Hem i Olfala Be Hem i No Harem Se i Stap Hem Wan

TAEM ol man oli kam olfala, plante taem oli kam handikap mo oli no moa save joen wetem ol narafala, oli stap olgeta wan nomo. Be Fernand Rivarol, we i ded long Geneva, Swiselan taem hem i gat 95 yia, i no bin kam olsem. Fernand i stap hem wan from we woman blong hem i ded finis, mo gel blong hem we i mared i mas lukaot long prapa haos blong hem. Be nating se olfala ya i no save aot long haos blong hem, hem i no harem nogud blong stap hem wan. Plante taem hem i sidaon long tebol, i karem telefon, mo i ring i go long ol man, blong storian wetem olgeta long saed blong Baebol.

Long laef blong Fernand, plante samting i bin hapen. I gat wan taem we hem i stap kalabus. ?From wanem? Stret long taem we Fernand mo waef blong hem tufala i kam Witnes blong Jeova long 1939, Wol Wo Tu i stat long Yurop. Fernand i holem strong long desisen blong hem blong no kilim narafala man. From samting ya, hem i lusum wok blong hem mo hem i mas go kalabus plante taem. Hem i stap kalabus faef yia haf evriwan. Long taem ya hem i mas seraot long woman blong hem mo smol gel blong hem.

Taem Fernand i stap tingtingbak, hem i talem se: “Long lukluk blong plante man, i olsem we mi lego wan gudfala wok mo mi lego famle blong mi blong oli lukaot long olgeta nomo. Ol man oli ting rabis long mi mo oli mekem long mi olsem we mi wan man nogud. Be long ol had yia ya, samting we mi tingbaot moa bitim ol narafala samting, hemia olsem wanem Jeova i sapotem mifala mo i givhan long mifala. Plante yia i pas finis afta long taem ya, be tras blong mi long Jeova i stap strong yet olsem i bin stap long taem ya.”

Bilif blong Fernand i pulum hem blong serem hop blong hem we i stanap long Baebol wetem olgeta we hem i toktok long olgeta long telefon. Sipos hem i storian gud wetem wan man, hem i sanem sam buk long saed blong Baebol long man ya. Afta, hem i ring long man ya bakegen blong luk sipos hem i bin laekem ol buk ya. Fernand i kasem bigfala glad taem sam man oli sanem leta i kambak long hem blong talem tangkiu long hem.

Maet wan man olsem Fernand i storian wetem yu long ples blong yu. I gud sipos yu lesin long tok blong hem blong faenemaot bilif blong hem. Oltaem ol Witnes blong Jeova oli glad blong storian wetem yu long saed blong bilif blong olgeta.