak blong fraet long God, nao 70,000 man Isrel oli ded from sin blong hem. Deved i sore bigwan long fored blong Jeova mo i tanem tingting blong hem. Nating se i olsem, hem i mekem se hem wan mo ol man raonabaot long hem oli kasem bigfala trabol.​—2 Samuel 24:​1-16.

15. ?Wanem i mekem se Deved i slip wetem woman blong narafala man?

¹⁵ Wan narafala taem bakegen, Deved i kam slak blong fraet long God, mo samting ya i lidim hem blong slip wetem Batseba we i waef blong Uria. Deved i save finis se i rong blong slip wetem waef blong  narafala man mo i rong tu blong wantem woman blong narafala man. (Eksodas 20:​14, 17) Trabol ya i stat taem Deved i luk we Batseba i stap swim. Sipos Deved i bin fraet long God, wantaem nomo bambae i lukluk i gowe mo i putum tingting blong hem i go long narafala samting. Be Deved i gohed blong ‘lukluk woman ya.’ Filing blong wantem woman ya i kam strong tumas, i winim fraet we Deved i gat long God. (Matiu 5:28; 2 Samuel 11:​1-4) Yes, Deved i fogetem se Jeova i joen wetem evri haf blong laef blong hem.​—Ol Sam 139:​1-7.

16. ?Wanem nogud frut we Deved i kasem from bigfala sin we hem i mekem?

¹⁶ Deved i givim bel long Batseba, nao woman ya i bonem wan pikinini boe. Smoltaem biaen, Jeova i sanem profet Natan blong talemaot long Deved, sin ya we hem i mekem. Taem Natan i stretem Deved finis, Deved i tanem tingting blong hem mo i fraet long God bakegen. Hem i plis long Jeova blong i no lego hem mo blong i no tekemaot tabu spirit long hem. (Ol Sam 51:​7, 11) Jeova i fogivim Deved mo i no panisim hem strong tumas. Be Jeova i no blokem ol nogud frut we Deved i kasem from sin ya. Pikinini ya blong Deved i ded, mo stat long taem ya, trabol mo ded i kasem famle blong Deved oltaem. !Tru ya, Deved i rili kasem rabis frut taem hem i kam slak blong fraet long God!​—2 Samuel 12:​10-14; 13:​10-14; 15:14.

17. Soemaot olsem wanem bigfala sin i save mekem man i harem nogud.

¹⁷ Tede tu, sipos yumi no fraet long God long bisnes ya long saed blong seks, yumi save kasem nogud frut we i stap longtaem. Traem tingbaot wan yangfala woman we man blong hem i go wok long narafala kantri. Nating se man ya i wan Kristin, hem i no stap tru long woman blong hem. Taem woman blong hem i kasem nius ya, hem i sek nogud, i bendaon, i haedem fes blong hem long tufala han blong hem, mo i krae we i krae. Tingbaot: ?Hamas yia bambae oli mas pas blong man ya i save winimbak tras mo respek blong woman blong hem? Fasin blong fraet long God i save blokem trabol olsem.​—1 Korin 6:18.

Fraet Long God i Blokem Plante Sin

18. ?Setan i wantem mekem wanem long yumi, mo hem i yusum wanem rod blong mekem samting ya?

¹⁸ Setan i stap wok hareap nomo blong mekem ol fasin blong wol ya oli kam rabis olgeta, be hem i wok strong moa blong spolem ol trufala Kristin. Rod we hem i yusum, hemia samting we i go stret long tingting mo hat blong yumi​—ol samting we yumi lukluk, harem, filim, tajem, mo testem. Hem i yusum moa ol samting we yumi lukluk mo harem. (Efesas 4:​17-19) ?Yu yu mekem wanem taem yu sek long wan rabis pija, no yu harem wan doti tok, no yu mitim wan man we i gat rabis tingting?

19. ?Olsem wanem fraet long God i givhan long wan Kristin blong i winim traem?

¹⁹ Tingbaot wan Kristin elda long Yurop we nem  blong hem André. * Hem i wan papa mo i wan dokta tu. Taem André i stap wok long hospital long naet, ol woman we oli wok wetem hem oli stap pinim ol leta long pilo blong hem. Oli dro ol hat long ol leta ya, mo oli askem long hem blong slip wetem olgeta. Be André i agensem fasin blong olgeta. Antap long samting ya, hem i faenem wan narafala wok, blong hem i save kamaot long ples ya we hem i stap kasem ol traem long saed blong rabis fasin. Fraet long God i lidim André blong mekem waes desisen, mo hem i kasem blesing from. Tede André i stap wok haftaem long branj ofis blong ol Witnes blong Jeova long kantri blong hem.

20, 21. (a) ?Olsem wanem fraet long God i save blokem yumi blong yumi no foldaon long sin? (b) ?Nekis stadi bambae i tokbaot wanem?

²⁰ Sipos yumi stap tingting long ol samting we i no stret, i no longtaem bambae yumi rere blong lego nambawan fasin fren we yumi gat wetem Jeova, mo mekem samting we yumi no gat raet blong mekem. (Jemes 1:​14, 15) Be sipos yumi fraet long Jeova, bambae yumi stap longwe, no yumi ronwe, long ol man, ol ples, ol fasin, mo ol pleplei, we oli save pulum yumi blong foldaon long rabis fasin. (Ol Proveb 22:3) Nomata se samting we yumi mas lego long hem i bigwan olsem wanem, mo nomata se yu mas sem long fes blong ol man from, be hemia i nating nomo. Sipos yumi mekem bigfala sin nao God i no moa glad long yumi, hemia i moa nogud. (Matiu 5:​29, 30) Sipos yumi fraet long God, bambae yumi no save go klosap long ol rabis fasin long saed blong seks, hemia i minim tu se yumi no save lukluk ol doti pija blong seks. Bambae yumi ‘blokem ae blong yumi blong yumi no stap lukluk ol samting ya we oli nating nomo.’ Sipos yumi mekem olsem, yumi save gat strong tingting se Jeova bambae i ‘blokem yumi blong yumi stap gud,’ mo bambae i givim evri samting we yumi rili nidim.​—Ol Sam 84:11; Ol Sam 119:​37, NW.

²¹ Tru ya, oltaem i waes blong fraet long God. Mo fasin ya i givim trufala glad tu. (Ol Sam 34:​9, NW ) Bambae yumi luk samting ya i klia nomo, long nekis stadi.

[Ol Futnot]

?Yu Yu Save Eksplenem?

• ?Man we i fraet long God i gat wanem narafala fasin tu?

• ?Olsem wanem fraet long God i save ronemaot fraet long man?

• ?Olsem wanem yumi soemaot se yumi tinghevi long prea?

• ?Olsem wanem fraet long God i save blokem sin?

[Kwestin]

[Tok blong pija long pej 23]

Deved i lanem blong fraet long God taem hem i lukluk ol samting we Jeova i wokem

[Tok blong pija long pej 24]

?Bambae yu mekem wanem sipos yu sek long wan traem we i pulum yu blong mekem rabis fasin?