Yumi No Mas Tok Smosmol Agensem Narafala
Yumi No Mas Tok Smosmol Agensem Narafala
“Yufala i mas stap mekem evri samting, be long fasin we yufala i no toktok smol biaen.”—FILIPAE 2:14, NW.
1, 2. ?Wanem advaes we aposol Pol i givim long ol Kristin long Filipae mo Korin? ?From wanem hem i givim advaes ya?
LONG faswan handred yia, tabu spirit i pulum aposol Pol blong raetem wan leta i go long ol Kristin long kongregesen blong Filipae. Long leta ya, hem i talem plante gudfala toktok blong presem ol Kristin ya. Hem i talem se ol brata sista long Filipae oli gat gudfala fasin ya blong rere blong givim presen long narafala, mo oli wok strong, mo hem i talem se hem i glad long gudfala wok blong olgeta. Be Pol i talem se i gat wan fasin we olgeta ya oli mas stretem. Oli ‘mas stap mekem evri samting long fasin we oli no toktok smol biaen.’ (Filipae 2:14, NW ) ?From wanem Pol i givim advaes ya?
2 Pol i savegud trabol we i stap kamaot from fasin ya blong tok smosmol agensem narafala. Sam yia bifo, hem i bin talem long kongregesen blong Korin se fasin blong tok smosmol biaen long man hem i denja tumas. Pol i tokbaot taem we ol man Isrel oli bin wokbaot long draeples nao oli mekem Jeova i kros bakegen mo bakegen. ?Oli mekem wanem? Oli mekem ol rabis fasin, oli wosipim aedol mo oli mekem nogud wetem woman, oli traem Jeova, mo oli tok smosmol agensem narafala. Pol i talem long ol Kristin long Korin se stori blong ol man Isrel ya i mas tijim wan lesen long olgeta. Hem i raetem se: “I nogud yumi stap tok smosmol agens long God, olsem we sam long olgeta ya oli stap mekem, nao enjel blong kilim man i kam kilim olgeta oli ded from.”—1 Korin 10:6-11.
3. ?From wanem yumi nidim blong tokbaot fasin ya blong tok smosmol agensem narafala?
3 Yumi we yumi ol man blong Jeova tede, yumi gat sem tingting olsem olgeta ya long kongregesen blong Filipae. Yumi strong blong mekem ol gudfala wok, mo yumi laeklaekem yumi. (Jon 13:34, 35) Be fasin ya blong tok smosmol agensem narafala i bin spolem sam man long Kristin kongregesen bifo. Taswe, i gud we yumi tede tu yumi tinghevi long advaes ya se: “Yufala i mas stap mekem evri samting, be long fasin we yufala i no toktok smol biaen.” Naoia bambae yumi tokbaot samfala long Baebol we oli bin tok smosmol agensem narafala. Biaen bambae yumi tokbaot sam samting we yumi save mekem blong blokem fasin ya tede.
Ol Man Nogud Ya Oli Tok Agens Long Jeova
4. ?Olsem wanem ol man Isrel oli tok smosmol agens long God taem oli stap long draeples?
4 Baebol i yusum Hibru tok ya we i minim ‘tok smosmol, komplen, no tok agens,’ blong tokbaot sam samting we i bin hapen taem ol man Isrel oli stap wokbaot long draeples blong 40 yia. Wanwan taem, ol man Isrel oli no glad long laef blong olgeta nao oli tok smosmol blong soemaot samting ya. Wan long ol taem ya, hemia sam wik nomo afta we Jeova i mekem oli fri long wok slef long Ijip. Long taem ya, ful neson blong Isrel i “stap tok agens long Moses mo Eron.” Ol man Isrel oli stap komplen long saed blong kakae, oli se: “Sipos Hae God i kilim mifala long Ijip, bambae i moa gud. Taem mifala i stap longwe, sospen i fulap gud long mit olwe nomo, mo mifala i save kakae ol narafala kakae olsem we mifala i wantem. Be yutufala i tekem mifala i kam long draeples ya blong bambae mifala i stap hanggri gogo mifala evriwan i ded.”—Eksodas 16:1-3.
5. ?Taem ol man Isrel oli komplen, oli rili stap tok agensem hu?
5 Jeova i lukaotgud long ol man Isrel taem oli stap long draeples. Hem i givim kakae mo wota long olgeta. Oli no stap ded from hanggri long draeples ya. Be from we oli no glad long samting we oli stap kasem, oli toktok olsem se oli trabol bigwan we bambae oli ded from, yes, oli stat komplen. Oli tok smosmol agensem Moses mo Eron, be Jeova i luk se oli rili stap tok kros agens long Hem nomo. Moses i talem long ol man Isrel se: “[Jeova] i harem finis ol tok ya blong yufala, we yufala i stap tok agens long hem, from we taem yufala i stap tok agens long mitufala, be yufala i stap tok agens long hem nomo.”—Eksodas 16:4-8.
6, 7. ?Olsem Namba 14:1-3 i soemaot, olsem wanem tingting blong ol man Isrel i jenis?
6 I no longtaem afta long samting ya, ol man Isrel oli tok smosmol bakegen agensem Moses mo Eron. Moses i sanem 12 spae oli go long Promes Lan. Ten long olgeta oli karem bad nius i kambak. ?Wanem i kamaot from? “[Ol man Isrel] oli stap tok agens long Moses mo Hae Pris Eron, oli talem se, ‘!Sipos mifala i ded nomo long Ijip no long draeples ya, bambae i moa gud! ?Blong wanem Hae God i wantem tekem yumi i go long kantri ya? Sipos yumi go mekem faet long olgeta ya longwe, bambae oli kilim yumi evriwan i ded, mo bambae oli tekem ol woman blong yumi wetem ol pikinini blong yumi tu. I moa gud yumi gobak long Ijip.’ ”—Namba 14:1-3.
7 !Tru ya, tingting blong ol man Isrel i jenis bigwan! Fastaem oli gat bigfala tangkiu long Jeova from we hem i mekem olgeta oli aot long Ijip mo i sevem olgeta long Red Si, ale oli bin singsing blong presem Hem. (Eksodas 15:1-21) Be oli fogetem samting ya kwiktaem nomo, taem oli fesem hadtaem long draeples mo oli fraet long ol man Kenan. Nao oli harem se oli no moa glad long wanem we oli gat. Oli no moa talem tangkiu long God from we hem i mekem olgeta oli fri, be oli blemem hem, oli ting se hem i stap blokem olgeta blong oli no kasem ol gudfala samting. Taem oli tok smosmol olsem, oli soemaot se oli no gat tangkiu from ol samting we Jeova i stap givim long olgeta. Taswe Jeova i talem se: “?Ol man nogud ya bambae oli stap tok agens long mi gogo kasem wetaem?”—Namba 14:27; 21:5.
Ol Faswan Kristin Oli Tok Smosmol Agensem Narafala
8, 9. Talem sam stori we i stap long Kristin Grik haf blong Baebol long saed blong fasin blong tok smosmol.
8 Ol stori ya antap oli tokbaot plante man wantaem we oli tok smosmol agensem narafala, long fored blong ol man. Be long yia 32 K.T., * taem Jisas Kraes i stap long Jerusalem blong mekem Lafet blong Wokem ol Wansaed Haos, ‘ol man we oli kam wanples, oli stap tokbaot hem, oli stap tok smosmol long olgeta.’ (Jon 7:12, 13, 32) I luk olsem se oli stap tok smosmol long sora blong narafala, sam oli stap talem se Jisas i wan gudfala man, sam oli talem se hem i man nogud.
9 Long wan narafala taem bakegen, Jisas mo ol disaepol oli go kakae long haos blong Livae, we narafala nem blong hem Matiu, we hem i man blong tekem mane blong takis. “Ol Farisi mo sam long olgeta we oli tija blong Loa, oli tok long ol man blong Jisas, oli talem se, ‘?Olsem wanem yufala i stap kakae wanples wetem ol man ya blong tekem mane blong takis mo ol man nogud ya?’ ” (Luk 5:27-30) Smoltaem biaen, Jisas i stap long Galili, nao bakegen “ol lida blong ol laen blong Isrel oli stat toktok agens long hem, from we hem i talem se, ‘Mi nao, kakae ya we i aot long heven, i kamdaon long wol.’ ” Sam disaepol blong Jisas tu oli harem nogud long tok ya, nao olgeta tu oli tok smosmol agensem Jisas.—Jon 6:41, 60, 61.
10, 11. ?Ol Kristin we oli toktok lanwis blong Gris oli komplen from wanem? ?Fasin blong ol aposol blong stretem problem ya i save tijim ol Kristin elda long wanem samting?
10 Long lafet blong Pentekos long yia 33 K.T., i gat wan narafala samting we i pulum ol Kristin blong tok smosmol, be long taem ya gudfala frut i kamaot from. Plante niufala Kristin blong narafala kantri oli kam stap long Judia mo oli glad se ol Kristin brata sista blong olgeta long ples ya i tekem olgeta oli kam stap long haos blong olgeta. Be i gat sam problem i kamaot long saed blong fasin blong seremaot kakae. Baebol i talem se: “Nao i gat wan rao i kamaot. Long wan saed i gat ol laen blong Isrel we oli stap yusum lanwis blong olgeta, mo long narasaed i gat ol laen blong Isrel we oli stap yusum lanwis blong ol man Gris. Nao olgeta ya we oli stap yusum lanwis blong ol man Gris oli stap talem se evri dei, taem we ol man oli seraot ol mane mo kakae, oli no lukaot gud long ol wido long saed blong olgeta.”—Ol Wok 6:1.
11 Ol Kristin ya we oli stap tok smosmol oli no olsem ol man Isrel long draeples. Olgeta ya we oli yusum lanwis blong Gris oli no komplen from we oli stap tingbaot olgeta nomo mo from we oli no glad long samting we oli gat long laef. Nogat. Oli toktok blong mekem ol narafala oli save se sam wido woman oli no stap kasem samting we oli nidim. Ol Kristin ya we oli komplen oli no mekem olsem blong raorao, mo oli no stap tok agensem Jeova tu. Oli talem ol toktok blong olgeta stret long ol aposol, nao ol aposol ya oli luk se komplen ya i stret nomo, ale oli wokem rod kwiktaem blong stretem bisnes ya. !Hemia i rili wan nambawan eksampol we ol aposol oli soemaot long ol Kristin elda tede! Yes ol man blong lukaot long ol sipsip blong God tede oli mas lukaot gud se oli no ‘blokem sora blong olgeta blong oli no harem puaman we i stap krae long olgeta blong oli givhan long hem.’—Ol Proveb 21:13; Ol Wok 6:2-6.
Fasin Blong Tok Smosmol i Save Spolem Yumi
12, 13. (a) ?Wanem pijatok we i soemaot se fasin blong tok smosmol agensem narafala i save spolem yumi? (b) ?Wanem sam samting we maet oli pulum yumi blong tok smosmol agensem narafala?
12 Bighaf blong ol stori long Baebol we yumi tokbaot finis, oli soemaot se fasin blong tok smosmol agensem narafala i bin mekem bigfala trabol i kamaot long medel blong ol man blong God bifo. Taswe i gud yumi tingbaot olsem wanem fasin ya i save spolem yumi tede tu. Wan pijatok i save halpem yumi blong kasem save long saed ya. I gat plante defren kaen aean we rosta i save kakae olgeta. Sipos man i luk smol rosta i kamaot long wan aean be hem i no mekem wan samting blong blokem rosta ya, bambae rosta i kakae aean ya gogo i rotin evriwan. Plante trak oli gat gudfala enjin be man i no moa save ron long olgeta from we rosta i kakae olgeta gogo i spolem olgeta fulwan. ?Olsem wanem pijatok ya i laenap wetem fasin blong tok smosmol agensem narafala?
13 I gat sam aean we oli save rosta isi nomo. Long sem fasin, i isi nomo blong yumi ol sinman yumi komplen. Yumi mas luksave kwiktaem eni saen we i soemaot se yumi stat karem fasin ya blong komplen. Wota we i stap long win no win blong solwota i mekem aean i rosta kwiktaem nomo. Long sem fasin, ol trabol we yumi kasem long laef blong yumi i save pusum yumi moa blong tok smosmol. Taem man i gat tumas wok no tumas wari, samting ya i save mekem se hem i tingbaot ol smosmol problem olsem ol bigbigfala trabol. Laef long ol las dei ya bambae i kam moa strong yet, taswe bambae i gat plante moa samting i kamaot yet we oli save mekem se yumi harem nogud nao bambae i isi nomo blong yumi komplen from. (2 Timoti 3:1-5) Ale, maet wan man blong Jeova i stat tok smosmol agens long narafala. Maet hem i mekem olsem from wan smol samting nomo, olsem maet hem i no glad long wan slak fasin blong narafala ya, no long wok we narafala i mekem, no maet from we narafala i kasem wan wok insaed long kongregesen.
14, 15. ?Sipos yumi luk se yumi stat blong tekem fasin ya blong komplen, from wanem yumi mas kwik blong stretem?
14 I gat plante samting we oli save mekem yumi harem nogud. Be sipos yumi letem ol samting ya oli pulum yumi blong komplen oltaem, bambae yumi kam olsem we yumi no moa glad long samting we yumi gat mo maet yumi karem fasin ya blong tok smosmol oltaem agensem narafala. Yes, fasin blong tok smosmol agensem narafala i olsem rosta long saed blong spirit we i save spolem yumi fulwan. Taem ol man Isrel oli komplen long saed blong laef blong olgeta long draeples, oli tok agensem Jeova hem wan se hadtaem blong olgeta i fol blong hem. (Eksodas 16:8) !I nogud tumas sipos yumi stat toktok olsem olgeta ya!
15 Man i save blokem rosta sipos hem i pentem aean wetem wan meresin. Sipos no, maet hem i luk wan smol rosta i kamaot, ale hem i kwik blong putum meresin long smol ples ya. Long sem fasin, sipos yumi luk se yumi stat blong komplen, i gud yumi prea mo yumi traehad blong stretem fasin ya kwiktaem. ?Olsem wanem yumi save stretem?
Tingbaot Ol Samting Olsem We Jeova i Stap Tingbaot Olgeta
16. ?Olsem wanem blong stretem fasin blong komplen?
16 Taem yumi komplen, tingting blong yumi i stap nomo long yumi wan mo ol trabol blong yumi, nao yumi no moa tingbaot ol blesing we yumi gat olsem ol Witnes blong Jeova. Blong stretem fasin ya blong komplen, yumi mas putum tingting blong yumi i stap long ol blesing. Wan long ol blesing ya, hemia nambawan janis we yumi wanwan i gat blong holem nem blong Jeova. (Aesea 43:10) Narafala blesing se yumi save kam fren blong Jeova, mo yumi save toktok wetem hem enitaem from we hem i Man blong “harem prea.” (Ol Sam 65:2, NW; Jemes 4:8) Mo tu, from we yumi kasem save se Jeova i gat wan bisnes blong stretem long saed blong hae rul blong hem, yumi save se laef blong yumi i impoten, from we yumi mas holemstrong long God mo soemaot se rul blong hem i beswan. (Ol Proveb 27:11) Antap long samting ya, yumi gat janis blong joen oltaem long wok blong talemaot gud nius blong Kingdom. (Matiu 24:14) Mo tu, bilif long ransom sakrefaes blong Jisas Kraes i mekem se God i save fogivim yumi nao tingting blong yumi i no moa stikim yumi from ol mastik we yumi mekem. (Jon 3:16) Hemia nao ol blesing we yumi gat, nomata wanem trabol i kasem yumi.
17. ?From wanem i gud blong tingbaot ol samting olsem we Jeova i stap tingbaot olgeta, nating sipos i gat wan samting we i stret nomo blong komplen from?
17 I gud yumi traem tingbaot ol samting olsem we Jeova i stap tingbaot olgeta, i bitim we yumi holemtaet prapa tingting blong yumi nomo. Deved i singsing se: “[Jeova]. Plis yu tijim mi long ol fasin blong yu, yu mekem mi mi savegud ol rod blong yu.” (Ol Sam 25:4) Sipos i gat wan samting we i stret blong komplen from, ale i sua se Jeova tu i luk samting ya. Hem i naf blong stretem samting ya naoia nomo. ?Sipos Jeova i luk, from wanem samtaem hem i letem wan trabol i stap longtaem? Maet hem i mekem olsem blong halpem yumi blong wokem ol gudfala Kristin fasin, olsem longfala tingting, fasin blong stanap strong longtaem, bilif, mo fasin blong bos long tingting.—Jemes 1:2-4.
18, 19. ?Wanem i save hapen taem yumi no komplen, nating se sam samting i hapen we yumi no glad long hem?
18 Taem yumi harem nogud long sam samting be yumi blokem fasin ya blong komplen, samting ya bambae i halpem yumi blong kamgud moa long ol Kristin fasin, mo bambae i givim gudfala witnes tu long ol man we ol stap wajem fasin blong yumi. Long yia 2003, wan grup blong ol Witnes blong Jeova i tekem bas long Jemani blong go long wan asembli long Hangari. Man blong draevem bas ya i no wan Witnes, mo hem i no glad tumas taem hem i harem se hem i mas spenem 10 dei wetem ol Witnes. Be afta we trip ya i finis, tingting blong hem i jenis. ?From wanem?
19 Oli kasem sam problem long trip ya, be ol Witnes oli no komplen. !Man blong draevem bas ya i talem se hemia beswan grup we hem i bin tekem samtaem long bas blong hem! Hem i talem tu se nekis taem we ol Witnes oli kam prij long haos blong hem, bambae hem i singaot olgeta oli kam insaed mo bambae hem i lesin long olgeta. !Ol brata mo sista ya oli givim wan gudfala witnes from we oli ‘mekem evri samting long fasin we oli no toktok smol biaen’!
Fasin Fogif i Mekem Se Yumi Joengud
20. ?From wanem yumi mas fofogivim yumi?
20 ?Olsem wanem sipos yumi no glad long wan Kristin brata no sista blong yumi? Sipos hem i wan bigfala trabol, yumi mas folem rul we Jisas i talem long Matiu 18:15-17. Be maet yumi no nidim blong folem rul ya from we plante taem ol problem oli smosmol nomo. I gud yu tingbaot problem ya olsem wan janis blong soemaot fasin fogif. Pol i raetem se: “Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala. Yufala i mas fofogivim yufala, long sem fasin ya we Masta blong yumi i fogivim yumi. Mo wetem ol fasin ya, yufala i mas lavem ol man, from we fasin ya blong lavem man, hem i save joenemgud olgeta samting, blong oli kam wan.” (Kolosi 3:13, 14) ?Yumi save faenem rod blong fogivim Kristin brata ya no sista ya? ?Yu no ting se maet Jeova i faenem fulap poen long yumi we hem tu i save komplen from? Be hem i gohed oltaem nomo blong soem sore long yumi mo blong fogivim yumi.
21. ?Olsem wanem long man we i harem narafala i tok kros from evri samting?
21 Nomata wanem trabol yumi gat no wanem samting we i mekem yumi harem nogud, be fasin blong tok smosmol bambae i no stretem trabol ya. Hibru tok ya we i minim tok smosmol agensem narafala i save minim tu se man i tok kros. Ating yumi no harem gud taem yumi kampani wetem wan man we i stap tok kros from evri samting, maet taem yumi luk hem i stap kam, yumi ronwe finis. Ale sipos yumi nao yumi gat fasin ya blong tok kros from evri samting, ating ol narafala bambae oli no harem gud blong kampani wetem yumi. !Maet olgeta tu oli wantem ronwe long yumi! Yes, maet fasin blong tok kros i pulum tingting blong narafala i kam long problem blong yu, be bambae i no pulum hem blong laekem yu.
22. ?Wan gel i talem wanem long saed blong ol Witnes blong Jeova?
22 Taem yumi gat fasin blong fofogivim yumi, hemia i mekem se yumi joengud moa. Fasin joengud ya i wan fasin we ol man blong Jeova oli tinghae long hem. (Ol Sam 133:1-3) Long wan kantri blong Yurop, wan gel Katolik we i gat 17 yia, i raet long branj ofis blong ol Witnes blong Jeova blong talem se hem i laekem skul blong olgeta. Hem i se: “Plante skul oli seseraot from we samfala oli no laekem ol narafala, no from oli griri, oli no gat longfala tingting, oli tingbaot olgeta nomo, mo from we oli no gat wan tingting. Mi luk se skul blong yufala nomo we ol memba blong hem oli no seseraot from ol samting ya.”
23. ?Bambae yumi tokbaot wanem long nekis stadi?
23 Yumi mas gat tangkiu from ol blesing long saed blong spirit we yumi gat taem yumi stap wosipim trufala God. Samting ya i save halpem yumi blong joengud mo i save blokem yumi blong yumi no tok smosmol agensem ol narafala from samting we i bisnes blong olgeta nomo. Nekis stadi bambae i soem olsem wanem ol fasin we God i tijim yumi blong wokem oli save blokem yumi, blong yumi no foldaon long wan fasin blong komplen we i nogud olgeta—hemia fasin blong tok smosmol agensem ogenaesesen blong Jeova.
[Futnot]
^ K.T. i minim Kristin Taem.
?Yu Yu Tingbaot?
• ?Wanem ya fasin blong tok smosmol agensem narafala?
• ?Wanem pijatok we i soemaot samting we i save kamaot from fasin blong tok smosmol agensem narafala?
• ?Wanem i save halpem yumi blong stretem fasin ya blong wantem komplen oltaem?
• ?Olsem wanem fasin fogif i save halpem yumi blong yumi no tok smosmol agensem narafala?
[Kwestin]